Digital Lamang
Pagpakigbahin sa Ebanghelyo—Bag-ong mga Mensahe gikan sa mga Propeta, mga Apostoles, ug Ubang mga Lider sa Simbahan
Tan-awa unsay bag-ohay lang nga gitudlo sa mga lider sa Simbahan diha sa social media mahitungod sa pagdapit sa uban sa pagdawat sa ebanghelyo ni Jesukristo.
Si Presidente Russell M. Nelson mitudlo:
“Ang ebanghelyo ni Jesukristo wala pa sukad mas gikinahanglan kaysa karon. …
“… Kita adunay sagrado nga responsibilidad sa pagpakigbahin sa gahom ug kalinaw ni Jesukristo ngadto sa tanan kinsa maminaw ug kinsa mopatigbabaw sa Dios diha sa ilang kinabuhi.
“Ang matag tawo nga mihimo og mga pakigsaad sa Dios misaad sa pag-amuma sa uban ug pagserbisyo niadtong nanginahanglan. Kita makapakita sa hugot nga pagtuo diha sa Dios ug kanunay nga andam nga motubag niadtong mangutana bahin sa “paglaom nga anaa [kanato]’ [1 Pedro 3:15]. Ang matag usa kanato adunay papel sa pagpundok sa Israel. …
“… Ang tanan angayan nga hatagan og kahigayonan nga mahibalo bahin sa gipahiuli nga ebanghelyo ni Jesukristo. Ang matag tawo angayan nga makahibalo asa sila makakaplag sa paglaom ug sa kalinaw nga ‘dili matugkad sa tawo’[Mga Taga-Filipos 4:7].1
Tan-awa unsa ang gipakigbahin sa mga propeta, mga apostoles, ug sa ubang mga lider sa Simbahan sa social media mahitungod sa atong oportunidad ug responsibilidad sa pagpakigbahin sa ebanghelyo.
Ang Dios Motandog sa Minilyon nga Kinabuhi
“Samtang magtubo ang inyong pagpamatuod, moabot nga mobati kamo sa nagtubo nga kahayag sa inyong kinabuhi. Dili kini moabot nga walay pagpaningkamot. Apan kini moabot samtang ang inyong pagpamatuod motubo ug inyong gipili ang pag-alima niini.
“Kamo ang mahimong kahayag sa kalibotan samtang ipaambit ninyo ang inyong pagpamatuod sa uban. Kamo ang mopaaninag ngadto sa uban nianang Kahayag ni Kristo sa inyong kinabuhi. Ang Ginoo mangita og pamaagi para nianang kahayag nga mohikap niadtong inyong gimahal. Ug pinaagi sa hiniusang hugot nga pagtuo ug pagpamatuod sa Iyang mga anak nga babaye ug mga anak nga lalaki, ang Dios mohikap sa kinabuhi sa minilyon diha sa Iyang gingharian ug tadlas sa kalibotan uban sa Iyang kahayag.”
Presidente Henry B. Eyring, Facebook, Ago. 20, 2020, facebook.com/henry.b.eyring.
Pangita og mga Paagi nga Makahatag sa Labing Maayo nga Gasa
“Ang Ginoo makausab og mga kinabuhi sa tinagsa-tagsa. Ang pagkatawo sa Manluluwas mao ang sinugdanan sa makadasig nga yutan-ong pangalagad. Sa tibuok Niyang kinabuhi, nakadala Siya og dili maihap nga kalag ngadto sa kahayag sa ebanghelyo. Mihangyo Siya kanato sa paghimo sa samang butang. Pangita og mga paagi nga madala ang inyong kaugalingon ug ang uban paduol kang Kristo. … Pinakamaayong gasa kana nga inyong ikahatag.”
Presidente M. Russell Ballard, Facebook, Dis. 12, 2022, facebook.com/mrussell.ballard.
Pakigsulti sa Uban mahitungod sa Pagserbisyo og Misyon
“Manawagan ako sa tanan nga batan-ong lalaki, ug niadtong batan-ong mga babaye nga may tinguha nga moserbisyo og misyon, nga sugdi karon dayon ang pagpakigsulti sa inyong mga ginikanan mahitungod sa pagserbisyo og misyon. Modapit usab ako kaninyo sa pagpakig-istorya sa inyong mga higala mahitungod sa pagserbisyo og misyon, ug kon ang usa sa inyong mga higala dili sigurado mahitungod sa pagserbisyo, awhaga sila sa pagpakig-istorya sa ilang bishop.
“Ang akong misyonaryo nga pagserbisyo miandam nako nga mahimong mas maayo nga bana ug amahan ug mahimong malamposon sa negosyo. Kini miandam usab nako alang sa tibuok kinabuhi nga pagserbisyo sa Ginoo diha sa Iyang Simbahan.
“Ngadto sa mga misyonaryo nga nauli na human sa ilang pagserbisyo, hinumdomi nga kamo wala ma-release gikan sa pagkaaktibo sa Simbahan. Palamboa ang maayo nga mga kinaiya nga inyong nakat-onan sa inyong misyon, ipadayon ang pagpalig-on sa inyong pagpamatuod, pagtrabaho og maayo, pag-ampo, ug pagmasulundon sa Ginoo. Tahora ang mga pakigsaad nga inyong gihimo. Ipadayon ang pagpanalangin ug pagserbisyo sa uban.”
Presidente M. Russell Ballard, Facebook, Mayo 9, 2022, facebook.com/mrussell.ballard.
Mohigugma, Mopakigbahin, Modapit
“Motuo ko nga tulo ka pulong ang dunay gahom sa pag-usab sa atong pagserbisyo sa Dios ug sa isigkatawo. Ang pagsunod niini makausab sa atong pakig-uban sa usag usa sa atong mga kongregasyon, sa atong mga higala, ug sa tanang mga anak sa Dios: mohigugma, mopakigbahin ug modapit.
1) Ang gugma kinahanglan nga maoy pundasyon ug pangdasig sa tanan nga atong gibuhat. Mohimo kini sa atong mga paningkamot nga mas makahuloganon ug mas makalipay!
2) Mopakigbahin sa unsay inyong ganahan mahitungod sa ebanghelyo ni Jesukristo. Ipakigbahin nganong ganahan kamo nga nahimong miyembro sa Ang Simbahan ni Jesukristo sa mga Santos sa Ulahing mga Adlaw.
3) Modapit og mga tawo sa pagduol ug pagsusi, pagduol ug pagtabang, ug pagduol ug pagpahisakop.
“Samtang maningkamot kamo sa pagsubay sa dalan sa pagkadisipulo, bisag usahay mapakyas kamo, ang kahayag ug kalipay sa ebanghelyo ni Jesukristo mosanag sa inyong kinabuhi. Ang uban makabantay nga aduna kamoy butang nga bililhon sa inyong kinabuhi, ug mosangpot kini sa mga oportunidad sa pagpakigbahin niini.
“Nakakat-on ko sa akong kinabuhi nga ang ebanghelyo ni Jesukristo nagdala og paglaom, kalipay, ug pagkaayo. Atong dako nga pribilihiyo ug panalangin ang pagpakigbahin niana nga ebanghelyo ngadto sa tanan nga anak sa Dios.”
Elder Dieter F. Uchtdorf, Facebook, Hulyo 1, 2021, facebook.com/dieterf.uchtdorf.
Ang Matag Ginagmay nga Badlis sa Pag-paint Mahinungdanon
“Si Harriet ug ako mipakigbahin niini nga video sa bag-o lang nga debosyonal. Nagpakita kini sa paghimo sa usa ka matahom nga painting ni Jay Ward. Sa usa ka espesyal nga paagi kini nga proseso naghulagway kon unsay buot ipasabot sa pagpaningkamot nga magpakabuhi nga sama kang Kristo, ug sa atong inadlaw-adlaw nga buhat sa pagdapit sa uban aron magpaduol kang Kristo. Nag-awhag kita sa katawhan sa normal ug natural nga mga paagi nga hangopon ang ebanghelyo ug ang Simbahan ni Jesukristo. Mohigugma kita, mopakigbahin, ug modapit sa katawhan nga sulayan ug magpaduol sa Manluluwas. Hangyoon nato sila sa pagduol ug pagtan-aw, pagduol ug pagtabang, pagduol ug pagpasakop niining talagsaong komunidad sa mga Santos sa Ulahing mga Adlaw.
“Minahal kong mga higala, ayaw gayod paghunong sa paghimo sa sagradong bulohaton sa Manluluwas. Pinaagi sa inyong mapahinungoron nga mga paningkamot makatabang kamo sa paghimo sa mas kompleto nga hulagway pinaagi sa pagtabang sa mga tawo nga mahiduol Kang Jesukristo ug sa Iyang Simbahan. Ang paggamit niining mga baroganan magdala og dugang nga kalipay sa kalibotan.
“Nagkinahanglan kini og daghan nga trabaho—gagmay, pino, halos dili makita nga mga badlis sa painting nga makatabang sa hulagway nga mahimong perpekto ug hingpit. Ang tig-paint nahibalo sa eksakto gayod unsay gusto niyang kab-oton. Ang mga badlis-badlis sa pag-paint tingali morag bisan unsa lang o samok ra alang niadtong walay nahibaloan, apan tuyo kining gibutang aron ang buhat sa kahanas makompleto. Ang pag-ampo, pag-atiman, ug mapailobong pagtabang sa katawhan nga naglibot kanato makatabang natong tanan aron maduol kang Kristo. Ang inyong inadlaw-adlaw nga ginagmayng buhat sa kamabination, kamanggiloy-on, ug gugma alang sa Dios ug sa Iyang mga anak modala sa katawhan diha sa mahigugmaon nga gakos sa Dios.
“Ang matag badlis mahinungdanon. Mahinungdanon kamo. Gikinahanglan kamo, gikinahanglan ang inyong buhat, walay gamay ra kaayo o dili mahinungdanon.”
Elder Dieter F. Uchtdorf, Facebook, Mar. 19, 2021, facebook.com/dieterf.uchtdorf.
Gamita ang teknolohiya ug Social Media sa Pamaagi sa Ginoo
“Makadasig kon sa unsang paagi nagkat-on ang atong pinalanggang mga misyonaryo kon unsaon sa paggamit ang teknolohiya sa maalamon ug sa epektibong paagi—sa pamaagi sa Ginoo. Sama nga ang mga misyonaryo nanaghingpit sa ilang kaugalingon sa ilang paggamit sa teknolohiya ug social media, kita kinahanglan nga mohimo usab sa samang butang gikan sa atong mga panimalay ug sa atong mga ward ug mga branch. Kon dili man kamo sigurado unsaon sa pagsugod, pagpatudlo sa mga misyonaryo. “Malipay silang motabang!
“Minahal kong mga higala, ang Dios buhi ug nahigugma kaninyo. Si Jesukristo nangulo sa Iyang Simbahan. … Hinumdomi, ang inyong mga paningkamot sa social media ug sa teknolohiya dili kinahanglan nga perpekto o propesyonal. Nagkinahanglan nga kini tinuoray ug intensyonal.
“Dapita ang inyong mga higala ug mga minahal nga moduol ug motan-aw, moduol ug motabang, ug moduol ug mahisakop. Gamita ang mga baroganan sa ‘paghigugma,’ ‘pagpakigbahin,’ ug ‘pagdapit.’ …
“Niining tanan, si Kristo anaa sa sentro. Pinaagi Kaniya ug tungod Kaniya, makadala kita og kalipay sa kalibotan.”
Elder Dieter F. Uchtdorf, Facebook, Mar. 6, 2021, facebook.com/dieterf.uchtdorf.
Magmapailobon, Magmalahutayon, ug Mosalig sa Ginoo
“Kon mahitungod sa pagpakigbahin sa ebanghelyo, ang yano nga sundanan sa “paghigugma, pagpakigbahin, ug pagdapit’ magdala og mas maayo nga focus sa tanang aspeto sa buluhaton sa Ginoo. Sa natural nga paagi ang pagsunod niining sukaranan nga mga baroganan makapahimo nato nga makatabang sa uban sa pagduol ngadto kang Kristo pinaagi sa paghimo ug pagtuman sa mga pakigsaad. Tingali dili gani nato mamatngonan nga nagpakigbahin na diay kita sa ebanghelyo, tungod kay ang pagpakigbahin ug pagdapit mga natural nga ekspresyon sa atong tinuoray nga paghigugma sa uban. Kabahin lamang gayod kini kon si kinsa kita!
“Nag-ingon ang mga kasulatan nga ang ‘[gugmang putli] mapailubon’ ug‘molahotay gayod’ (1 Mga Taga-Corinto 13: 4, 7). Ang gugma walay eskedyul o petsa sa paghupas. Kon ang atong pagpakigbahin dinasig sa gugma, dili kita mawad-an og pailob. Padayon kitang mosulay, ug mosalig kita sa Ginoo samtang motabang kita sa uban.”
Elder David A. Bednar, Facebook, Ago. 2, 2021, facebook.com/davida.bednar.
Motabang sa Uban sa Pagpangita og Kalingkawasan gikan sa Pagkaulipon
“Samtang kita magpundok sa atong mga kaugalingon ngadto kang Jesukristo pinaagi sa pagsunod sa Iyang mga pagtulon-an, atong masinati ang kalingkawasan ug kagawasan nga ang ebanghelyo lamang ang makahatag—kagawasan nga makabaton og personal nga pagpadayag ug kagawasan nga mahimong tawo nga gusto sa Langitnong Amahan nga kita mamahimo.
“Ang dili matarong nga pagpakabuhi mahimong mosangpot sa pagkaulipon ug mga limitasyon, sa pisikal ug espirituwal. Samtang motabang kita sa pagpundok sa atong mga higala ug mga minahal ngadto sa ebanghelyo, lakip sa pagtabang kanila sa paghimo ug pagtuman og sagradong mga pakigsaad uban sa Dios, makatabang kita kanila nga makakita og kagawasan gikan sa daghang matang sa pagkaulipon.
“Samtang magpuyo kamo nga matarong, dili lang kay makaikyas kamo sa pagkaulipon gikan sa kaaway, apan mahimo usab kamo nga maayong ehemplo sa paglaom ug kahayag ngadto sa uban.”
Elder Quentin L. Cook, Facebook, Okt. 23, 2022, facebook.com/quentin.lcook.
Modapit sa Uban sa Pagtagamtam sa mga Panalangin sa Ebanghelyo sa Manluluwas
“Akong ipahayag ang akong pasalamat sa atong talagsaong mga misyonaryo sa tibuok kalibotan kinsa nagtinguha sa pagdala sa mensahe sa Pagpahiuli ug sa pagpalig-on sa pagtuo kang Ginoong Jesukristo.
“Sama niining mga misyonaryo, matag usa kanato dunay oportunidad sa paghigugma, pagpakigbahin, ug pagdapit sa uban sa pag-apil kanato ug sa pagtagamtam sa mga panalangin sa ebanghelyo sa Manluluwas.”
Elder Quentin L. Cook, Facebook, Okt. 30, 2021, facebook.com/quentin.lcook.
Ipakigbahin Kining Mahinungdanon nga Kamatuoran ngadto sa Tanan nga Atong Nailhan
“Sa wala pa mamulong sa debosyonal sa Primary bag-o lang sa Anchorage, Alaska, gipangutana nako ang pipila sa akong mga apo unsay angay nakong ipakigbahin ngadto sa ubang mga bata nga susama kanila og edad.
“‘Pa, sultihi sila nga nakaila ka ni Jesus ug nga Siya nahigugma kanila,’ maoy ilang tubag.
“Gitiman-an gyod nako ang ilang sugyot ug gisiguro nga mosaad ngadto sa matag usa niadtong mga bata nga ang Langitnong Amahan, si Jesukristo, ug ang Espiritu Santo nakaila kanila sa ilang mga ngalan. Gipakigbahin usab nako kanila nga ang Dios nahigugma kanila.
“Ang mga kamatuoran nga akong gipakigbahin niining bililhong mga bata mao gihapong mga kamatuoran nga akong ipakigbahin kaninyo.
“Ang Langitnong Amahan ug si Jesukristo nahigugma kanato sa hilabihan. Mga anak kita sa Dios. Ipaambit gayod nato kining mahinungdanong kamatuoran ngadto sa tanan nga atong nailhan. Wala gayod kita mag-inusara. Diha sa Langitnong Amahan ug ni Jesukristo, duna kitay padayon nga paghigalaay ug suporta.”
Elder Ronald A. Rasband, Facebook, Hulyo 12, 2022, facebook.com/RonaldARasband.
Mahimo nga Kahayag Niining Nagkakisdom nga Kalibotan
“Mahimo kamo nga usa ka kahayag niining nagkakisdom nga kalibotan, sa pagbarog isip mga saksi sa Dios ug sa Iyang pagkamatarong sa tanang higayon, walay eksepsiyon, ug makaplagan ang kalipay sa pagserbisyo. Unta inyong mahibaloan ang inyong lapad nga impluwensiya, ug unta moserbisyo kamo sa mapahinungoron nga paagi sa inyong Amahan sa Langit.”
Elder Ronald A. Rasband, Facebook, Abr. 30, 2021, facebook.com/RonaldARasband.
Aduna Kitay Responsibilidad sa Pagdapit
“Sa bag-o lang nga debosyonal sa BYU, namulong ko mahitungod sa relasyon tali sa mga panalangin ug sa mga responsibilidad sa mga miyembro sa Ang Simbahan ni Jesukristo sa mga Santos sa Ulahing mga Adlaw.
“Aduna kitay responsiblidad sa pagdapit sa tanan sa pagdawat sa ebanghelyo. Ang mga misyonaryo mapanalanginan sa ilang serbisyo pinaagi sa suporta sa ilang mga pamilya ug sa mga miyembro.
“Aduna kitay responsibilidad sa paghiusa sa mga pamilya alang sa kahangtoran. Gipanalanginan kita og mga templo sa tibuok kalibotan.
“Aduna kitay responsibilidad sa pagsunod sa ebanghelyo ni Jesukristo. Madawat nato ang mga panalangin pinaagi sa managlahing mga kapanguhaan sa Simbahan, lakip ang Basahon ni Mormon—karon nga naa na sa 112 ka pinulongan.
“Aduna kitay responsibilidad sa pag-atiman niadtong mga nanginahangaln. Tungod sa kamanggihatagon ug kamatinud-anon sa atong mga miyembro, napakigbahin nato ang atong mga panalangin ngadto sa kalibotan pinaagi sa daghan nga makitawhanong mga paningkamot.
“Ang akong imbitasyon mao ang pagkonsiderar sa atong tahas sa pagtuman niining balaanong mga responsibilidad ug magmahinangpon sa pag-apil. Kon atong buhaton, atong maila ug matagamtam ang pinadala sa langit nga mga panalangin.”
Elder Gary E. Stevenson, Mar. 16, 2021, facebook.com/stevenson.gary.e.
Mopadan-ag sa Kahayag Karon
“Lisod ang dili pagkagusto sa kanta nga ‘Si Jesus Buot nga Ako Mahimong Bidlisiw’! Matag higayon nga kini akong madungog, mahanduraw nako ang malipayong mga nawong sa nanagkanta nga mga bata. Ang ikaduhang bersikulo nag-ingon nga, ‘Ako magmahigugmaon si Jesus miingon, nga ang kalipay makita sa tanan nga bata.’
“Matag usa kanato dunay kahayag sa sulod kanato, ug gusto ni Kristo nga ipadan-ag nato kana nga kahayag! Mga higala, hinaot nga dawaton ninyo kini nga pagdapit sa pagpadan-ag sa kahayag karon, bisan asa man kamo.”
Sister Tracy Y. Browning, Ene. 24, 2023, facebook.com/Primary2ndCounselor.