Digital Lamang: Mga Young Adult
Sa Unsa nga Paagi nga ang mga Kasulatan Nagtudlo Nako sa Paghigugma sa Uban
Ang pagtuon sa mga kasulatan makatabang nato nga makasinati og mas maanindot nga mga pagbati sa gugma nga putli alang niadtong naglibot kanato.
Samtang nagtubo, ako nasayod nga ang ebanghelyo tinuod tungod sa pagtambong sa seminary, pagtan-aw sa mga ehemplo sa akong kamagulangan nga igsoong lalaki, ug sa pagbasa sa mga kasulatan. Apan ako nag-atubang og daghang oposisyon sa dihang ako nag-19 anyos ug nagsugod sa pag-andam sa pagserbisyo og misyon. Kinahanglan akong maghulat og dugay-dugay kay sa akong gusto, apan sa kataposan nakaserbisyo ra ko. Kadto ang labing halandomon nga panahon sa akong kinabuhi!
Ug bisan nga ako nag-atubang og daghang oposisyon sa akong misyon, didto ako mas nasuod sa hilabihan ngadto ni Jesukristo ug nakat-on mahitungod sa Iyang hingpit nga gugma gikan sa mga kasulatan ug sa akong kaugalingon nga mga kasinatian. Nakahimo ko sa pagkat-on sa paghigugma sa mga tawo nga akong giserbisyohan sa paagi nga ang Manluluwas nahigugma kanila.
Ang pagpalambo og gugma nga putli nakatabang nako nga moserbisyo sa labing maayong duha ka tuig sa akong kinabuhi, ug samtang namalandong ako nianang higayona, mas nakaamgo ko sa hingpit kon sa unsa nga paagi nga ang mga kasulatan migiya nako sa pagpalambo og putli nga gugma ni Kristo.
Ang mga Kasulatan Motabang Nato nga Mahigugma
Gikonsiderar ba nimo ang imong kaugalingon nga usa ka disipulo ni Jesukristo?
Sa Basahon ni Mormon, si Moroni mitudlo nga ang mga disipulo ni Kristo naghupot og piho nga mga hiyas. Kini nga mga hiyas naglakip sa gugma nga putli o, sama sa iyang pagsulti niini “ang tiunay nga gugma ni Kristo” (Moroni 7:47). Apan alang kanako ug alang sa kadaghanan kanato, usahay lisod ang pagpakita og gugma nga putli ngadto sa tanan, ilabi na sa nagkangitngit nga kalibotan nga atong gipuy-an.
Kanunay nakong gipangutana ang akong kaugalingon—ug ang Langitnong Amahan:
“Unsaon nako nga makasunod sa tambag sa pagpalambo nianang gugma nga putli ni Kristo nga ako dili man hingpit?”
Pinaagi sa daghang personal nga pagpamalandong ug pagpangita, nakat-on ko og usa ka makatabang nga buluhaton nga anaa ra sa tumoy sa atong mga tudlo.
Kon kita gusto og mga tubag ug giya, dili na kinahanglan nga mangita pa sa layo kay sa mga kasulatan! Nasayod kita nga “ang mga pulong ni Kirsto mosulti [nato] sa tanan nga mga butang nga [atong] buhaton” (2 Nephi 32:3), apan tinud-anay ba gayod kamong “nagtuo sa balaan nga mga kasulatan” (Helaman 15:7) ug sa gahom niini sa pagtabang kaninyo nga mopalambo og gugma nga putli?
Pinaagi sa akong kaugalingon nga pagtuon sa kasulatan, akong nakaplagan ang tabang nga akong gikinahanglan sa pagpalambo og dugang nga gugma nga putli. Gibati nako nga ang akong kasingkasing nausab samtang ako nagbasa sa mga kamatuoran bahin sa Manluluwas. Si Presidente Spencer W. Kimball (1895–1985) miingon, “Kon akong isubsob ang akong kaugalingon sa mga kasulatan, … Akong makita ang akong kaugalingon nga mas labaw pang mahigugmaon niadtong kinsa kinahanglan nakong higugmaon sa tibuok nakong kasingkasing ug hunahuna ug kusog.”1
Nakaamgo ko nga ang pagtuon sa kasulatan mao ang usa sa labing importante nga mga himan nga makatabang kanato nga mahimong sama ni Jesukristo. Kon kita mogahin og panahon ug dapit sa pagpamalandong sa mga kasulatan, makat-on kita og dugang mahitunod sa Iyang kamatuoran, sa Iyang gugma, ug sa Iyang kabubut-on—ilabi na kon unsaon sa paghigugma ang uban sama sa Iyang paghigugma.
Pagbansay sa Putli nga Gugma sa Manluluwas
Si Sister J. Annette Dennis, Unang Magtatambag sa Kinatibuk-ang Kapangulohan sa Relief Society, karong bag-o mitudlo: “Ang Manluluwas … ang simbolo sa gugma nga putli, sa tiunay nga gugma. Samtang kita hinay-hinay nga makat-on sa pagbuhat unsay Iyang gisugo kanato … ang Iyang gugma mabati sa uban pinaagi nato ug mohimo sa tanan nga Iyang gisugo dili lamang posible apan sa kataposan mas sayon ug mas gaan [tan-awa sa Mosiah 24:15] ug mas magmalipayon kay sa atong mahunahuna. Kini magkinahanglan og pagbansay; kini moabot og katuigan, sama kanako, apan kon kita magtinguha nga ang gugma mao ang gahom nga modasig, Siya [mohupot] niana nga tinguha [tan-awa sa Alma 32:27], kana nga liso, ug sa kataposan [mohimo niini nga] usa ka matahom nga kahoy, puno sa matam-is nga bunga [tan-awa sa Alma 32:41].”2
Ang pagpalambo og gugma nga putli magkinahanglan og pagbansay, apan kon kita andam nga makat-on gikan sa ug molihok sa gitudlo sa mga kasulatan, kita mahimong mas maayo sa pagpakita og Kristohanong gugma. Makaplagan nato nga ang mga kamatuoran diha sa mga kasulatan ug ang mga pulong sa mga propeta sa tinuod makahatag kanato og dugang Kristohanong kinaiya. Makaplagan nato nga posible nga mopalambo sa putli nga gugma ni Kristo. Ug uban sa Iyang putli nga gugma nga karon kabahin na sa atong kaugalingong kinaiya, kita makahimo nga mas mahigugma pa sa uban sa paagi sa Iyang paghigugma ug mobati og pa og dugang sa Iyang putli nga gugma sa atong kaugalingong mga kinabuhi.