Digital Lamang: Mga Young Adult
Giya sa Inyong Young Adult sa Pagpakabuhi: Makabayaw nga mga Kinutlo gikan sa Atong mga Lider alang sa Panahon nga Ikaw Labing Nagkinahanglan Niini
Usahay kita nagkinahanglan og makahupay nga mga kamatuoran sa panahon nga ang kinabuhi malisod.
Ang pagka-young adult mahimong usa ka nindot kaayo nga panahon nga puno sa bag-ong mga kasinatian ug kulbahinam nga mga oportunidad. Apan kini usab mahimong malisod. Usahay ang umaabot makita nga mamingawon samtang kita naghulat alang sa gisaad nga mga panalangin o kon ang kinabuhi wala mahimo sa paagi nga kita naghanduraw niini nga mahimo.
Niini nga mga higayon, kita makatan-aw ngadto sa dinasig nga mga pulong sa atong mga propeta, apostoles, ug ubang mga lider sa Simbahan. Sila hingpit nga nahibalo kon unsa ka gubot kini nga panahon sa kinabuhi nga mahimo ug mopakigbahin og makausab sa kinabuhi nga tambag ilabi na alang kanato.
Ania ang pipila sa ilang makaawhag nga mga mensahe nga gihatag ilabi na ngadto sa mga young adult sa pagtabang kanatong tanan diha sa panaw sa kinabuhi:
Kon Kamo Naguol mahitungod sa Umaabot
“Sa usa ka pagsabot, ang inyong gagmay ug yano nga mga sakripisyo mao ang mga tuldok sa inadlaw nga pagpakabuhi nga naghimo sa obra maestra nga pinintal sa inyong kinabuhi. Tingali dili ninyo makita kon giunsa sa mga tuldok pagkonektar karon, ug kamo wala pa manginahanglan. Pagbaton lamang og hugot nga pagtuo igo alang sa panahon nga inyong gipuy-an karon. Salig sa Dios, ug ‘gikan sa gagmay nga mga butang [magagikan] ang mga dagko’ [Doktrina ug mga Pakigsaad 64:33]. …
“Tungod kay ang Dios nakahatag kaninyo sa inyong kabubut-on, kamo makapili og daghang mga direksiyon nga adtoan ug sa gihapon magpuyo og usa ka makatagbaw nga kinabuhi. Ang mortalidad usa ka istorya nga bukas ang kataposan, kamo ang mopili sa inyong kaugalingong panimpalad nga istorya. Kamo adunay mga sugo, kamo adunay mga pakigsaad, kamo adunay dinasig nga propetikanhong tambag, ug kamo adunay gasa sa Espiritu Santo. Sobra na kana sa paggiya kaninyo ngadto sa mortal nga kamaya ug mahangturong hingpit nga kalipay.”
Elder Dieter F. Uchtdorf sa Korum sa Napulog Duha ka Apostoles, “The Adventure of Mortality” (tibuok kalibotan nga debosyonal alang sa mga young adult, Ene. 14, 2018), Gospel Library.
Kon Kamo Wala Mobati nga Igo ang Kamaayo
“Tingali makita nato ang atong mga kaugalingon nga mas menos og gamay kay sa kita mao. Dili takos. Walay talento. Walay butang nga espesyal. Kulang sa kasingkasing, hunahuna, mga kapangohaan, karisma, o pamarog aron mas magamit og kanunay sa Dios.
“Moingon ka nga ikaw dili hingpit? Dili igo ang imong kamaayo? Parehas ta!
“Ikaw na tingali ang tawo nga gipangita sa Dios.
“Ang Dios wala magkinahanglan kanimo nga mahimong talagsaon, ilabi na nga hingpit.
“Siya mokuha sa imong mga talento ug mga abilidad ug mopilopilo niini—bisan tuod kon kini maingon og daginuton sama sa pipila ka pan ug mga isda. Kon kamo mosalig Kaniya ug magmatinud-anon, Siya mopalambo sa imong mga pulong ug mga lihok ug mogamit niini sa pagpanalangin ug pagpangalagad ngadto sa pundok sa katawhan!”
Elder Dieter F. Uchtdorf sa Korum sa Napulog duha ka Apostoles, Facebook, Okt. 15, 2021, facebook.com/dieterf.uchtdorf.
Kon Gibati Ninyo nga Nabug-atan sa Kalibotan
“Minahal nga batan-ong mga higala, hinumdomi: Kamo—sama ni Esther natawo sa ingon nga panahon nga sama niini. Ayaw pagkamahinadlukon, ug ayaw pagkawala og kadasig. Ang Dios magauban kaninyo sa inyong panaw sa kanunay. Siguroha lamang ang pagdala Kaniya ug sa Iyang pulong uban kaninyo, ug hinumdomi, pag-ampo sa kanunay nga madungog ang Iyang tingog diha sa mga kasulatan.”
Elder Jeffrey R. Holland sa Korum sa Napulog Duha ka Apostoles, Facebook, Mar. 9, 2021, facebook.com/jeffreyr.holland.
Kon Bation Ninyo ang Kasakit sa Kasingkasing
“Kon ang pagsalig gibudhian, maguba ang mga damgo, mahugno ug mahugno pag-usab ang kasingkasing, nasakitan ug nasakitan pag-usab, kon gusto kita og hustisya ug nagkinahanglan og kalooy, kon nagkumo ang atong mga kamot ug nag-agas ang atong mga luha, kon kinahanglan kitang mahibalo unsay angay natong huptan ug unsay dili, kita sa kanunay mahimong mohinumdom Kaniya. Dili sa kanunay ingon niana ka bangis ang kinabuhi. Ang walay sukod Niyang kalooy makatabang kanato nga makit-an ang atong dalan, kamatuoran, ug kinabuhi [tan-awa sa Juan 14:6].”
Elder Gerrit W. Gong sa Korum sa Napulog Duha ka Apostoles, “Kanunay nga Mahinumdom Kaniya,” Liahona, Mayo 2016, 108.
Kon Ikaw Mobati og Kasubo
“Samtang nagdiskobre kita sa Dios, usahay ang dili damhon nga mga tubag sa mga pag-ampo motabang kanato nga makabuntog sa lisod nga mga sitwasyon, motabang kanato nga makakaplag og pagkahisakop sa komunidad, pagwagtang sa kangitngit gikan sa atong mga kalag, ug paggiya kanato sa pagkakita og espirituhanong kasilongan ug pagkahisakop sa kaanindot sa Iyang mga pakigsaad ug malahutayon nga gugma.”
Elder Gerrit W. Gong sa Korum sa Napulog Duha ka Apostoles, “Tanan nga mga Kanasuran, mga Kaliwatan, ug mga Pinulongan,” Liahona, Nob. 2020, 40
Kon Ikaw Mobati nga Nakasala
“Akong minahal nga batan-ong mga higala, aduna sa kanunay usa ka paagi sa pagbalik. Si Jesukristo (ug ang Iyang ebanghelyo) mao ang paagi. Wala kamo makahimo og bisan unsang sala nga seryoso kaayo nga kamo dili na maabot sa gugma ug maulaong grasya sa Manluluwas. Samtang kamo mobuhat og mga lakang sa paghinulsol ug pagsunod sa balaod sa Dios, mosugod kamo sa pagbati kon unsa gayod ka dako ang tinguha sa Langitnong Amahan ug sa Iyang Hinigugmang Anak kaninyo nga mabalik ngadto Kanila! Sila gusto kaninyo nga magmalipayon. Sila mobuhat sa tanan diha sa Ilang gahom nga dili molapas sa inyong kabubut-on o sa Ilang mga balaod sa pagtabang kaninyo nga mobalik.”
Presidente Russell M. Nelson, “The Love and Laws of God” (Brigham Young University debosyonal, Sept. 17, 2019), 3, speeches.byu.edu.
Kon Kamo Nagkinahanglan og Paglaom
“Inyong … madunggan kami nga mopahayag uban ni Moroni nga ang paglaom mahinungdanon kon gikinahanglan nga kita ‘modawat [sa] kabilin nga ang [Dios] nag-andam [alang kanato]’ [Ether 12:32]. Buot namo nga kamo moangkon niana nga kabilin isip mga anak nga lalaki ug mga babaye sa usa ka hari. Sa pagbuhat niana, kita kinahanglan gayod makaamgo nga ang paglaom dili lamang ang mensahe ug paagi sa kinaiyanhong malaumon; kini mao ang pribilehiyo sa tanan kinsa nagtuo.”
Elder Jeffrey R. Holland sa Korum sa Napulog Duha ka Apostoles, “A Future Filled with Hope” (tibuok kalibotan nga debosyonal alang sa mga young adult, Ene. 8, 2023), Gospel Library.
Kon Kamo Mobati og Kakapoy
“Human kamo makatan-aw sa sulod, mangamuyo ako nganha kaninyo sa pagtan-aw sa ibabaw. Ang mga mata nga nagdung-aw kaninyo mao kadtong sa inyong mapinanggaong Amahan sa Langit kinsa makahimo, ug mohimo sa paghatag diha kaninyo sa tanan niadtong mga butang nga inyong gilauman diha sa pagkamatarong. Dili kamo makakuha niining mga panalangin pinaagi sa paggukod niini. Palihog hunong sa pagdagan hangtod nga makutasan ka. Paghilom, ayaw paglihok. Ipasayon kini. Magmaaghop ug magmapainubsanon sa kasingkasing, ug mag-ampo. Ako mopamatuod kaninyo nga moabot ang mga milagro kon kita maghinay, kon kita magkalma, ug kon kita moluhod. Ang tanan nga ang Amahan aduna mahimo nga usa ka adlaw niana mainyo [tan-awa Doktrina ug Mga Pakigsaad 84:33–38].”
Sister Patricia T. Holland, “A Future Filled with Hope” (tibuok kalibotan nga debosyonal alang sa mga young adult, Ene. 8, 2023), Gospel Library.
Kon Kamo Nagkinahanglan og Pagbalik sa Pasalig
“Ang Dios nasayod sa tanan ug nakakita sa tanan. Sa tanang kahangtoran, wala gyuy laing nakaila kaninyo o nagpakabana mahitungod kaninyo labaw kaysa Iyang gihimo. Wala gyuy laing mas maduol kaninyo kaysa Kaniya. Kamo makapahayag sa inyong mga gibati ngadto Kaniya ug makasalig Kaniya nga mopadala sa Espiritu Santo ug sa mga anghel sa pag-amuma kaninyo. Iyang gipakita ang Iyang kinadak-ang paghigugma sa dihang Iyang gipadala ang Iyang Bugtong Anak aron magpakamatay alang kaninyo—aron mahimong inyong Manluluwas ug inyong Manunubos!”
Presidente Russell M. Nelson, “Mga Pagpili alang sa Kahangtoran” (tibuok kalibotan nga debosyonal alang sa mga young adult, Mayo 15, 2022), Gospel Library.