Ako Moserbisyo og Una sa Ginoo

Ni Denis Mukasa, Nairobi, Kenya

Ang pagserbisyo sa Ginoo isip usa ka misyonaryo nakatabang kanako sa pagpalambo sa akong hugot nga pagtuo diha sa usa ka tinuod nga tukoranan nga nakatabang kanako sa paghimo og husto nga mga desisyon sa dihang nag-atubang ko og lisod nga mga pagpili. Human sa akong misyon, mas naandam ko alang sa akong pag-eskwela, panarbaho, ug nagkadaiyang mga calling diha sa Simbahan, lakip na isip usa ka bishop.

Gikan pa sa pagkabata, mahinamon gayod ako nga moadto sa unibersidad. Ang unibersidad motugot kanako nga makakuha og maayo nga edukasyon ug sa kataposan mogiya kanako ngadto sa usa ka maayo nga trabaho nga makapahimo kanako sa pagbuhi og usa ka pamilya.

Apan sa dihang naabot na ko sa edad nga moeskwela sa unibersidad, dili ko segurado kon makabayad ba ko. Ang anaa nga mga kapanguhaan alang kanako dili paigo. Ang akong papa namatay sa miaging tuig, ug ang akong igsoon nga babaye ug ako mitipon sa akong uyoan. Nianang panahona, ang among uyoan walay igo nga materyal nga mga kapanguhaan sa pagtabang kanako tungod kay gitabangan niya ang lima sa iyang kaugalingon nga mga anak didto sa unibersidad.

Gikan sa bata nga edad, nagtinguha usab ako nga moserbisyo sa Dios diha sa usa ka kapasidad o laing kapasidad, apan wala ako masayod kon unsaon. Sa wala po ko mipasakop sa Simbahan sa edad nga 19, wala koy kahigayonan sa pagbuhat niana.

Sa dihang mipasakop ko sa Simbahan niadtong 2004, gusto gihapon nakong tinguhaon ang akong edukasyon sa unibersidad, apan mihimo ko sa desisyon nga moserbisyo una og misyon. Wala gihapon ko nakahibalo kon unsaon nako pagkab-ot ang akong mga damgo ug mga tumong sa usa ka edukasyon sa unibersidad human sa akong misyon, apan mipakita ako og hugot nga pagtuo nga ang mga butang sa kataposan mahimong maayo alang kanako. Miingon ko sa akong kaugalingon, “Mosalig ako sa Ginoo. Ako moserbisyo og una Kaniya. Ang ubang mga butang mosunod ra unya.” Mao nga, mipadayon ko inubanan sa hugot nga pagtuo ug misugod sa paghimo og serbisyo aron motabang og bayad alang sa akong misyon.

Pipila sa akong mga higala misulti kanako nga usikan lang nako ang akong panahon isip usa ka misyonaryo. Apan ako adunay hugot nga pagtuo nga ang usa ka misyon mao ang husto nga butang nga buhaton, nga ang pagserbisyo sa Ginoo dili usa ka usik sa panahon.

Usa sa mga kasulatan nga nakadasig kanako nga moserbisyo makita diha sa Bag-ong Tugon: “Apan maoy unaha ninyo pagpangita ang gingharian ug ang pagkamatarong gikan sa Dios, ug unya kining tanang mga butanga igadugang ra kaninyo” (Mateo 6:33).

Sa wala madugay gitawag ko ngadto sa Ghana Cape Coast Mission. Ang akong misyon mihatag kanako og halandomon nga mga kasinatian ug mipahimutang sa pundasyon alang sa umaabot nga mga kahigayonan ug mga responsibilidad. Human sa akong misyon, mas naandam ko alang sa akong pag-eskwela, panarbaho, ug nagkadaiyang mga calling diha sa Simbahan, lakip na isip usa ka bishop.

Sa dihang nauli ko, pipila sa akong mga ig-agaw nakatapos na sa ilang edukasyon. Ang akong buotan nga uyoan dayon aduna nay anaa nga mga kapanguhaan sa pagtabang kanako sa pagtinguha sa akong edukasyon sa unibersidad. Mikuha ko og kurso sa certified public accounting ug dayon mi-enroll sa usa ka bachelor’s degree nga programa. Lima ka tuig human sa akong misyon, migradwar ako sa accounting ug finance.

Sa pagkatinuod, sama sa akong nakita sa akong kinabuhi human sa akong misyon, ang Ginoo midugang “[ni]ining tanang mga butanga” ngadto sa akong pamilya. Sa wala pa ang akong misyon, nabalaka ko nga kon dili ko moeskwela, kon dili ko makakuha og maayo nga edukasyon, magpuyo ako sa kakabos. Apan ang Ginoo mipanalangin gayod og maayo sa akong pamilya ug nakapahimo kanamo nga magpuyo og medyo komportable nga kinabuhi.

Wala gayod ako nagmahay nga miserbisyo og misyon sa wala pa miadto sa unibersidad. Ang pagpakita og hugot nga pagtuo sa pagserbisyo og misyon mao ang pundasyon sa daghang desisyon nga akong gihimo sa akong kinabuhi. Ang pagserbisyo sa Ginoo nakatabang kanako sa pagpalambo sa akong hugot nga pagtuo diha sa usa ka tinuod nga tukoranan. Kana nga pundasyon nakatabang kanako sa paghimo og husto nga mga desisyon sa dihang nag-atubang ko og lisod nga mga pagpili.

Alang niadtong nabalaka mahitungod sa pagserbisyo og misyon, mohatag ko sa samang tambag nga akong nadawat gikan sa mga kasulatan: “Unaha ninyo pagpangita ang gingharian ug ang pagkamatarong gikan sa Dios,” ug unya kining tanang mga butanga nga inyong gihunahuna nga dili moabot kaninyo sa kataposan moabot sumala sa kabubut-on sa Dios—gani kapulo pil-on. Mao kana ang akong kasinatian.