Dali, Sunod Kanako

1 Nephi 16–22

Sa Unsang paagi ang Pagpasalamat Makatabang Kanato nga Molahutay og Maayo?

Ang mga pagsulay moabot sa tanang katawhan matarong man sila o dili matarong. Kon giunsa nato sa pagpili sa pagtubag sa mga pagsulay ug kon asa nato gidirekta ang atong pagtutok makahimo sa tanang kalainan.

Pagtutok diha sa Pagpasalamat

Sa dihang namatay si Ishmael, ang iyang mga anak nga babaye nagbangutan sa iyang kamatayon “tungod sa ilang mga kasakit diha sa kamingawan” (1 Nephi 16:35). Kini nga kababayen-an miantos og dakong kalisdanan, apan sa pagpabilin nga nakatutok diha sa ilang mga pagsulay maoy hinungdan sa ilang pagbagulbol batok sa propeta (Lehi) ug nawad-an sa ilang panglantaw sa ilang mga panalangin (tan-awa sa 1 Nephi 16:36).

Si Nephi nagpuyo latas sa samang mga pagsulay apan wala nagbagulbol, bisan sa dihang ang iyang gapasan nabali ug ang grupo wala makakuha og pagkaon usa ka higayon niana (tan-awa sa 1 Nephi 16:18–22). Mitubag siya nga may pagpailob ug hugot nga pagtuo.

Sa diha na lamang nga ang anak nga mga babaye ni Ismael ug ang ilang mga bana gipanton sa Ginoo nga sila mihinulsol ug “misalikway sa ilang kasuko” (tan-awa sa 1 Nephi 16:39). Dayon, bisan sa ilang pagkaon og hilaw nga karne didto sa kamingawan, ang anak nga mga babaye ni Ishmael mihatag og talagsaong pag-amuma alang sa ilang mga anak ug “mga mahimsog, oo, gani sama ngadto sa mga kalalakin-an, ug sila mipadayon sa ilang mga pagpanaw nga wala nay mga pagbagulbol” (1 Nephi 17:2).

Bisan og ang grupo mipadayon sa “[pag-]agi sa dagko nga mga kasakit sa kamingawan” (1 Nephi 17:1), si Nephi mihinumdom nga “hilabihan ang mga panalangin sa Ginoo [kanila]” (1 Nephi 17:2).

Ang pagpasalamat makatabang kanato nga makita ang mga panalangin sa Ginoo dili igsapayan sa atong mga pagsulay.

Kalihokan

Idrama-drama ang pipila ka lisod nga mga kahimtang nga lagmit atubangon sa inyong pamilya o giatubang sa kaniadto. Hisgoti kon unsaon ninyo sa pagtubag ang mga hagit nga may pasalamat ug hugot nga pagtuo.