Galuega o Talafaasolopito o Aiga: O Se Punavai o le Mana
E tele naua le mana e mafai ona tatou maua mai le aoao e uiga i o tatou tuaa.
Faamatalaga mai le Liliuina o Loto, saunia e Annie Henrie Nader
Sa nofo lo’u tinamatua i le potu mo mālō o lo’u fale i nai masina mulimuli o lona olaga. Ae o le asō, ua 18 tausaga talu ona maliu o ia, matou te faaigoa lena potu mo mālō o le “potu a Tinamatua.”
Sa i ai sa’u miti manino pe a ma se tausaga talu ai, sa ou savali i luma atu o le potu a Tinamatua ma sa i ai o ia iina. Sa sau o ia e tuu mai ia te a’u se opo lapoa, ma loimata i ona mata ma se ataata i ona foliga, sa ia fai mai ia te a’u, “Faafetai mo le alofa i ou tuaa. E le mafai ona ou ta’u atu ia te oe le tele o le uiga o lena mea ia i matou.”
Talu mai lenei miti, ua ese ai lava o’u lagona.
Aisea e Tatau Ai Ona Tatou Iloa Tala a o Tatou Tuaa?
I le faigalotu a Peresitene Russell M. Nelson i le lalolagi atoa i le autalavou matutua ia Me 2022, na ia saunoa ai:
“O filifiliga amiotonu uma e te faia iinei o le a e matua manuia ai i lenei taimi. Ae o filifiliga amiotonu i le olaga nei o le a matua manuia ai e faavavau i mea e lei mafaufauina. Afai e te filifili e osia ni feagaiga ma le Atua ma faamaoni i na feagaiga, e te maua le folafolaga o le ‘[mamalu] o le a faaopoopo i luga o [o outou ulu] e faavavau ma faavavau lava’ [Aperaamo 3:26].
“O nei upumoni e ao ona uunaia ou lagona sili o le FILLI—fefe i le le iai. Ua ia te outou le gafatia e oo ai i le malo selesitila. O le FILLI silisili lava, o le le i ai lea i le malo selesitila, ae maua se malo maualalo ifo ona o iinei i le lalolagi na e filifili ai e ola i tulafono o se malo maualalo ifo.”1
Vaai faalemafaufau i lagona e tatau ona i ai i ou tuaa le manatuaina i totonu o le maota o le Alii pe a galulue a latou fanau e fai ma sui e ofo atu ia i latou ma le lotomaualalo se folafolaga o le mamalu ma le saolotoga mai le FILLI na faamatalaina e Peresitene Nelson. E avea i tatou ma faaola i luga o le Mauga o Siona a o tatou faatinoina sauniga sui mo o tatou tuaa ua maliliu (tagai i le Opetaia 1:21; tagai foi i leMataupu Faavae ma Feagaiga 103:9).
Ou te fia fautua atu i se auala ese, e fesoasoani o tatou tuaa e laveai i tatou. Ua fesoasoani o tatou tuaa, faatasi ma le Atua, e saunia nei olaga o loo tatou ola ai i aso nei.
E te silafia osigataulaga na faia e ou tuaa na aafia ai le mea ua e i ai i le aso? Pe ua e faaaluina se taimi e faamasani ai i ou tuaa? E te iloa o a ni uiga po o ni aafiaga e te tutusa ai ma i latou? E mafai faapefea e le iloa o lenei mea ona manuia ai lou olaga?
I lo’u aafiaga, o le aoao mai e uiga i le tina o lo’u tinamatua lona tolu, o Mary Jane Cutcliff, na faaali mai ai ia te au le tele o faatosinaga a o matou tuaa i o matou olaga. O Mary Jane o se tasi o o’u uluai tuaa na papatisoina i le Ekalesia i le 1857 i Livapulu, Egelani. Sa auai o ia i le Ekalesia ina ua mavae se aafiaga loloto faaleagaga. O le aoaoina o lona faatuatua tele ua musuia ai au e faatino i le faatuatua ma faalagolago i upumoni na faaalia mai ia te au e le Agaga.
O se isi faataitaiga o tala mamana o augatuaa o Kapeteni Moronae, o le sa saeia lona ofu ma faaaoga se fasi vaega e fai ma lana Tagavai o le Saolotoga (tagai i le Alema 46:11–25). O lenei fasi ie o lona ofu o se faatusa o o latou tuaa tutusa, o Iosefa, “o lona ofu na saeia e ona uso i ni fasi ie e tele” (Alema 46:23) a o faatau atu o ia i Aikupito ma faatoilaloina se faasologa lauiloa o luitau.
Sa le gata ina iloa e Kapeteni Moronae lenei tala mamana e uiga i lona tuaa, ae sa mafai ona ia faaaogaina i lona olaga ma musuia isi ia manatua le tala a Iosefa ma maua le faatuatua ma le faamoemoe e faatoilalo ai o latou lava luitau. O le iloaina o tala a o tatou tuaa e mafai ona faia lea lava mea e tasi mo i tatou.
O Le Mana o Talafaasolopito o Aiga
Na saunoa talu ai nei Elder Rafael E. Pino o le Fitugafulu e faapea, “o le auai soo i le galuega o malumalu ma talafaasolopito o aiga … o le auala lea o le tuufaatasia ma faamauina o aiga mo le faavavau [tagai i le Mataupu Faavae ma Feagaiga 128:15].”2 E mafai e o tatou tuaa ona tuuina mai ia i tatou ni faataitaiga e mulimuli ai ma faateleina lo tatou manao ia tuufaatasia e faavavau ma o tatou aiga.
Sa ou fai atu talu mai la’u miti ma lo’u tinamatua, ua ese ai lava o’u lagona. Ma e moni lena mau. Talu mai le galueaiina i le galuega o talafaasolopito o aiga, ua i ai se suiga i le ala ou te mafaufau ai i se mea. Ua atili ai ona ou maelega i le iloaina o tagata o lo’u aiga i itu uma e lua o le veli.
Sa ta’ua e Peresitene Nelson e faapea, o le FILI tupito o le le iai i le malo selesitila. O lo’u alofa mo le Atua sa avea pea ma o’u uunaiga e toe foi atu e mau faatasi ma Ia i le malo selesitila. Ma e ala i le faamalosia o lo’u alofa mo o’u tuaa, ua faateleina ai lo’u faaosofia. Ou te iloa e alofa le Atua i ana fanau uma. E le finagalo o Ia ia misia e se tasi o i tatou ia aiga e faavavau ma le olioli o le mamalu selesitila. Ou te faafetai mo Lana fuafuaga ua mafai ai ona ou toe foi atu ia te Ia ma i lo’u aiga.
I le taimi nei, e le mafai ona ou malamalama i mea uma o lo’u alofa po o la’u galuega o talafaasolopito o aiga le uiga o ia mea i o’u tuaa (e pei ona ta’ua e lo’u tinamatua i la’u miti), ae ou te iloa o a matou sootaga e faavavau ma e i ai so matou alofa tutusa mo le tasi ma le isi. Ua manifi lava le veli ma o le a i ai se aso o le a le toe tuueseeseina ai i tatou mai e pele ia i tatou. Ua le mafai ona ou faatali e toe vaai ia i latou, i lena aso.