Digital Lamang: Mga Young Adult

Pagtukod diha sa Lig-on nga Sukaranan sa Manunubos: Pagtuon og Maayo sa Yanong mga Kamatuoran

Ni Jamie Kathryn LeSueur

Mga Magasin sa Simbahan

Dili kinahanglan nga kita makahibalo sa matag detalye mahitungod sa ebanghelyo sa pagpadayon sa atong mga pagpamatuod. Apan nagkinahanglan kita og lawom nga pagsabot sa mga kamatuoran sa ebanghelyo.

babaye naglingkod sa iyang katre ug nagbasa og magasin

Ang podcaster, ang influencer, ang tigmantala, ang politiko, ang higala, ang silingan, ang estranghero.

Ang internet naghatag sa tanan og gahom sa pagsulti og opinyon––ug kini dili kanunayng mosusi niini nga mga sinulat alang sa kamatuoran. Ang pipila sa mga tawo makigbahin sa sulod [content] nga ingon og nahisubay sa ebanghelyo ni Jesukristo, apan ang ilang mga ideya mahimong mahisalaag gikan sa putli nga doktrina nga gitudlo diha sa mga kasulatan ug sa mga propeta sa tanan nga mga panahon. Sama sa gitudlo ni Presidente Russell M. Nelson sa bag-ohay pa lamang, “Ang kalibotanon nga mga impluwensiya ug mga pag-aghat miasdang ug daghan kaayo. Apan daghan kaayo sa mga impluwensiya ang malinglahon, matintalon, ug makapalayo kanato sa dalan sa pakigsaad.”¹

Nahibalo si Satanas nga kita dili dayon motuo sa mga butang nga tataw nga mga bakak, apan tingali atong buhian ang putli nga kamatuoran aron sa pagdawat sa dili kompleto nga mga kalainlainan sa kamatuoran nga atong mabasa sa online. Kining dili kompleto nga mga kalainlainan, o dili tanan mga kamatuoran, mao ang “linino nga [mga] pisi”² nga naninguha si Satanas sa pagbugkos kanato sa pagpapahawa kanato sa dalan sa pakigsaad (2 Nephi 26:22).

Busa unsaon nato pag-ila sa linino nga mga pisi sa mga bakak gikan sa putli ng kamatuoran? Labing maayo kaayo ang pagkasulti ni Presidente Nelson: “Amumaha ang inyong kaugalingon gamit ang mga pulong sa karaan ug sa modernong panahon nga mga propeta, … pagkat-on sa tanan nga inyong mahimo mahitungod sa ebanghelyo, [ug] ihumol ang inyong kaugalingon diha sa buhong nga kapanguhaan sa pagpadayag nga dali ra kaayo natong ma-access.”³

Unsay Akong Mahimong Tun-an?

Ang usa ka lawom nga pagsabot sa ebanghelyo motabang kanato sa pag-ila tali sa putli ug dili tanan tinuod nga kamatuoran. Kita labing malamposon kon atong itutok ang atong enerhiya sa pagtukod “diha sa lig-on nga sukaranan sa atong Manunubos” (Helaman 5:12).

Sa dihang sakop pa siya sa Kapitoan, si Elder Lawrence E. Corbridge miingon: “Adunay walay kinutobang mga pag-angkon ug mga opinyon nga giparang batok sa kamatuoran. … Makagahin ka sa tibuok kinabuhi sa walay paglaom nga pagsunod sa tubag sa matag pangangkon … ug dili gayod moabot sa kahibalo sa labing importante nga mga kamatuoran.”⁴

Busa imbis igahin ang imong kusog sa pagsunod sa indibidwal nga mga tubag sa matag higayon nga ikaw adunay usa ka pangutana, paggahin og panahon matag adlaw sa pagpalawom sa imong pagsabot niadtong sukaranang mga kamatuoran nga nag-angkla sa imong hugot nga pagtuo ngadto sa Sukaranang Bato, si Jesukristo.

Ang sukaranang doktrina sa ebanghelyo ni Jesukristo naglakip sa hugot nga pagtuo, paghinulsol, mga pakigsaad, mga propeta; pagpadayag, ang Pag-ula ni Jesukristo, ang plano sa kaluwasan, ug ang atong balaang pagkatawo isip mga anak sa Dios.⁵ Kini nga mga kamatuoran nagtabang kanato sa paglakaw subay sa dalan sa pakigsaad; kini mga importante alang sa atong kahimayaan.

Ang kamatuoran nga walay labot sa kaluwasan [Peripheral truths], sa laing bahin, dili importante alang sa atong kaluwasan.

Sa Kanunay Adunay Daghan pa nga Pagakat-onan

Usahay kita naghunahuna nga kita hanas na sa atong pagsabot sa sukaranang mga kamatuoran sa ebanghelyo. Tingali ato na kining nadungog gatosan ka mga higayon.

Apan ang paagi nga atong nasabtan karon ang mga baroganan sa ebanghelyo mahimong dili ingon ka kompleto sama sa paagi sa pagsabot sa Dios niini. Hangtod kita mahimong sama sa Dios, kanunayng adunay usa ka butang nga atong makat-onan. “Siya nga nakadawat sa kahayag, ug nagpadayon diha sa Dios, makadawat og labaw pa nga kahayag” (Doktrina ug mga Pakigsaad 50:24; empasis gidugang). Kana naglakip sa bag-ong kahibalo mahitungod sa sukaranang mga baroganan sa ebanghelyo.

Si Presidente Nelson usa ka halangdong ehemplo sa nagpadayon nga pagpalawom sa iyang pagsabot. Human nahimong Apostol sulod sa 36 ka tuig, siya miingon, “Nagiyahan ko bag-ohay lang ngadto sa usa ka bag-ong panabot.”⁶

Kon ang pagkamausisahon, kamakugihon, ug ang Espiritu Santo makagiya sa propeta sa Dios ngadto sa usa ka bag-ong kahibalo mahitungod sa sukaranang doktrina sa ebanghelyo, niana ang pagsiksik “pinaagi sa pagtuon ug usab sa hugot nga pagtuo” (Doktrina ug mga Pakigsaad 88:118) makahimo og sama alang kanato.

Pagtinguha og usa ka Personal nga Pagsaksi

Samtang kita nagtinguha og kamatuoran taliwala sa daghang mga impluwensiya nga nagdagsang kanato sa online, ang atong labing gamhanang himan mao ang atong kaugalingong personal nga pagsaksi gikan sa Espiritu Santo.

Si Presidente Joseph Fielding Smith (1876–1972) mitudlo, “Pinaagi sa Espiritu Santo ang kamatuoran modulot sa kinahiladman ug sa kaugatan aron kini dili gayod hikalimtan.”⁷ Atong makat-onan kon sama sa unsa ang bation sa Espiritu Santo sa paghimatuod sa putli nga kamatuoran ngadto sa atong mga kasingkasing.

Kita nagtuo nga pinaagi sa Espiritu Santo, kita makahimo nga “masayod sa kamatuoran sa tanan nga mga butang” (Moroni 10:5). Ug samtang kana sa walay pagduhaduha tinuod, importante kini sa paghinumdom nga usa sa mga tahas sa Espiritu Santo mao ang pagtabang kanato sa pagdawat og usa ka pagpamatuod sa importante nga doktrina––“ni Jesukristo ug sa Iyang buhat ug sa buhat sa Iyang mga sulugoon dinhi sa yuta” (Bible Dictionary, “Holy Ghost”).

Ang pagtuon sa mga kamatuoran nga walay labot sa kaluwasan dili ngil-ad nga butang. Ug usahay kini makalig-on sa atong mga pagpamatuod kon makakaplag kita og mga tubag ngadto sa atong “dili importante” nga mga pangutana. Apan ang mga pagpamatuod dili mahimong itukod diha sa mga kamatuoran nga walay labot sa kaluwasan. Si Elder Joseph B. Wirthlin (1917–2008) sa Korum sa Napulog Duha ka Apostoles nag-ingon, “Kita kinahanglan gayod nga makasabot ug magpuyo pinaagi sa yano, sukaranan nga mga kamatuoran ug dili malibog niini. Ang atong pundasyon kinahanglan nga solido ug nakagamot og lawom.”⁸

Ang pagtuon niini nga paagi makatabang kanato nga dili malibog taliwala sa daghang mga tingog nga kita giliyokan. Kita “[mag-anam] og kalig-on diha sa kasayoran sa kamatuoran” ug mahimong mga tawo “nga mabuot og salabotan” (Alma 17:2). Ug sama sa pangamuyo ni Presidente Nelson, atong himoon ang atong bahin sa pagpalambo og “usa ka lig-on nga espiritwal nga pundasyon nga natukod diha sa lig-on nga sukaranan sa atong Manunubos, si Jesukristo.”⁹

Kalihokan sa Lawom nga Pagtuon sa Doktrina

Gamit og mga kapanguhaan sama sa Giya ngadto sa mga Kasulatan, bag-ohay nga mga pakigpulong sa komperensiya, Isangyaw ang Akong Ebanghelyo, ug Doctrines of the Gospel Student Manual [Manwal sa Estudyante sa mga Doktrina sa Ebanghelyo] sa pagsiksik alang sa mga tubag ngadto sa mosunod nga mga pangutana mahitungod sa paghinulsol. Paninguha sa paghunahuna og lainlaing mga panglantaw ug ipanghimatuod ang imong pagsabot sa doktrina sa Ginoo uban sa kasulatan.

Unsa ang katuyoan sa paghinulsol?
Nganong gusto sa Langitnong Amahan kanako nga maghinulsol?
Kon ako maghinulsol, unsaon nako pagdawat og pagkaayo, pagkalimpyo, ug ang kadasig sa pag-usab?
Sa unsang paagi ang hugot nga pagtuo ug paghinulsol may kalabotan?
Unsaon nga ang paghinumdom sa maulaong pag-ula sa Manluluwas makadasig kanako sa paghinulsol?

Kon walay usa niini nga mga pangutana nakasamok sa imong interes, pangutan-a ang imong kaugalingon, ”Unsa ang usa ka bahin sa paghinulsol ako gustong mas makasabot?” Kini nga kalihokan mahimong himoon kauban sa ubang mga baroganan sa ebanghelyo; ang paghinulsol usa lamang ka ehemplo.