Ako bang Gihimong Lisod ang Ebanghelyo?

Ni Ana Beatriz S. Pinto

Wala ako makasabot kon nganong gibati ko ang ka kapoy.

sunod-sunod nga mga bombilya nag-anam og kabadbad

Sa akong tibuok nga kinabuhi naningkamot ako nga mahimong kinsa ako nagtuo nga gipaabot sa Langitnong Amahan nga ako mahimo. Apan dihay problema: Wala gayod ako mahibalo kon ako igo ba sa ka maayo.

Akong gipunting ang akong mga pagkadili hingpit, ilabi na human magtuon sa mga kasulatan o maminaw ngadto sa mga pakigpulong sa kinatibuk-ang komperensiya. Kon magbasa niining mga butanga nga unta moawhag kanako, motutok lamang ako sa unsay akong nabuhat nga sayop.

Mipuyo ako niini nga paagi sulod sa dugay nga panahon—makalolooy ug gibati ang ka kapoy sa akong pagka-disipulo.

Apan wala nako maamgohi nga unsa ang tinuod nga wala nako mabuhat mao ang tinud-anay nga pagtuo diha sa Manluluwas ug sa putli, yanong mga kamatuoran sa Iyang ebanghelyo.

Nahikalimot Nganong Ako Nagpuyo sa Ebanghelyo

Ang akong panan-aw nausab samtang ako nagpaminaw sa usa ka bag-ohay nga debosyonal uban ni Sister Patricia T. Holland. Miingon siya, “Unsa ang akong gimahayan pag-ayo sa akong pagkabatan-on mao nga wala nako makita ang yano nga kanindot sa ebanghelyo; gani akong gihimo ang ebanghelyo nga sobra kalisod.”¹

Ang iyang mensahe miigo kanako.

Naamgohan nako nga akong gihimong lisod kanunay ang ebanghelyo! Daghan kanato naghimo. Kita nagpaabot sa atong mga kaugalingon nga mahimong hingpit, nagtuo nga walay lawak alang sa mga kasaypanan ug sa pag-uswag. Ug kon ang mga butang wala mahimo sa paagi nga atong gipaabot niini nga mahimo, kita mabalaka mahitungod sa umaabot, magtandi sa atong mga kaugalingon ngadto sa uban, mawad-an og koneksyon ngadto sa Langitnong Amahan, ug gani magsugod sa paghunahuna kon ang pagpuyo sa ebanghelyo takos ba.

Akong naamgohan nga ang akong kabalaka wala maingon pinaagi sa pagpuyo sa ebanghelyo. Nabalaka ako tungod kay ako nakahunong sa pagtutok diha sa rason nga ako nagpuyo sa ebanghelyo: ni Jesukristo.

Nakalimot ako nga Siya ug ang Langitnong Amahan nahigugma kanako uban sa hingpit nga gugma (tan-awa sa Juan 15:9; 2 Nephi 1:15).

Nakalimot ako nga ako nahimo aron makabaton og hingpit nga kalipay dinhi sa panaw (tan-awa sa 2 Nephi 2:25).

Nakalimot ako nga ang mortalidad naglakip sa pagkadili hingpit ug sa pagsalig diha sa Manluluwas sa pagbuntog niini (tan-awa sa Ether 12:27).

Nakalimot ako nga ang Manluluwas ania sa pagtabang kanako sa pagkat-on ug pagtubo ug pag-uswag ug nga Siya nagpahinungod sa akong mga paningkamot diha sa akong agianan (tan-awa sa 2 Nephi 2:1–2; 32:9).

Pagpayano

Kita masulod ngadto sa kasamok kon atong himoon ang ebanghelyo ngadto sa usa ka listahan sa mga lagda ug kalimtan ang putling mga kamatuoran ni Jesukristo. Kon kita maningkamot sa pagsunod sa atong mga pakigsaad ug sa mga sugo uban sa tuyo nga mahimong mas mahisama Kaniya, niana sa tinuoray kita nagpuyo sa ebanghelyo.

Sama sa gitudlo ni Presidente Russell M. Nelson, kini mao kon ang ebanghelyo ni Jesukristo “makapausab sa kinabuhi sa tanan kinsa makasabot niini ug maninguha sa paggamit niini sa iyang kinabuhi. Ang doktrina ni Kristo makatabang kanato sa pagkaplag ug pagpabilin diha sa dalan sa pakigsaad.”²

Ang Langitnong Amahan gusto kanato nga mahinumdom kanunay nga ang Manluluwas makatabang kanato sa pagkab-ot sa atong balaang potensiyal. Apan unsaon nato nga dili makalimot niining importanting kamatuoran?

Ania ang pipila ka mga sugyot nga nakatabang kanako:

Nag-ampo ako sa Langitnong Amahan sa pagtabang kanako nga mobati nga Siya nahigugma kanako ug modawat sa akong labing maayo nga mga paningkamot.
Ako nag-ambit sa sakramento, nagtutok diha sa Pag-ula ni Jesukristo. Nagpahinumdom ako sa akong kaugalingon nga ang Iyang grasya makatabang kanako sa umaabot ug anaa na naglihok sa akong kinabuhi samtang ako naningkamot sa pagsunod Kaniya.
Modangop ako sa mga kasulatan alang sa kahopayan. Ako nagbasa mahitungod niadtong kinsa mibati usab og kakulang ug gilig-on sa Ginoo.
Moadto ako sa templo kanunay. Ang tanan diha sa balay sa Ginoo nagpahinumdom kanako sa Iyang kalooy ug nga ako makasarang sa pag-uswag. Didto, akong mabati ang kalinaw taliwala sa daghang mga kabalaka.

Kining naandan nga mga buhat nakahimo kanako sa pagpasalamat kon unsa ang labing importante sa ebanghelyo. Kini nagpahinumdom kanako sa dili pagpalisod sa kayano niini.

Ang Ebanghelyo Makabenepisyo

Kon ikaw nanlimbasog uban sa mga pagbati sa pagkahingpit o pagkakulang o pagbati sama og ang ebanghelyo nahimong usa ka palas-anon, hinumdomi ang mga pulong ni Elder Dieter F. Uchtdorf sa Korum sa Napulog Duha ka Apostoles:

“[Ang ebanghelyo] matahom ang kasayon niini, ug makabenepisyo gayod kini.

“… Kon kamo naghunahuna nga ang ebanghelyo wala kaayo makahatag og benepisyo kaninyo, ako modapit kaninyo sa pag-atras, pagtan-aw sa inyong kinabuhi gikan sa mas taas nga ang-ang, ug ipasayon ang inyong pamaagi ngadto sa pagkadisipulo. Pag-focus sa sukaranang mga doktrina, mga baroganan, ug sa paggamit sa ebanghelyo. Mosaad ko nga ang Dios mogiya ug mopanalangin kaninyo sa inyong dalan padulong sa makatagbaw nga kinabuhi, ug ang ebanghelyo siguradong mas makahatag og benepisyo kaninyo.”³

Pinaagi sa pagtutok diha sa putli nga mga kamatuoran sa ebanghelyo ni Jesukristo, akong nakita ang akong kinabuhi ug hugot nga pagtuo nga milagrosong nahimong yano. Nahibalo ako nga ang inyo mahimo usab.