Ua Na’o Tusiga Faatekinolosi: Talavou Matutua
Fesootaiga i le Agaga i se Nofoaga e Lē Faaleagaga
I le taimi o la’u tautua faamiliteli i Korea i Saute, sa vavaeeseina ai a’u mai le Ekalesia, ae o ni mea laiti na faatumauina ai le malosi o lo’u faatuatua.
I le tuputupu ae ai i Korea i Saute, sa masani ona na o au le tagata O Le Ekalesia a Iesu Keriso o le Au Paia o Aso e Gata Ai faatasi ma au uo ma tagata o le vasega. O nisi taimi sa faigata ona faamatala pe aisea na ou le faia ai mea lava e tasi na faia e a’u uo, ae o le tu atu mo o’u talitonuga sa foliga mai e faamalosia ai lo’u faatuatua.
Peitai, ina ua avea au ma se talavou matua, sa ou feagai ma le tele o faaosoosoga ma tuu i se siosiomaga e sili atu ona lē lelei faaleagaga nai lo se isi lava taimi muamua.
O se Nofoaga Faaleagaga lē Lelei
I Korea i Saute, e manaomia alii talavou matutua e auauna atu i le militeli mo ni nai tausaga. A o ou i ai i le ogatotonu o la’u tautua faamiliteli ina ua uma ona ou auauna atu i la’u misiona, sa ou lagonaina le tuuatoatasi i lo’u faatuatua nai lo se isi lava taimi—mo le tele o mafuaaga.
O le mea muamua, sa faigata ona valavala ma isi tagata o le Ekalesia ma lo’u aiga, ae o le isi faigata sa siomia e mea e faasagatau i o tatou tulaga faatonuina. Mo se faataitaiga, o le ava malosi e i soo se mea i Korea i Saute, aemaise lava i le militeli. I le maea ai o toleniga sa taatele i tagata uma le potopoto faatasi e inu faatasi. Ina ua latou iloa ou te le inu ava malosi, sa latou faia soo se mea e mafai ona latou faia e faamalosia ai au. I le latou vaai, sa le na ona ou pipiimau i ou tulaga faatauaina—sa ou tetee atu i le aganuu.
Ae paga lea, sa o se mea masani foi mo o’u uso a fitafita le talanoa e uiga i tamaitai i se auala faalelalolagi ma faalefeusuaiga lea na ou lagona ai le le toafimalie. Sa o se luitau le faalogo atu i la latou gagana leaga i aso uma. E le gata i lea, sa le mafai ona ou auai i le lotu, ai ma inu i le faamanatuga, auai i le malumalu, pe faia le tele o soo se mea e fesootai i ai le talalelei i lea taimi.
Mo sina taimi, sa ou lagonaina le tuuatoatasi ma mafaufau po o le a se mea e mafai ona ou faia e lagona ai le Agaga ma faatumauina le malosi o lo’u faatuatua. E mafai faapefea ona ou tu i nofoaga paia ae sa leai sa’u filifiliga e fai?
O Mea Laiti
Ina ua mavae sina taimi o tauiviga, sa ou filifili loa e tatau ona ou tauaveina le tiutetauave mo le lagonaina o le Agaga, e oo lava i se siosiomaga faalelalolagi. O se tasi o mea na fesoasoani ia te au o le aumaia lea o a’u tusitusiga paia sa ou faaaogaina i la’u misiona faatasi ma a’u i le taimi o la’u auaunaga. E moni lava o mausa laiti tatou te faia i aso taitasi—faitauina o a tatou tusitusiga paia, tatalo, ma vaavaai mo avanoa e auauna atu ai ma avea atili e faapei o le Faaola—lea e faatumauina ai lo tatou fesootai atu i le Agaga.
O se tasi aso sa ou tau ai i le 1 Korinito 10:13, o loo faapea mai, “Ua faamaoni le Atua, o le na te le tuuina atu outou i le faaosoosoga e sili i se mea ua outou lavātia, a e sauni foi faatasi ma le faaosoosoga se mea e sao ai, ina ia outou lavā oono.”
A o faitauina lena mau, sa ou iloaina ai e ui lava ina sa ou lagonaina le tuuatoatasi, sa faatasi mai le Tama Faalelagi ia te au. Afai ou te faaauau pea ona aapa atu ia te Ia ma lo’u Faaola, o le a La fesoasoani mai ia te a’u e saili se auala e onosaia ai ma le faamaoni la’u auaunaga faamiliteli ma fo’i ai i le aiga ma se molimau ua malosi atu nai lo le taimi muamua.
Manatuaina Po o Ai A’u
Na avea tusitusiga paia ma se laina faaola mo a’u i lea taimi ina ua vaavaeesea atu a’u mai le lotu ma isi tagata o le ekalesia. O le talanoa atu i le Tama Faalelagi i aso taitasi ma le faitauina o a’u tusitusiga paia na faatumauina ai lo’u fesootai atu ia te Ia ma faamanatu mai ai ia te a’u lo’u faasinomaga paia, o se tasi lea o ki i le ola ai faaleagaga.
O le manatuaina o au o se atalii faapelepele a ni matua faalelagi na faatumauina le malosi o lo’u faavae o le faatuatua, aemaise lava pe a ou feagai ma faaosoosoga.
Na aoao mai talu ai nei e Elder Alan T. Phillips o le Fitugafulu: “E finagalo Iesu Keriso ia e iloa ma faia se sootaga ma lou Tama oi le Lagi. …
“O oe o Lona atalii/afafine. Afai o e lagona ua e sē, afai o i ai ni au fesili pe ua le o i ai le poto, afai o e tauivi ma ou tulaga, pe o tauivi ma mataupu faavae faaleagaga, liliu atu ia te Ia. Tatalo ia te Ia mo se faamafanafanaga, alofa, tali, ma se taitaiga. Po o a lava mea e manaomia, ma pe o fea lava foi o e i ai, ia liligi atu lou loto i lou Tama Faalelagi.”1
E tusa lava pe le mafai ona e auai i le malumalu, lotu, pe ai ma inu i le faamanatuga po o le a lava le mafuaaga, o le manatuaina o lou faasinomaga paia e mafai ona saunia ai pea se ala mo oe e toe fesootai ai ma le Agaga ma faaloloto ai lou sootaga ma le Tama Faalelagi ma Iesu Keriso.
E Masani Lava Ona Tatou Maua le Paia
Ina ua uma la’u tautua faamiliteli, sa sili atu ona faamuamua a’u mausa faaleagaga nai lo se isi lava taimi. O le mafai ona auai i le malumalu, ai ma inu i le faamanatuga, ma le auai atoatoa i le talalelei sa o se eseesega tele i le siosiomaga sa ou i ai mo le lua tausaga talu ai. Ua ou lagonaina nei le atoaga o faamanuiaga, mafanafana, ma le olioli ua ofoina mai e le talalelei a Iesu Keriso ia i tatou. Ma ou te fiafia sa ou tumau faamaoni seia oo ina mafai lenei mea.
Afai e i ai se taimi e te oo ai i tulaga e manaomia ai oe e tu i nofoaga e le paia tele, ia taofi mau i lou faatuatua. Ua ou aoaoina le tele o mea e uiga i le totoina o a tatou fatu o le faatuatua i se tulaga mautu ma faatagaina na aa e taofimau ina ia mafai ai ona tatou tetee atu i faaosoosoga ma luitau o le lalolagi.
Po o le a lava le pogisa o lou siosiomaga po o ou luitau e ono foliga mai i nisi taimi, aua nei galo ua e maua pea le avanoa i le lagi e ala i le tatalo, e ala i tusitusiga paia, ma e ala i le meaalofa o le Agaga Paia.
E pei ona aoao mai talu ai nei e Elder Joaquin E. Costa o le Fitugafulu: “O le a se mea ua tuuina mai ai ia i tatou le mana e ui atu ai i mea faigata? O le a le mea e avatu ai se atufola faaopoopo o le malosi e agai ai pea i luma pe a foliga ua leiloloa mea uma?
“Na ou mauaina faapea o le faapogai o lena malosiaga o le faatuatua lea ia Iesu Keriso pe a tatou saili ma le loto i ai e o mai ia te Ia i aso taitasi uma.”2
Po o fea lava e te tu ai, afai o loo e taumafai e mulimuli ia Iesu Keriso ma taofimau i lou faatuatua, o soo se mea lava e mafai ona avea o se nofoaga paia e mafai ona e maua ai ma faasoa atu Lona malamalama.