“Atong Tawag sa Pagpaambit sa Ebanghelyo sa Manluluwas,” Liahona, Hulyo 2023.
Atong Tawag sa Pagpaambit sa Ebanghelyo sa Manluluwas
Isip mga sulugoon sa Dios, gitawag kita sa pagpaambit sa paglaom nga gitanyag sa Manluluwas pinaagi sa Iyang kinabuhi, mga pagtulon-an, Pag-ula, ug gipahiuli nga ebanghelyo.
Isip batan-ong mga misyonaryo sa England, ang akong kompanyon ug ako nagtudlo sa usa ka lalaki kinsa nakasinati og makalilisang, makapahulga sa kinabuhi nga mga panghitabo atol sa Ikaduhang Gubat sa Kalibotan. Nalambigit siya sa armado nga away diha sa yuta ug dayon naluwas sa usa ka makalaglag nga pag-atake sa barko nga iyang gisakyan sa wala pa mipauli ngadto sa England. Sa dihang sa kataposan naabot siya sa England, napuno kaayo siya sa emosyon ug pasalamat nga luwas nga nakapauli nga siya miluhod, mihalok sa yuta, ug nagpasalamat.
Sa dihang gitudloan namo siya sa Pagpahiuli ug mihulagway sa Unang Panan-awon ni Joseph Smith, siya mihilak. Nag-agas ang mga luha sa iyang mata, iyang gihulagway ang makapatandog nga pagsaksi nga iyang nadawat. Gipasabot niya nga ang mensahe sa Pagpahiuli nakahatag kaniya og mga pagbati nga susama sa unsay iyang gibati sa dihang luwas siya nga mipauli ngadto sa yuta sa England. Gibati niya nga siya adunay mahangtoron nga padulngan.
“Ang gipahiuli nga ebanghelyo nagtanyag sa kahayag gayod nga gikinahanglan sa mga anak sa Dios atol sa samok nga mga panahon,” miingon si Elder Quentin L. Cook (kinaibabwan nga laray, ikalima gikan sa tuo), kinsa miserbisyo sa British nga Misyon uban ni Elder Jeffrey R. Holland (kinaibabwan nga laray, ikapito gikan sa wala).
Tuo: litrato sa maayong kabubut-on sa tagsulat
Atong Tawag isip mga Sulugoon sa Dios
Isip mga miyembro sa Ang Simbahan ni Jesukristo sa mga Santos sa Ulahing mga Adlaw, mga sulugoon kita sa Dios. Isip Iyang mga sulugoon, ang atong misyon mao ang pagpaambit ngadto sa uban—sama niadtong akong gitudloan didto sa England—sa paglaom nga gitanyag sa Manluluwas pinaagi sa Iyang kinabuhi, mga pagtulon-an, Pag-ula, ug gipahiuli nga ebanghelyo (tan-awa sa 3 Nephi 27:13–14). Dili kana sayon nga buluhaton sa usa ka kalibotan nga napuno sa pagduhaduha, kasagmuyo, ug kangitngit, apan ang gipahiuli nga ebanghelyo nagtanyag sa kahayag gayod nga gikinahanglan sa mga anak sa Dios atol sa samok nga mga panahon.
Si Presidente Russell M. Nelson mipahayag nga ang kalibotan karon mas nagkinahanglan sa ebanghelyo ni Jesukristo kay sa kaniadto: “Ang Iyang ebanghelyo mao lamang ang tubag sa dihang daghan sa kalibotan ang panguyapan sa kalisang. Kini naghatag og gibug-aton sa dinalian nga panginahanglan alang kanato sa pagsunod sa instruksiyon sa Ginoo ngadto sa Iyang mga disipulo nga ‘panglakaw … sa tibuok kalibotan, ug isangyaw kining maayong balita ngadto sa tanang mga tawo’ [Marcos 16:15, tan-awa usab sa Mateo 28:19]. Kita adunay sagrado nga responsibilidad sa pagpakigbahin sa gahom ug kalinaw ni Jesukristo ngadto sa tanan kinsa maminaw ug kinsa mopatigbabaw sa Dios diha sa ilang kinabuhi.” Si Presidente Nelson midugang, “Ang matag usa kanato adunay papel sa pagpundok sa Israel.”1
Usa ka paagi nga atong matuman kana nga tahas mao ang pagdawat og mga tawag sa pagserbisyo isip full-time nga misyonaryo. Kita nasayod, sama sa bag-ohay lang nga gihatagan og gibug-aton ni Presidente Nelson, nga ang nag-una nga responsibilidad sa misyonaryo nga buhat gisangon labi na ngadto sa batan-ong mga lalaki kinsa gitagana alang sa pagpundok sa ulahing mga adlaw. Alang kanila, ang misyonaryo nga pagserbisyo usa ka “responsibilidad sa pagkapari.” Bisan og ang misyonaryo nga buhat opsiyonal alang sa batan-ong mga babaye, si Presidente Nelson mihangyo kanila sa pagpangutana sa Ginoo kon Siya gusto ba nga sila moserbisyo usab. “Ang inyong matampo niini nga buhat nindot kaayo!” siya misulti kanila. Ug, siyempre, ang Ginoo nagkinahanglan og senior nga mga magtiayon nga moserbisyo kon itugot sa ilang mga kahimtang. “Ang ilang mga paningkamot,” sa mga pulong ni Presidente Nelson, “dili gayod mahulipan.”2
Laing paagi nga atong matuman ang atong tahas sa pagpundok sa Israel mao ang paghinumdom sa atong pakigsaad nga “mobarog ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9). Wala kita magkinahanglan og full-time nga misyonaryo nga tawag aron mobarog isip usa ka saksi. Samtang kita mosunod sa ebanghelyo, mohigugma ug moserbisyo sa uban, mobarog nga lig-on sa atubangan sa tintasyon ug pagpanggukod, ug magpamatuod sa pulong ug buhat, madani nato ang uban ngadto kang Jesukristo.
Ang pagpaambit sa ebanghelyo mahimong makahadlok, bisan alang niadtong kinsa nakaserbisyo na og mga misyon. Apan kon kita adunay lig-on nga pagpamatuod sa Manluluwas ug sa Pagpahiuli, dili kita makapugong apan magpamatuod sa unsay atong nahibaloan.
Ang Kaimportante sa Pagpamatuod
Unsaon nato sa pagpalig-on sa atong pagpamatuod aron nga kita mahimong epektibo nga mga misyonaryo? Kinahanglan lamang kita mosunod sa tambag sa atong buhi nga propeta. Ang atong mga pagpamatuod motubo kon kita:
-
Mopakusog sa atong esprituhanong paglambo.3
-
Mogahin og panahon alang sa Ginoo.4
-
Mopalig-on sa atong espirituwal nga pundasyon.5
-
Mopatigbabaw sa Dios labaw sa tanan sa atong mga kinabuhi.6
-
Maminaw Kaniya.”7
Samtang kita magtuon sa mga pulong ni Presidente Nelson ug mopatalinghog sa iyang tambag, atong mapalig-on ang atong pagpamatuod sa Manluluwas ug sa Iyang ebanghelyo, sa tahas ni Propeta Joseph Smith sa Pagpahiuli, sa katinuod sa Basahon ni Mormon, ug sa tawag sa mga propeta ug apostoles sa modernong panahon. Ang usa ka napalig-on nga pagpamatuod moandam kanato—ug mopalambo sa atong mga tinguha—sa pagpatalinghog sa propetikanhon nga panawagan ni Presidente Nelson sa pagpundok sa Israel sa duha ka habig sa tabil.
Aron epektibong mopaambit sa ebanghelyo, dili kinahanglan nga kita mahimong hanas nga mamumulong. Dili kinahanglan nga kita nahibalo sa matag ginagmay nga detalye sa doktrina sa ebanghelyo. Dili kinahanglan nga kita nakasag-ulo og dinosena nga mga kasulatan. Dili gani kinahanglan nga kita taas og kinaadman. Kadto nga mga butang motabang kanato sa pagpaambit sa atong mensahe, apan ang tinuod nga makapakabig nga gahom moabot gikan sa usa ka mapainubsanon nga kasingkasing, usa ka lagsik nga pagpamatuod, ug usa ka makapanghimatuod nga pagsaksi gikan sa Espiritu Santo.
“Walay tawo,” miingon si Propeta Joseph Smith, “nga makasangyaw sa Ebanghelyo kon wala ang Espiritu Santo.”8
“Kalayo diha sa Akong mga Bukog”
Niadtong 1830, human nakadungog sa mga misyonaryo nga nagtudlo sa mensahe sa gipahiuli nga ebanghelyo, gusto ni Brigham Young nga mahibalo alang sa iyang kaugalingon sa kamatuoran sa unsay ilang gitudlo. Sa han-ay nga paagi, iyang gitun-an ang Basahon ni Mormon ingon man ang kinaiya niadtong kinsa mipamatuod niini ug ni Propeta Joseph Smith.
Adunay usa ka butang mahitungod niadtong nahauna nga mga misyonaryo nga nakatandog sa kasingkasing ug kalag ni Brigham. “Ang ilang pagpamatuod sama og kalayo diha sa akong mga bukog,” miingon siya.9
Usa niadto nga mga misyonaryo, si Eleazer Miller, namiyembro sa Simbahan sulod pa lang sa upat ka bulan.10 Siya, sa misyonaryo nga pinulongan karon, usa ka “bag-ong salta [greenie],” ug dili siya maayo nga mamumulong sa publiko. Apan kadto nga mga butang dili mahinungdanon.
Eleazer Miller
Pipila ka tuig ang milabay, si Presidente Brigham Young mipahayag: “Dihang nakakita ko og tawo nga dili kamaong manulti, o walay talento sa pagpamulong sa publiko, kinsa makasulti lamang og, ‘Ako nasayod pinaagi sa gahom sa Espiritu Santo nga ang Basahon ni Mormon tinuod [ug] nga si Joseph Smith usa ka propeta sa Ginoo[,]’ [a]ng Espiritu Santo nga gikan niana nga indibidwal [mi]pasanag sa akong pagsabot, ug kahayag, himaya, ug pagka-imortal [diha] sa akong atubangan.”
Si Presidente Young miingon nga siya gilibotan ug napuno niana nga kahayag ug himaya ug nga siya nasayod alang sa iyang kaugalingon nga ang pagpamatuod ni Eleazer tinuod.
“Ang kalibotan uban sa tanang kaalam ug gahom niini, uban sa tanang himaya, ug pagpakita sa panggawas nga bahandi sa mga hari ug mga magmamando niini,” miingon si Presidente Young, “hingpit nga mahimong walay bili kon itandi sa yano nga pagpamatuod nga wala magsalig sa laing mga butang sa usa ka sulugoon sa Dios.”11
Unsa ka Dako sa Atong Kalipay
Si Propeta Joseph Smith mipahayag, “Human sa tanan nga nasulti, ang [labing] dako ug [labing] importante nga katungdanan mao ang pagsangyaw sa Ebanghelyo.”12
Ang pagtahod sa atong mga pakigsaad isip mga sakop sa gingharian sa Dios naglakip sa pagpaambit sa ebanghelyo ni Jesukristo. Ang pagpaambit sa ebanghelyo mao ang usa sa labing dako nga mga pagpahayag sa paghigugma sa atong silingan sama sa atong kaugalingon (tan-awa sa Mateo 22:37–39). Ang pagpaambit sa ebanghelyo mao ang dako nga sugo sa Manluluwas.
Kadto kanato kinsa nakatabang sa pagdala og mga kalag ngadto kang Kristo nakatagamtam sa mahangtoron nga kalipay nga gisaad ngadto niadtong kinsa naghago sa pagluwas sa mga anak sa Dios (tan-awa sa Doktrina ug mga Pakigsaad 18:15–16). Naghandom gihapon ko sa akong full-time nga serbisyo isip usa ka batan-ong misyonaryo didto sa England—sa mga kompanyon nga akong gikauban sa pagserbisyo, sa mga tawo nga among nahimamat, sa bililhon nga mga anak nga lalaki ug mga anak nga babaye sa Dios nga among natabangan og dala ngadto sa Iyang panon. Ang akong kinabuhi dili na gayod susama human niana.
Gikan sa akong personal nga kasinatian, ako mopalanog sa saad sa Unang Kapangulohan ngadto niadtong kinsa “[modala] sa kalibotan [sa] iyang kamatuoran,”13 bisan dinhi man o sa layong dapit: “Ang Ginoo mohatag og ganti ug mopanalangin nimo pag-ayo samtang ikaw mapainubsanon ug mainampoon nga moalagad Kaniya. Labaw nga kalipay ang naghulat kanimo kaysa imo nang nasinati samtang ikaw magserbisyo uban sa Iyang mga anak.”14