E Silafia ma Alofa Le Atua ia te Oe

Saunia e Elder Alan T. Phillips

O Le Fitugafulu

O le fuafuaga o le fiafia a le Atua e faatatau uma ia te oe. O oe o Lona atalii/afafine faapelepele e taua tele.

Ono tausaga talu ai, sa tietie atu ai lo matou aiga i le po i fafo tonu atu lava o le aai o Oxford. E pei lava ona masani ai ma tamaiti laiti, sa manaomia ona matou malolo ma o lea sa matou mauaina se pamukesi o i ai ni faleoloa eseese ma ni fale’aiga. Sa matou feosofi ma le faaeteete i fafo o le taavale, asiasi i le faleoloa, ma toe faasasa’o i le taavale, ma faaauau la matou malaga.

Sefululima minute mulimuli ane, ae fesili mai le ma atalii ulumatua i se fesili taua: “O fea Jasper?” E nofo Jasper na o ia i le pito i tua o le taavale. Sa faapea i matou ua moe pe o lafi foi pe o fai foi sana togafiti ia matou.

Ina ua siaki lelei e lona uso tua o le taavale, sa ma iloa ai e le o i ai iina le ma atalii e lima tausaga. Sa tumu o ma’ua loto i le popole. A o matou toe tietie atu i le pamukesi, sa matou aioi atu i le Tama Faalelagi ia puipuia ia Jasper. Sa ma viliina leoleo ma ta’u i ai le tulaga na i ai.

Ina ua matou taunuu atu ma le atuatuvale, i le silia ma le 40 minute mulimuli ane, na matou maua ai ni taavale leoleo se lua i le paka o taavale, ma moli o loo faaemoemo. I totonu o se tasi o na taavale, sa i ai Jasper, o loo ta’alo’alo i faamau. O le a le galo lava ia te a’u le olioli na matou lagonaina i le toefaatasia ma ia.

O le tele o aoaoga faafaataoto a le Faaola e taulai i le faapotopotoina, toefuataiina, po o le taumafai e sue ia maua mea sa faataapeapeina pe leiloloa. O nisi o nei faataoto o le faataoto i le mamoe na se, o le tupe na leiloa, ma le atalii faamaumau oa.¹

A ou toe mafaufau ai pea i lenei mea na tupu ia Jasper i le aluga o tausaga, sa ou tomanatu ai i le faasinomaga paia ma le taua o fanau a le Atua, le mana togiola a Iesu Keriso, ma le alofa atoatoa o se Tama i le Lagi, o lē e silafia oe ma au. Ou te faamoemoe e molimau atu i nei upumoni i le asō.

1. Fanau a le Atua

E faigata le olaga. E toatele tagata e lagona le lofituina, tuuatoatasi, faaesea, pe lē lavavā. A oo ina faigata mea, atonu tatou te lagona ua tatou se ese pe ua pa’u’ū atu i tua. O le iloa ai o i tatou uma o fanau a le Atua, ma o tagata o Lona aiga faavavau o le a toe maua ai se lagona o i tatou o ni ō ma le faamoemoega.²

Na faasoa mai e Peresitene M. Russell Ballard: “E tasi le faasinomaga taua ua tofusia ai i tatou i le taimi nei ma le faavavau. … O oe ma sa avea pea lava oe o se atalii po o se afafine o le Atua. … O le malamalama ai i lenei upumoni—malamalama moni i ai ma taliaina—e suia ai olaga.”³

Aua ne’i e malamalama sese pe tuumaualaloina lou taua i lou Tama Faalelagi. E le o oe o se fua tulagalua faafuaveta o le natura, se matuaoti na foafoa e le atulaulau, po o se taunuuga o anomea e tupu faafuasei i le aluga o taimi. O le mea e i ai se mamanu, e i ai foi se fai mamanu.

E i ai le uiga ma le faamoemoega o lou olaga. O le Toefuataiga faifai pea o le talalelei a Iesu Keriso, e aumaia ai le sulu ma le malamalama e tusa ai ma lou faasinomaga paia. O oe o se afafine/atalii faapelepele o le Tama Faalelagi. O oe lava o loo faatatau i ai na faataoto ma aoaoga uma. E alofa tele le Atua ia te oe na Ia auina mai ai Lona Alo, e faamalolo, lavea’i, ma togiola oe.⁴

Na aloa’ia e Iesu Keriso le natura paia ma le taua e faavavau o tagata taitoatasi.⁵ Sa Ia faamalamalama ai le auala e avea ai poloaiga sili e lua ia alofa i le Atua ma alolofa i o tatou tuaoi ma faavae o poloaiga uma a le Atua.⁶ O se tasi o o tatou tiutetauave paia o le tausia o i latou e le tagolima.⁷ O le mafuaaga lea, i le avea ai o soo o Iesu Keriso, tatou te “tauave avega a le tasi [ma le isi], … faanoanoa faatasi ma e e faanoanoa …, ma faamafanafana atu ia te i latou o e e manaomia le faamafanafanaga.”⁸

O talitonuga faalelotu e le gata ina faatatau i lo tatou sootaga ma le Atua; ae e faatatau foi i lo tatou sootaga i le tasi ma le isi. Na faamatala mai e Elder Jeffrey R. Holland e faapea, o le upu faa-Peretania o le religion e sau mai le Latina relikare, o lona uiga “ia nonoa” po o le, upu, “ia toe-nonoa.” O lea, “o le talitonuga faalelotu moni [o] le nonoa lea e fusia ai i tatou i le Atua ma le tasi ma le isi.”⁹

O le ala tatou te taulima ai e le tasi ma le isi e matuai taua moni lava. Ua aoao mai e Peresitene Russell M. Nelson, “E manino lava le savali a le Faaola: O Ona soo moni e atia’e, siitia, faamalosiau, faasufi, ma musuia.”¹⁰ E sili atu lea ona taua pe a lagona e o tatou uso faimalaga le sē, tuuatoatasi, faagaloina, pe aveesea.

Tatou te le tau tilotilo mamao e sue tagata o loo tauivi ma faigata. E mafai ona tatou amata e ala i le fesoasoani i se tasi i o tatou lava aiga, aulotu, po o le pitonuu. E mafai foi ona tatou saili e fesoasoani i mafatiaga o le 700 miliona o tagata o loo ola i le mativa tele na’ua¹¹ o le 100 miliona o tagata ua faaaunu’ua faamalosi ona o sauaga, taua, ma sauaga e faavae i le faasinomaga.¹² O Iesu Keriso o le faataitaiga lelei atoatoa o le tausia o i latou e manaomia le fesoasoani--o ē matelaina, o le tagata ese, o ē mama’i, o ē matitiva, ma ē o faafalepuipuiina. O Lana galuega o la tatou galuega foi lea.

Ua aoao mai Elder Gerrit W. Gong e faapea “e tele ina tatou maua lo tatou ala e foi atu ai i le Atua e ala i sootaga ma isi.”¹³ O lena tulaga, e tatau ai ona avea a tatou uarota o se maluapapa mo fanau uma a le Atua. Pe o tatou auai ma le faalēano i le lotu pe o fatu faato’aga ia pitonuu o lo latou faamoemoe o le tapua’i, manatua Keriso, ma auauna atu le tasi i le isi?¹⁴ E mafai ona tatou uai atu i le fautuaga a Peresitene Nelson ia faaitiitia le faamasinosino, ae faatele le alofa, ma tuu atu le alofa mama o Iesu Keriso e ala i a tatou upu ma faatinoga.¹⁵

II. O Le Mana Togiola o Iesu Keriso

O le Togiola a Iesu Keriso o le faaaliga silisili lea o le alofa o le Tama Faalelagi mo Lana fanau.¹⁶ O le upu togiola ua faamatalaina ai le tulaga o le ‘ia tasi’ o i latou o e ua vavaeeseina pe ua tuueseeseina.

O le misiona a lo tatou Faaola o le saunia lea e toefoi atu ai i le Tama Faalelagi ma le mapusaga i le malaga. Ua silafia e le Faaola e ala i Lona aafiaga le ala e lagolago ai i tatou e ala i luitau o le olaga.¹⁷ Aua ne’i sese ai: o Keriso o lo tatou lavea’i ma le fomai o o tatou agaga.

A tatou faaalia lo tatou faatuatua, e fesoasoani o Ia ia tatou fetaomi atu i luma e ala atu i faigata. O loo faaauau pea ona tuuina mai Lana valaaulia alofa ma le alofa mutimutivale:

“O mai ia te a’u, outou uma o e tigaina ma mafatia i avega, o a’u foi e malolo ai outou.

“Ia outou amoina la’u amo, ma ia outou faaa’oa’o ia te au, … ona maua lea e outou o le malologa mo outou agaga.”¹⁸

O le upu valiata o le amo, e mamana. E pei ona faamatala mai e Peresitene Howard W. Hunter: “O le amo o se mea … e mafai ai e le malosi o se manu lona lua ona tuufaatasi ma faaluaina ai le taumafaiga a se manu e tasi, e faasoa ai ma faaitiitia ai le galuega mamafa a le suotosina o le [galuega o loo faamaeaina nei]. O se avega na lofituina pe atonu foi e le mafai e se toatasi ona tauave, e mafai ona tauaveina lelei e se toalua ua noatia faatasi i se amo masani.”¹⁹

Na aoao mai Peresitene Russell M. Nelson: “E te sau ia Keriso ina ia amo faatasi ma Ia ma Lona mana, ina ia e le tosoina na o oe le avega o le olaga. O loo e tosoina le avega o le olaga ua amo faatasi ma le Faaola ma le Togiola o le lalolagi.”²⁰

E faapefea ona tatou amo faatasi pe noatia i tatou lava i le Faaola? Ua faamalamalama mai e Elder David A. Bednar:

“O le osia ma le tausia o feagaiga paia e tuufaatasia ai i tatou ma le Alii o Iesu Keriso. O le mea moni lava, o loo augani mai le Faaola ia i tatou ina ia faalagolago atu ma tatou galulue faatasi ma Ia. …

“E le o tuua na o i tatou ma e le tatau ona tuua na o i tatou.”²¹

I soo se tasi o mafatia, sē, fememea’i: E te le tau faia na o oe lenei mea.²² E ala i le Togiola a Keriso ma Ana sauniga e mafai ona amo faatasi pe noatia oe ia te Ia. O le a ia saunia ma le alofa le malosi ma le faamalologa e te moomia e faafetaia’ia ai le malaga o i luma. O Ia lava o le maluapapa mai a tatou afā.²³

III. O Le Alofa o le Tama Faalelagi

Ina ia manino, o Jasper e mālie, lotoalofa, atamai, ma faalogogata. Ae o le mea sili ona taua i lenei tala, o ia o lo’u atalii. O ia o lo’u atalii, ma ou te alofa ia te ia e sili atu nai lo le mea o le a ia iloa. Afai e faapea se lagona o se tamā faalelalolagi e le atoatoa e uiga i sona atalii/afafine, mata e mafai ona outou silafia lagona o se Tama Faalelagi atoatoa, alofa, ma ua faamamaluina ia te oe?

I a’u uo pele o le tupulaga faia’e, Gen Z ma Gen Alpha: Faamolemole ia outou iloa o le faatuatua e manaomia ai le galue.²⁴ Ua tatou ola i se taimi ua toatele i latou na o le “vaai e talitonu ai.” E mafai ona faigata le faatuatua ma manaomia ai filifiliga. Ae o loo tali mai tatalo.²⁵ E mafai foi ona lagonaina tali.²⁶ O nisi o mea e sili ona moni i le olaga e le o vaaia; e mafai ona pa’i i ai, iloa, ma o’o i ai. E moni foi na mea.

E finagalo Iesu Keriso ia outou iloa ma ia i ai se sootaga ma lo outou Tama o i le Lagi.²⁷ Na Ia aoao mai, “O ai se tagata o ia te outou, e i ai se atalii, o tutu i fafo ma faapea mai, Tamā, tatala mai lou fale se’i ou alu atu i totonu e talisua ma oe, o le a lē faapea atu, Sau i totonu, lo’u atalii; aua o a’u mea o āu ia, o āu foi o a a’u ia?”²⁸ E mafai ona e mafaufau i se foliga e sili ona patino, ma alofa o le Atua le Tama Faavavau?

O oe o Lona atalii/afafine. Afai o e lagona ua e sē, afai o i ai ni au fesili pe ua le o i ai le poto, afai o e tauivi ma ou tulaga, pe o tauivi ma mataupu faavae faaleagaga, liliu atu ia te Ia. Tatalo ia te Ia mo se faamafanafanaga, alofa, tali, ma se taitaiga. Po o a lava mea e manaomia, ma pe o fea lava foi o e i ai, ia liligi atu lou loto i lou Tama Faalelagi. Mo nisi, atonu tou te mananao e mulimuli i le valaaulia a Peresitene Nelson ma fesili “pe o i ai moni o Ia iina—pe Na Te silafia oe. Ōle atu ia te Ia po o a ni Ona lagona e uiga ia te oe. Ona e faalogo lea.”²⁹

Uso e ma tuafafine pele:

Ia iloa lou Tama i le Lagi. E atoatoa ma alofa o Ia.
Ia iloa pe o ai Iesu Keriso.³⁰ O Ia o lo tatou Faaola, ma le Togiola. Ia noatia oe lava ma i latou e te alofa i ai ia te Ia.
Ma ia e iloa pe o ai oe. Ia iloa lou faasinomaga paia moni. O le fuafuaga o le fiafia a le Atua e faatatau uma ia te oe. O oe o Lona atalii/afafine faapelepele e taua tele. Na te silafia ma alofa ia te oe.

O nei upumoni faigofie ae faatomua, ou te molimau atu ai i le suafa o Iesu Keriso, amene.