E Na’o Tusiga Faatekinolosi: Talavou Matutua
Upumoni e 4 e Fesoasoani ia te Oe e Faatautaia ai taimi o le Talavou Matua
Sa ou tauivi ma taimi o le talavou matua, ae sa ou aoaoina ni upumoni se fa na fesoasoani ia te a’u e uia ai lena ala.
Ia a’otauina. Auauna atu i se misiona. Ia faaipoipo. Fealuai i le lalolagi Ia i ai se matātā. Ia mautu i tulaga tautupe. Maua se pepe. Faatasi ai ma le tele naua o faaiuga taua o le olaga ma leo o loo ta’u mai ia i matou auala e “[avea ai ma tagata] matutua,” e faapefea ona matou faaitiitia la matou lisi o mea e tatau ona faamuamua?
Faatasi ai ma nei avanoa e le mafaitaulia ma le fefe masani i le lē lelei [o taunuuga] po o le misi atoa, e faigofie ona malamalama o loo tauivi le toatele o talavou matutua. Ae o le tali i le faamuamuaina o faaiuga o le olaga e tutusa lava i taimi uma: liliu atu ia Iesu Keriso. A o tatou uia le sami fesuisuia’i o le talavou matua, e mafai ona tatou faaaogaina fautuaga nei e fa e faatumau ai le faaogatotonuina o o tatou olaga ia Keriso.
Suesue i Tusitusiga Paia i Aso Taitasi
E i ai se eseesega i le va o lesuesueina ma lefaitauina—o se tasi efaia ai seeseesega tele! Ia te au, o le suesueina e ta’u mai ai le faitau ma le agaga tatalo ma se faamoemoega ma le sailiga mo le taitaiga ma le malamalama.
Sa faataulai atu e Peresitene Thomas S. Monson lana saunoaga mulimuli o se perofeta i le mana o le Tusi a Mamona. Faatasi ai ma isi faamanuiaga, sa ia folafola mai a o tatou faitauina le Tusi a Mamona, o le a tatou “i ai i se tulaga e lagona ai i le siufofoga o le Agaga, e tetee atu ai i faaosoosoga, e faatoilalo ai le masalosalo ma le fefe, ma maua ai le fesoasoaniga a le lagi i o tatou olaga.”1
O le suesueina o tusitusiga paia, e te faaali atu ai i le Atua e taua o Ia. E pei lava ona tatou fafagaina o tatou tino i taeao taitasi mo le malosi faaletino, e manaomia foi e o tatou agaga le malosi faaleagaga i aso taitasi. O le fatuina o se mausa o le suesueina o tusitusiga paia i aso taitasi o le a aumaia ai ia i tatou le tausiga faaleagaga tatou te manaomia e faatumauina ai lo tatou taula mausali ia Keriso ma tatala atu o tatou mafaufau ma loto i le Agaga.
Totogi le Sefuluai
E ui o le vaaiga sese e mafai ona faia faalelalolagi, ae o le tupe o se mea moni o le olaga. O se popolega mo le toatele o talavou matutua. Pe le matagofie ea pe ana faapea ua faamaonia faamanuiaga ia i tatou pe afai tatou te ositaulagaina sina vaega itiiti o mea ua tuuina mai ia i tatou?
Oi, faatali—ua faamaonia mai!
O Malaki i le Feagaiga Tuai ma Iesu Keriso lava ia i Amerika na folafola mai uma e faapea afai tatou te totogi a tatou sefuluai, o le a tatalaina pupuni o le lagi ma o le a liligi mai faamanuiaga (tagai i le Malaki 3:10; tagai foi i le 3 Nifae 24:8–10). E silafia e le Atua o tatou popolega tautupe ma ua silafia o le ole atu mo se vaega o mea uma tatou te maua e mafai ona lagona e peiseai e tele naua. Peitai, soo se mea lava e mafai ona tatou faia i lena saofaga e 10 pasene e le faatusatusa i faamanuiaga ua teuina e le Atua mo i tatou, ma e tatou te faamalosia lo tatou faatuatua i taimi uma tatou te faapaiaina ai a tatou sefuluai i le Alii.
Faataitai le Lotofaafetai.
O le faataitaia o le lotofaafetai i le taimi atoa o le lelei ma le leaga o se tomai e manaomia ai le taumafai ma le faataitaia. Peitai, o le lotofaafetai e i ai le gafatia e faaleleia atili ai le olaga! O le faaalia o le lotofaafetai e le na o le le amanaiaina o vaega le lelei uma o le olaga ma faafoliga o loo lelei mea uma ma manaia. Nai lo lena, o loo aofia ai le mauaina o mea ia lotofaafetai aie ui lavai mea le lelei uma.
Ua faaalia i suesuega o nisi o aafiaga lelei o le lotofaafetai e aofia ai le faaleleia atili o le soifua manuia, sootaga loloto atu, faateleina o le faamoemoe ma le fiafia, malosi atu le loto pulea, faaitiitia le atuatuvale, soifua maloloina lelei faaletino ma faalemafaufau, ma se olaga sili atu ona lelei! Na faapea mai Peresitene Nelson, o le lotofaafetai e “aumaia ia i tatou se vaaiga sili atu e uiga i le faamoemoega tonu ma le olioli o le olaga.”1
O le isi taimi e te maua ai ni nai minute, filifili e mafaufau loloto i mea e te lotofaafetai ai. Pe e ala i le tatalo po o le mafaufau loloto, o le a manuia lou olaga i le lotofaafetai ma o le a faatumauina ai lou taulai atu i le Faaola.
Aoao Atili e uiga ia Iesu Keriso
O o’u manatu mulimuli e faatatau i le mea na tupu e sili ona aoga ma suia e faavavau ua tupu: o le Togiola a Iesu Keriso.
E mafai ona ou faasino atu i se tasi o taimi i la’u misiona lea na suia ai le ala na ou vaai ai i le Togiola a le Faaola. O le taimi o se suesuega o tusitusiga paia i le taeao ina ua faafuasei ona taia au i le taua ma le mamalu o le Togiola a Keriso. Ou te le manatua le mea na ou faitauina, ae na faafuasei lava ona ou malamalama i se tulaga loloto atu, le moni o le leai o se uiga moni o mea uma i le olaga e aunoa ma Iesu Keriso ma Lana Togiola.
E mafai ona e amata i le asō e ala i le faitau ma faalogologo i tusitusiga paia ma upu a perofeta e uiga ia Keriso ma Lana taulaga togiola. Taumafai e tatalo mo se malamalama loloto atu. O le tuufaatasia o suesuega ma le tatalo e aumaia ai vavega ma o le a valaaulia ai le mana sili atu i lou olaga. Ua fautuaina soo i tatou e Peresitene Nelson ina ia manumalo i le lalolagi, lea na ia faauigaina o le “tuputupu ae i le alofa i le Atua ma Lona Alo Pele e sili atu i lo lou alofa i soo se tasi po o soo se mea.”3
O le aoao atili e uiga i lo tatou Faaola ma Lana Togiola e le iu o le a fesoasoani ia i tatou e faatoilalo ai le lalolagi, toe faatulaga ai mea tatou te faamuamuaina, ma suia ai le ala tatou te mafaufau ma faatino ai i aso uma. O le a aumaia ai tatou e latalata atili atu i le Tama Faalelagi ma Iesu Keriso, ma o le a sili atu ona tatou saunia e taulimaina luitau e tele o le olaga.