“Sa Kataposan Nakasabot kon Unsay Kahulogan nga Gihigugma sa Dios,” Liahona, Sept. 2023.
Mga Young Adult
Sa Kataposan Nakasabot kon Unsay Kahulogan nga Gihigugma sa Dios
Nakalimot ko sa gahom sa pagkahibalo sa akong balaanon nga pagkatawo.
Paghulagway pinaagi ni Alecia Schubert
Sa dihang bata pa ko, ang akong pamilya mibalhin gikan sa Hungary ngadto sa Germany. Mahinamon ko nga mobalhin didto, apan nahitabo nga kini ang nahimong labing lisod nga siyam ka tuig sa akong kinabuhi.
Naglisod ko sa pagkat-on og German, ug sukad sa una medyo sensitibo ko, nga maoy hinungdan aron mahimo ko nga target pirmi sa sungog. Mikunhod gayod ang akong bili sa kaugalingon. Dihadiha gibati nako nga mora og walay nahigugma nako ug dunay gamay nga paglaom sa umaabot. Naghunahuna ko kon mas maayo ba kaha ang kalibotan kon wala ko ug usahay maghunahuna gani nga maghikog.
Apan bisan pa man, pinaagi sa tanang pag-antos, nakahibalo ko nga adunay rason nganong gihatagan ko og kinabuhi, bisan kon wala kaayo ko makasabot ngano. Nakahibalo ko nga makita nako ang kahayag sa Manluluwas bisan sa labing ngitngit nga mga higayon (tan-awa sa Ether 12:4). Sa dihang ang kalibotan mura og nakigbatok kanako, nakahibalo ko asa Siya pangitaon ug unsa ang Iyang mahimo alang kanako kon ako Siyang pangitaon pinaagi sa mga kasulatan, pag-ampo, ug paghimo sa akong labing maayo isip Iyang disipulo. Sa tinud-anay ang pagsunod sa Iyang ebanghelyo ang naghatag kanako sa bisan unsang matang sa kalinaw ug nagtabang nako nga magpadayon atol niining lisod kaayo nga panahon.
Usa ka Kamatuoran nga Akong Nakalimtan
Sa kataposan, ang akong pamilya ug ako mibalik sa Hungary. Nakahuman ko sa hayskul, ug bisan tuod nahunong na ang pagpanungog nako, nagkulang pa gihapon ko og pagsalig sa kaugalingon. Ang mga sangpotanan sa dili maayo nga pagtratar nakaapekto kaayo nako, ug usahay nagduhaduha pa gihapon ko sa akong kaugalingong bili.
Ug isip usa ka young adult, ganahan kaayo ko nga mahimong masaligon sa paghimo og dagko nga mga desisyon sa kinabuhi ug pagdesisyon kon unsa ang gusto nako nga maabot sa kinabuhi.
Samtang nakigbisog ko niini, mibati ko og pagdasig nga motambong og usa ka komperensiya sa mga batan-ong single adult sa silangang Europe. Nagkinahanglan ko og pipila ka espiritwal nga direksyon sa akong kinabuhi aron motabang nako nga mas mapalig-on ang akong bili sa kaugalingon ug nag-ampo nga makakita og mga tubag didto.
Usa ka gabii diha sa komperensiya, nanlimbawot ang mga balahibo sa akong mga bukton sa dihang ang mamumulong sa fireside nagsugod sa pag-istorya mahitungod kon giunsa siya pagsungog dihang bata pa. Siya namulong kabahin kon giunsa niya pagbati nga walay bili ug dili makita. Dihadiha misugod ako sa paghilak.
Iyang gihulagway kon unsa gayod ang akong nasinati.
Ang mamumulong mipadayon ug mipakigbahin sa kamatuoran nga iyang gihuptan atol sa iyang mga pagsulay—usa ka kamatuoran nga akong nakalimtan:
“Ako anak sa Dios.”
Paghangop sa Akong Balaanon nga Pagkatawo
Sa dihang nahuman na ang fireside, aduna gihapon akoy mga luha nga midagayday sa akong nawong. Nakabantay ang mamumulong ug miduol aron gakson ko. Iya kong gisultihan nga kasagaran dili siya personal gayod nga moatubang aron mamulong og mga fireside apan mibati nga giaghat nga adunay usa ka tawo nga direktang nagkinahanglan nga makabati sa iyang mensahe.
Ako mao kadto nga tawo.
Kini nga kasinatian nagpakita nako kon unsa gayod nga ang Langitnong Amahan nakahibalo kaayo sa Iyang mga anak ug nga Siya nakahibalo gayod kon unsaon sa pagtabang kanato aron nga kita mobati og bisan gamay lang nga silaw sa Iyang hingpit nga gugma isip ginikanan. Siya nakahibalo nga kinahanglan kong makadungog sa mensahe niini nga mamumulong ug mitultol nako nga maanaa sa saktong dapit sa saktong higayon.
Akong nailhan ang mga pulong nga “Ako Anak sa Dios” sa tibuok nakong kinabuhi, apan ang kamatuoran niini bug-os nga nagdahunog sa akong kalag nianang higayona. Ako tinud-anay nga nakaamgo unsa ang buot ipasabot nga mahimong anak sa hingpit nga Dios kinsa nahigugma kaayo nato nga Siya andam sa pagsakripisyo sa Iyang kaugalingong Anak aron kita mabuhi pag-usab ug matubos gikan sa atong mga sala. Kinsa nahigugma pag-ayo nako nga samtang Siya dili kanunay nga makapanalipod kanako gikan sa kasakit, Siya uban nako latas niini ug makatabang nako nga makalingkawas gikan niini, molambo gikan niini, ug mobalik ngadto Kaniya.
Siya nahigugma kanako karon, ug Siya nahigugma kanako sa walay kataposan atol sa mga tuig nga ako gisungog sa dihang gibati nako nga walay usa nga nahigugma nako. Ako nakahibalo na karon nga tungod kay ako nakahibalo niini nga kamatuoran sa tinud-anay gayod nga akong gipili nga magpadayon.
Si Presidente Russell M. Nelson bag-ohay lang nagtudlo sa gahom sa pagkahibalo sa atong balaanon nga pagkatawo. Siya miingon: “Hinigugma kong mga higala, kamo literal nga espiritu nga mga anak sa Dios. … Apan kana ba nga mahangtoron nga kamatuoran napatik sa inyong kasingkasing? …
“Ayaw og kasayop niini: Balaanon ang inyong potensiyal. Uban sa inyong makugihon nga pagtinguha, ang Dios mohatag kaninyo og mga pasiplat kon kinsa kamo mamahimo.”1
Karon kon akong mabantayan ang akong kaugalingon nga nagduhaduha sa akong bili, kanunay nako nga pahinumdoman ang akong kaugalingon sa kamatuoran nga ako anak sa Dios ug nga ang akong kinabuhi usa ka gasa gikan Kaniya.
Hinumdomi nga kamo anak sa Dios. Ug ayaw gayod kalimot sa makapalahutay, makausab sa kinabuhi, ug talagsaon nga espirituhanong gahom nga nagagikan sa paghangop niana nga kamatuoran.
Ang tagsulat nagpuyo sa Szeged, Hungary.