“Paghimong Lig-on sa Mahuyang nga mga Butang,” Liahona, Peb. 2024.
Paghimong Lig-on sa Mahuyang nga mga Butang
Gipakita ni Nephi kanato kon unsaon sa paglihok diha sa saad sa Ginoo nga Siya “mohimo sa mahuyang nga mga butang nga mahimo nga malig-on ngari [kanato]” (Ether 12:27).
Paghulagway pinaagi ni Dan Burr
Sama sa kadaghanan nato, ako usahay manglimbasog sa pagkahibalo nga ako adunay bili ug nga ang Ginoo makahimo—ug mahimong—mohigugma kanako. Naghunahuna ko mahitungod sa akong umaabot ug kon ang gisaad nga mga panalangin matuman ba. Mabalaka ko mahitungod kon mabuntog ba kaha nako ang akong mga kahuyang aron mamahimong tawo nga gusto sa Dios nga ako mamahimo. Adunay higayon, nga ang kinabuhi ingon og makapahiubos, ug ang mahuyang nga mga butang diha sa akong kinabuhi mobalda sa kalipay nga akong makaplagan pinaagi sa akong Manluluwas.
Apan, sa pagbasa sa mga kasulatan, akong nakat-onan mahitungod sa mga propeta nga nanglimbasog sa pagkahibalo sa ilang bili diha sa pagsangyaw sa ebanghelyo (tan-awa sa Moises 6:31), mibati nga gimahal ug gihunahuna (tan-awa sa Mosiah 24:10–12; Doktrina ug mga Pakigsaad 121:1, 6), mibuntog sa makaguol nga mga hagit (tan-awa sa Mosiah 24:15–16; Doktrina ug mga Pakigsaad 3:1–3, 9–10), ug nagtan-aw sa ilang katuyoan diha sa plano sa Langitnong Amahan (tan-awa sa Moises 1:19–20; Abraham 1:4, 16–19; Joseph Smith—Kasaysayan 1:10–20). Pinaagi sa ilang mga istorya ako nakakaplag og paglaom. Samtang magtinguha ako sa Ginoo, ako makaandam ug makabuntog sa tanan nga mga hagit. Ako nasayod nga ako tingali makasinati og mga problema ug kasub-anan, apan ako makakat-on, makahimo, ug mamahimong mas mahisama sa akong Manluluwas.
Mga Kahuyang
Bisan og ang mortalidad usa ka gasa, kita makasinati og daghang kahuyang niining kinabuhi. Kon kita moila sa atong mga kahuyang ug mopaubos sa atong kaugalingon, nan ang atong “kahuyang”—nga sa kasagaran mopakita mismo sa porma sa garbo, katapolan, o tingali sa pagkadili mahinulsulon—mahimong mabuntog pinaagi sa Ginoo ug makadala kanato nga mas maduol ngadto Kaniya (tan-awa sa Ether 12:27–28). Sama sa gisulti ni Elder D. Todd Christofferson sa Korum sa Napulog Duha ka Apostoles, “Ang Dios mopakita kanato sa atong mga sayop ug mga kapakyasan, apan motabang usab Siya nga atong mahimo ang kahuyang ngadto sa kalig-on.”1
Kini nakapasubo ni Nephi sa dihang ang iyang pamilya nadala ngadto sa ilang huyang nga mortal nga kinaiyahan (tan-awa sa 1 Nephi 2:18; 15:4; 2 Nephi 4:13; 5:1). Apan nagbangutan usab si Nephi sa iyang kaugalingong mga kahuyang. Bisan og siya nahigugma sa Ginoo, si Nephi namulong kabahin sa “mga sala sayon nga mohasol kanako” (2 Nephi 4:18), hinungdan sa iyang pag-agulo, pagdanguyngoy ug paglunang sa sala (tan-awa sa mga bersikulo 19, 26, 28). Siya mibati nga napalibotan sa mga pahinumdom sa iyang mga sala ug busa mibati og kasakit (tan-awa sa mga bersikulo 17–19).
Apan siya wala “nagpabilin diha sa walog sa kasubo” ug gitugotan ang iyang “lawas mawad-an og kusog” o ang iyang “kusog nagkawala” (bersikulo 26). Siya mipili sa pagsalig diha sa Ginoo ug mamahimong mas maayo. Sa dihang si Nephi mipili sa pagbiya sa sala ug sa kasakit nga dala niini, siya nakakaplag og bag-o nga kalig-on: kahimuot, pagsalig, kahibalo, pagmaya, katubsanan, ug kalingkawasan (tan-awa sa mga bersikulo 15–20, 26–34). Si Nephi nakakaplag og hingpit nga kalipay diha ni Jesukristo. Ako nasayod nga kitang tanan makakaplag og hingpit nga kalipay diha sa Manluluwas. Kon kita mosunod sa Iyang ebanghelyo, “ang mahuyang nga mga butang [ma]mahimong lig-on” sa atong mga kinabuhi (Ether 12:27).
Mga Kalig-on
Ang pagkasayod kon si kinsa kita isip mga anak sa Dios makatugot kanato aron makita ang atong bili ug makadala sa Espiritu ngadto sa atong mga kinabuhi. Nasabtan kini ni Nephi. Human siya mipasabot kabahin sa tanang butang nga sayop niyang nabuhat, siya nakasabot nga siya gimahal, nailhan, ug importante. Kini nga pagkaamgo mitugot kaniya sa paghimo ug sa pagbuhat niining mga resolusyon:
“Pagmata, akong kalag! Ayaw na paglunang sa sala. Pagmaya, O akong kasingkasing, ug ayaw na paghatag og luna sa kaaway sa akong kalag.
“Ayaw na pagkasuko pag-usab. … Dili anamon sa pagkawala ang akong kalig-on. …
“Pagmaya, … ug moingon: O Ginoo, ako magadayeg kanimo sa kahangtoran. …
“O Ginoo, ikaw motubos ba sa akong kalag [ug] Ikaw moluwas ba kanako gikan sa mga kamot sa akong mga kaaway [ug] Ikaw mohimo ba kanako nga ako mokurog atubangan sa sala? …
“O Ginoo, ako misalig kanimo, ug ako mosalig kanimo sa kahangtoran” (2 Nephi 4:28–31, 34).
“Ako, si Nephi, nangamuyo sa hilabihan ngadto sa Ginoo nga akong Dios. …
“Ug kami naninguha sa paghupot sa mga paghukom, ug sa mga balaod, ug sa mga sugo sa Ginoo diha sa tanan nga mga butang. …
“Ug ang Ginoo nag-uban kanamo” (2 Nephi 5:1, 10–11).
Sama ni Nephi, kita makahimo og labaw pa pinaagi ni Jesukristo. Si Presidente Henry B. Eyring, Ikaduhang Magtatambag sa Unang Kapangulohan, misumada [summarized] niining proseso: “Kadtong kinsa dili makakita sa ilang mga kahuyang dili mouswag. Ang inyong pagkasayod sa inyong mga kahuyang usa ka panalangin kay nakatabang kini nga magpabilin kamong mapaubsanon ug padayon ang inyong pagsunod sa Manluluwas. Ang Espiritu dili lang mohupay kaninyo, apan Siya usab ang paagi nga ang Pag-ula mousab sa inyong pagkakamo. Dayon ang mahuyang nga mga butang mamahimong lig-on.”2
Kita makapili karon aron mamahimong usa ka mas mapasaligon nga mga disipulo ni Jesukristo, aron mamahimong bag-o pinaagi Kaniya. Sama ni Nephi, ang pag-ila sa atong mga kahuyang modala kanato ngadto sa mapainubsanon nga petisyon sa Langitnong Amahan alang sa tabang sa pagbuntog niadto nga mga kahuyang. Pinaagi sa Ginoo, ang mga kahuyang ug mga pagduha-duha mabuntog, ang bili makaplagan, ug ang atong panabot molambo. Samtang ako tingali wala sa tanang tubag ug tingali nanglimbasog pa gihapon, ako mosalig nga ang Ginoo motabang kanako, nga Siya motabang kanako sa pagbuntog sa akong mga kahuyang ug palamboon ang mga kalig-on.
Ang tagsulat nagpuyo sa Idaho, USA.