“Sa Unsang Paagi nga ang Paghinulsol Mitabang Kanako nga Mouswag,” Liahona, Peb. 2024.
Mga Young Adult
Sa Unsang Paagi nga ang Paghinulsol Mitabang Kanako nga Mouswag
Kon ang Langitnong Amahan ug si Jesukristo igo nga nagtuo kanako aron padayon akong hatagan og dugang nga mga kahigayonan, nganong dili man usab ko motuo sa akong kaugalingon?
Paghulagway pinaagi ni Joshua Dennis
Sa dihang medyo bag-o pa ko sa pagkamisyonaryo, ang akong presidente sa misyon mihangyo kanako nga mahimong usa ka tigbansay.
Mibati ko nga dili gayod angayan. Unsaon man nako pagtudlo ang usa ka bag-o nga sister nga mahimong usa ka talagsaon nga misyonaryo kon ako dili pa gayod segurado kon nahibaloan na ba gayod nako ang tanan sa akong kaugalingon?
Sa pagkatinuod, nakahimo ko og daghang kasaypanan isip usa ka tigbansay, ug dili gayod maayo ang akong gibati mahitungod niini sulod sa usa ka panahon. Apan sa dihang nagsugod ko sa pagsusi sa akong mga kahuyang ug mga pagkulang ug naningkamot nga mahimong mas maayo, nakaangkon ako og pagpamatuod nga ang Ginoo naghatag kanato og “kahuyang nga [kita] mahimo nga magpaubos” tungod kay Siya makahimo sa “mahuyang nga mga butang nga mahimo nga malig-on ngadto kanila” (Ether 12:27). Nagsugod kong magkat-on og daghan mahitungod sa paghinulsol, nga dili lamang kon kita masayop—kini alang sa bisan unsang panahon nga gusto kitang mahimo nga mas sama sa Langitnong Amahan ug ni Jesukristo.
Sukad nauli gikan sa akong misyon, gikinahanglan kong mas makasabot niana kay sa sukad niadto.
Pagkapakyas
Bisan gimahal ko kaayo ang akong misyon, nanglimbasog ko sa paggamit sa mga leksiyon nga akong nakat-onan samtang nagserbisyo sa akong kinabuhi pagkahuman. Sa kataposan mipauli ko og sayo kay sa gilaoman tungod sa mga panglimbasog sa kahimsog sa pangisip ug dayon mibalhin gikan sa akong panimalay sa Pilipinas ngadto sa United Arab Emirates aron magsugod og trabaho.
Sukad mibalhin dinhi, naglisod ko sa pagbati nga ingon og nakahimo ko og pag-uswag ug nagpadayon sa unahan diha sa dalan sa pakigsaad. Sa akong misyon, akong mapahinungod ang akong tanan nga oras ug kusog ngadto sa ebanghelyo. Gamay ra kaayo ang akong kabalaka mahitungod sa akong temporal nga mga panginahanglan o kon unsa ang akong buhaton sa akong kinabuhi human sa akong misyon. Apan karon nga naningkamot ko sa pagbalanse sa ubang mga panginahanglan sa kinabuhi, gibati nako nga ingon og sige ko og kapakyas.
Ug tungod nagkulang ko sa maabagon, matinud-anon nga komunidad nga aduna ako didto sa Pilipinas ug sa eskedyul sa usa ka misyonaryo nga naghimo sa pag-uswag nga mas sayon gayod ug mas klaro, usahay mobati ko nga ingon og wala gayod ko nag-uswag.
Bag-o nga mga Kinaiya ug Bag-o nga Paglaom
Samtang nagpadayon ko nga nanglimbasog niini nga mga pagbati, kusganon akong mibati nga kinahanglan kong magpatuman og usa ka kinaiya nga aduna ako sa akong misyon. Isip usa ka misyonaryo nakat-onan nako kon unsa ka importante nga makigkonektar sa Langitnong Amahan kada gabii pinaagi sa pag-ampo ug matinuoron nga motimbang-timbang sa akong mga aksiyon sa matag adlaw. Mangutana ko sa Langitnong Amahan kon unsa ang akong maayo nga nabuhat, mangayo og kapasayloan gikan sa akong mga sala ug alang sa kalig-on sa pagbuntog sa akong mga pagkadili hingpit, ug dayon mangutana Kaniya kon unsaon nako nga mahimong mas maayo sa sunod nga adlaw.
Sa sinugdanan nahadlok ko sa pagsugod og buhat niini human sa akong misyon, ilabi na tungod kay mibati na ko nga ingon og gipakyas na nako ang akong kaugalingon ug ang Langitnong Amahan. Dili ko gusto nga mas mobati pa og dili maayo mahitungod sa akong mga pagkulang. Apan akong nahinumdoman kon unsay akong nakat-onan sa akong misyon: ang paghinulsol makahatag og hingpit nga kalipay. Sama sa gipasabot ni Elder Craig C. Christensen sa Seventy: “Ang paghinulsol sa kada adlaw ug pagduol ngadto ni Jesukristo mao ang paagi sa pagsinati og hingpit nga kalipay—kalipay nga molabaw pa sa atong mahunahuna [tan-awa sa 1 Mga Taga-Corinto 2:9]. Mao kana ang hinungdan nganong ania kita dinhi sa yuta. Mao kana ang hinungdan nganong giandam sa Dios ang Iyang talagsaong plano sa kalipay alang kanato.”1
Mapasalamaton kaayo ko alang niana nga pag-aghat—ang pakig-istorya sa Langitnong Amahan kada adlaw nakapausab og dako kaayo alang kanako. Ang pagkaamgo nga ang Langitnong Amahan ug si Jesukristo naghatag kanako og kahigayonan nga mahimong mas maayo kada adlaw nagtabang kanako nga makabaton og dugang nga kapuangod sa kaugalingon—kon Sila igo nga nagtuo kanako aron padayon akong hatagan og dugang nga mga kahigayonan, nganong dili man usab ko motuo sa akong kaugalingon?
Sama sa gitudlo ni Presidente Russell M. Nelson: “Walay laing mas makapagawasnon, mas makapahamili, o mas importante sa atong kaugalingong paglambo kay sa usa ka kanunay, matag-adlaw nga paghatag og gibug-aton sa paghinulsol. … Mao kini ang yawe ngadto sa kalipay ug kalinaw sa hunahuna.”2
Ang Paghinulsol Mao ang Pag-uswag
Ang mga kamaturoan nga akong nakat-onan mahitungod sa paghinulsol nakatabang kanako sa pagkahibalo kon unsaon nga magpadayon sa pag-uswag. Sama sa gipasabot ni Presidente Nelson: “Ang paghinulsol mao ang yawe sa kalamboan. Ang lunsay nga hugot nga pagtuo maghimo nga makapadayon kita sa dalan sa pakigsaad.”3 Kon ako maghinulsol, makadawat ako og direksiyon ug kasegurohan gikan sa Ginoo. Kon ako maghinulsol, magpabilin ko nga duol Kaniya.
Ug ang pagbaton og kapuangod alang sa akong kaugalingon ug sa akong mga paningkamot nakahatag kanako sa pagdasig nga magpadayon sa pag-uswag. Mobati ako nga nadasig sa paghinulsol kon ako motuo nga ako bililhon sa paningkamot. Gusto ko nga mahimong mas duol sa Langitnong Amahan ug kang Jesukristo kon ako motuo nga ako takos sa Ilang gugma.
Ako tinud-anay nga nagtuo nga adunay daghang kalipay, kalinaw, ug kahupayan nga makaplagan sa paghinulsol, dili igsapayan sa unsay atong giagian. Dangop ngadto sa Langitnong Amahan ug ni Jesukristo. Pag-ampo ngadto sa Langitnong Amahan aron masayod kon unsa ang inyong mabuhat aron mahimong mas duol ngadto Kaniya ug kang Jesukristo ug mahimong mas sama Kanila.
Ako nasayod nga mabati ninyo ang Ilang gugma ug suporta—ug dugang nga kapuangod alang sa inyong kaugalingon—kon inyong buhaton.
Ang tagsulat gikan sa Pilipinas.