“Auala e 4 e Fatu ai se Avanoa Faaleagaga,” Liahona, Iuni 2024.
Autalavou Matutua
Auala e 4 e Fatu ai se Avanoa Faaleagaga
O se aiaiga faavae e le o se talaiga i Ierusalema na suia ai la’u vaaiga i le fatuina o se avanoa faaleagaga i lo’u olaga.
Ata na tusia e Ingrid Nancy Ochoa Villarreal
E tele nofoaga faatusi paia e le mamao le savali i ai mai le Iunivesite o Eperu i Ierusalema lea o loo ou nofo ai o se tagata aoga i le taimi nei. E mafai ona ou asiasi atu i faasitepu o le malumalu lea atonu na aoao atu ai Iesu po o le Tuugamau i le Faatoaga lea e manatu ai nisi na taoto ai Lona tino a o lei Toetu o Ia. O le nofo ai i le Nuu Paia o se faamanuiaga, ma ou te faafetai mo aso uma ou te faaaluina i lenei nofoaga ofoofogia. Ae o le i ai iinei o se tagata o Lana Ekalesia e le faigofie.
Ona o le aiaiga faavae mo le tapu ai o ni talaiga i Isaraelu, e le faatagaina ai a’u e faasoa atu lo’u faatuatuaga. Ou te lei iloaina le faigata o lenei mea seia oo ina fesili mai se tasi o a’u uo ia te au mo se kopi o le Tusi a Mamona ma sa le mafai ona ou tuuina atu ia te ia se kopi. E mafai ona lagonaina sina tuuatoatasi ma le faaesea i le avea ai o se soo o Keriso i nisi o taimi.
Ae o loo ou aoaoina foi ni lesona maoae iinei; E mafai lava ona ou faasoa atu le malamalama ma le alofa o Iesu Keriso i soo se tasi, ma e mafai ona ou fesootai atu i le Agaga.
E Ala i Talanoaga Faaleagaga
E ui o la’u polokalama faaleaoaoga e tele ina faalepotosalalau, e toetoe lava o isi tagata aoga uma i a’u vasega o ni Kerisiano talitonu. E masani ona matou nonofo pe a uma le vasega ma fefaasoaai manatu ma malamalamaaga i lesona. O nei talanoaga ua mafai ai ona ou maua se avanoa e mafai ai ona ou molimau atu ia Iesu Keriso.
A o matou talanoa i le tasi ma le isi, e tele ina faamanatu mai ia te au le Mataio 18:20: “Aua o le mea ua faapotopoto faatasi ai se toalua po o se toatolu i lo’u igoa, ou te i ai faatasi ma i latou.”
E ui e le mafai ona ou faasoa malosi atu le talalelei i nei talanoaga, ae o lenei aafiaga ua aoaoina ai au i le ala e mafai ai e le talanoa atu i uso a soo e uiga ia Keriso ona valaaulia le Agaga i a tatou sootaga ma faatumauina o Ia i le totonugalemu o mea uma tatou te faia.
E Ala i le Tausia o Feagaiga
Ua ou iloaina e na o le pau lava le auala e mafai ai ona ou faasoa atu le talalelei a Iesu Keriso iinei e ala lea i lo’u lava ituaiga tagata ua ou i ai. E le mafai ona ou tuuina atu i tagata se Tusi a Mamona iinei, ae e mafai ona ou tatalo faatasi ma i latou, e mafai ona ou fesoasoani ia latou lagonaina le alofa o le Atua, ma e mafai ona ou molimau atu e alofa le Atua ia i latou. A o ou taumafai e tau lava ina tausia a’u feagaiga ma mulimuli i poloaiga a le Alii, o loo ou molimauina atu lava lea i lo’u faatuatua i le talalelei a Iesu Keriso.
Po o a lava ou tulaga o i ai, mafaufau i auala e mafai ona avea ai lau faataitaiga ma se malamalama e taiala ai isi i le upumoni ma faasoa atu le agalelei o le Agaga.
E pei ona aoao mai talu ai nei Elder Dale G. Renlund o le Korama a Aposetolo e Toasefululua, “E avea i tatou ma soo [o Iesu Keriso] ma avea ma sui lelei o Ia pe a tatou tauaveina faasolosolo ma le loto i ai i o tatou luga lava le suafa o Iesu Keriso e ala i feagaiga.”1
E Ala i le Taulai atu i la Tatou Sootaga ma le Tama Faalelagi ma Iesu Keriso.
E faatoa mafai ona ou lagonaina le Agaga e ala i le fesootai muamua ma le Tama Faalelagi ma Iesu Keriso i aso uma—ia tumau ia i Laua ina ia mafai ai ona ou “viia [lo’u] Tama o i le lagi” (Mataio 5:16). O nisi taimi tatou te vaai ai i le talalelei o se fuafaatatau lea tatou te palakaina ai mea ina ia maua ai ni taunuuga patino. Ae ua ou aoaoina o le fatu o le talalelei o lo tatou sootaga moni lea ma le Tama Faalelagi ma le Faaola.
O la’u faagasologa o le fesootai atu ai ia i Laua e le foliga e ese iinei i le Nuu Paia. E ui lava e mafai ona ou asiasi atu i nofoaga sa femaliuai ai Iesu, ae e sili atu ona ou lagonaina le Agaga pe a ou tatalo ma suesue i a’u tusitusiga paia ma faaavanoa se taimi mai lo’u aso e faaalu ai se taimi aoga ma i Laua—o le auala lena sa i ai i lo’u olaga atoa.
Na aoao mai Sister Bonnie H. Cordon, o lē sa avea muamua ma Peresitene Aoao o Tamaitai Talavou: “O loo i ai le mana i le faia ai o nei faigamasani paia e faaitiitia ai o se lisi o mea e ao ona fai ma sili atu ona avea o se molimau. O le faagasologa o le a faifai lemu, ae o le a tuputupu a’e i le auai atoatoa ma aafiaga ‘anoa i aso taitasi faatasi ma Keriso.”2
O le tuuina atu o taumafaiga faamaoni e fesootai ai ma le Tama Faalelagi ma Iesu Keriso o le a fesoasoani ia te oe e faia ai se avanoa mo taimi paia i lou olaga.
Ou te folafola atu o le a e lagonaina le eseesega.
E Ala i le Taulai Atu i Upumoni Faigofie
Ona o loo ou i ai i ni tulaga uigaese lea e le mafai ai ona ou talanoaina auiliiliga o lo’u faatuatuaga, o le i ai i Ierusalema ua aoaoina ai a’u ia aua nei ou vaai “i tala atu o le faailoga” (Iakopo 4:14). Ua ou aoao e taulai atu i upumoni faigofie o le talalelei: E alofa le Atua i Ana fanau uma, o Iesu Keriso o lo’u Faaola, ma o Peresitene Russell M. Nelson o le perofeta a le Atua i le lalolagi i aso nei.
O lenei vaaiga ua fesoasoani ia te a’u e tausia ai a’u feagaiga ma tumau ai i le fesootaiga i le Agaga a o ou faatautaia luitau o le avea ma se talavou matua i le Ekalesia, aemaise lava i se nofoaga e toalaiti tagata o le ekalesia o loo iai.
Ae ua ou iloa e tusa lava po o fea ou te i ai, pau lava le mea ia ou taumafai e fatu se avanoa faaleagaga i lo’u olaga i aso taitasi, o a’u fesili, faafitauli, ma popolega e foia i taimi uma e ala i le faamoemoe i le Tama Faalelagi ma i lou Faaola, o Iesu Keriso.