Ua Na’o Tusiga Faatekinolosi: Autalavou Matutua
Mauaina o La‘u Molimau i le Ofusa o le Malumalu
O le ofuina o ofusa mo le taimi muamua na pei o le vaega na misi o se paso sa ou taumafai e faauma.
Ata na tusia e David Green
I le tausaga ma le afa ae ou te lei alu i le Malumalu o Uosigitone D.C. ina ia maua ou lava faaeega paia, ou te lei faalogo lava e uiga i le Tusi a Mamona po o Le Ekalesia a Iesu Keriso o le Au Paia o Aso e Gata Ai. Ae ina ua ou feiloai i faifeautalai ma amata ona aoao e uiga i le Ekalesia, sa le mafai ona taofia lou lagonaina e moni le talalelei.
Sa papatisoina au i le afa o lo‘u tausaga sinia i le aoga maualuga, a o sauniuni ai e auai i le Iunivesite o Georgetown. E lei leva ona uma ona ou papatiso, ae fesili mai nisi o tagata o la‘u uarota e oo lava i faifeautalai sa galulue i le eria pe na ou mafaufau e uiga i le auauna atu i se misiona. Sa ou tali atu i taimi uma ma se malosi e leai. E mafai faapefea ona ou aoaoina tagata e uiga i se tapuaiga ma se ituaiga olaga lea faatoa amata ona ou ola ai foi au ia?
Sa ou mauaina lou faamanuiaga faapeteriaka i ni nai vaiaso a o lei siitia atu i Georgetown, ma o lena aafiaga na ofoina mai ai le tele o vaaiga e uiga i lo‘u lumanai. A o lei auai i le Ekalesia, sa ou lagonaina o lo‘u olaga sa foliga mai e masani lava ona alu e pei ona fuafuaina, ma na faafuasei lava ona faalavelaveina lena mamanu. O le anotusi o lo‘u faamanuiaga faapeteriaka sa lei atagia mai ai le ala na ou vaai faalemafaufau ai i taimi uma i lo’u olaga. O se tasi o upumoni sa sili ona vave na ou aveesea o le fautuaga e le mafaafitia e tatau ona ou auauna atu i se misiona.
E lei umi ae ou mafaufau, e ui lava ma le musuā, e amata au pepa o le misiona.
Sa ou malamalama o se mea masani mo tagata o le ekalesia le mauaina o o latou faaeega paia o le malumalu a o lei ulufale atu i le misiona, o lea sa amata ai ona ou sauni e ulufale atu. Sa ou iloa o se tasi o suiga o le a tupu i lo‘u olaga o le tuuto lea i le ofuina o le ofusa o le malumalu. Ou te lei mafaufau tele e uiga i ofusa ae ou te lei amata sauni mo le malumalu, o lea sa leai ai ni ou muaimanatu e uiga i le ofuina.
Ina ua ou siitia atu i le kolisi, sa ma galulue ma lo‘u epikopo ma alu i le inisitituti i vaiaso taitasi. Sa agalelei lava lo‘u faiaoga inisitituti e ofo mai ni faatonuga talafeagai mo sauniuniga mo le malumalu mo ni nai vaiaso seia oo i le aso o lo’u faaeega paia. O se alofa mutimutivale agalelei lenei, pe a ou mafaufau atu sa ou alu ese mai lau uarota tumau ma sa lei i ai [sou] aiga i le Ekalesia e taialaina au. Na iu lava ina ou maua lo‘u valaauga o le misiona i Parakuei, ma sa ou sauni e alu i le malumalu mo le taimi muamua.
Alu i le Malumalu
O le alu i le malumalu na pei ua ou toe foi atu i le aiga. E oo lava i le ofuina o ofusa mo le taimi muamua na pei o le vaega o loo misi i se paso sa ou taumafai e foia. Sa ou malamalama o la‘u feagaiga i le ofuina o le ofusa o se laasaga taua i lo’u alualu i luma faaleagaga, ma e ui lava o lenei faaiuga e paia ma patino, ae sa ou faia ma le fiafia aua sa ou iloa o le malamalama o le a ou maua e uiga i lo‘u paia o se afafine o le Atua sa sili atu nai lo soo se mea e mafai ona ofoina mai e le lalolagi ia te a’u.
Ina ua uma ona maua o‘u faaeega paia, o le suiga tele sa le o le pe na faape‘i o‘u lagona i le ofuina o ofusa, ae o ou lavalava fou e tatau ona ou faia mulimuli ane. Sa ou aveeseina le tele o lavalava mai la‘u kapoti ia o le a le ufiufia ai o‘u ofusa.
Peitai, o le faia o na suiga i lo‘u olaga na talafeagai lava. Ona sa ou faaalu le taimi e sauniuni ai mo le malumalu, o le suiga i la‘u filifiliga o lavalava sa o se aafiaga fiafia ma faigofie. Ma a o ou taumafai e aoao atili, sa ou faalolotoina la‘u molimau e faapea, o le tuuto atu e ofuina le ofusa o le malumalu e sili atu nai lo na o se suiga o lavalava—o se faatusa o lo‘u tuuto atu i lo’u Faaola, o Iesu Keriso, ma la‘u filifiliga e mulimuli ia te Ia. O se meaalofa foi—o se faamanatu vaaia o a‘u feagaiga o le malumalu ma le mana, puipuiga, ma faamanuiaga ua avanoa mo a‘u e ala i le taulaga togiola a le Faaola.
Na pau lava lo‘u faamoemoega o le alu atu i totonu o le malumalu i le aso o lo‘u faaeega paia o le lagonaina lea o le alofa o le Atua mo au. Sa mafai na sili atu ona ou lagonaina lena lagona i totonu o le malumalu nai lo se isi lava taimi, ma sa ou naunau e tausia a‘u feagaiga ma ofu o’u ofusa ona ou te lei manao lava e alu ese lena lagona.
Taumafai e Tausi A‘u Feagaiga
I taimi sili ona tuuatoatasi ma le matautia o lo‘u olaga, o la’u molimau i mataupu faavae faigofie o le talalelei ua faamalosia ai a‘u e ofu o’u ofusa i taimi uma ma le loto i ai a o taumafai e tausia feagaiga na ou osia i le malumalu.
Ou te maua le mafanafana tele i nei upu mai ia Peresitene Russell M. Nelson:
“Soo se taimi lava e tulai mai ai soo se ituaiga o faalavelave i lou olaga, o le nofoaga sili ona saogalemu faaleagaga e tatau ona i ai o le ola i totonu o au feagaiga o le malumalu!
“Faamolemole talitonu mai ia te a’u pe a ou fai atu, a fausia lou faavae faaleagaga ma le mausali i luga o Iesu Keriso, e lē manaomia la ona e fefe. A o e faamaoni i au feagaiga na osia i totonu o le malumalu, o le a faamalosia oe e Lona mana. O lea, pe a oo ina tutupu mafui’e faaleagaga, o le a mafai ona e tu malosi ona ua mautu ma lē maluelue lou faavae faaleagaga.”1
E lei faigofie lo‘u olaga talu ona ou auai i le Ekalesia. O le mea moni, o taimi sili ona faigata o lo‘u olaga na tupu ina ua uma lo’u papatisoga. Peitai, ou te iloa o lo‘u malamalama i le talalelei toefuataiina ma le malosi mai feagaiga na ou osia i le malumalu ua mafua ai ona onosaia nei luitau, ma o taunuuga semanu e matuai ese lava pe ana leai lo’u faatuatua ia Iesu Keriso.
O se luitau le ola ma le loto i ai o se soo o Keriso pe a foliga mai e le ogatusa le lalolagi ma tulaga faatonuina o loo ou taumafai e tausia. Ae e pei ona ta‘ua e Peresitene Nelson, o le sulufaiga sili mo a’u o le ola lea i totonu o a‘u feagaiga o le malumalu, e aofia ai le ofuina o o’u ofusa i le ala na ou folafola atu ai. Ma a o faaauau pea ona ou faia ma tumau ai i luga o le ala o feagaiga, ou te iloa o le a ou lagonaina le olioli.