“Ang Malungtaron nga Hingpit nga Kalipay sa Pagsunod sa Ebanghelyo,” Liahona, Pebrero 2024.
Ang Malungtaron nga Hingpit nga Kalipay sa Pagsunod sa Ebanghelyo
Ang malahutayon nga hingpit nga kalipay moabot pinaagi sa paglahutay diha sa ebanghelyo ni Jesukristo ug sa pagtabang sa uban sa pagbuhat sa ingon.
The Garden of Eden [Ang Tanaman sa Eden], ni Grant Romney Clawson; Leaving the Garden of Eden [Pagbiya sa Tanaman sa Eden], ni Joseph Brickey
Usa ka mubo ug direkta nga ekspresyon sa katuyoan sa atong mga kinabuhi mahimong makit-an diha sa propetikanhon nga mga pagtulon-an ni Lehi mahitungod sa sinugdanan sa tawhanong kinabuhi dinhi sa yuta. Didto sa Tanaman sa Eden, si Adan ug si Eva nagpuyo diha sa usa ka kahimtang sa pagkainosente. Sila nagpabilin ngadto niana nga kahimtang, sila dili unta “[makabaton og] hingpit nga kalipay, tungod kay sila wala makasinati sa pagkauyamot; walay gihimo nga maayo, kay sila wala makasinati og sala” (2 Nephi 2:23). Sa ingon, sama sa gipasabot ni Lehi, “Si Adan napukan aron ang mga tawo mahimo; ug ang mga tawo naingon, nga unta sila makabaton og hingpit nga kalipay” (2 Nephi 2:25; tan-awa usab sa Moises 5:10–11).
Samtang kita magtubo sa usa ka napukan nga kalibotan, kita makakat-on sa kalainan tali sa maayo ug sa dautan pinaagi sa unsay atong gitudlo ug pinaagi sa unsay atong nasinati. Kita “motilaw sa kapait, aron [kita] masayod sa paghatag og bili sa maayo” (Moises 6:55). Ang hingpit nga kalipay moabot kon kita mosalikway sa kapait ug palabihon ang pagmahal ug paghupot sa maayo.
Pagkaplag og Hingpit nga Kalipay
Tungod sa Iyang hingpit nga gugma alang kanato, ang atong Langitnong Amahan matinguhaon nga mopakigbahin sa Iyang hingpit nga kalipay ngari kanato, sa karon ug sa kahangtoran. Kana ang nahimo Niyang kadasig sa tanang butang gikan sa sinugdanan, lakip sa Iyang mahimayaon nga plano sa kalipay ug ang sakripisyo sa Iyang Bugtong Anak sa pagtubos kanato.
Ang Dios dili mosulay sa paghamtang sa hingpit nga kalipay o kamaya ngari kanato, apan Siya motudlo kanato kon unsaon sa pagpangita niini. Siya nagsulti usab kanato kon diin dili makit-an ang hingpit nga kalipay—“ang pagkadautan [dili ug] dili mahitabo nga mahimo nga kalipay” (Alma 41:10). Pinaagi sa Iyang mga sugo nga gipadayag sa Langitnong Amahan ngari kanato ang dalan ngadto sa hingpit nga kalipay.
Si Presidente Russell M. Nelson mipahayag sa ingon niini nga paagi:
“Ania ang dakong kamatuoran: samtang ang kalibotan moinsister nga ang gahom, kabtangan, kainila, ug kagana sa unod makahatag og kalipay, kini dili mohatag og kalipay! Kini dili makahatag og kalipay! Kini walay ikahatag gawas sa haw-ang nga puli alang sa ‘bulahan ug sa malipayon nga kahimtang niadtong [kinsa] naghupot sa mga sugo sa Dios’ [Mosiah 2:41].
“Ang kamatuoran mao nga mas labaw nga makakapoy ang pagpangita og kalipay diin kamo dili gayod makakita niini! Hinoon, kon kamo mismo makigtambayayong ni Jesuskristo ug mobuhat sa espirituhanong buhat nga gikinahanglan sa pagbuntog sa kalibotan, Siya, ug Siya lamang, ang adunay gahom sa pagtabang ninyo sa pagbuntog sa mga tintasyon niini nga kalibotan.”1
Busa, ang malungtaron nga hingpit nga kalipay makita diha sa pagtuman sa mga sugo sa Dios, ug ang mga sugo sa Dios makita diha sa ebanghelyo ni Jesukristo. Apan ang pagpili anaa ra kanato. Kon diha sa atong kahuyang kita mapakyas sulod sa usa ka higayon sa pagtuman sa mga sugo, kita makabalik gihapon, mosalikway sa kapait, ug sa makausa pa mosunod sa maayo. Ang gugma sa Dios dili makapasaylo sa sala—kana mahimo nga ang kalooy naghikaw sa hustisya—apan pinaagi sa Iyang Pag-ula, gihalad ni Jesukristo ang katubsanan gikan sa sala:
“[Si] Amulek kay … miingon … nga ang Ginoo sa pagkatinuod moabot aron sa pagtubos sa iyang mga katawhan, apan siya dili moabot aron sa pagtubos kanila [diha] sa ilang mga sala, apan aron sa pagtubos kanila gikan sa ilang mga sala.
“Ug siya adunay gahom nga gihatag ngadto kaniya gikan sa Amahan aron sa pagtubos kanila gikan sa ilang mga sala tungod sa paghinulsol; busa siya mipadala sa iyang mga anghel sa pagpahayag sa maayo nga mga balita sa mga kinahanglanon sa paghinulsol, nga nagdala ngadto sa gahom sa Manunubos, ngadto sa kaluwasan sa ilang mga kalag” (Helaman 5:10–11).
Si Jesus miingon:
“Kon tumanon ninyo ang akong sugo, magpabilin kamo sa akong gugma; sama nga ako nagtuman sa mga sugo sa akong Amahan ug nagpabilin sa iyang gugma.
“Gisultihan ko kamo niini aron mabatonan ninyo ang akong kalipay ug mahingpit ang inyong kalipay” (Juan 15:10–11).
Mao kini ang gibati ni Lehi diha sa iyang damgo samtang siya mitilaw sa bunga sa kahoy sa kinabuhi—nga nagrepresentar sa gugma sa Dios. Siya miingon, “Sa diha nga ako mikaon sa bunga niini kini mipuno sa akong kalag sa tuman nga hingpit nga kalipay” (1 Nephi 8:12; tan-awa usab sa 11:21–23).
Gipadayag usab ni Lehi ang ikaduha nga paagi nga kita makadala og hingpit nga kalipay ngadto sa atong mga kinabuhi sa dihang siya miingon, “Busa, ako mitinguha nga ang akong banay mokaon usab [sa bunga]” (1 Nephi 8:12).
Talan-awon sa luyo: Tree of Life [Kahoy sa Kinabuhi], ni Kazuto Uota
Tabangi ang Uban nga Makakaplag og Hingpit nga Kalipay
Sama sa katawhan ni Hari Benjamin, kita “napuno sa hingpit nga kalipay” kon kita makadawat og kapasayloan sa atong mga sala ug mosinati og “kalinaw sa tanlag” (Mosiah 4:3). Kita mobati niini pag-usab kon kita motan-aw sa panggawas ug magtinguha sa pagtabang sa mga sakop sa pamilya ug sa uban nga modawat sa samang hingpit nga kalipay ug kalinaw.
Isip usa ka batan-ong lalaki, si Alma nangita og kalipay diha sa tanang butang nga sukwahi sa ebanghelyo ni Jesukristo. Human nga gibadlong sa usa ka anghel, siya miabot og layo gikan “sa kapait” ngadto “sa maayo” pinaagi sa paghinulsol “hapit ngadto sa kamatayon” (Mosiah 27:28) ug sa buhong nga grasya sa Manluluwas. Mga tuig ang milabay, si Alma madasigon kaayo nga namahayag ngadto sa iyang anak nga si Helaman:
“Ug, unsa nga hingpit nga kalipay, ug unsa ka kahibulongan nga kahayag ang akong nakita; oo, ang akong kalag napuno sa hingpit nga kalipay labaw sa akong kasakit! …
“Oo, ug sukad niana nga panahon gani hangtod karon, ako naghago sa walay paghunong, nga ako makakabig og mga kalag ngadto sa paghinulsol; nga ako makadala kanila sa pagtilaw sa hilabihan nga hingpit nga kalipay diin ako mitilaw; nga sila unta usab matawo sa Dios, ug mapuno sa Espiritu Santo. …
“Oo, ug karon tan-awa, O akong anak, ang Ginoo mihatag kanako og hilabihan ka dako nga hingpit nga kalipay diha sa bunga sa akong mga kahago;
“Kay tungod sa pulong [ang ebanghelyo ni Jesukristo] diin siya mihatag ngari kanako, tan-awa, daghan ang natawo sa Dios, ug nakatilaw ingon nga ako nakatilaw” (Alma 36:20, 24–26).
Sa laing okasyon, si Alma mipamatuod:
“Kini mao ang akong himaya, nga tingali ako mahimo unta nga himan diha sa mga kamot sa Dios aron sa pagdala sa pipila ka mga kalag ngadto sa paghinulsol; ug kini mao ang akong hingpit nga kalipay.
“Ug tan-awa, kon ako makakita og daghan sa akong mga kaigsoonan nga matinud-anon nga naghinulsol, ug moduol sa Ginoo nga ilang Dios, niana ang akong kalag mapuno uban sa hingpit nga kalipay” (Alma 29:9–10).
Si Alma mipadayon sa pagsangyaw sa makabuntog nga hingpit nga kalipay nga iyang gibati sa dihang ang uban nakabaton og kalamposan sa pagdala og mga kalag ngadto kang Kristo:
“Apan ako wala malipay sa akong kalamposan lamang, apan ang akong hingpit nga kalipay labaw nga napuno tungod sa kalamposan sa akong mga kaigsoonan [ang mga anak nga lalaki ni Mosiah], kinsa mitungas ngadto sa yuta sa Nephi.
“Tan-awa, sila naghago sa hilabihan, ug nagdala og daghan nga bunga; ug unsa ka dako ang ilang ganti!
“Karon, kon ako maghunahuna sa kalamposan niini nga akong mga kaigsoonan ang akong kalag pagabayawon, gani ngadto sa pagkabulag niini gikan sa lawas, sa ingon niini, hilabihan ka dako sa akong hingpit nga kalipay” (Alma 29:14–16).
Atong makaplagan ang samang hingpit nga kalipay kon atong higugmaon ang uban nga anaa “ang tiunay nga gugma ni Kristo” (Moroni 7:47; tan-awa usab sa bersikulo 48), ipakigbahin ang gipahiuli nga kamatuoran uban kanila, ug dapita sila sa pagpundok uban sa katawhan sa pakigsaad.
O My Father [O Akong Amahan], ni Simon Dewey
Hingpit nga Kalipay Taliwala sa Pagsulay
Kita dili angayng mahadlok nga ang mga pagsulay ug mga hagit nga dili nato malikayan nga sagubangon dinhi sa mortalidad mopugong o moguba sa atong hingpit nga kalipay. Si Alma mao ang usa ka tawo kansang dili hinakog nga pagserbisyo alang sa uban maoy hinungdan sa iyang dakong pag-antos. Siya miantos sa pagkabinilanggo, taas nga panahon sa kagutom ug kauhaw, mga hulga sa iyang kinabuhi, ug balik-balik nga pagbiay-biay ug pagsalikway. Ug gani, kadtong tanan “mabuntog diha sa hingpit nga kalipay ni Kristo” (Alma 31:38). Tingali ang pag-antos ni Alma nakapahimo sa hingpit nga kalipay nga misunod nga mas dako pa.
Si Presidente Nelson nagpahinumdom kanato nga ang kalipay adunay papel diha sa pag-antos sa Manluluwas—“tungod sa kalipay nga gibutang sa iyang atubangan, giantos niya ang krus” (Mga Hebreo 12:2).
“Hunahunaa kana! Aron Iyang maantos ang labing sakit nga kasinatian nga nalahutay sukad dinhi sa yuta, ang atong Manluluwas nakatutok sa hingpit nga kalipay!
“Ug unsa man ang hingpit nga kalipay nga gibutang diha sa Iyang atubangan? Siguradong naglakip kini sa kalipay sa paglimpyo, pag-ayo, ug paglig-on kanato; sa kalipay gumikan sa pagbayad sa mga sala sa tanan kinsa maghinulsol; sa kalipay sa paghimong posible alang kanimo ug kanako nga makapauli—limpyo ug takos—aron nga mopuyo uban sa atong Langitnong mga Ginikanan ug mga pamilya.
“Kon kita motutok sa hingpit nga kalipay nga moabut kanato, o ngadto niadtong atong gimahal, unsay atong malahutay nga karon ingon og bug-at, sakit, makahadlok, dili makiangayon, o imposible gayud?”2
Ang malahutayon nga hingpit nga kalipay moabot pinaagi sa paglahutay diha sa ebanghelyo ni Jesukristo ug sa pagtabang sa uban sa pagbuhat sa ingon. Ang malungtaron nga kalipay moabot kon kita mopuyo diha sa gugma sa Dios, mosunod sa Iyang mga sugo ug modawat sa grasya sa Manluluwas. Diha sa dalan sa ebanghelyo, adunay hingpit nga kalipay diha sa panaw ingon man hingpit nga kalipay sa kataposan. Ang ebanghelyo ni Jesukristo mao ang dalan sa inadlaw-adlaw nga hingpit nga kalipay.