“4 ka Baroganan nga Atong Makat-onan gikan sa Paagi nga Naglihok ang Tigdumalang Bishopric,” Liahona, Peb. 2024.
4 ka Baroganan nga Atong Makat-onan gikan sa Paagi nga Naglihok ang Tigdumalang Bishopric
Ang Tigdumalang Bishopric nagsunod sa espirituhanong mga baroganan samtang sila nagdumala sa temporal nga mga kalihokan sa Simbahan.
Niadtong 1831, usa ka tuig human sa pag-organisar sa Ang Simbahan ni Jesukristo sa mga Santos sa Ulahing mga Adlaw, si Edward Partridge gitawag nga mahimong unang bishop. Siya midawat og duha ka nag-unang mga responsibilidad: sa pagpangalagad sa temporal nga mga kalihokan sa Simbahan ug sa pag-atiman niadtong anaa sa panginahanglan. (Tan-awa sa Doktrina ug mga Pakigsaad 42.)
Kini nga mga responsibilidad gigamit gihapon karon, miingon si Tigdumalang Bishop Gérald Caussé. “Ang Simbahan mitubo, apan kita nagbuhat gihapon sa samang butang: nangalagad sa temporal nga kalihokan ug nag-atiman alang sa nanginahanglan.”
Ang Tigdumalang Bishopric mipahigayon niining mga katungdanan alang sa Simbahan ubos sa direksiyon sa Unang Kapangulohan. Ang mga bishop naghimo niining mga katungdanan diha sa ilang mga ward, mipasabot si Bishop Caussé.
Ang bishop mokoordinar sa buhat sa kaluwasan ug kahimayaan diha sa ward, lakip na sa pag-atiman alang niadtong nanginahanglan. Siya usab modumala sa mga rekord, mga panalapi, ug sa paggamit sa meetinghouse.1
Ang bishop mosangon sa kadaghanan sa buhat sa pagpangita ug pag-atiman alang niadtong anaa sa panginahanglan ngadto sa Relief Society ug sa kapangulohan sa elders quorum.2 Kini nga responsibilidad magamit usab ngadto sa tanan nga miyembro sa Simbahan samtang sila mangalagad sa usag usa.3
Ang responsibilidad sa Tigdumalang Bishopric alang sa temporal nga mga kalihokan—o sa pisikal nga mga aspeto—sa Simbahan naglakip sa pagdumala sa ikapulo ug mga halad sa puasa, makitawhanon nga tabang, mga programa sa welfare ug pagbarog sa kinaugalingong paningkamot, pagtukod ug pagmentinar sa mga meetinghouse ug mga templo, ug pagsangkap ug pagpang-apud-apod sa mga kapanguhaan sa ebanghelyo, sama sa mga kasulatan ug mga hymnbook.
“Tanang butang gipanag-iya sa Ginoo—kini dili atoa. Ug busa kami modumala niining mga kapanguhaan sa Iyang pamaagi,” miingon si Bishop Caussé.
Ang Tigdumalang Bishopric mipakigbahin og pipila sa daghang baroganan nga mogiya sa ilang buhat ug sa unsang paagi nga kining mga baroganan tingali magamit ngadto sa mga miyembro sa ward ug sa stake.
Ang Tanang Butang Espirituhanon ngadto sa Dios
Ang Ginoo namahayag: “Ang tanan nga mga butang ngari kanako mga espirituhanon, ug wala mahinabo sa bisan unsa nga panahon nga Ako mihatag nganha kaninyo og balaod nga temporal; ni bisan kinsa nga tawo, ni sa mga katawhan, ni si Adan, nga inyong amahan, kinsa Ako milalang” (Doktrina ug mga Pakigsaad 29:34).
Kini nga baroganan mao ang usa sa daghang butang nga nakat-onan ni Bishop W. Christopher Waddell, Unang Magtatambag, samtang nagserbisyo diha sa Tigdumalang Bishopric. “Bisan og kami responsable alang sa temporal nga mga kalihokan sa Simbahan ug pag-andam sa dalan, ang kasulatan mobalik ngadto sa tanang butang espirituhanon ngadto sa Ginoo—wala gayod sukad nga Siya mihatag og usa ka temporal nga sugo. Ang tanang butang espirituhanon. Ug akong nakita kana. Aron atong mabuhat ang unsay gusto sa Ginoo nga atong buhaton, kita kinahanglang mosalig Kaniya,” miingon siya.
Kini magamit ngadto sa tanang miyembro sa Simbahan kon atong tuyoon sa pagpaningkamot sa pagpalambo ang atong mga calling—mahimong isip usa ka tigpangalagad nga igsoong lalaki o babaye, magtutudlo sa Sunday School, lider sa nursery, o ward building representative.
Si Bishop L. Todd Budge, Ikaduhang Magtatambag sa Tigdumalang Bishopric, mipasabot: “Unsa ang akong nakaplagan sa akong kaugalingong kinabuhi mao nga ako makaampo usab kabahin sa akong temporal nga mga kalihokan. Ako makaampo kabahin sa akong panalapi. Makaampo ko kon mopalit ba ko niining balaya o kana nga balay o himoon ba kini nga puhunan o kana nga puhunan. Kinahanglan natong apilon ang Ginoo dili lang sa espirituhanon nga bahin sa atong kinabuhi apan diha sa temporal nga mga butang usab sa atong kinabuhi tungod kay ang tanan niining mga butang makatampo ngadto sa atong abilidad sa paghigugma ug pagserbisyo sa ubang mga tawo.”
Ang Tigdumalang Bishopric—Bishop Gerald Caussé (taliwala); Bishop W. Chistopher Waddell, Unang Magtatambag (tuo); ug Bishop L. Todd Budge, Ikaduhang Magtatambag (wala)—nagbisita sa balay tipiganan sa mga bishop sa Welfare Square sa Siyudad sa Salt Lake. Kini usa sa 124 nga balay tipiganan sa mga bishop nga gipadagan sa tibuok kalibotan, nagdonar og pagkaon ngadto niadtong nanginahanglan.
Litrato pinaagi ni Laura Seitz, sa maayong kabubut-on sa Church News
Panaghiusa sa Buhat
Sa dihang si Bishop Budge gitawag ngadto sa Tigdumalang Bishopric niadtong Oktubre 2020, siya miasumer nga siya adunay iyang kaugalingong mga buluhaton ug wala magdahom nga ang bishopric maghiusa kaayo sa pagtrabaho. Miingon siya nga siya mibati sa paggiya sa Ginoo samtang sila maghiusa sa pagtrabaho, sa kanunay mag-uban sa pag-ampo, mag-uban sa pagtambong sa templo, ug mag-uban sa pagtinambagay.
“Sa una nakong pag-abot sa bishopric, nagtuo ko nga among bahinon ang kalibotan o ang usa ka butang ngadto sa tulo ug modawat og mga responsibilidad ug bahinon kini ngari kanamo,” miingon si Bishop Budge. “Apan kami wala mobuhat sa ingon niana nga paagi. Kami mobuhat sa tanang butang diha sa panaghiusa isip usa ka bishopric. Ug akong nakat-onan nga adunay dakong gahom diha sa mga konseho. Adunay dakong gahom diha sa panaghiusa nga moabot kon kami maghiusa sa pagtrabaho uban sa komon nga tumong ug komon nga katuyoan.”
Samtang sila moapil diha sa lain-laing ehekutibo nga mga konseho ug mga komite sa punoang buhatan sa Simbahan ug magtinambagay isip bishopric, ang matag usa nila nagdala og talagsaong mga talento, mga kagikan, ug mga kasinatian sa kinabuhi—sama sa bisan unsa nga kapangulohan sa ward o sa stake.
“Kini dili sa ingon nga ikaw mapun-an og usa pun-an og usa ug makuha ang hiniusang mga abilidad sa tulo ka tawo. Apan kami magtrabaho nga maghiusa. Ug pinaagi sa pagtrabaho nga maghiusa, kami makatuman og labaw pa ka daghan sa tulo ka bahin,” miingon si Bishop Budge.
Human ang usa ka bagyo miigo sa Pilipinas niadtong 2013, ang mga miyembro sa Simbahan dili lang mitabang og limpyo apan mitabang usab sa pagtukod pag-usab, nga nakatudlo kanila sa mapuslanon nga mga kahanas.
Pagpalambo sa Pagbarog pinaagi sa Kinaugalingong Paningkamot
Usa ka tuig human sa Bagyong Haiyan—usa sa labing kusog nga Bagyo nga sukad natala—migun-ob sa Pilipinas niadtong 2013, si Bishop Caussé mibisita sa siyudad sa Tacloban. Ang Simbahan misangkap og mga materyal human sa unos aron matabangan ang mga Pilipino nga makatukod pag-usab sa ilang mga panimalay. Samtang nagtukod pag-usab, daghang nakakat-on og mga kahanas sama sa pamanday, panaod og tubo, ug pagdumala sa konstruksiyon.
Usa ka bag-ong gitawag nga magtatambag diha sa Tigdumalang Bishophric niana nga higayon, si Bishop Caussé mibisita sa usa ka eskwelahan sa bokasyonal sa Tacloban ug nakakita mismo sa epekto sa tabang sa Simbahan. “Kita adunay gatosan, sa tinud-anay gatosan, sa atong mga miyembro ang nakadawat og bokasyonal nga pagbansay aron makabaton og kahanas sa trabaho aron makakaplag og trabaho o makapalambo sa ilang kaugalingong negosyo,” nahinumdom siya.
Niadtong Oktubre 2021 nga kinatibuk-ang komperensiya, si Presidente Russell M. Nelson mipahibalo nga ang usa ka templo tukoron diha sa Tacloban.4 “Hunahunaa lang ang tanang butang nga nahitabo sa milabay nga pipila ka tuig ug sa unsang paagi ang sistema sa welfare sa Simbahan ug ang mga baroganan sa welfare nakatabang sa mga tawo nga maandam alang sa pagtukod sa templo,” miingon si Bishop Caussé.
Ang matag makitawhanon nga proyekto diin nalambigit ang Simbahan adunay usa ka tumong sa pagbarog sa kinaugalingong paningkamot, miingon siya. “Alang kanamo ang pagbarog sa kinaugalingong paningkamot usa ka baroganan sa kaluwasan. Kini usa ka espirituhanong baroganan. Matag higayon, kami mangutana: ‘Kumusta man ang atong pagtabang sa mga tawo nga motabang sa ilang kaugalingon?’”
Sa samang paagi, samtang ang mga lider sa ward ug sa stake mangita ug moatiman niadtong adunay temporal ug emosyonal nga mga panginahanglan, sila maningkamot sa pagtabang sa mga miyembro nga mapalig-on ang ilang pagsalig sa kaugalingon. Usa ka paagi ang mga lider makabuhat niini mao ang pagdapit kanila sa pag-apil diha sa usa sa mga grupo sa pagbarog sa kinaugalingong paningkamot sa Simbahan. Kini nga mga grupo magtudlo sa mga tawo og espirituhanon nga mga baroganan ingon man sa praktikal nga mga kahanas. Ang mga grupo nakatutok sa usa sa lima ka area: trabaho, edukasyon, personal nga panalapi, emosyonal nga kalig-on ug pagsugod ug pagpalambo og negosyo.5
Uban sa tabang niining mga grupo, ang mga miyembro sa tibuok kalibotan nakagamit sa doktrinal nga mga baroganan ug hugot nga pagtuo diha sa Ginoo sa pagtabang sa ilang kaugalingon ug sa uban nga mamahimong mas makabarog sa kinaugalingong paningkamot sa espirituhanon ug sa temporal nga paagi. Sila nakakaplag og mas dakong paglaom, kalinaw, ug kauswagan.6
Pagtutok sa mga Tawo
Ang Simbahan mahitungod sa mga tawo, mihatag og gibug-aton si Bishop Caussé. “Ako sa kanunay nahimong mapainubsanon tungod sa matinud-anon nga mga miyembro nga among nahimamat sa matag nasod, sa matag kontinente. Ang Simbahan mahitungod sa mga tawo.”
Ang buhat ug himaya sa Dios mao ang “pagpahinabo sa pagka-mortal ug sa kinabuhi nga dayon sa tawo” (Moises 1:39), ug Siya gusto nga ang tanan Niyang mga anak mopili sa pagbalik ngadto Kaniya. Si Jesukristo mitukod sa Iyang Simbahan aron makahimo ang mga indibidwal ug mga pamilya sa pagbuhat sa ingon.7
“Ang ebanghelyo anaa gayod sa kinabuhi sa ubang mga tawo,” miingon si Bishop Caussé. “Kini mahitungod sa usa ka tawo nga gibunyagan. Kini mahitungod sa usa ka batan-ong lalaki nga nagdawat sa pagkapari o usa ka babaye nga moadto sa templo sa unang higayon ug magpabunyag alang sa usa sa iyang mga katigulangan. Kini mahitungod sa mga pamilya nga nagpundok, mga kongregasyon nga nagpundok, ug nag-ambit sa sakramento sa matag Dominggo.
“Sa kataposan sa adlaw, kini mahitungod sa yano nga mga butang sa kinabuhi—ang rason nganong kita ania dinhi ug asa kita padulong ug sa unsang paagi kita makabalik sa atong Langitnong Amahan ug makadawat sa tanan nga mga panalangin sa Pag-ula ni Jesukristo. Ako mapasalamaton alang sa kayano sa ebanghelyo. Mopamatuod ko nga kini tinuod.”