“Gikinahanglan Ako nga Moserbisyo Kaniya,” Liahona, Pebrero 2024.
Mga Tingog sa mga Santos sa Ulahing mga Adlaw
Gikinahanglan Ako nga Moserbisyo Kaniya
Ang akong presidente sa Relief Society nagtudlo kanako nga pinaagi sa serbisyo, kami mahimong tinuod nga konektado.
Paghulagway pinaagi ni Dilleen Marsh
Sa dihang ako nagmabdos sa akong kinamanghoran nga anak, si Margaret Blackburn miserbisyo isip ang among presidente sa Relief Society sa ward. Nagkailhanay lang mi sa usag usa sulod lang sa mubo nga panahon atol sa mga miting sa simbahan.
Pagkahuman nga akong gipanganak ang akong anak, ang mga kababayen-an nanagdala og mga pagkaon nianang unang semana, lakip na si Margaret, kinsa mas tigulang ug hinay na. Mapasalamaton ako tungod kay ako walay kusog o tinguha sa pag-andam og pagkaon, pagluto, o mamalit alang sa mga sagol—labi na ang pagbuhat nianang tanan.
Human nianang unang semana, si Margaret mipadayon sa pagdala og mga pagkaon. Mahimong linuto sa balay o mga sobra gikan sa kalihokan sa ward, dili kadto igsapayan nako. Mura og nahibaloan niya labaw pa sa akong panginahanglan og usa ka tawo nga mogunit sa akong anak o molimpyo sa akong balay, ako nagkinahanglan sa panalangin nga dili na maghunahuna mahitungod kon unsay para sa panihapon.
Wala magdugay, si Margaret gi-release gikan sa iyang calling tungod sa luya nga panglawas. Wala ko nakahibalo niini niadtong tungora, apan siya gidayagnos nga adunay makamatay nga kanser.
Sa dihang akong nasayran ang kabahin sa iyang dayagnosis, nahibalo nako kon unsa ang kinahanglan nakong buhaton. Gikinahanglan nako nga moserbisyo kaniya—dili tungod kay nakautang ko niya og kabubut-on o kinahanglang mobalos sa iyang kamabination. Hinoon, tungod sa iyang pagserbisyo kanako, ako nakat-on sa paghigugma kaniya.
Si Margaret mitudlo kanako nga pinaagi sa pagserbisyo, kita tinud-anay nga mahimong konektado. Sa dihang ako naghunahuna kabahin niining talagsaong babaye, ang akong kasingkasing gisakitan nga naghunahuna sa iyang pagduot sa vacuum o pagsilhig sa salog sa iyang kusina. Busa, matag semana misugod ako sa pagbisita kaniya ug nanglimpyo sa iyang balay.
Usa ka adlaw samtang nagdrive padulong sa balay pagkahuman, ako napuno sa pagkamapasalamaton nga ang Langitnong Amahan mihan-ay niini nga mga oportunidad sa gugmang putli. Kon si Margaret wala pa miserbisyo kanako nga makugihon kaayo, ako tingali dili gyod unta komportable sa paghimo og regular nga pagbisita ngadto sa iyang balay. Ako nakat-on sa paghigugma niana nga panahon uban kaniya! Ang Dios nasayod nga pinaagi sa pagpadala kaniya ngari kanako sa akong panahon sa panginahanglan, ang dalan sa pagserbisyo kaniya miandam kanako diha sa iyang panahon sa panginahanglan.
Ang akong mga mata napuno sa mga luha tungod kay akong naamgohan kon unsa ka hingpit niining mga pagdasig ug mga oportunidad sa pagserbisyo nga misumpay kanamo hangtod sa kahangtoran.