Digital Lamang: Mga Young Adult
Personal nga Pagdungog sa Tingog sa Espiritu
Ang Langitnong Amahan ug si Jesukristo mamulong ngari kanato sa lainlaing mga paagi––kini anaa kanato sa pagkat-on sa pag-ila sa tingog sa Espiritu.
Litrato sa maayong kabubut-on sa tagsulat
Ang Langitnong Amahan ug si Jesukristo gusto og lawom, personal nga relasyon uban sa matag usa kanato, ug Sila nakaila kaayo mahitungod kanato––bisan ang atong mga personalidad––nga sila nakahibalo gyod kon unsaon sa pag-impluwensiya kanato. Ako nagtuo nga Sila kasagaran nagpadala sa Espiritu sa pagpamulong ngari kanato sa mga paagi nga personal natong masabtan og labing maayo (tan-awa diha sa 2 Nephi 31:3).
Pinaagi sa pagtuon og Sikolohiya [Psychology], daghan ako og nakat-onan mahitungod sa mga personalidad. Ang tanan nagdawat ug nagproseso sa impormasyon sa lainlaing paagi. Ug tingali kini may kalabotan ngadto sa paagi sa atong pagbati usab sa Espiritu.
Adunay lainlaing mga paagi sa pagbati sa Espiritu Santo ug sa pagdawat sa mga tubag. Sama pananglitan, nag-ingon si Enos, “Tan-awa, ang tingog sa Ginoo midangat sa akong hunahuna” (Enos 1:10). Nagtudlo si Pablo nga ang Espiritu moabot isip mga pagbati sa “gugma, kalipay, kalinaw, pailob, pagkamapuangoron” (Mga Taga-Galacia 5:22; tan-awa usab diha sa bersikulo 23). Ug nahibalo si Joseph Smith nga siya nagdawat og pagpadayag tungod kay ang usa ka piho nga hunahuna “misulod sa [iyang] hunahuna, ug mitandog kini diha sa [iyang] mga pagbati sa labing makusog” (Dokrina ug mga Pakigsaad 128:1).
Naghunahuna sa tambag sa mga propeta sa pagtinguha sa Espiritu, kanunay akong naghunahuna kon sa unsang paagi ako labing maayo nga makaila sa Iyang tingog diha sa akong kinabuhi ug kon Siya mamulong ngari kanako sa usa ka paagi nga ilabi ka talagsaon ngari kanako.
Pagkat-on sa Pag-ila sa Espiritu
Nagtubo ako nga nagtuo nga ang Espiritu namulong lamang sa madungog nga tingog, nga nakapahunahuna kanako nga pipila ra gayod ka tawo ang may pribilehiyong makadungog niana nga tingog. Busa sa dihang nahimamat ko ang mga misyonaryo ug midawat sa ilang pagdapit sa pag-ampo ngadto sa Langitnong Amahan alang sa usa ka panghimatuod nga ang ebanghelyo tinuod, ako nagpaabot nga makadungog sa tingog. Ug ako nasagmuyo nga wala ako makadungog. Bisan tuod gibati nako nga ang ilang mensahe tinuod, ako nagpanuko nga magpabunyag tungod kay wala nako madungog ang tingog sa Espiritu.
Samtang ang akong mga sakop sa pamilya nabunyagan ug nagpamatuod, akong gibati nga ako wala magbuhat og usa ka butang nga matarong, sanglit ang Langitnong Amahan wala “mamulong” ngari kanako. Sa dihang ang akong mama ug magulang nga lalaki miadto sa templo, ako dihay lig-ong pagbati nga ang templo tinuod nga balay sa Ginoo ug nga ako kinahanglang mangandam sa pag-adto didto usa ka adlaw niana. Apan sa gihapon ako wala makaila nga ang akong mga pagbati mga pag-aghat diay gikan sa Espiritu.
Usa ka adlaw niana nagbasa ako gikan sa Basahon ni Mormon uban sa mga misyonaryo, ug ako dihay lig-ong pagbati nga unsay among gibasa tinuod. Misulti ako sa mga elder kon unsay akong gibati, ug mitabang sila kanako sa pagsabot nga ang saksi nga akong gibati mao ang Espiritu Santo nga namulong ngari kanako. Diha niana nga higayon ako nakaamgo nga ako kanunay nga mibati sa Espiritu Santo sa daghan kaayong mga paagi, apan wala ako maghunahuna nga Siya mamulong kanatong tanan sa lahi kaayo nga paagi. Akong gidawat ang pagdapit nga magpabunyag nianang adlawa.
Ang Presensya sa Espiritu diha sa Akong Kinabuhi
Daghan kanato mahimong makigbisog sa pagbati sa Espiritu o mahibalo kon Siya namulong ba ngari kanato. Apan kon kita makahibalo mahitungod sa lainlaing mga paagi nga Siya mamulong ngari kanato ug mohangyo sa Langitnong Amahan alang sa panabang, makahimo kita sa pag-ila sa mga pag-aghat, bisan kon kini moabot sa lahi nga paagi kay sa atong gipaabot.
Akong namatikdan nga alang kanako, ang mga pag-aghat kanunay nga moabot pinaagi sa akong mga pagbati. Bisan sa wala pa ako mipasakop sa Simbahan, ako kanunay adunay usa ka gamhanang pagbati nga ang ebanghelyo tinuod. Nahinumdom ako nga nagtambong og miting sa sakramento sa unang higayon ug mibati og kalinaw, nga karon akong nailhan nga mao ang Espiritu.
Bisan tuod ako nakaamgo nga ang Espiritu namulong ngari kanako sa labing kasagaran pinaagi sa akong mga pagbati, sa gihapon ako nagkat-on pa kon unsaon pag-ila sa Iyang presensya diha sa akong kinabuhi sa matag adlaw.
Si Presidente Russell M. Nelson naghatag kanato og tambag kabahin sa pagkat-on kon unsaon sa Espiritu sa pagpamulong ngari kanato, nag-ingon: “Pag-ampo sa ngalan ni Jesukristo bahin sa inyong mga kabalaka, inyong mga kahadlok, inyong mga kahuyang—oo, sa mga tinguha gayod sa inyong kasingkasing. Ug dayon maminaw! Isulat ang mga ideya nga mosulod sa inyong hunahuna. Isulat ang inyong mga gibati ug sundi kini sa paglihok sa unsay giaghat nga angay ninyong buhaton. Kon inyong balik-balikon kini nga proseso matag adlaw, matag bulan, matag tuig, kamo “molambo ngadto sa baroganan sa pagpadayag’ [Mga Pagtulun-an sa mga Presidente sa Simbahan: Joseph Smith (2007), 154].”1
Samtang kita maningkamot sa pag-ila sa Espiritu, kita makahinumdom nga Siya nakaila kanato ug namulong ngari kanato sa tinagsa. Kon kita nagpuyo nga takos sa Iyang pakig-uban ug naggamit og hugot nga pagtuo diha ni Jesukristo, kita makahimo sa pag-ila sa Iyang tingog ug sa pagtugot Kaniya sa paggiya kanato.