Aoao e Talitonu e Mafai ona Faamaloloina A’u e le Faaola
Sa ou iloa e mafai e Iesu Keriso ona faamaloloina tagata uma, ae o le utuvai atu i Lona mana faamalolo i taimi ou te manaomia ai sa sili atu ona faigata nai lo le mea sa ou faamoemoeina.
I le taimi o se vaega faapitoa o la’u misiona, sa ou tauivi ai ma se faafitauli sa ou talitonu e leai se vaifofo. I lo’u fiu ai ma le lē fiafia, sa o’u ta’u atu ai i se uo mamae e uiga i lea tulaga. Ina ua uma ona tuu mai ia te a’u e masua atu, sa tali mai ma le faigofie lava lenei uo—o le sa latalata i taimi uma i le Agaga—“Pe na e taumafai e tatalo e uiga i ai?”
O le tali sa pei e ioe. Ioe, sa ou taumafai muamua e tatalo e uiga i ai. Ae e le’i faia ma le loto atoa i ai. Ou te lei tatalo ma le faatuatua e mafai e le Faaola ona faamaloloina manu’a uma. O se upumoni lena sa ou talitonu i ai mo isi ae e le mo a’u lava ia.
I le avea ai ma se faifeautalai, sa masani ona ou aoaoina tagata e mafai ona latou maua le faamalologa ia Keriso. Ae po o le a lava lo’u taumafai malosi e faatalitonu a’u lava ia o Lona mana faamalolo sa faatatau foi ia te a’u, ou te lei talitonu atoatoa lava i ai.
I se tasi aso sa lofituina a’u i tauiviga sa ou feagai ai. O mea sa masani ona ou maua ai le mafanafana e lei foliga mai o loo aoga. Sa ou manaomia se mea e sili atu—sa ou manaomia se Faaola o le e mafai ona faamaloloina manu’a uma. Sa sili atu ona ou tatalo faatauanau nai lo se isi lava taimi muamua, ma mo le taimi muamua, sa ou ole atu i le Atua e fesoasoani mai ia ou talitonu i le mana faamalolo lea e oo mai e ala i le Togiola a Iesu Keriso.
A o o’u suesue i le Togiola a le Faaola ma faia mea uma i lo’u malosi e talitonu ai, sa amata ona suia lo’u mafaufau. Sa “faatumulia a’u i le olioli, filemu, ma le faamafanafana,”1 ma sa o’u aoaoina mo a’u lava ia e faapea “o mea uma e le talafeagai e uiga i le olaga e mafai ona faasa’oina e ala i le Togiola a Iesu Keriso.”2
Pe na oo mai lo’u faamalologa e ala i se vavega faaletino e pei o vavega tatou te faalogo i ai i le Feagaiga Fou? Pe na i ai ni vavega e le mafai ona malamalama i ai e pei o le vai na liua i le uaina po o se tagata na faatuina mai le oti?
E leai.
Ae o le mana faamalolo sa ou molimauina i lo’u olaga na oo mai e ala i le mafanafana ma le filemu i aso uma na o’u maua. Sa oo mai e ala i le talitonuga le mafaatusalia o le a lelei mea uma sa ou lagonaina i le taele o lo’u agaga. O na mea na aumaia ia te a’u le malosi lea na ou manaomia i le toe tasi le aso, tasi le vaiaso, ma le isi masina e tasi, ma le ’ata’ata i o’u foliga atoa.
O le mea moni lava, ou te lei iloaina le mana faamalolo o le Faaola o galue i lo’u olaga seia oo ina mavae se taimi ma sa faigofie atu ona onosaia o’u tofotofoga. Ina ua ou tomanatu i o’u lagona i ni masina na muamua atu, ae ou te lei sailia le fesoasoani a le Faaola, sa ou iloaina sa oo ia te a’u se aafiaga o se vavega. Sa manino lo’u iloa sa leai se auala na mafai ai ona ou faatoilaloina faigata sa ou oo i ai e aunoa ma se Faaola alofa o faaloaloa mai Ona aao o le alofa mutimutivale ma le faamalologa ia te a’u.
Ou te manatu o le mea moni o le mana faamalolo o Keriso e masani ona faaalia e ala i vavega laiti e tutupu i aso uma, ma sa ou misia lena upumoni i le taimi atoa. Ioe, tatou te faalogo e uiga i vavega tetele, faaletino i le Tusi Paia ma le Tusi a Mamona, ae ou te fia mafaufau o nisi o vavega aupito sili ona taua na tutupu a o i ai Keriso i lenei lalolagi atonu sa faaalia e ala i faatinoga faigofie, e lei tusia o le agalelei lea ou te mautinoa sa Ia faia i aso taitasi.
Pe na ala mai i se talanoaga sa Ia faia ma se tasi na ui atu i le auala lea na tuua ai i latou ma se lagona o le faamoemoe pe na o se ’ata’ata faigofie na Ia ofoina atu i se tasi sa tuliesea mai le lalolagi, ou te mautinoa, e pei o a’u, sa masani ona Ia faamaloloina nei tagata i auala uma laiti ma le maoae.
E mafai e Keriso ona faamalolo manu’a uma. Sa Ia ofoina mai Lona aao faamalolo ia te a’u i auala na toetoe lava a ou le ano i ai ma le mafai ai ona tuuina atu ia te Ia se faamālo. Ma ou te talitonu e mafai ona Ia faia lea lava mea e tasi mo i tatou uma. E pei ona aoao mai Sister Amy A. Wright, Fesoasoani Muamua i le Au Peresitene Aoao o le Peraimeri: “E tofu i tatou uma ma se mea i o tatou olaga ua gauia lea e moomia ona fonofono, faaleleia, pe faamaloloina. A o tatou liliu atu i le Faaola, a o tatou faaogatasia o tatou loto ma mafaufau ma Ia, a o tatou salamo, e afio mai o Ia i le mea o tatou i ai ‘ma le faamalologa i Ona apaau’ [2 Nifae 25:13].”3
Afai e te le talitonu e mafai e Iesu Keriso ona faamalolo oe, ou te uunaia oe e tatalo mo le faatuatua ia talitonu. Tatalo ina ia pupula ou mata e vaai i vavega laiti e tutupu ona o Ia i aso taitasi. Saili o Ia. Ou te folafola atu e leai se lototiga tele po o se luitau e telē tele mo Ia e faamalolo ai—i Lana lava taimi ma i Lana lava ala. E leai se tasi e faaesea mai le alofa o le Faaola, ma e aofia ai ma oe. Afai e te faatagaina o Ia, o le a Ia fesoasoani ia te oe e saili le faamalologa mai ou manu’a i Lana ala atoatoa. Na Ia faia mo a’u.