“Siya sa Kanunay nag-uban Kanako,” Liahona, Pebrero 2024.
Mga Tingog sa mga Santos sa Ulahing mga Adlaw
Siya sa Kanunay nag-uban Kanako
Ang pagkamaunongon ngadto sa Ginoo sa kataposan mipanalangin kanako og labaw pa kay sa akong giantos.
Paghulagway pinaagi ni Trina Dalziel
Tulo ka bulan human natawo ang among ikalima nga anak, ang akong bana mikuha sa sweldo aron magsugod og bag-o nga trabaho ug magsugod sa usa ka graduate school. Kana nagkinahanglan kanamo nga mobalhin og duha ka estado ang gilay-on. Gibati ang kaugtas sa pinansiyal ug pisikal nga paagi, ug nalayo sa katilingban diha sa bag-ong dapit, nagmagul-anon ko og maayo.
Ang pag-adto sa simbahan lisod. Nagpanuko, miadto ko, apan dali ra kong mihawa sa mga miting aron molikay sa mga madasigon nga pakig-ila ila nga mangutana kon kumusta ang akong pagpahiuyon. Sila naglaom og mga tubag nga sama ka madasigon, apan ako walay ikatubag. Ang mga miyembro sa ward kasagaran mosulti kon unsa sila kabulahan ug kalipay nga anaa kanila ang ebanghelyo ni Jesukristo. Unsay problema nako?
Miserbisyo ko sa akong calling, ug dili kaayo kinasingkasing ang akong pag-ampo ug pagbasa sa mga kasulatan. Apan ang akong mga paningkamot ingon og “walay maanindot nga benepisyo” alang kanako.1
Dul-an sa usa ka tuig ang milabay, ang pagkamagul-anon misugod sa pagkahanaw. Pinaagi sa sunod-sunod nga ginagmayng kausaban sa panghunahuna, pisikal, sosyal, ug espirituhanon, hinayhinay ko nga milambo.
Pila ka bulan ang milabay, dihang nawala na ang akong gibati nga pagkamagul-anon, ako nag-ampo sa dihang nasanapan sa kanindot ug pasalamat alang sa mga panalangin sa pagsunod sa ebanghelyo. Akong gibati nga dili makataronganon alang nako nga mahimong bulahan kaayo. Ang Dios mao ang mihatag kanako og espirituhanon nga gasa sa hugot nga pagtuo ug usa ka tinguha nga makaila Kaniya. Ako milihok lang sa tinguha nga Siya mihatag kanako.
“Nganong angayan man ko sa mga panalangin,” nag-ampo ko, “sa pagbuhat lang sa unsa ang Imong gitisok diha sa akong kasingkasing sa pagbuhat una sa tanan?”
Sa akong kahingangha, Siya mitubag sa akong pag-ampo diha-diha dayon uban sa panumdoman sa akong kagahapon.
“Unsa man ang mga panahon nga gipangita ko nimo bisan sa kasakit ug kalisod? Sa dihang imong gitugyan ang imong kabubut-on ngadto sa akong kabubut-on, miadto gihapon sa simbahan, ug miserbisyo gihapon sa akong mga anak sa bisan unsang paagi? Anak ko,” ako nakasabot pinaagi sa Espiritu, “ikaw buhong nga nabulahan tungod sa imong kamatinud-anon—sa pagpili kanako bisan kon ikaw dili gusto.”
Ako naghunahuna nga ang pagkamatinud-anon nagpasabot sa kanunay nga pag-ani sa bunga sa Iyang Espiritu. Karon ako nasayod nga ang pagkamatinud-anon nagpasabot sa pagkamaunongon ug kaligdong ngadto Kaniya—bisan unsa pay mahitabo. Ang reyalidad sa Dios dili mausab madungog man nako Siya o mabati Siya. Sa mga panahon sa hingpit nga kalipay o kasub-anan, kon ako magpabilin uban Kaniya, Siya kanunayng mag-uban kanako.