Digital Lamang: Mga Young Adult
Naghunahuna Ka ba nga ang Dios Wala Makaila Kanimo? Salig Kanako, Siya Nakaila
Usa ka kasinatian mihulma sa akong tibuok nga kinabuhi ug mitudlo kanako nga ang Langitnong Amahan kanunay nga nagpakabana kanato.
Bag-ohay lamang akong mipauli gikan sa akong misyon ug gibati ang kawalay kasigurohan kon asa padulong sa akong sunod nga kinabuhi. Usahay ako naghunahuna kon ang Langitnong Amahan tinuod ba gyod nga nagpakabana kanako, sa akong mga kahimtang, ug sa akong mga pagbati sa kawalay kasigurohan.
Apan akong nahinumdoman nga Siya nagpakabana. Nahibalo Siya kon unsay akong gisinati.
Ug giunsa nako sa pagkahibalo niini?
Una, tungod kay ang atong mga lider sa Simbahan nagpadayon sa paghatag og pasalig kanato kabahin niini nga mga kamatuoran. Sama pananglitan, si Presidente Russell M. Nelson, bag-ohay miingon: “Ako mopaniguro kaninyo nga ang atong Langitnong Amahan ug ang Iyang Pinalanggang Anak, si Jesukristo, nahigugma kaninyo. Sila personal gayod nga nakahibalo sa inyong mga sirkumstansiya, sa inyong kaayo, sa inyong mga panginahanglan, ug sa inyong mga pag-ampo alang sa panabang.”1
Ug ikaduha, ako nagtuo nga ang Langitnong Amahan ug si Jesukristo nakaila kanako tungod kay ako daghan og mga kasinatian sa akong kinabuhi diin Sila mitabang kanako ug mipakita kanako sa Ilang gugma.
Apan ang kasinatian nga akong naghunahuna sa kanunay mao ang mahitungod sa akong pagkasinagop.
Mga Milagro
Sa dihang ako nag-edad og tres, mipuyo ako sa usa ka balay sagupanan sa Cambodia. Nasakit ako og grabe sa pulmoniya, ug ang sagupanan dili makaabot og bayad sa akong medikal nga pag-atiman.
Sa samang higayon, ang akong umaabot nga inahan nagbisita sa Cambodia gikan sa Finland alang sa usa ka biyahe sa trabaho. Siya dihay usa ka espirituwal nga kasinatian nga migiya kaniya sa pagbisita sa akong piho nga sagupanan.
Sa dihang kami nagkahimamat, gibati niya ang dihadiha nga espirituwal nga koneksiyon ngari kanako.
Gidala niya ako sa ospital ug gibayaran ang akong medikal nga mga bayranan. Gibati niya nga siya gigiyahan ngadto sa Cambodia sa pagtabang kanako nga maayo—wala nay lain. Apan sa telepono usa ka gabii niana, ang iyang papa miingon ngadto kaniya, “Tingali kining gamay nga batang babaye kinahanglan nga magpabilin sa imong kinabuhi.”
Siya miampo ug mibati sa iyang kaugalingong espirituwal nga panghimatuod nga ako gituyo nga mahimo niyang anak. Busa gisugdan ang proseso sa pagsagop ug sa pagpauli ngadto sa Finland uban kanako.
Sa matag panahon bation nako ang pagkadili siguro kon ang Langitnong Amahan nagpakabana ba kanako, namalandong sa ka talagsaon sa gigikanan sa akong istorya ug sa mga milagro nga naapil kanunay nga nagpahinumdom kanako niini nga kamatuoran: Siya sa personal nagpakabana ug nangilabot sa akong kinabuhi.
Ang Gahom sa Paghinumdom
Ang paghinumdom niini nga kasinatian mao ang pwersa nga nagpalihok kanako nianang mga panahona sa dihang ako nakigbisog samtang nagserbisyo sa akong misyon sa London, England. Sa dihang ako gihatagan og kapilian sa pagpalugway sa akong misyon sulod sa pipila ka semana, sa tinuod ako gusto lamang nga mopauli!
Apan nahinumdom ko nga ang Langitnong Amahan nakahatag kanako og mga milagro aron ako mahimong usa ka himan diha sa Iyang mga kamot. Kini nga pag-angkon mihatag kanako og kalig-on sa pagserbisyo alang niadtong sobra nga mga semana ug sa pagpakigbahin sa gugma sa Langitnong Amahan ug ni Jesukristo ngadto sa uban.
Ako nahibalo nga dili tanan kinsa anaa sa malisod nga mga kahimtang mahimong adunay sama kanako og espirituwal nga mga kasinatian. Apan ako nahibalo nga ang Langitnong Amahan wala makalimot ni bisan kinsa kanato. Sa atong pagkab-ot Kaniya, Siya sa kanunay mohatag kanato sa kalig-on ug sa paggiya nga atong gikinahanglan.
Siya Nakaila Kanato
Ang akong kasinatian isip usa ka bata naghatag pag-usab og kasigurohan kanako nga bisan taliwala sa iyang binilyon nga mga anak, nakaila ang Langitnong Amahan kanako—usa ka gamitoy, ingon og nahikalimtan nga bata diha sa usa ka sagupanan—ug mihatag kanako sa inspirasyon nga mikonektar kanako ngadto sa ebanghelyo ug ngadto sa akong pamilya.
Ug Siya nakaila kanimo.
Kon bation nako nga nakasala tungod sa akong mga sayop, sa dihang ako nasanapan samtang nagserbisyo sa akong misyon, ug ingon nga ako karon naninguha sa pagdesisyon kon unsa ang akong eskwelahan sa unibersidad, akong nakaplagan ang kalinaw diha sa kahibalo nga ang akong Langitnong Amahan ug Manluluwas uban kanako.
Sama nga si Presidente Susan H. Porter, Kinatibuk-ang Presidente sa Primary, bag-ohay nga mitudlo: “Ang gugma sa Dios dili makita sa mga sirkumstansiya sa atong mga kinabuhi apan sa Iyang presensya sa atong kinabuhi. Makahibalo kita sa Iyang gugma kon kita makadawat sa kalig-on nga lapas sa atong kaugalingon ug kon ang Iyang Espiritu magdala og kalinaw, kahupayan, ug direksiyon. … Makaampo kita aron mabuka ang atong mga mata nga makakita sa Iyang kamot sa atong kinabuhi ug makakita sa Iyang gugma diha sa katahom sa Iyang mga gilalang.”2
Ako magpamatuod nga ang Langitnong Amahan ug si Jesukristo makahatag kanato sa gahom ug sa gugma nga atong gikinahanglan sa pagbuhat sa tanan nga Sila naghangyo kanato. Nagdapit ako kaninyo sa pag-andam sa pagpangita niana nga kamatuoran alang sa inyong mga kaugalingon, ug isaad ko kaninyo nga Sila mopahinumdom kaninyo sa Ilang gugma diha sa mga paagi nga inyong labing gikinahanglan.