Digital Lamang: Mga Young Adult
Sa Unsa nga Paagi ang Basahon ni Mormon Miabli sa Kalangitan alang Kanako
Samtang kita magtuon sa Basahon ni Mormon karong tuiga, gusto kong mopakigbahin nga ako adunay pagpamatuod sa gahum ug impluwensya niini sa imong kinabuhi.
Ang tagsulat nagpuyo sa Utah, USA.
Ako adunay pagpamatuod sa Basahon ni Mormon sukad sa unang higayon nga ako mibasa niini sa batan-on pa ko. Apan sa pagkatinuod, ang akong “pagtuon” sa kasulatan sa wala pa ang kinatibuk-ang komperensya sa Oktubre 2018 maingon og hinanali nga paglaktaw-laktaw. Busa sa dihang si Presidente Nelson mihagit sa mga babaye sa Simbahan sa pagbasa sa Basahon ni Mormon sa katapusan sa tuig, kini ingon og mao ang pagdapit nga akong gikinahanglan.
Ang iyang pagdapit miabut uban sa pipila ka gamhanang mga saad usab. Siya miingon, “Samtang kamo mainampoong magtuon, ako mosaad nga ang kalangitan maabli alang kaninyo” (“Ang Partisipasyon sa mga Sister sa Pagpundok sa Israel,” Liahona, Nob. 2018, 69).
Samtang ako naminaw, gibati nako ang kahinam sa pagpasalig og usab sa basahon nga akong gimahal pag-ayo, ug dili ako makahulat sa kalangitan nga moabli alang kanako.
Ug kini ilang gihimo. Sa daghang mga paagi. Human makompleto kini nga hagit sa Basahon ni Mormon, migahin ako og panahon sa pagpamalandong sa kasinatian nga ako aduna ug sa gihapon anaa kanako. Natingala ako sa unsay akong nakat-unan, unsay akong gibati, ug kinsa ako mahimo pinaagi sa pagtuon sa dinasig niini nga mga pahina.
Unsay Akong Nakat-unan
Samtang ako nagbasa sa Basahon ni Mormon nga mas paspas ang kakusgon kaysa akong naandan, ang asoy sa tinuod madasigon ug maukyabon. Akong gibati ang ingon nga koneksyon niadtong kansang mga pagpamatuod ug mga kasinatian naglangkob niini nga basahon.
Gikan sa igsoon nga lalaki ni Nephi nga si Sam, akong nakat-unan nga ang hilum nga pagkamatarung halangdon. Gikan ni Alma akong nakat-unan nga dili gayud itugyan ang akong hugot nga pagtuo. Gikan sa iyang anak nga lalaki, nga kini dili pa gayud ulahi ang pagduol kang Kristo ug sa pagsinati sa makalimpyo nga gahum sa Iyang walay kinutuban nga Pag-ula (tan-awa sa Mosiah 27; Alma 36). Ang amahan ni Haring Lamoni midasig kanako sa paghimo og dugang nga mga sakripisyo alang sa Dios (tan-awa sa Alma 22:15, 18). Si Pahoran mitudlo kanako sa pagmalinawon ug sa pagka-Kristohanon kon mobati ako nga wala masabti (tan-awa sa Alma 61). Gikan sa igsoon nga lalaki ni Jared akong nakat-unan nga samtang importante ang buhat sa atong bahin, kini dili igo; kita nagkinahanglan sa tabang ug makaabag nga gahum ni Kristo (tan-awa sa Ether 2–3). Gikan ni Moroni akong nakat-unan nga bisan og kita mobati nga nag-inusara, kita sa tinuod wala gayud mag-inusara (tan-awa sa Mormon 8:3, 5).
Nakakat-on ako sa pagpangutana sa Ginoo sa kanunay, pag-ampo sa tumang kamainiton ug uban sa hugot nga pagtuo. Akong nakat-unan ang importansya sa pagtipig og mga rekord ug sa pagpamatuod ug sa hustong paagi sa paghinulsol. Akong nakat-unan nga ang Dios mahunahunaon, nga si Kristo maloloy-on, ug nga Sila usa sa katuyoan.
Akong nakat-unan nga ang “[pagbusog] diha sa mga pulong ni Kristo” (2 Nephi 32: 3) naghatag sa direksyon nga akong gikinahanglan alang sa akong kinabuhi.
Akong nakat-unan, gani pag-usab, nga si Joseph Smith wala—ug dili makahimo—sa pagsulat niini nga basahon.
Unsa ang Akong Gibati
Kini ba nagkadungan og hitabo nga akong gibasa ang salmo ni Nephi sa (2 Nephi 4) sa usa ka adlaw nga gibati nako ang gibug-aton sa akong mga kakulangan ug mga kahuyang? Sa tinuod dili. Kini ba usa ka malipayon nga hitabo nga akong nakit-an ang pahayag ni Haring Lamoni, “O unsa ka kahibulongan ang mga buhat sa Ginoo, ug hangtud kanus-a ang iyang pagtugot uban sa iyang mga katawhan” (Mosiah 8:20) sa dihang gibati nako nga nag-inusara sa akong mga pagsulay? Dili! Diha sa Dios, walay magkadungan nga hitabo, hingpit lamang nga pagkapahimutang nga malumong mga kalooy, ug ako ang tigdawat kutob sa gidaghanon sa akong mabasa. Ako tinud-anay nga mibati sa gugma sa Langitnong Amahan alang kanako ug sa usa ka dili hitupngan nga pagbati sa kalinaw samtang akong giunlod ang akong kaugalingon diha sa Basahon ni Mormon.
Kini mao ang makaayo nga gahum sa Manluluwas nga akong gibati kadaghanan sa akong tibuok nga pagbasa sa Basahon ni Mormon. Bersikulo human sa laing bersikulo nagpamatuod sa Iyang grasya, kalooy, kapuangod, ug walay katapusan nga gugma. Samtang nagbasa ako mahitungod ni Jesukristo, ako nasanapan sa pagpasalamat alang sa Iyang sakripisyo. Usa sa labing dako nga milagro nga akong nasinati samtang nagbasa mao ang pagbati sa hingpit nga kapasayloan alang sa nagsunod-sunod nga dili maayong mga pagpili nga gihimo sa mga tuig nga milabay. Akong gibati ingon og ang Manluluwas direktang nakigsulti kanako samtang ako nagbasa. Sa akong kasingkasing gibati nako ang mga pulong, Kini panahon na sa pag-uswag. Si Kristo sa tininuod mihatag sa pagkaayo nga akong gikinahanglan.
Bisan og wala ako makakita sa nabanhaw nga Kristo sama sa mga Nephite (tan-awa sa 3 Nephi 11), akong gibati ang Iyang presensya sa akong kinabuhi samtang nagbasa ako mahitungod Kaniya diha sa Basahon ni Mormon. Nakasabut siya sa tinuod sa matag usa kanato ug sa atong talagsaon nga mga pagsulay, ug Siya adunay gahum sa pagluwas, paghupay, ug pag-ayo kanato.
Kinsa ako Mahimo
Samtang sa matag adlaw giunlod ko ang akong kaugalingon sa Basahon ni Mormon, ako mas mapailubon, manggiloy-on, mapasalamaton, ug malaumon. Ako may kalagmitan nga mahimong dili kaayo hakog ug dili kaayo mabalaka sa kalibutanong mga butang.
Tungod sa Basahon ni Mormon ug sa Espiritu nga gidala sa akong kinabuhi, ako usa ka mas maayong inahan, asawa, anak nga babaye, ug higala. Ako usa ka mas mapasaligong disipulo ni Jesukristo.
Sa unsang paagi ang usa ka basahon aduna sa tanan nga mga tubag? Sa unsang paagi ang usa ka basahon makatuman og daghan kaayo?
Usa ka basahon lamang nga gidesinyo sa Dios ang adunay ingon niana nga gahum. Ug ako nasayud nga kini gayud iya sa Dios.
Sama sa gisaad ni Presidente Nelson, ang kalangitan sa tinuod nahimo nga abli alang kanako, sa daghang mga paagi kaysa akong sukad mahunahunaan. Busa mopadayon ako sa pagbasa ug pagtuon sa Basahon ni Mormon. Mopadayon ako sa pagsiksik sa mga pahina niini ug sa pagpangita ni Kristo diha niini tungod kay kini nga basahon tinuod ang tanan mahitungod Kaniya.