Sili Atu Nai Lo o se Toa Manumanu
O Iesu Keriso ua le gata o lo tatou toa manumanu; ae o Ia o lo tatou Alii ma le Tupu, o le Faaola ma le Togiola o tagata uma.
Mai le 1856 i le 1860, e faitau afe paionia o le Au Paia o Aso e Gata Ai na tosoina a latou meatotino i taavaletosolima mo le silia ma le 1,000 maila a o latou malaga atu i le Vanu o Sate Leki. I le selau onosefulu fitu tausaga talu ai i lenei vaiaso, i le aso 4 o Oketopa, 1856, sa faateia ai Peresitene Polika Iaga i le iloaina o kamupani taavale tosolima e lua, na taitaia e Eteuati Matini ma James Willie, o loo i ai pea i le faitau selau o maila mai Sate Leki, ma le latalata vave mai o le taumalulu.1 O le aso lava na sosoo ai, na tu ai Peresitene Iaga i luma o le Au Paia ma tautino atu: “E toatele o tatou uso ma tuafafine o loo i ai i laufanua valevalenoa ma taavaletosolima, ma e tatau ona aumai i latou iinei. O atu nei ma aumai na tagata o i laufanua valevalenoa.”2
E na o le lua aso mulimuli ane, ae tuua e uluai vaega muamua o le au lavea’i e saili ia paionia o taavaletosolima.
Sa faamatala e se tasi o le vaega a Uili le tulaga atuatuvale a o lei taunuu le ‘au lavea’i autu. Na ia faasoa mai: “I le taimi lava na foliga ai o le a leiloloa uma, … ma sa foliga mai ua toe o sina mea itiiti e tatau ai ona ola ua pei o se emo o se uila mai le vanimonimo, le tali mai o le Atua ia matou tatalo. O se vaega laveai, na aumaia meaai ma sapalai … , na iloa atu. … Sa matou faafetai atu ai i le Atua mo lo matou laveaiga.”3
O nei ‘au lavea’i o ni toa manumanu i le au paionia, na tuuina o latou ola i se tulaga lamatia i ni tulaga ogaoga o le tau ina ia aumaia le toatele sa mafai ma le saogalemu i le aiga. O se tasi o na toa manumanu o Efaraima Hanks.
I le ogatotonu o Oketopa, e aunoa ma se iloa e uiga i le faalavelave o taavaletosolima, sa malaga toe foi Hanks i lona aiga i Sate Leki e mulimuli i se malaga, ae i se taimi o le po, sa fagua ai o ia e se leo na faapea atu, “O loo pagatia tagata o le taavaletosolima, ma o loo manaomia oe; pe mafai ona e alu e fesoasoani ia i latou?”
Faatasi ai ma lena fesili o loo tatagi pea i lona mafaufau, sa ia toe faanatinati atu ai i le Aai o Sate Leki. Ma ina ua faalogo atu o valaau mai Peresitene Heber C. Kimball mo nisi volenitia, sa malaga atu Hanks i le aso lava e sosoo ai, na o ia lava, e laveai. O le saoasaoa o lana alu, na ia pasia ai isi au lavea’i na muamua, ma, ina ua taunuu i le vaega a Matini, sa toe ta’ua e Hanks, “O le vaaiga na faafetauia la’u pupula a o ou ulu atu i la latou tolauapiga, e le mafai lava ona aveesea mai lo’u manatua … ma sa lava lea e tuia ai le loto e sili ona malō.”4
Sa faaalu e Efaraima ni aso e faasolosolo atu ai mai lea faleie i lea faleia e faamanuia tagata mama’i. Sa ia faamatalaina, “i le tele o taimi, pe a matou faamanuia i e mama’i; ma vaoia faama’i i le suafa o le Alii o Iesu Keriso, e vave lava ona toe malolosi e mafatia; sa faamaloloina i latou toetoe o le taimi lava lea.”5 O Efaraima Hanks o le a avea e faavavau ma toa manumanu i na paionia o taavaletosolima.
E talitutusa ma lena laveai ofoofogia, o mea e tutupu e aafia ai o tatou olaga e oo lava i le kosi o le talafaasolopito e masani lava o taunuuga ia o faaiuga ma ausiaga a alii ma tamaitai taitoatasi—o tusiata maoae, saienitisi, taitai o pisinisi, ma le au faipolotiki. O nei tagata tulaga ese taitasi e tele ina faamamaluina o ni toa manumanu, e i ai maafaamanatu ma sauniga faamanatu e faamanatu ai mea maoae na latou ausia.
A o o’u laitiiti, o a’u uluai toa o tagata taaalo. O o’u mua’i manatuaga o le aoina lea o kata o peisipolo e i ai ata ma fuainumera o le au taaalo o le Liki Autu o Peisipolo. “O le tapuai i toa” a o tamaitiiti e mafai ona mālie ma lotomama … e pei o tamaiti e fai o latou ofu e pei o a latou toa manumanu mo le Halouini. E ui ina tatou faamemelo ma faaaloalogia le tele o alii ma tamaitai talenia mo o latou tomai ma o latou sao, o le tulaga e faamamaluina ai i latou, pe afai e faitaulia sona maualuga, e mafai ona tutusa ma le fanauga a Isaraelu sa tapuai i se povi auro i le toafa o Sinai.
O le avea ai ma tagata matutua, o le mea sa avea i se taimi ma mea mālie i le olaga faatamaitiiti, e mafai ona avea ma maagao pe afai o le “tapuai i le toa” o le au faipolotiki, au fai anotusi i upega tafa’ilagi, le au faatosina, le au taaalo, po o le au faimusika, e afua ai ona tatou vaavaai “i tala atu o le faailoga”6 ma lē iloa ai le mea moni e tatau ai.
Mo le fanauga a Isaraelu, o le lu’itau e le o le auro na latou aumaia ma i latou i la latou malaga i le nuu folafolaina, ae o mea na latou faatagaina e avea ai le auro: o se tupua, lea na avea ma manulauti o la latou tapuaiga, ma liliu ese ai la latou gauai mai ia Ieova, o lē na vaeluaina le Sami Ulaula ma laveaiina i latou mai le nofopologa. O la tatou taulaiga i le tamai povi na aafia ai lo latou tomai e tapuai ai i le Atua moni.7
O le toa manumanu—o la tatou toa, i le taimi nei ma taimi uma lava—o Iesu Keriso, ma soo se mea, po o soo se tasi, e faalavefauina i tatou mai Ana aoaoga, e pei ona maua i tusitusiga paia ma ala mai i upu a perofeta soifua, e mafai ona le lelei ai le aafiaga o lo tatou agaigai i luma i luga o le ala o feagaiga. A o lei taitai ona oo i le Foafoaga o lenei lalolagi, sa tatou vaavaai atu ia Iesu Keriso ina ua manino mai le fuafuaga na tuuina mai e le Tama o i le Lagi, lea na aofia ai lo tatou avanoa e agaigai ai i luma ma avea e faapei o Ia, sa lu’itauina.
E le gata o Iesu Keriso o le taitai i le puipuia o le fuafuaga a lo tatou Tama, ae o le a faatinoina foi e Ia le matafaioi aupito taua i lona faatinoga. Sa Ia tali atu i le Tama ma ofofua atu ia foaiina fua o Ia lava “o se togiola mo tagata uma,”8 e totogia se aitalafu o le a faia e i tatou taitoatasi e ala i le agasala a ua le mafai ona totogia e i tatou lava.
Na aoao mai Peresitene Dallin H. Oaks, “Ua faia e Iesu Keriso mea uma e tatau ai mo la tatou malaga i le olaga faaletino ma agai atu i le taunuuga ua faataatia mai i le fuafuaga a lo tatou Tama Faalelagi.”9
I le Faatoaga o Ketesemane, ina ua feagai ma se galuega e ese le lofituina, sa ta’ua ma le lototoa e le Faaola, “Ia aua nei faia lo’u loto a o lou finagalo,” ma faasolo atu ai e tauaveina i Ona lava luga ia tiga tuufaatasi, o ma’i, ma puapuaga mo agasala a tagata uma o le a soifua mai.10 I se gaoioiga atoatoa o le usitai ma le tuuto atu, na faamae’a ai e Iesu Keriso le gaoioiga aupito silisili, lototoa i foafoaga uma, ma taualuga ai i Lona Toetu mamalu.
I le tatou konafesi aoao aupito lata mai, na faamanatu mai ai e Peresitene Russell M. Nelson ia i tatou: “Po o a lava au fesili po o faafitauli o i ai, e maua lava le tali i le soifuaga ma aoaoga a Iesu Keriso. Aoao atili e uiga i Lana Togiola, Lona alofa, Lona alofa mutimutivale, Lana aoaoga faavae, ma Lana talalelei toefuataiina o le faamalologa ma le alualu i luma. Liliu Atu ia te Ia! Mulimuli ia te Ia!”11 Ma ou te faaopoopo atu, “Filifili o Ia.”
I lo tatou lalolagi lavelave, e mafai ona faaosoosoina e liliu atu i toa o sosaiete i se taumafaiga e aumaia ai le faauigaga po o le manino i le olaga pe a foliga mai ua fenumia’i pe lofituina. Tatou te faatauina lavalava latou te lagolagoina, talia polotiki latou te faalauiloa mai, ma mulimuli ia latou fautuaga e faasoa mai i luga o upega faaagafesootai. Atonu e lelei mo se suiga e le tumau, ae e tatau ona tatou mataala i lenei ituaiga o tapuai i toa ia le avea ma a tatou tamai povi auro. O le filifilia o le toa sa’o e i ai taunuuga e faavavau.
Ina ua taunuu lo matou aiga i Sepania e amata la matou auaunaga o ni taitai misiona, sa matou mauaina se upusii na faava’a mai ia Elder Neal A. Maxwell sa i ai lona faatatauga i toa matou te filifili e mulimuli ai. Na ia ta’ua, “Afai e te le filifilia muamua le malo o le Atua, o le a leai lava se eseesega i le faaiuga po o le a le mea na e filifilia.”12 Uso e ma tuafafine, o le filifilia o Iesu Keriso, le Tupu o tupu, tatou te filifilia ai le malo o le Atua. Soo se isi lava filifiliga e tutusa lava ma le filifilia e faalagolago i le lima o le tagata, po o se tamai povi auro, ma o le a i’u ina tatou toilalo ai.
I le Feagaiga Tuai i le tusi a Tanielu, tatou te faitauina ai le tala ia Sataraka, Mesako, ma Apeteniko, o e na iloa manino le toa e filifili—ma e le o se isi lava atua o le Tupu o Nepukanesa. Na latou tautino atu lava ma le mautinoa:
“Ua mafai lo matou Atua, matou te auauna i ai, ona laveai mai ia te i matou ai le ogaumu e mu ai le afi. …
“Ae peitai, a le o lea, ia e silafia e oe le tupu e, matou te le auauna i ou atua, o le tupua auro foi ua e faatuina, matou te le ifo i ai.”13
E pei ona aoao mai le Aposetolo o Paulo, “Ua i ai atua e toatele,”14 ma e mafai ona ou faaopoopo atu, o toa e toatele ua valaaulia i tatou e ifo i lalo, e tapuai, ma opomauina. Ae e pei lava ona iloa e uo e toatolu a Tanielu, e na o le Toatasi lava e mautinoa e laveai—aua o loo i ai lava o Ia ma o le a i ai pea lava pea.
Mo i tatou, i la tatou malaga toe foi i le afioaga o le Atua, i lo tatou nuu folafolaina, e le o le au faipolotiki, le au faimusika, le tagata taalo, po o le au fai anotusi i upega tafa’ilagi le faafitauli, ae o le filifili e faataga i latou ia avea ma uluai manulauti o la tatou gauai ma le taula’iga ma suia ai lo tatou Faaola ma le Togiola.
Tatou te filifilia o Ia, o Iesu Keriso, pe a tatou filifili e faamamalu Lona aso pe o tatou i ai i le fale pe o malaga i se tafaoga. Tatou te filifilia o Ia pe a tatou filifilia Ana afioga e ala i tusitusiga paia ma aoaoga a perofeta soifua. Tatou te filifilia o Ia pe a tatou filifili e umia se pepa faataga o le malumalu ma ola agavaa mo lona faaaogaina. Tatou te filifilia o Ia pe a o i tatou o ni e faatupuina le filemu ma aua le fefinaua’i, “aemaise lava pe a eseese o tatou manatu.”15
E leai se taitai ua faaalia se lototoa sili atu, leai se agalelei ua faaalia le agalelei sili atu, e leai se fomai faapitoa ua faamaloloina ni faama’i sili atu, e leai foi se tufuga ua sili atu ona fatufatua’i mea fou nai lo Iesu Keriso.
I se lalolagi o toa manumanu, o i ai maafaamanatu ma falemataaga ua tuuto atu i mea maoae na ausia e alii ma tamaitai, ae o loo i ai lava le Toatasi e tumatila i luga atu o isi tagata uma. Ou te molimau atu o Iesu Keriso ua le gata o lo tatou toa manumanu; ae o Ia o lo tatou Alii ma le Tupu, o le Faaola ma le Togiola o tagata uma. I le suafa o Iesu Keriso, amene.