Digital Lamang
Pagbuntog sa Akong Pagkaadik sa Druga pinaagi sa Kalig-on gikan ni Jesukristo
Ang tagsulat nagpuyo sa Washington, USA.
Anaa ko sa kinalisdan nga punto sa akong pagkaadik sa druga, ug mabatyagan nako unsay mahitabo kon unsa man nga dalan ang akong pilion.
Natawo ko nga sakop sa Ang Simbahan ni Jesukristo sa mga Santos sa Ulahing mga Adlaw, gibunyagan sa akong amahan dihang nag-otso anyos ko, ug hingpit ang pagkaaktibo sa Simbahan atol sa akong kabatan-on. Dihang nahuman ko sa akong misyon, ang sunod nakong tumong sa kinabuhi mao ang pagpangita sa pinili nga anak sa Dios nga babaye nga mapakaslan nako sa templo.
Apan nagsugod ko sa pagpangita og dili maayong kalingawan ug minunot sa mga tentasyon. Nagsugod ko sa pagpakig-date sa dili miyembro sa Simbahan. Sa hinayhinay nagsugod nga akong nabutang sa dili maayong sitwasyon ang akong personal nga mga sumbanan, ug dili na ko aktibo sa Simbahan. Sa kataposan naminyo ko sa babaye nga dili miyembro sa Simbahan, ug sa wala madugay misangpot sa diborysiyo ang among kaminyoon.
Padayon kong minunot sa tentasyon. Sa kahiladman, anaa gihapon ang akong pagpamatuod ug ang pangandoy nga maminyo sulod sa templo, apan gibati nako ang kadili takos niana nga mga panalangin. Nawad-an ko sa paglaom nga maminyo sa templo o manganak, maong gilubong nako ang akong mga pagbati nga sad-an ug gisagubang ang mga pagbati sa pagkawalay bili pinaagi sa pagtinguha og kalibotanong kalipay.
Unsa ka gabii sa akong mga traynta nga pangedaron, gihasol ko sa pagbati nga sad-an sa akong tanan nga moral nga kalapasan. Miluhod dayon ko ug nag-ampo sa Ginoo dala ang diosnong kasubo tungod sa mga sala nga akong nahimo. Misaad ko nga sundon ang balaod sa kaputli ug usabon ang akong kinaiya.
Apan dili lang kay kana ra ang akong gisagubang. Padayon pa nakong gigahin ang misunod nga pito ka tuig nga nalulong sa grabeng pagkaadik sa druga.
Sa tinuoray mibati ko nga nag-inusara ug nalaang sa akong pagkaadik sa kemikal. Mibati ko og labihang kasakit sa akong ulo, kasingkasing, ug lawas, mibati ko nga nag-ong-ong sa kamatayon sa makadaghang higayon. Nawad-an ko sa tanang paglaom nga makalingkawas pa ko gikan sa mga kadena sa pagkaadik ug depresyon nga maoy nagpabug-at kanako.
Usa ka adlaw naa na ko sa nagsanga nga dalan; kinahanglan ko nga modesisyon kon ako magpadayon ba o dili sa pagkaadik niining kinabuhia ug maningkamot nga makasugakod sa kadalanan. Apan nahibalo ko nga kana nga desisyon siguradong mosangpot sa akong kamatayon. Nahibalo ko nga kon dili nako pilion kadto nga opsiyon, nan nagkinahanglan nga akong lisoon ang akong kinabuhi ug mobalik kang Jesukristo.
Nakita nako ang akong kaugalingon nga naglingkod sa akong trak, nga gilamoy sa makapaluya nga kahadlok. Nga ang akong phone naa sa akong kamot, gitutokan nako ang numero sa akong papa. Labihan nga kasakit ug kabug-at ang gibati sa akong kalag nga wala akoy kusog bisan sa paglitok og mga pulong. Mibati ko nga kon motawag ko ug mangayo og tabang niana akong pilion ang kinabuhi ug kon dili ko motawag sigurado nga akong pilion ang kamatayon ug kaalaotan.
Mikabat og kapin sa usa ka oras una ko nakatigom og igong kaisog nga sa kataposan tawagan ang akong papa ug mohangyo kon mahimo ba nako siyang adtoon. Sa pag-abot nako didto, ang akong mga ginikanan ug ako dunay taas nga diskusyon nga sa pagkahuman mihangyo si Papa nga hatagan ako og panalangin sa pagkapari.
Gidawat nako ang hangyo ug milingkod, mibati og tinuoray nga pagpaubos ug tinuoray nga nagmahinulsolon. Gigamit nako ang akong hugot nga pagtuo sa gahom sa Dios ug sa Iyang pagkapari. Tinuoray nakong gitinguha ang tabang sa Langitnong Amahan. Atol sa panalangin, ang akong mga hunahuna napaling ngadto Kaniya, naghangyo nga panalanginan Niya ako og kalig-on ug gahom samtang maningkamot ko sa pagbuntog niini nga pagkaadik. “Palihog, dili na ko ganahang magpakabuhi og ingon niini,” nag-ampo ko sa hilom. “Palihog tabangi ko sa paglingkawas gikan niini nga bung-aw nga akong nasudlan. Palihog tabangi ko kay dili ko makahimo niini nga ako ra.”
Ang mga kamot sa akong papa nagkurog samtang namulong siya uban sa gahom ug kombiksyon samtang gipangalagad ang panalangin sa pagkapari. Miingon siya nga si Satanas naningkamot og maayo aron dili nako magamit ang akong dako nga potensiyal. Mibati ko nga ang akong mga desisyon nagpugong usab nako sa pagpanalangin ug pagbayaw sa uban kinsa unta makabenipisyo gikan kanako nga makapakita og matarong nga ehemplo ug impluwensiya. Ang panalangin balik-balik usab nga nagpahinumdom kanako nga ako adunay kahigayonan nga makabuntog sa akong mga pagkaadik.
Nasayod ko nga walay sala nga akong nahimo nga dili ko mapasaylo. Sigon sa gitudlo ni Presidente Boyd K. Packer (1924–2015):
“Wala akoy nahibaloang mga sala nga may kalabotan sa moral nga sumbanan diin kita dili mapasaylo. … Ang pormula gipamahayag sa kwarenta ka pulong:
“’Tan-awa, siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom [niini].
“Pinaagi niini kamo masayod kon ang usa ka tawo naghinulsol sa iyang mga sala—tan-awa, siya mokumpisal [niini] ug mobiya [niini]’ Doktrina ug mga Pakigsaad 58:42–43].”1
Sa panalangin nga gihatag sa akong papa kanako, gipanalanginan usab ako og gahom ug kalig-on sa pagbuntog sa akong mga kasakit. Nahibalo ko nga si papa tinuod nga gidasig ug namulong pinaagi sa awtoridad sa Dios.
Dihang nahuman ang pagpanalangin, mibarog ko ug migakos sa akong amahan. Nagkinuptanay kami, ug nagginaksanay og dugay. Si mama miapil pinaagi sa paggakos namong duha samtang nagbakho ko sa abaga sa akong papa, nga mibati sa dili mapugngan nga pagbati sa gugma ug pasalamat sulod sa akong kasingkasing.
Ang akong tanang gibati nga kawala nay paglaom nahanaw. Misugod ko sa pagbati nga ang pisikal nga kahidlaw sa pagkaadik ug ang baga nga dag-om sa depresyon ug pagbati nga kahaw-ang nga mihugpa kanako sa taas nga panahon nawala. Diha dayon akong gibati ang bag-ong nakaplagan nga tinguha ug kahinam sa kinabuhi ug sa tanang posibilidad alang sa kamaya nga posible nakong maangkon kon mopili ko sa unsay husto ug motugyan ngadto sa kabubut-on sa akong Langitnong Amahan. Gusto kong magpakabuhi subay sa kinaiya nga gipakita ni Jesukristo isip ehemplo sa tanan nga butang: “Dili ang akong pagbuot ang matuman, apan ang imo” (Lucas 22:42).
Mipadayon ko sa akong dalan padulong sa Langitnong Amahan ug ni Jesukristo uban sa nabag-o nga determinasyon ug kalig-on.
Pipila ka higayon wala madugay, ang kaaway padayon sa iyang mga pagtental; ang tawo nga akong suod padayon sa pagkombinse nako sa pag-adto ug makigtagay kaniya. Iya kong gipugos gamit ang bakak nga ang pag-inom dili dako nga butang basta dili ka maadik sa inom. Naglisod ko sa sulod kanako—sa usa ka bahin gusto nakong magpabilin kana nga relasyon ug pagkaadunay pagkasama nga hunahuna nianang tawhana, apan sa laing bahin gusto nakong ipakita sa Langitnong Amahan ang akong gugma ug pasalamat pinaagi sa pagtuman sa Pulong sa Kaalam. Samtang naglisod ko bahin niini nga mga hunahuna, mikidlap ang akong phone ug mihayag tadlas sa kwarto. Akong gisusi kon unsa kadto—usa ka notipikasyon sa Facebook nga may kinutlo gikan sa pakigpulong ni Presidente Thomas S. Monson “Mga Baroganan ug mga Saad”:
“Ang Pulong sa Kaalam naghatag … og piho nga direksyon bahin sa kalan-on nga atong gikaon, ug nagdili sa paggamit og mga butang nga makadaot sa atong lawas.
“Kadtong nagmasulundon sa mga sugo sa Ginoo ug nagmatinud-anon sa pagtuman sa Pulong sa Kaalam gisaaran og partikular nga mga panalangin, lakip niana ang kapiskay ug dugang kusog sa lawas [tan-awa sa Doktrina ug mga Pakigsaad 89:18–21].”2
Kini ang akong pagpamatuod nga ang Langitnong Amahan nakakita nga haom ang pagpadala kanako niadtong piho nga mensahe sa eksaktong panahon nga ako naglisod. Samtang ang mga tubag tingali dili dayon ingon niana ka direktang moabot ug kita sa kanunay kinahanglang magtinguha sa pagsunod sa mga sugo, mapasalamaton ko niana nga panalangin. Nasayod ko unsay kinahanglan nga akong desisyon ug dalan nga kinahanglan nakong ipadayon sa pagsubay sa akong kinabuhi. Nagkinahanglan ko nga mokumpisal ug mobiya sa akong mga sala ug padayon nga motalikod sa tanan nga dili diosnon. Nagkinahanglan ko nga mabalaan pinaagi sa gahom ni Jesukristo ug sa Iyang Pag-ula. Nakasabot ko nga “kini nga kinabuhi mao ang panahon alang [kanako] sa pagpangandam sa pagsugat sa Dios” (Alma 34:32) ug sa “pagsuta kon [ako] mobuhat ba sa tanan nga mga butang bisan unsa ang isugo sa Ginoo nga [akong] Dios” (Abraham 3:25). Nakasabot ko nga kini mao ang panahon aron mabuntog ang akong pisikal nga mga pagkaadik, samtang duna pa koy mortal nga lawas. Ug nakasabot ko nga kinahanglan nakong ipakita sa Langitnong Amahan ang dako nga kausaban sa kasingkasing (tan-awa sa Mosiah 5:2; tan-awa usab sa Alma 5:12–14) ug “wala nay hilig sa pagbuhat og daotan, apan sa pagbuhat og maayo sa kanunay” (Mosiah 5:2).
Pinaagi sa paghinulsol (lakip ang pakigtambayayong sa akong mga lider sa pagkapari), sundan sa matag matarong nga desisyon nga akong gihimo sukad niadto, giablihan nako ang akong kaugalingon ngadto sa mga pultahan sa langit ug gitugotan ang Langitnong Amahan nga mobubo sa Iyang mga panalangin kanako.
Pipila ka bulan human sa akong kausaban sa kasingkasing, ang umaabot nakong asawa, si Malaina, miabot sa akong kinabuhi ug nagsugod ang among paghigugmaay. Mapasalamaton ko karon nga naamdam alang sa umaabot nga paghiusa. Ang pagpakig-date kang Malaina sama gayod kaayo sa hinimo-himo nga sugilanon [fairy tale] nga damgo nga nahimong tinuod! Kaming duha parehas nga nasakitan sa milabayng mga pakigrelasyon, ug nakaplagan namo ang gugma ug pagsinabtanay sa usag usa. Kaming duha parehas nga nagtinguha sa tibuok namong kasingkasing nga mahimong takos nga makasal sa templo. Unom ka bulan human nagsugod kami sa pag-date, naselyo kami sa Seattle Washington Temple.
Ang Langitnong Amahan mipanalangin kanako og mahigugmaon nga asawa kinsa nakasabot sa gahom sa Pag-ula ni Jesukristo ug unsay ipasabot sa pagkalimpyo pinaagi sa paghinulsol. Gihigugma ako ni Malaina nga usa ka tawo nga ako mao karon ug dili sa mga sayop sa akong kagahapon. Ang iyang personal nga pagpamatuod ug gugma sa Manluluwas padayong naghatag kanako og kalig-on alang sa katumanan sa hingpit nga sukod sa akong pagkalalang. Siya ang tinuoray nga kompanyon nga kaniadto pa akong gipangandoy, ug kaming duha napanalanginan og duha ka anak.
Nakita nako ang pagkakatingalahan sa kadako nga kausaban sa akong kinabuhi ngadto sa pagkamaayo sulod lang sa pipila ka mubo nga tuig. Mibati ko nga ang pagkahaw-as gikan sa bung-aw nga kausa akong nahimutangan ngadto sa kon asa ako karon tinuod nga usa ka milagro. Personal nakong pagpamatuod kini nga pinaagi sa sinserong paghinulsol ug hugot nga pagtuo kang Jesukristo ang tanang butang posible! Ako ang buhi nga panghimatuod niana.