Digital Lamang: Mga Lider sa Simbahan Nagtudlo gikan sa Social Media
Ang mga Panalangin sa Pagkamasulundon
Tan-awa kon unsa ang natudlo sa mga propeta, apostoles, ug ubang mga lider sa Simbahan diha sa social media mahitungod sa importansya sa pagsunod sa mga sugo sa Dios.
Gentle Shepherd [Maaghop nga Magbalantay sa Karnero], ni Yongsung Kim
Ang paghisgot sa pagtudlo sa mga bata, si Presidente Russell M. Nelson namulong kabahin sa gahom sa pagkamasulundon ngadto sa mga sugo sa Langitnong Amahan. Miingon siya:
“Itudlo ang hugot nga pagtuo sa pagsunod sa tanang mga sugo sa Dios, kay nakahibalo nga kini gihatag sa pagpanalangin sa Iyang mga anak ug sa paghatag kanila sa hingpit nga kalipay [tan-awa sa 2 Nephi 2:25]. Pahimangno-i sila nga makasugat sila og mga tawo kinsa pilion lamang ang mga sugo nga ilang tumanon ug mobalewala sa uban nga ilang gipili nga supakon. Gitawag ko kini og pangkarinderya nga pagkamasulundon. Kini nga kinaiya sa pagpili-pili dili magsilbi. Mopadulong kini ngadto sa kauyamot. Sa pag-andam sa pagsugat sa Dios, sundon tanan Niyang mga sugo. Nagkinahanglan og hugot nga pagtuo ang pagtuman niini, ug ang pagtuman sa Iyang mga sugo makapalig-on niana nga hugot nga pagtuo.
“Ang pagkamasulundon mopadagayday sa mga panalangin sa Dios nga walay pagpugong. Siya mopanalangin sa Iyang masulundon nga mga anak og kagawasan gikan sa pagkaulipon ug pagkauyamot. Ug Siya mopanalangin kanila og dugang pa nga kahayag.”1
Samtang kita magpakita sa atong gugma ngadto sa Langitnong Amahan pinaagi sa pagsunod sa Iyang mga sugo (tan-awa sa Juan 14:15), kita makadawat og gamhanan nga mga panalangin. Sa pagtabang kanato diha sa atong pagpaningkamot og mas maayo nga pagsunod sa mga sugo sa Dios, hunahunaa kining bag-o nga mga pagtulon-an gikan sa mga lider sa Simbahan nga gimantala diha sa social media.
Ang Unang Dako nga Sugo—Higugmaa ang Dios
“Isip kanhi presidente sa [Unibersidad sa Brigham Young], malipayon akong mamulong ngadto sa mga estudyante ug mga magtutudlo atol niining debosyonal sa buntag. …
“Akong gidapit ang mga estudyante sa paghunahuna kon sila mangahas ba nga mahimong lahi ug kon sila nagpadayon ba sa unahan batok sa oposisyon sa kalibotan. Mas importante kaysa unsay mabuhat sa usa ka indibidwal isip usa ka estudyante mao ang mga pagpili nga ilang gihimo sa ilang personal nga mga kinabuhi—ang mga prayoridad nga ilang gibuhat sa tinuyo nga paagi o sa walay paghunahuna.
“Kinahanglan nga dili gayod nato kalimtan ang pagtulon-an sa Manluluwas nga ang ‘una og dakong sugo’ diha sa balaod mao ang ‘higugmaa ang Ginoo nga imong Dios uban sa tibuok mong kasingkasing, ug sa tibuok mong kalag, ug sa tibuok mong salabutan,’ ug ang ikaduha nga sugo ‘susama ra ngadto niini, Higugmaa ang imong silingan sama sa imong kaugalingon.’
“Ang paghigugma sa silingan—bisan unsa ka importante—dili mag-una sa gugma sa Dios ug sa pagkamasulundon ngadto sa Iyang mga sugo. Kon kita sa tinuoray nahigugma sa Dios ug nagserbisyo Kaniya ingon sa Iyang gitudlo kanato, atong higugmaon ang atong silingan sama sa paghigugma sa Dios kaniya ug sama nga Siya gusto kanato nga mohigugma ug moserbisyo kanila.
“Si Jesus kanunay nga mahigugmaon, apan sa walay kalainan higpit sa Iyang mga sugo ug mga gipaabot. Ngadto sa babaye nga nakasala og pagpanapaw Siya wala mohukom kaniya niana nga higayon, apan mitapos pinaagi sa pagtudlo kaniya sa ‘[pag]lakaw sa imong agianan, ug ayaw na pagpakasala pag-usab.’
“Ug Iyang gitapos ang makapoy nga pagtudlo sa Wali sa Bungtod uban ang dili ikatandi nga mando ‘Busa kamo kinahanglan magmahingpit, ingon nga hingpit ang inyong Amahan nga langitnon.’ Magpadayon kita ngadto nianang balaan nga kahimtang pinaagi sa mga prayoridad nga nagsunod sa Manluluwas nga dili mausab pinaagi sa kalibutanong mga mithi ug mga pamatasan.
“Ang pagsunod sa mga sumbanan sa ebanghelyo dili mohimo kanimo nga ubos ra o hukman ang imong panig-ingnan ngadto sa pagkaubos. Tanan kanato nakaila og mga tawo kansang mga hinimoan napalambo ang kalidad ug pagkatataw pinaagi sa pagkalahi gikan sa pundok sa katawhan.
“Akong balikon ang mga pulong nga natudlo ni Presidente Russell M. Nelson: ‘Palihog tuohi ko, nga kon ang inyong espirituwal nga pundasyon natukod nga lig-on diha ni Jesukristo, kamo dili kinahanglan nga mahadlok. Kon kamo nagmatinud-anon sa inyong mga pakigsaad nga gihimo didto sa templo, kamo lig-unon pinaagi sa Iyang gahom.’”
Presidente Dallin H. Oaks, Facebook, Sep.13, 2022, facebook.com/dallin.h.oaks.
Ang Kasugoan nga Magpabunyag
“Ang ebanghelyo yano. Tungod sa maulaong sakripisyo sa Manluluwas, kita malimpyo ug mausab. Kini nagsugod nga may hugot nga pagtuo diha ni Jesukristo. Kita nagtuo Kaniya, nagasalig Kaniya, ug nagsalig diha Kaniya. Kana nga hugot nga pagtuo naggiya kanato ngadto sa paghinulsol.
Atong ikapakita ang atong gugma alang Kaniya pinaagi sa pagsunod sa mga sugo. Mitudlo si Jesus pinaagi sa panig-ingnan ingon nga Siya sa Iyang Kaugalingon Mismo gibunyagan. Ang bunyag usa sa Iyang mga sugo.
“Human kita mabunyagan, Siya nagsaad sa paghatag kanato sa gasa sa Espiritu Santo. Kita pagagiyahan ug mahupay, ug ang Espiritu Santo motabang kanato nga mahibalo sa kamatuoran. Mabati nato ang Espiritu Santo nga uban kanato. Makabaton kita og mga pagbati sa kalinaw, gugma, ug hingpit nga kalipay, ug kita maadunay tinguha sa pagserbisyo sa uban. Maningkamot kita sa tibuok natong kinabuhi sa pagpahimuot sa Ginoo.
“Samtang kita nagtuo Kaniya, nagsalig Kaniya, ug nagdepende diha Kaniya—ug nagbuhat niini sa mas kanunay—atong bation ang kahupay sa pakig-uban sa Espiritu Santo. Kita makabaton sa kalig-on sa paglahutay sa bisan unsa nga hagit nga kita hatagan ug sa pagsunod sa mga sugo nga walay pagpugos.”
Presidente Henry B. Eyring, Facebook, Hunyo 24, 2023, facebook.com/henry.b.eyring.
Usa ka Yawe ngadto sa Pagkaplag sa Kalipay
“Ako nabuntog lamang sa kaayo sa Ginoo ug sa Iyang pagsalig nga Siya aduna diha kaninyo ug kanako. Kitang tanan ordinaryong mga miyembro sa Simbahan. Walay usa kanato nga mga superstar. Kita mga anak lamang sa Dios nga naningkamot sa pagbuhat sa matarong nga butang alang sa matarong nga rason. Naningkamot kita sa pagpadako sa atong mga pamilya sa matarong nga paagi aron sila mahigugma sa Ginoo ug gusto nga maninguha sa pagsunod sa Iyang mga sugo. Sa ngadto-ngadto, kita makabaton og pipila ka nindot, pinili nga mga pribilehiyo ug mga oportunidad.
“Kon ang atong kataposang paghukom moabot, dili ang gidaghanon sa mga miting nga atong gitambungan, ang gidaghanon sa mga miting nga atong gipahigayon, o ang tanang mga pagbisita nga atong nahimo. Hinoon, lawom ang pagpasalamat sa Ginoo niadtong naningkamot ug nagtabang sa uban pagsubay sa dalan sa pakigsaad.
“Si Jesukristo atong igsoon ug atong labing suod nga higala. Nahigugma siya kanato ug nakapakita kanato sa agianan. Ang mga butang nga ikaw ug ako nagkinahanglan sa pagkaplag sa kalipay anaa sa pagpaningkamot sa pagsunod sa Iyang mga sugo ug sa pagpaningkamot nga mahisama Kaniya kutob sa atong mahimo. Ang matag adlaw usa ka oportunidad sa pagtandog og kinabuhi, sa pagtabang ngadto sa usa ka tawo kinsa nagkinahanglan kanimo ug itanyag ang usa ka pulong sa pag-awhag.”
Presidente M. Russell Ballard (1928–2023), Facebook, Sept. 16, 2021, facebook.com/mrussell.ballard.
Tabang gikan sa Manluluwas
“Si Lesa ug ako malipayon nga migahin og pipila ka panahon uban niining talagsaong grupo sa mga misyonaryo sa Ang Simbahan ni Jesukristo sa mga Santos sa Ulahing mga Adlaw atol sa usa ka bag-ohay nga pagbisita ngadto sa Brazil Missionary Training Center. Among gihisgotgan ang mahitungod sa mga panalangin nga moabot gikan sa pagkamasulundon ngadto sa mga sugo sa Dios. Kini alang usab sa mga misyonaryo—ug alang kanatong tanan.
“Mipakigbahin ako ngadto niining maayo kaayo nga mga elder ug mga sister nga tanan kita mga anak sa usa ka mahigugmaong Langitnong Amahan. Nagtinguha siya sa atong seguradong kalamposan ug mahangturong pag-uswag dinhi niini nga kinabuhi ug didto sa sunod.
“Ang atong Manluluwas nga si Jesukristo makatabang kanato sa pagdawat niini nga mga panalangin gikan sa atong Amahan. Ako nagpamatuod Kaniya, ug sa Iyang balaang makaluwas nga tahas isip atong Manluluwas.”
Elder Gary E. Stevenson, Facebook, Hunyo 1, 2023, facebook.com/stevenson.gary.e.
3 ka Paagi sa Pagdawat og Espiritwal nga Panalipod
“Kita makapanalipod sa atong mga kaugalingon gikan sa malisod nga mga hagit sa kinabuhi diha sa espirituwal nga panalipod sa Manluluwas.’ Tulo ka aspeto nga makatabang kanato nga malakip sa espirituwal nga panalipod sa Manluluwas naglakip sa:
“Pagpangamuyo sa gahom sa Manluluwas diha sa atong mga kinabuhi.
“Pagtuman ug pagpasidungog sa sagradong mga pakigsaad uban ang pagka-eksakto.
“Pagkamatinuoron ngadto sa personal ug pamilya nga responsibilidad sa pagsunod sa mga sugo ug sa pagtudlo sa atong mga pamilya sa ebanghelyo.
“Kon kita makanunayon ug dili matarog sa pagsunod sa mga sugo sa Dios uban sa hugot nga pagtuo ug kakugi, sa pagkatinuod ang kahupay sa panalipod sa Manluluwas moilis sa sakit sa atong mga kasinatian, kalinaw moilis sa kaguliyang, paglaom moilis sa kaguol, ug mga pagsulay mahimong mga panalangin.”
Elder Ulisses Soares, Facebook, Peb. 9, 2023, facebook.com/soares.u.
Mas Mahunahunaon nga Pagpuyo
“Laing maanindot nga panahon sa Pasko ang nangabot ug nanglabay. Kadaghanan kanato mangandoy sa maanindot nga mga pagbati nga naglibot sa Pasko nga makalungtad sa tibuok tuig, apan nganong kita dili makahimo sa pagbati niini sa kasagaran? Ang Pasko usa ka panahon nga kita sa kinaiyanhong paagi mas mobati nga nahilig sa pagtan-aw ug sa pagserbisyo ug sa paghigugma sa uban diin, ingon sa gisulti sa mga kasulatan kanato, usa ka paagi sa paghigugma ug pagserbisyo sa Dios—mga gasa alang sa Manluluwas niini nga panahon nga kita nagsaulog sa Iyang pagkatawo. Kini usa ka panahon nga mas magpakabana sa uban, mas mahunahunaon nga pagpuyo sa una ug ikaduha nga dagkong mga sugo.
“Ang mga sugo sa paghigugma ug pagserbisyo sa Dios ug niadtong naglibot kanato sa tinuod alang sa atong kaugalingon nga kaayohan ug mohimo og mas daghan pang maanindot nga mga pagbati sa kalinaw ug hingpit nga kalipay ngadto sa atong mga kinabuhi kay sa bisan unsa pay mahimo sa laing mga butang. Samtang sa matag adlaw atong sundon ang panig-ingnan sa gugma sa Manluluwas ug pag-amuma alang sa uban, bisan sa labing gamay nga mga paagi, kita mahinumdom Kaniya kanunay ug sa hinayhinay mahimong mas mahisama Kaniya. Niana kini ‘bation nga sama sa Pasko’ ang kada adlaw tungod kay kadtong maanindot nga mga pagbati moabot pinaagi sa pagkapuno sa gugma sa Manluluwas. Atong tan-awon kon kita makahimo niining bag-ong tuig ‘sa pagbati sama og Pasko’ sa matag higayon. Hinaot tanan kaninyo adunay usa ka puno ni Kristo nga [tuig]!!”
Sister J. Anette Dennis, Facebook, Ene. 3, 2023, facebook.com/RS1stCounselor.
Usa ka Pagdapit gikan sa Dios sa Pagsunod Kaniya
“Usa sa … mga awit sa Primary nga akong bag-ohay nga gitun-an mao ang ‘I Need My Heavenly Father’ [Songbook sa mga Bata, 18]. Gusto ko kon giunsa niini nga awit sa pagpakigbahin nga ang atong Langitnong Amahan gusto nga kita magmalipayon ug nga kita makahimo sa paglipay pinaagi sa pagpili sa pagsunod Kaniya ug sa Iyang Anak, si Jesukristo. Ang Langitnong Amahan nahigugma sa matag usa kanato. Unsaon nimo sa pagpili sa pagserbisyo Kaniya karon?” …
“Gusto lamang akong [mopakigbahin] og usa ka bersikulo gikan niana nga awit. Kini nag-ingon, ‘Ako nagkinahanglan sa akong Langitnong Amahan sa pagtabang kanako sa matag adlaw. Siya ganahan nga mahimo kitang malipayon ug pilion ang matarong nga paagi.’ Nagustohan ko kana tungod kay kini usa ka pagdapit nga hinumdoman nga ang Dios maawhag pinaagi sa gugma alang kanato ug alang sa atong kalipay.
“Gigamit ko usab ang oportunidad sa pagbasa … sa usa sa eskriptuhanong mga pakisayran nga makita diha sa awit, ug kini anaa sa Alma 30:8. Kini nag-ingon, ‘Pagpili kamo niining adlawa, kang kinsa kamo moalagad.’
“Mga higala, ako naglaom nga kamo makig-uban kanako ug kamo mopili sa pagserbisyo sa Langitnong Amahan karon ug sa kada adlaw tungod kay Siya madasig sa paghigugma. Kita nahigugma Kaniya, ug kita gusto niana nga kalipay diha sa atong mga kinabuhi.”
Sister Tracy Y. Browning, Facebook, Sep. 26, 2022, facebook.com/Primary2ndCounselor.