Ang Basahon ni Mormon nga Hagit sa Akong Bishop

Ni Travis Howell

Pagtulon-an human sa usa ka pagtulon-an, lagda human sa usa ka lagda, ang Basahon ni Mormon nahimong kabahin kon kinsa ako ug unsa ang akong gituohan.

Paghulagway pinaagi ni David Miles

Sa dihang 11 anyos pa ko, ang akong bishop midapit kanako ug sa pipila ka ubang batan-ong mga lalaki nga akong kaedad nga makigtagbo kaniya aron maghisgot sa among mga responsibilidad sa dihang madawat namo ang pagkapari. Siya usab mipakigbahin kanamo sa iyang pagpamatuod sa Basahon ni Mormon ug mihimo og usa ka hangyo. Wala koy ideya kon unsa ka dako nga impluwensiya ang iyang mga pulong sa akong kinabuhi.

Ang among bishop midapit kanamo sa pagbasa og ka lima ka higayon sa tibuok Basahon ni Mormon sa dili pa kami moserbisyo sa among mga misyon. Kami adunay mga walo ka tuig sa pagkompleto sa buluhaton. Kini ingon og lisod kaayo, tungod kay ako dili gayod malingaw sa pagbasa, ilabi na sa teksto nga ingon ka lisod sama sa kasulatan. Apan, alang sa mga rason nga dili nako mahinumdoman o hingpit nga mapasabot, ang akong 11 anyos nga hunahuna midesisyon nga seryosohon kini nga hagit. Nagsugod ko nianang gabhiona pinaagi sa pagbasa sa kapitulo 1 sa 1 Nephi.

Wala kaayo koy nasabtan sa kapitulo, apan ako adunay pagbati nga gibuhat nako ang husto nga butang. Pagkasunod adlaw nagbasa ko og laing kapitulo, ug bisan wala gihapon ko nakasabot sa tanang mga pulong ni Nephi, ako adunay susama niana nga pagbati.

Sa paglabay sa panahon, nagbasa ko og gamay sa Basahon ni Mormon kada adlaw. Sa ulahing bahin nianang tuiga, gisira nako ang basahon human mabasa ang Moroni 10 ug mibati nga malipayon kaayo uban sa usa ka pagbati sa kalamposan. Sa sunod nga higayon nga nakita nako ang akong bishop, mahinamon kong misulti kaniya nga nahuman nako og basa ang tibuok nga Basahon ni Mormon. Mipahiyom siya ug midayeg sa akong mga paningkamot apan miingon dayon, “Ayaw kalimot—gikinahanglan gihapon nimo kining basahon og upat ka higayon sa dili pa ka mobiya alang sa imong misyon!”

Dayon nianang gabhiona, gikuha nako ang Basahon ni Mormon og usab ug gipakli ang mga pahina. Mikabat kini kanako og taas nga panahon sa pagbasa niini. Magkinahanglan ba kini og sama ka taas nga panahon sa ikaduhang higayon? Bililhon ba gayod kini? Samtang namalandong ko, mipakli ko ngadto sa 1 Nephi kapitulo 1. Misugod ko sa pagbasa sa unang pipila ka bersikulo, ug ang Espiritu mikompirmar pag-usab kanako nga kini ang husto nga butang nga buhaton. Mao nga, mibasa ko og padayon. Kini mao ang importante nga higayon kanako sa dihang ang pagtuon sa kasulatan nahimong usa ka naandan kay sa usa ka higayon nga tumong.

Sulod sa sunod pipila ka bulan, ang mga istorya ingon og nahimong mas pamilyar ug mas masabtan. Nailhan nako ang pipila ka makahuloganon nga mga bersikulo gikan sa unang higayon nga gibasa nako kini, ug gi-highlight nako kini. Sa dihang ang usa ka tawo sa simbahan mitudlo gikan sa Basahon ni Mormon, nagsugod kong makaila sa pipila ka istorya ug mga pagtulon-an.

Samtang nagbasa ko, ang basahon hinay-hinay nga nakausab kanako. Pagtulon-an human sa usa ka pagtulon-an, lagda human sa usa ka lagda, nagsugod kong makasabot ug mas nagpaduol ngadto sa Manluluwas. Ang mga pagtulon-an sa Basahon ni Mormon nahimong kabahin kon kinsa ako ug unsa ang akong gituohan. Mipadayon ako sa pagbasa sa Basahon ni Mormon sulod sa sunod nga pipila ka tuig, ug sa matag higayon nga ako nahuman sa pagbasa sa Moroni 10, mibutang ako og usa ka marka sa inihapan sa sulod nga hapin sa akong basahon.

Sa kataposan, miabot ang panahon sa dihang nadawat nako ang akong tawag sa misyon. Human nga nagsaulog uban sa pamilya ug mga higala, nakakita ko og gamayng panahon nga nag-inusara ug giablihan ang sulod nga hapin sa akong Basahon ni Mormon. Natuman nako ang akong tumong. Apan, mas importante, nakaila ko sa akong Manluluwas.

Mga Leksiyon nga Nakat-onan

Sukad nauli gikan sa akong misyon, namalandong ko sa Basahon ni Mormon nga hagit sa akong bishop. Kini mitudlo kanako og tulo ka importante nga mga leksiyon.

Una, akong nakat-onan nga usahay nagkinahanglan kini og labaw pa sa usa ka pagbasa aron makaangkon og saksi nga ang Basahon ni Mormon tinuod. Nakadungog ko og daghang istorya sa mga tawo kinsa mibasa sa Basahon ni Mormon alang sa unang higayon ug nakabaton og dako kaayo nga espirituwal nga kasinatian nga nagkompirmar nga ang basahon tinuod. Alang kanako, kini lahi. Mikabat kini og daghang tuig sa makugihon nga pagbasa. Ang akong pagpamatuod sa Manluluwas wala moabot sa usa ka pagbasa sa Basahon ni Mormon; hinuon, kini miabot pagtulon-an human sa usa ka pagtulon-an, lagda human sa usa ka lagda sa paglabay sa panahon.

Ikaduha, akong nakat-onan nga gikinahanglan natong magpadayon sa pagtanyag og mga pagdapit ngadto sa uban, bisan kon kini ingon og walay usa nga naminaw. Isip usa ka batan-on, segurado ako nga nakadawat ako og liboan ka mga pagdapit gikan sa mga lider sa kabatan-onan, mga bishop, mga ginikanan, mga magtutudlo sa seminary, ug uban pa. Ang kadaghanan gayod misulod sa usa ka dalunggan ug milapos sa pikas. Apan sa bisan unsa nga rason, midesisyon ako nga seryosohon kining usa ka pagdapit gikan sa akong bishop, ug kana nga usa ka pagdapit mao ang mahinungdanon sa akong pag-angkon og personal nga pagpamatuod. Importante kaayo nga kita (isip mga lider, mga ginikanan, mga higala) mopadayon sa pagdapit. Ang sunod nga pagdapit nga atong ihatag tingali mao ang pagdapit nga mohimo sa tanang kalainan alang sa usa ka tawo nga atong gitudloan.

Ikatulo, ako masaligon nga dili igsapayan sa mga edad sa atong mga bata, sila makabati sa Espiritu Santo samtang sila mobasa o maminaw sa Basahon ni Mormon, bisan kon sila dili makasabot sa mga pulong niini. Usa sa akong kinadak-an nga mga tinguha alang sa akong mga anak mao nga sila mobasa sa Basahon ni Mormon ug magkat-on sa mga pagtulon-an niini bahin sa Manluluwas. Kon ako mahadlok alang sa kaugmaon sa akong mga anak, ako magmaisogon sa pagkahibalo nga ang Basahon ni Mormon usa ka gunitanan nga puthaw nga mogiya kanila subay sa dalan paingon sa kinabuhing dayon.

Ang akong kasinatian sa Basahon ni Mormon nahiuyon sa saad ni Joseph Smith nga makita sa pasiuna sa basahon. Ako nahimong “labi nga [n]aduol sa Dios pinaagi sa pagsunod sa iyang mga lagda, kay sa bisan hain nga basahon.” Ang Espiritu mipamatuod kanako nga kini nga saad tinuod.

Ang tagsulat nagpuyo sa Arizona, USA.