“Kalinaw Gipuli sa Among Kasakit,” Liahona, Pebrero 2024.
Mga Tingog sa mga Santos sa Ulahing mga Adlaw
Kalinaw Gipuli sa Among Kasakit
Ako wala maandam sa pagkawala sa akong amahan, apan ang plano sa Dios naghatag kanako og kalinaw.
Paghulagway pinaagi ni Ellen Marello
Ingon kadto og walay imposible alang sa akong amahan. Bisan pa man sa pagkabali sa iyang paa, siya mitukod og usa ka kongkreto, duha ka andana nga panimalay alang sa among pamilya samtang siya naggamit pa og saklay. Ang usa ka bali nga paa wala gani makapahunong kaniya sa pagtambong sa iyang mga reponsibilidad sa pagkapari o gikan sa pagserbisyo sa uban.
Sa dihang si Presidente Russell M. Nelson mipahibalo niadtong 2020 nga ang sakramento ipahigayon na diha sa atong mga panimalay, ang akong amahan, napuno sa kaligdong ug gugma alang sa Ginoo, miluhod sa matag Dominggo sa konkreto nga salog nga bali ang paa aron mopanalangin sa sakramento. Siya miingon nga importante ang magluhod sa pagpakita og pagtahod alang niining sagrado nga ordinansa.
Niadtong Mayo 18, 2020, ang akong minahal nga papa, akong bayani, namatay gumikan sa COVID-19. Ang iyang kamatayon kalit kaayo nga kami wala maandam. Siya 61 anyos pa lamang. Nasayran nako nga sama nga ang Dios mitahod sa kabubut-on, kami kinahanglan gayod motahod sa panahon sa Dios. Mao nga ako mapasalamaton alang sa Iyang saad, nga gitudlo pinaagi ni propeta Alma “nga ang mga espiritu sa tanan nga mga tawo, sa diha-diha nga sila mobiya gikan niining mortal nga lawas, oo, ang mga espiritu sa tanan nga mga tawo, bisan sila maayo o dautan, dad-on sa panimalay ngadto niana nga Dios kinsa mihatag kanila sa kinabuhi” (Alma 40:11). Tanang kalalakin-an ug kababayen-an!
Ang lubong sa akong papa gamay ug sagrado. Napulog duha kanamo mikanta og malipayon nga mga himno sa pagpasalamat ngadto sa Dios alang sa mortal nga kinabuhi sa akong papa. Sa dihang misugod kami sa pagpanganta sa “Kalag Ko May Kasanag Karon,”1 ang pamilya sa sunod kanamo, kanhi nagbakho tungod sila namatyan, nahimo nga hilom. Sila ingon og nahibulong nga kami mura lang og wala maapiktuhi nga namatyan, apan kami nakasinati sa kalinaw sa pagkahibalo nga adunay usa ka plano alang kanamo. Ako motuo nga sila usab mibati og kalinaw nga gihatag ni Jesus.
Ang kinabuhi dili sayon kon wala ang akong amahan, apan adunay kalinaw diha ni Kristo. Ang akong amahan ug ako suod kaayo, apan ako mobati kaniya nga mas duol kanako karon kay sa kaniadto. Ako naselyo ngadto kaniya ug ang akong mama alang sa kahangtoran, ug ako nasayod ang akong amahan buhi. Gimingaw kaayo ko niya, apan karon ako adunay duha ka amahan sa pikas habig sa tabil—ang akong Langitnong Amahan ug ang akong yutan-on nga amahan. Ako nasayod nga ang Amahan sa Langit mogiya kanako hangtod sa among sunod nga panagkita.