“Nganong ang Paghinumdom kon si Kinsa Kamo Importante,” Liahona, Peb. 2024.
Mga Young Adult
Nganong ang Paghinumdom kon si Kinsa Kamo Importante
Kamo gipadala dinhing dapita, karon mismo, aron motabang sa pag-andam sa kalibotan alang sa mahimayaon nga pagbalik sa Ginoo.
Ang propeta sa Ginoo, si Presidente Russell M. Nelson, nagsulti og pipila ka makapahinam nga mga butang mahitungod sa umaabot. Hunahunaa kining maisugon nga propetikanhong pamahayag:
“Akong minahal nga mga kaigsoonan, daghan kaayong talagsaong mga butang anaa sa unahan. Sa umaabot nga mga adlaw, kita makakita sa labing dako nga mga pagpakita sa gahom sa Manluluwas nga ang kalibotan sukad wala makita. Tali karon ug sa adlaw sa Iyang pagbalik ‘uban sa gahom ug dakong himaya’ [Joseph Smith—Matthew 1:36], Siya motanyag og dili maihap nga mga pribilehiyo, mga panalangin, ug mga milagro diha sa mga matinud-anon.”1
Ako mohatag og piho nga pagtagad sa dihang si Presidente Nelson nagsulti og mga butang nga sama niana. Sa akong paghunahuna sa unsay panghitabo sa kalibotan karon, ang akong mga hunahuna nabaling ngadto kaninyo isip ang mga kasamtangan ug ang umaabot nga mga lider sa Simbahan. Kamo mismo personal nga makasinati sa daghang talagsaong pagpakita sa gahom sa Ginoo. Gani, ako nagtuo nga kamo mahimong labaw pa nga mga saksi—kamo mahimong mga partisipante. Ang Ginoo mogamit kaninyo isip Iyang mga instrumento sa pagpahinabo sa mga milagro sa ulahing mga adlaw.
Ang Ginoo Mosalig Kaninyo
Nganong naghunahuna ko sa ingon? Tungod sa unsa ang giingon ni Presidente Nelson mahitungod kaninyo. Piho nga nagsulti ngadto sa mga young adult, siya namahayag, “Kamo ‘usa ka pinili nga henerasyon’ (1 Pedro 2:9), nga gi-orden nang daan sa Dios nga makabuhat og talagsaong buhat—sa pagtabang sa pag-andam sa mga katawhan niini nga kalibotan alang sa Ikaduhang Pag-anhi sa Ginoo!”2
Kamo ang usa sa “halangdon ug bantogan” (Abraham 3:22). Ang Ginoo mosalig kaninyo, ug Siya nakahibalo nga kamo makahimo sa pagtuman sa dagkong mga butang gamit ang mga talento ug mga gasa nga gihatag Niya kaninyo.
Kon ang mga gilauman taas, natural lang nga mabalaka nga kita dili igo. “Unsa kaha kon mabulilyaso nako kini ug pakyason ang Ginoo?” Ang kahadlok sa kapakyasan mahimong makaparalisa. Apan ako nasayod nga kamo molampos tungod sa duha ka rason: (1) unsa ang akong nahibaloan mahitungod kanimo ug (2) unsa ang akong nahibaloan mahitungod sa Manluluwas si Jesukristo.
Hinumdomi Kon si Kinsa Kamo
Buhaton ni Satanas ang tanang butang kutob sa iyang mahimo aron libogon ug ihisalaag kamo mahitungod kon si kinsa gayod kamo. Ingon ana ang iyang mga plano aron mapugngan kamo gikan sa inyong makapahinam nga umaabot. Sa pagbatok niini, si Presidente Nelson nagtudlo kanato uban sa katin-aw mahitungod sa atong tinuod nga pagkatawo. “Una ug labing importante, kamo anak sa Dios,” miingon siya. “Ikaduha, isip miyembro sa Simbahan, kamo anak sa pakigsaad. Ug ikatulo, kamo mga disipulo ni Jesukristo.”3
Nganong Importante kana? Hunahunaa kon unsa gayod ang kahulugan nga mahimong usa ka anak sa Dios. Kini nangahulugan nga kamo adunay pagkabalaan diha kaninyo. Kini nangahulugan nga kamo adunay mahangturon nga bili—sukaranang bili, independente sa inyong yutan-ong mga kahimtang. Ang inyong potensiyal walay kinutoban!
Labaw pa nianang tanan, kamo mga anak sa pakigsaad. Kana naghatag kaninyo og usa ka espesyal nga bugkos uban sa Langitnong Amahan ug ni Jesukristo.4 Sama sa kaminyoon nga gibugkos ang magtiayon ug nagpasabot og mas mapasaligon nga relasyon kay sa pakig-date, ang inyong mga pakigsaad mobayaw sa inyong mga relasyon ngadto sa Dios ngadto sa mas taas nga ang-ang sa pasalig ug gahom.
Agi ug dugang, kamo disipulo ni Jesukristo. Kana nangahulugan nga kamo maningkamot sa paghigugma sama sa Iyang paghigugma, mopasaylo sama sa Iyang pagpasaylo, ug mobarog alang sa kamatuoran sama sa Iyang gibuhat sa tibuok niyang mortal nga kinabuhi.
Kon ikaw makakita og anak sa Dios, usa ka anak sa pakigsaad, ug usa ka disipulo ni Jesukristo kon kamo manamin, nan ako masaligon nga kamo makakab-ot sa taas nga mga gilauman sa Ginoo diha kaninyo sama sa uban sa wala pa kamo mohimo.
Si Ester nakasabot sa iyang tinuod nga pagkatawo samtang iyang gipakigbatokan ang iyang mga kahadlok, miluwas sa iyang katawhan, ug mihatag og himaya ngadto sa Dios. Sama ni Ester, kamo giandam “tungod ug alang sa panahon nga sama niini” (Ester 4:14).
Si Jeremias wala magdahom nga siya sarang sa tawag sa Dios alang kaniya. Ang Ginoo mipahinumdom ni Jeremias sa iyang mahangturong pagkatawo “Sa wala pa ikaw buhata … gipili ko na ikaw aron mahimong propeta alang sa kanasoran” (Jeremias 1:5). Siya usab misaad nga mobutang sa Iyang mga pulong sa baba ni Jeremias (tan-awa sa Jeremias 1:9). Ang susamang mga panalangin ang mahimong mainyoha kon kamo mohinumdom kon si kinsa kamo ug nganong ania kamo dinhi.
Hinumdomi kon si Kinsa Siya
Ug gani, bisan kon mosulay kamo sa pagtan-aw sa inyong kaugalingon sama sa pagtan-aw sa Ginoo kaninyo, sa higayon nga kamo mobati nga nawad-an og kadasig tungod sa inyong kaugalingong mga kahuyang. Kana mahitabo kanatong tanan. Kini nahitabo gani ngadto ni Nephi—Ang samang tawo kinsa maisugon nga mibiya sa Jerusalem, mikuha sa tumbagang mga palid, miluwas sa iyang pamilya gikan sa kagutom didto sa kamingawan, mihimo og barko, mitabok sa kadagatan, ug misugod og bag-ong kinabuhi sa usa ka wala hiilhi nga yuta. Human nga natuman kadtong tanan, sa usa ka higayon sa pagpamalandong sa kalag, si Nephi mituaw:
“O pagkaalaot ko nga tawo! Oo, ang akong kasingkasing nagmasulub-on tungod sa akong pagkahuyang; ang akong kalag nagmagul-anon tungod sa akong kadaotan” (2 Nephi 4:17).
Apan dayon, sa usa ka mahinungdanong pagbawi, miingon siya: “Bisan pa niana, ako nasayod kang kinsa ako mosalig. Akong Dios ang akong kaabag” (2 Nephi 4:19–20). Si Nephi nasayod nga ang Ginoo, mao ang iyang kalig-on sa tanang higayon, magpadayon sa paglig-on kaniya. Siya namahayag, “Pagmata, akong kalag! Ayaw na paglunang sa sala” (2 Nephi 4:28) ug “Pagmaya, O akong kasingkasing …; oo, ang akong kalag magmaya diha kanimo, akong Dios, ug ang lig-on nga sukaranan sa akong kaluwasan” (2 Nephi 4:30).
Sa higayon nga kamo magduhaduha sa inyong kaugalingon, kamo makasulti sama sa gibuhat ni Nephi, “O Ginoo, ako misalig kanimo, ug ako mosalig kanimo sa kahangtoran” (2 Nephi 4:34). Kon kamo mobati og kahadlok o mawad-an og kadasig, hinumdomi kining mga pulong sa Ginoo: “Ayaw kahadlok, gagmay nga panon; pagbuhat og maayo; tugoti nga ang yuta ug impyerno maghiusa sa pagbatok kaninyo, kay kon kamo gitukod diha sa akong lig-on nga sukaranan, sila dili makabuntog” (Doktrina ug mga Pakigsaad 6:34). Kamo mahimong lig-on tungod kay Siya lig-on.
Uban sa Iyang Kalig-on, Kamo Makahimo Niini!
Sa mga higayon, nga kamo pagasulayan aron makita kon unsa ka lig-on ang inyong gitukod nga kinabuhi diha sa pundasyon ni Jesukristo. Kadto nga mga higayon, “kon ang yawa mopadala sa iyang mapintas nga mga hangin … [ug] tanan niya nga ulan nga yelo ug ang iyang mapintas nga unos mohampak diha kaninyo,” dili lang ang kalig-on sa balay ang mahinungdanon. Ang kalig-on sa koneksiyon sa balay ngadto sa “lig-on nga sukaranan,” “ang bato sa atong Manunubos, nga mao si Kristo” (Helaman 5:12).
Ako mopamatuod nga kamo gitakda nga mahimong importante nga manunula sa pag-andam sa kalibotan alang sa Ikaduha nga Pag-anhi sa Manluluwas. Maanindot, milagruso nga mga butang kinahanglang mahitabo tali karon ug unya. Mga kasingkasing mausab, mga paril sa pagkawalay pagtuo malumpag, ang mga utlanan sa tulda sa Zion malugwayan, ang pamilya sa Dios mapundok. Ug kamo mahimong kabahin niini. Kitang tanan adunay mga hagit niining telestial nga kalibotan ug magsagubang og mga kinutoban sa unsay atong matuman nga kita ra, apan kita makapili sa pagbalik ngadto sa luwas ug kalinaw sulod sa kawan sa atong Manluluwas. Sa pagkatinuod, kita “[makahimo sa] tanang butang pinaagi kaniya nga nagapalig-on [kanato]” (Mga Taga-Filipos 4:13).