“Siya Mihatag og mga Paagi alang Kanamo,” Liahona, Peb. 2024.
Dali, Sunod Kanako
1 Nephi 16–2 Nephi 10
“Siya Mihatag og mga Paagi alang Kanamo”
Si Lehi ug ang Liahona, ni Ronald L. Bergen
Si Nephi ug ang iyang pamilya milahutay og lisod nga mga pagsulay sa ilang pagbiya sa Jerusalem ug nangita sa gisaad nga yuta. Sama kanato, ang Ginoo dili kanunay nga moluwas kanila gikan sa paglahutay sa mga pagsulay. Apan, sama kanato, kon sila adunay tinuod nga panginahanglan, ang Langitnong Amahan anaa aron sa pagsangkap.
Sa dihang si Nephi ug ang iyang mga igsoong lalaki mihimo og pipila ka pakyas nga higayon sa pagkuha sa tumbaga nga mga palid, nahutdan sa mga opsiyon, ug nagkinahanglan og balaan nga panginlabot, si Nephi “giubanan sa Espiritu” (1 Nephi 4:6) ug nakuha ang mga palid.
Sa dihang ang pamilya nagkinahanglan sa pagpadayon ngadto sa kamingawan apan wala masayod kon asa mopadulong, ang Ginoo misangkap og usa ka kompas (tan-awa sa 1 Nephi 16:10).
Sa dihang sila nagutman sulod sa usa ka higayon tungod sa pagkawala sa pana ni Nephi, si Nephi mihimo sa iyang kaugalingong pana ug gapasan ug gihatagan og direksiyon gikan sa Ginoo aron makahibalo kon asa mangita og pagkaon (tan-awa sa 1 Nephi 16:18–24).
Sa dihang miabot sila sa dagat, ang Ginoo mipakita ni Nephi kon unsaon sa paghimo og barko (tan-awa sa 1 Nephi 17:8).
Si Laman ug si Lemuel gigamit sa sayop ang ilang kabubut-on aron sa paglatos nilang Nephi ug Sam (tan-awa sa 1 Nephi 3:28), apan sa dihang sila nagtinguha sa paghunos sa kinabuhi ni Nephi, ang iyang misyon sa kinabuhi wala pa makompleto, busa ang Ginoo mipasidaan ni Nephi sa pagbiya ngadto sa kamingawan. Sa dihang sila adunay usa ka panginahanglan, si Nephi ug ang iyang pamilya naluwas. (Tan-awa sa 2 Nephi 5:4–5.)
Gikan sa panahon nga si Nephi mibiya sa Jerusalem hangtod sa panahon nga sila kinahanglan na sa pagbiya gikan nilang Laman ug Lemuel, siya mibiyahe og lagyo, gibunalan gamit ang puthaw, mikaon og hilaw nga karne, gigapos sulod sa tulo ka adlaw diha sa barko, ug miantos sa pagkawala sa iyang ugangan nga lalaki ug sa iyang amahan. Sama kanato, ang iyang pagkamatarong wala makapalingkawas kaniya gikan sa pag-antos. Sama kanato, siya miantos sa mga pagsulay sa mortalidad. Apan sa dihang si Nephi nagkinahanglan sa Ginoo—ang Ginoo kanunayng anaa.
Kita molahutay og mga kalisdanan—usahay tungod sa atong mga sirkumstansiya o mga pagpili ug usahay diha sa mga kamot sa uban. Kita moatubang sa kasubo, pag-antos, ug gani kamatayon. Apan sama ni Nephi, kon kita maminaw ug mosalig sa Espiritu Santo, ang Langitnong Amahan, mosangkap unsa gayod ang atong gikinahanglan, sumala sa Iyang kabubut-on ug tayming.