O Le Mana Faamalolo o le Faaola i luga o Motu o le Sami
E ala i faamanuiaga o le malumalu, e faamalolo ai e le Faaola tagata taitoatasi, aiga ma malo.
I le vaitau o le 1960 na faiaoga ai lo’u tama i le Kolisi a le Ekalesia o Hawaii i Laie, lea na ou fanau ai. Sa tauanau e o’u tuafafine matutua e toafitu ia o’u matua, e faaigoa a’u ia “Kimo,” o se igoa Hawaii. Sa matou nonofo latalata i le Malumalu o Laie i vaitaimi na sa tautuaina ai le toatele o tagata auai o le Ekalesia o le Eria a Asia ma le Pasefika, e aofia ai ma Iapani.1 I le taimi lea, sa amata ai ona omai vaega o le Au Paia Iapani i Hawaii ina ia maua ai faamanuiaga o le malumalu.
O se tasi o nei tagata o le ekalesia, o se tuafafine mai le motu matagofie o Okinawa. O le tala o lana malaga i le Malumalu o Hawaii e ofoofogia. I le luasefulu tausaga na muamua atu, sa faaipoipo ai o ia i se faaipoipoga masani na faatulagaina i le Lotu Puta. Na o ni nai masina mulimuli ane, na osofai ai e Iapani ia Pearl Harbor, Hawaii, ma faafuasei ona tulei ai le Iunaite Setete i se feteenaiga ma Iapani. I le aliae ai o taua e pei o le Midway ma le Iwo Jima, o le fana’e o taua na tuleia ai i tua autau a Iapani i gataifale o lona motu, o Okinawa, o le nofoaga mulimuli lea o le puipuiga na tu atu faasaga i autau Tuufaatasi i le ogatotonu o Iapani.
Mo le tolu masina o puapuaga i le 1945, na matuai matamataita ai le Taua o Okinawa. O se fuavaa o vaatau o le sami e 1,300 a Amerika na siomia ma tu’ipomuina le motu. Sa matua’i toatele tagata militeli ma tagata lautele na maliliu ai. O le asō o loo lisiina i se maafaamanatu mamalu i Okinawa le silia ma le 240,000 o suafa o tagata na iloa o e na maliliu ai i le taua.2
I se taumafaiga atuatuvale ina ia sao mai le fasiotiga tagata, sa saili ai e lenei tamaitai Okinawa, lana tane, ma le la fanau laiti e toalua le sulufaiga i totonu o se ana i se mauga. Sa latou onosaia le faanoanoa e lē mafaamatalaina i le aluga o vaiaso ma masina na sosoo ai.
I se tasi po atuatuvale i le totonugalemu o le taua, faatasi ai ma lona aiga na toetoe ina a matelaina ma lona toalua na matapogia, sa ia mafaufau ai e faamuta o latou mafatiaga i se pomu lima, lea na tuuina atu e le au pulega ia te ia ma isi mo lena lava faamoemoega. Ae peitai, a o sauni o ia e faia lea mea, sa oo ifo se aafiaga loloto faaleagaga lea na tuuina atu ai ia te ia se lagona vaaia o le moni o le Atua ma Lona alofa mo ia, lea na avatu ai ia te ia le malosi e faaauau ai. I aso na sosoo ai, sa ia toe faate’iina lana tane ma fafaga lona aiga i vao, meli mai faamoega lagomeli vao, ma manu ninii na maua i se auvai lata ane. O le mea e maofa ai, sa latou onosaia le ono masina i totonu o le ana, seia oo ina logoina i latou e tagata o le nuu ua uma le taua.
Ina ua toe foi ane le aiga i le fale ma amata ona toe atinae o latou olaga, sa amata e lenei tamaitai Iapani ona saili mo tali e uiga i le Atua. Sa faifaimalie ona ia tutuina se talitonuga ia Iesu Keriso ma le manaomia ona papatisoina. Ae peitai, sa popole o ia mo e pele ia te ia o e na maliliu e aunoa ma se malamalama ia Iesu Keriso ma le papatisoga, e aofia ai lona tina, o lē na maliu i le fanauina o ia.
Vaai faalemafaufau i lona olioli ina ua o atu tamaitai faifeautalai e toalua mai Le Ekalesia a Iesu Keriso o le Au Paia o Aso e Gata Ai i lona fale i se tasi o aso ma aoaoina o ia e mafai e tagata ona aoao e uiga ia Iesu Keriso i le lalolagi o agaga. Sa maofa o ia i le aoaoga e faapea, e mafai e ona matua ona filifili e mulimuli ia Iesu Keriso pe a maliliu ma talia le papatisoga e fai ma o laua sui i nofoaga paia e ta’ua o malumalu. Sa faaliliuina o ia ma lona aiga i le Faaola ma papatisoina.
Sa galulue malosi lona aiga ma amata ona manuia, olioli i se fale matagofie ma maua nisi fanau e toatolu. Sa faamaoni i latou ma malolosi i le Ekalesia. Sa faafuasei lava ona oso le ma’i o lana tane ma maliu ai, ma faamalosia ai o ia e galue i ni itula uumi i le tele o galuega mo le tele o tausaga e tausia ai lana fanau e toalima.
Sa faitioina o ia e nisi o tagata o lona aiga ma le pitonuu. Sa latou tuuaia ona faafitauli i lana filifiliga e auai i se lotu Kerisiano. O le lē lotovaivai ai i le faalavelave mamafa ma faitioga matuia, sa ia pipii mau ai i lona faatuatua ia Iesu Keriso, ma filima’oti ai e fetaomi pea i luma, ma faatuatua e silafia o ia e le Atua ma e i ai ni aso fiafia o i luma atu.3
O ni nai tausaga talu ona maliu faafuasei lana tane, sa musuia ai le peresitene o le misiona a Iapani e faamalosiau i le au paia Iapani ia galulue agai atu i le auai i le malumalu. O le peresitene o le misiona o se Tagata Amerika o le Taua a Okinawa, lea na matua mafatia ai le uso o Okinawan ma lona aiga.4 E ui i lea, sa fai atu le tuafafine lotomaualalo ia te ia: “Sa avea o ia i lena taimi ma se tasi o o matou fili itagia, ae o lea ua i ai o ia iinei faatasi ma le talalelei o le alofa ma le filemu. O lenei mea, ia te au, sa o se vavega lava.”5
I le faalogo ai i le savali a le peresitene o le misiona, sa naunau ai le tuafafine ua maliu lana tane ina ia faamauina i lona aiga i le malumalu i se aso. Ae peitai, sa faigata mo ia, ona o tulaga faigata o mea tautupe ma papuipui o le gagana.
Ona alia’e mai lea o ni vaifofo fou. E mafai ona tuuitiitia le tau i le afa pe afai e togipau e le au paia Iapani le vaalele atoa e felelei atu ai i Hawaii i le vaitau e le pisi.6 Sa faatauina atu foi e tagata o le au paia ni lipine pese e faaulutalaina Japanese Saints Sing. O nisi o le au paia na faatau ese atu o latou fale. O isi na faamavae mai a latou galuega ina ia mafai ona o i le malaga.7
O le isi luitau mo le au paia o le le maua o faamatalaga o le malumalu i le gagana Iapani. Sa valaauina e taitai o le Ekalesia se uso Iapani e malaga atu i le malumalu o Hawaii e faaliliu sauniga o le faaeega paia.8. O ia o le ulua’i Iapani na liliu mai ina ua maea le taua, na aoao ma papatisoina e ni fitafita faamaoni Amerika.9
O le taimi muamua na faalogo ai le au paia Iapani na maua faaeega paia i le faaliliuga, sa latou fetagisi. Sa tusia e se tasi o le au paia: “Ua anoanoai taimi na matou o ai i le malumalu. Ua matou faalogo i sauniga i le faaPeretania. [Ae] matou te lei lagonaina lava le agaga o le galuega o le malumalu e pei ona matou lagonaina nei [faalogo i ai] i le matou lava gagana moni.”10
Mulimuli ane i lena lava tausaga, e 161 tagata matutua ma tamaiti na malaga mai Tokyo e agai atu i le Malumalu o Hawaii. Sa tomanatu se tasi o uso Iapani i le malaga: “A o ou tilotilo atu i fafo o le vaalele ma vaaia ai Pearl Harbor, ma manatua ai le mea na faia e le matou atunuu i nei tagata i le aso 7 o Tesema, 1941, sa ou [lagonaina] le fefe o lo’u loto. Pe mata o le a latou talia i matou? Ae i lo’u te’i sa latou faaalia le alofa ma le agalelei tele lea ou te le’i vaai lava i ai i lo’u olaga.”11
Ina ua taunuu le Au Paia Iapani, sa faafeiloai i latou e le au paia Hawaii i le anoano o ula fugalaau a o fefaasoai i opo ma feasogi i alafau, o se aganuu e fou i le aganuu Iapani. Ina ua uma ona faaaluina aso e 10 o suiga iloga i Hawaii, sa faatofa atu le Au Paia Iapani, a o lagiina e le Au Paia Hawaii le pese “Aloha Oe”.12
O le malaga lona lua na faatulagaina mo le au paia Iapani na aofia ai le tuafafine Okinawa ua maliu lana tane. Sa ia faia le malaga e 10,000-maila (16,000-km) e faafetai ai i se meaalofa lima foai mai faifeautalai o e sa auauna atu i lana paranesi. A o i ai i le malumalu, sa maligi ona loimata o le olioli a o fai o ia ma sui mo le papatisoga o lona tina ma sa faamauina i lana tane ua maliu.
Sa faaauau e le aunoa ia malaga mai Iapani i Hawaii, seia oo ina faapaiaina le Malumalu o Tokyo Iapani i le 1980, ua avea ai ma malumalu lona 18 na faagaoioia. Ia Novema o le tausaga lenei, o le a faapaiaina ai le malumalu lona 186 i Okinawa, Iapani. E tu e le mamao mai le ana i Okinawa tutotonu lea na nonofo ai lenei tamaitai ma lona aiga.13
E ui ou te lei feiloai lava i lenei tuafafine lelei mai Okinawa, ae o lana talatuu e ola pea e ala i lana fanau faamaoni, o le toatele ou te iloa ma alofa i ai.14
Sa faagaeetia lo’u tama, o se fitafita o le Pasefika o le Taua Lona Lua o le Lalolagi, ua ou mauaina se valaauga e auauna atu i Iapani o se faifeautalai talavou. Sa ou taunuu i Iapani i se taimi e le’i mamao ona faapaiaina le Malumalu o Tokyo ma muai vaaia lo latou fiafia mo le malumalu.
O feagaiga o le malumalu o ni meaalofa mai lo tatou Tama Faalelagi i soo faamaoni o Lona Alo o Iesu Keriso. E ala i le malumalu, e fusia ai e lo tatou Tama Faalelagi tagata taitoatasi ma aiga i le Faaola ma i le tasi ma le isi.
Na folafola mai e Peresitene Russell M. Nelson i le tausaga ua mavae:
“O tagata taitoatasi e osia feagaiga i vai papatiso ma i totonu o malumalu—ma tausi i ai—ua ia faateleina le avanoa e maua ai le mana o Iesu Keriso. …
“O le taui mo le tausiga o feagaiga ma le Atua, o le mana faalelagi—mana e faamalolosia ai i tatou e tetee atili atu ai i o tatou tofotofoga, faaosoosoga, ma lototiga. O lenei mana na te faafaigofieina o tatou ala.”15
E ala i faamanuiaga o le malumalu, e faamalolo ai e le Faaola ia tagata taitoatasi, aiga, ma malo—e oo lava ia i latou o e na i ai se taimi na tutu ai o ni fili lototiga. Sa tautino atu e le Alii toetu i se sosaiete na pulea e feteena’iga, o i latou o e faamamaluina “lo’u igoa, o le a tulai mai i ai le Atalii o le Amiotonu ma le faamalologa i ona apaau.”16
Ou te faafetai i le molimauina o le faataunuuga faifaipea o le folafolaga a le Alii e faapea, “o le a oo mai le taimi e salalau atu ai le malamalama o se Faaola i atunuu uma, ituaiga, gagana, ma tagata,”17 e aofia ai i latou o e o “i motu o le sami.”18
Ou te molimau atu i le Faaola o Iesu le Keriso ma e uiga i Ana perofeta ma aposetolo i nei aso e gata ai. Ou te molimau faamaoni atu e uiga i le mana faalelagi e fusia ai i le lagi mea e fusifusia i le lalolagi.
O le galuega lenei a le Faaola, ma o malumalu o Lona maota paia lea.
Faatasi ai ma se tautinoga e le maluelue, ou te folafola atu ai nei upumoni i le suafa o Iesu Keriso, amene.