“Giunsa Nako sa Pagpakabuhi nga wala ang Basahon ni Mormon?,” Liahona, Pebrero 2024.
Mga Tingog sa mga Santos sa Ulahing mga Adlaw
Giunsa Nako sa Pagpakabuhi nga wala ang Basahon ni Mormon?
Ang akong indibidwal ug pamilya nga pagtuon sa Basahon ni Mormon nakatabang kanako nga mobati og kakalma, kadasig, ug kamalaumon.
Litrato sa maayong kabubut-on sa tagsulat
Pipila ka higayon na ang milabay, usa ka higala ug ako miapply alang sa usa ka pang-edukasyon nga programa. Ako masaligon nga ako mapili. Sa dihang migawas na ang resulta, nasagmuyo ko nga ang akong higala ang napili apan ako wala. Mibati ko nga gibinuangan tungod kay sa akong pagtuo nga ako ang angayan nga mapili kay sa akong higala.
Nianang tungora, ang akong pagtan-aw sa akong higala isip usa ka kontra o usa ka tawo nga mikuha og butang nga akong gipanag-iya. Pipila ka adlaw ang milabay, samtang nagtuon sa Jacob 2 diha sa Basahon ni Mormon, akong nabasa kon giunsa ni Jacob sa pagbadlong ang iyang katawhan tungod sa ilang mga sala. Usa niadtong mga sala mao ang garbo.
Ang mga pagtulon-an ni Jacob nakapaamgo kanako nga ako nakahimo og sala nga garbo ngadto sa akong higala tungod sa paghunahuna nga ako ang angayan sa butang nga nahatag ngadto kaniya. Ang mga pulong ni Jacob nahimong mga pagpadayag ngari kanako:
“Ayaw himoa kini nga ang garbo sa inyong mga kasingkasing molaglag sa inyong mga kalag!
“Hunahunaa ang inyong mga kaigsoonan sama nganha sa inyong mga kaugalingon” (Jacob 2:16–17).
Ako nag-ampo ngadto sa Langitnong Amahan sa pagpasaylo kanako ug sa pagtabang kanako nga malikayan ang sala sa garbo sa umaabot. Dayon ako nakig-istorya ngadto sa akong higala mahitungod sa akong gibati ug mihangyo kaniya sa pagpasaylo kanako. Mibati ko og kalinaw ug hingpit nga kalipay sa pagbuhat sa ingon ug sa pagdawat og kapasayloan gikan kaniya ug gikan sa Langitnong Amahan.
Ang akong indibidwal ug pamilya nga pagtuon sa Basahon ni Mormon nakahatag kanako og usa ka pagbati sa direksiyon ug nakatabang kanako nga mobati og kakalma, kadasig, ug kamalaumon. Usahay ako naghunahuna kon unsaon sa pagdumala sa pagpakabuhi sulod sa daghang katuigan nga wala ang Basahon ni Mormon!
Kon wala ang Basahon ni Mormon, wala unta ko makabaton og paglaom nga ako mamahimong mas maayo nga tawo. Ang akong kinabuhi haw-ang ug walay klaro ang katuyoan. Dili ko makahibalo nga ang Dios adunay usa ka plano sa kaluwasan alang sa Iyang mga anak. Wala unta ko makabaton og klaro nga salabotan sa Pag-ula ni Jesukristo. Dili na unta ko maglaom pa alang sa mas maayo nga kalibotan. Wala na unta ko motuo sa mga butang nga akong gituohan, mobuhat sa mga butang nga akong gibuhat, maghunahuna sa paagi nga ako naghunahuna, ug mahimong kinsa ako.
Pinaagi sa Basahon ni Mormon, ako nakadawat og kasiguroan nga ang Dios nahigugma ug nagpakabana alang sa tanan Niyang mga anak sa tanang bahin sa kalibotan. Ako nasayod nga ang Basahon ni Mormon tinuod gayod nga mao ang laing tugon ni Jesukristo.