“Ikapulo: Atong Pagpahayag sa Hugot nga Pagtuo,” Liahona, Peb. 2024.
Ikapulo: Atong Pagpahayag sa Hugot nga Pagtuo
Nahugno ko sa dihang dili nako mabag-o ang akong rekomend sa templo, apan ang akong hugot nga pagtuo sa pagsugod sa pagsunod og usab sa balaod sa ikapulo nagdala og dako nga mga panalangin og kalinaw.
Ang pamilya Datiles nalingaw sa usa ka kalihokan sa pag-bowling. Sa dihang gagmay pa ang mga bata, si Brother Datiles naglisod sa pagbayad og ikapulo tungod sa iyang napakyas nga negosyo. Siya ug ang iyang asawa nagtakda og tumong nga mahimong hingpit nga mga tigbayad sa ikapulo.
Litrato sa maayong kabubut-on sa tagsulat
Pipila ka tuig ang milabay, sa dihang gagmay pa ang akong mga anak, nakigkita ko sa akong lider sa pagkapari aron mabag-o ang akong rekomend sa templo. Apan sa dihang nangutana siya kon ako ba usa ka hingpit nga tigbayad sa ikapulo, gikinahanglan nako siyang sultihan nga ako dili. Gusto kong mamahimo nga hingpit nga tigbayad sa ikapulo, apan naglisod ko sa pagbayad og ikapulo tungod sa usa ka sayop nga desisyon nga akong nahimo diha sa usa ka napakyas nga negosyo.
Human naminaw sa akong mga panglimbasog ug nangutana mahitungod sa akong pinansiyal nga mga panginahanglan, siya mabination ug mapuangoron nga nagpahinumdom kanako mahitungod sa importansiya sa pagbutang sa akong hugot nga pagtuo diha sa Ginoo ug sa pagkahimong usa ka hingpit nga tigbayad sa ikapulo. Magkauban dayon namong girebyo ang unsay nasulat diha sa Malaquias 3:10: “Sulayi ninyo ako karon, nagaingon ang Ginoo sa mga panon, kon dili ba buksan ko kaninyo ang mga tamboanan sa langit, ug buboan ko kamo sa panalangin, sa pagkaagi nga wala na unyay dapit nga igong kabutangan sa pagdawat niini.”
“Nakasabot ko nga sakit alang kanimo nga dili mabag-o ang imong rekomend sa templo karong panahona,” miingon siya. “Apan ang kalipay nga imong mabati ug ang mga panalangin nga imong madawat mas dako pa gayod human nga ikaw madungganon nga mobayad sa imong ikapulo. Mahimo kitang magkita og usab alang sa usa ka pagbag-o sa rekomend sa templo human sa tulo hangtod sa unom ka bulan.”
Human niana nga interbiyo, ang akong asawa ug ako nag-istorya ug nag-ampo mahitungod niini. Segurado kami nga nasayod ang Langitnong Amahan kon unsa ka dako ang among tinguha nga mabalik didto sa templo aron makaapil sa sagrado nga mga ordinansa. Ang pag-adto sa templo importante kaayo kanamo. Didto sa balay sa Ginoo, dili lang kami makahatag og tabang ngadto sa among mitaliwan nga mga minahal, apan kami usab makasinati sa dakong kalipay, kalinaw, ug kakalma. Kining tanan bililhon kaayo nga mga panalangin nga among makuha gikan sa paghimo ug pagtuman og mga pakigsaad sa templo ug pagpahigayon og sagrado nga mga ordinansa didto. Among gitino nga ang ikapulo dili kaayo mahitungod sa kwarta ug mas mahitungod sa pagbutang sa among hugot nga pagtuo diha sa Langitnong Amahan ug kang Jesukristo. Ug kami nagtakda og usa ka tumong nga mahimong hingpit nga mga tigbayad sa ikapulo ug mobalik ngadto sa templo.
Uban niini nga mga tumong sa hunahuna, gibati namo nga gidasig sa pagbaligya sa among sakyanan. Kadto lamang ang among paagi sa komportable nga pagdala sa among pamilya, apan kami adunay hugot nga pagtuo nga ang Ginoo mopanalangin kanamo kon himoon namo kini nga sakripisyo. Nasayod kami nga mahimong lisod alang kanamo nga mosakay sa usa ka jeep nga naggunit og tulo ka batang babaye samtang ang akong asawa modala sa among mga bag, apan nasayod kami nga kadto mao ang husto nga butang nga buhaton aron makab-ot ang among mga tumong. Nagsugod kami sa pagbayad sa among ikapulo sa hingpit.
Human sa tulo ka bulan, nakigkita ko og usab sa akong lider sa pagkapari alang sa usa ka follow-up nga interbiyo. Nangutana siya mahitungod sa akong pagpamatuod sa ikapulo, ug ako nakasulti kaniya nga ako usa ka hingpit nga tigbayad sa ikapulo.
Ang akong asawa ug ako nakabag-o na gayod sa among mga rekomend sa templo, ug mibalik dayon kami sa templo. Nakab-ot namo ang among tumong sa pagbalik ngadto sa templo aron sa paghimo og mga pakigsaad ug pagdawat og mga ordinansa alang sa among mga katigulangan. Misugod sa pag-abli ang mga tamboanan sa langit. Misugod sa pag-abot ang mga panalangin. Ang akong mga pagbati sa kalipay ug kalinaw sa kahiladman labaw pa sa mahulagway.
Nagsakay gihapon kami gamit ang mga jeep ug usahay molapas sa among mga hunongan tungod kay kami nakatulog, apan ang kalipay sa pagkahimong hingpit nga mga tigbayad sa ikapulo ug ang mga panalangin sa pagsimba didto sa templo labaw pa kay sa bisan unsang pisikal nga mga kalisod.
Mipadayon ang panalangin. Human sa unom ka bulan, na-promote ko sa trabaho, diin wala lang ko nakadawat og mas taas nga sweldo apan nahimong kwalipikado usab alang sa mga benepisyo nga adunay sakyanan. Human sa unom ka bulan, ang Ginoo mihatag kanamo og bag-o nga kasakyan—ang among pamilya adunay sakyanan na usab, karon mas komportable kay sa sakyanan nga among gibaligya.
Ang Ginoo mituman sa Iyang mga saad kanako, ug pinaagi sa pagtuman sa Iyang mga sugo, ako usab nagtuman sa akong mga saad ngadto Kaniya.
Ang tagsulat nagpuyo sa Laguna, Philippines.