O Lesona Paia Faamātua

Saunia e Elder Valeri V. Cordón

O Le Fitugafulu

E ulu atu matua i se faigapaaga ma le Tama Faalelagi e taiala a latou fanau faapelepele ia toe foi atu i le lagi.

Pe na e siiina se pepefou i ou lima? E i ai se malamalama lea e susulu mai pepefou uma lava, e aumai ai se sootaga faapitoa o le alofa lea e mafai ona faatumulia ai loto o matua i le olioli.¹ Sa tusia e se tusitala Mekisiko, “Ua ou iloa a oomi e se pepefou le tamaitamailima o lona tamā i si ana moto itiiti, ua mau ai o ia e faavavau.”²

O le tulaga faamatua o se tasi o aafiaga aupito sili ona tulaga ese o le olaga. E ulu atu matua i se faigapaaga ma le Tama Faalelagi e taiala a latou fanau faapelepele ia toe foi atu i le lagi.³ O le aso, ou te fia faasoa atu nisi o lesona faamātua o loo maua i tusitusiga paia ma aoaoina mai e perofeta soifua e fesoasoani tatou te tuua ai o tatou talatuu faamātua.

A’e i Nofoaga Maualuluga Atu o le Aganuu o le Talalelei

E tatau ona tatou fe’a’ei i nofoaga maualuluga atu o le aganuu o le talalelei faatasi ma o tatou aiga. Na folafola mai e Peresitene Russell M. Nelson: “O aiga e agavaa mo le taitaiga mai le lagi. E le mafai e matua ona lava le fautuaina o fanau mai aafiaga patino, fefe, po o le alofa faanoanoa.”⁴

E ui lava o o tatou siomiaga faaleaganuu, sitaili faamatua, ma aafiaga patino atonu e taua mo le tulaga faamātua, ae o nei gafatia ua le lava ia e fesoasoani ai i a tatou fanau ia toe foi atu i le lagi. E manaomia ona tatou maua ma faaaoga se “seti o uiga tausili ma … faiga,”⁵ e maualuga atu, o se aganuu o le alofa ma faamoemoega, lea tatou te fe’oe’oea’i ai ma a tatou fanau “i se ala maualuga atu, ma sili ona paia.”⁶ Na faamatalaina e Peresitene Dallin H. Oaks le aganuu o le talalelei o “se auala iloga o le olaga o se seti o uiga tausili ma faamoemoega ma faiga. … O lenei aganuu a le talalelei e sau mai le ata o le faaolataga, o poloaiga a le Atua, ma aoaoga a perofeta soifua. E taialaina i tatou i le ala tatou te tausia ai o tatou aiga ma ola ai i o tatou olaga taitoatasi.”⁷

O Iesu Keriso o le totonugalemu lea o lenei aganuu o le talalelei. O le vaetamaina mai o le aganuu o le talalelei i totonu o tatou aiga e taua lea i le fatuina o se siosiomaga lafulemu lea e mafai ai ona ola talaulau le fatu o le faatuatua. Ina ia fe’a’ei atu i nofoaga maualuluga, ua valaaulia ai i tatou e Peresitene Oaks “e lafoai soo se tu masani po o faiga faaletagata lava ia pe faaleaiga, e feteenai ma aoaoga a le Ekalesia a Iesu Keriso.”⁸ Matua, pe a tatou fefefe e faatulaga le aganuu o le talalelei, e ono mafai e le fili ona faatu se faavae mautu i totonu o o tatou fale pe, sili atu foi le leaga, i totonu o o loto o a tatou fanau.

A o tatou filifili e fai le aganuu o le talalelei ma aganuu autu i o tatou aiga, o le a faapea ona faatosina malosi ai e le Agaga Paia,⁹ a tatou sitali faamatua o i ai nei, agaifanua, ma faiga o le a iloiloina, faaogatasia, faamamaina, ma faaleleia.

Ia Fai le Aiga ma Nofoaga Autu o le Aoaoina o le Talalelei

Na aoao mai Peresitene Russell M. Nelson, o le aiga e tatau ona avea ma “totonugalemu o le aoaoina o le talalelei.”¹⁰ O le faamoemoega o le aoaoina o le talalelei o le “faalolotoina lea o lo tatou liua i le Tama Faalelagi ma Iesu Keriso, ma fesoasoani ai ia tatou avea atili ai e faapei o i Laua.”¹¹ Sei o tatou iloiloina ia tiutetauave taua e tolu faamātua na faamatala mai e perofeta ma aposetolo e mafai ona fesoasoani tatou te faatuina ai se tulaga maualuga atu o le aganuu o le talalelei i o tatou aiga.

Muamua: Aoao Saoloto Atu

Na faatonuina e le Tama Faalelagi ia Atamu e uiga ia Iesu Keriso ma Lana aoaoga faavae. Sa Ia aoaoina o ia “ia aoao saoloto atu ia mea i lau fanau.”¹² I ni isi faaupuga, na aoaoina e le Tama Faalelagi ia Atamu e matuai aoao atu nei mea, ia faateleina, ma ia le faatapulaaina.¹³ Ua tau mai e tusitusiga paia ia i tatou, “sa viia e Atamu ma Eva le suafa o le Atua, ma sa la faailoa atu mea uma i o laua atalii ma afafine.”¹⁴

Tatou te aoao faateleina a tatou fanau pe a tatou faaalu ni taimi anoa faatasi ma i latou. Tatou te aoao atu e aunoa ma le faatapulaaina pe a talanoaina autu maaleale e pei o “taimi e matamata ai [televise po o masini feaveai],” e faaaoga ai punaoa ua faavanoa mai e le Ekalesia.¹⁵ Tatou te matuai aoao atu pe a tatou suesue i tusitusiga paia ma a tatou fanau e faaaoga ai le Sau, Mulimuli Mai ia te Au ma faataga le Agaga e avea ma faiaoga.

Lona lua: Faataitai le Avea ma Soo

I le tusi a Ioane, tatou te faitau ai e faapea, ina ua fesiligia e nisi o Iutaia le Faaola e uiga i Lana amio, sa tatai atu e Iesu ia taulaiga i Lana faataitaiga, o Lona Tama. Na Ia aoao mai: “E le mafai e le Atalii ona fai o se mea, na o ia lava, a o mea na te vaai atu i le Tamā o faia: o mea foi o faia e ia, o loo faia foi ia lava mea e le Atalii.”¹⁶ Matua, o le a le mea e manaomia ona tatou faataitaia mo a tatou fanau? Avea ma soo.

I le avea ai ma ni matua, e mafai ona tatou aoao atu le taua o le faamuamua o le Atua pe a tatou talanoa i le poloaiga muamua, ae tatou te faataitaia pe a tatou faataatia ese mea faalavefau o le lalolagi ae tausi le aso Sapati ia paia i vaiaso taitasi. E mafai ona tatou aoao atu le taua o feagaiga o le malumalu pe a tatou talanoa e uiga i le aoaoga faavae o le faaipoipoga faaselesitila, ae tatou te faataitaia pe a tatou faamamalu a tatou feagaiga, taulima o tatou taitoalua ma le faatamalii.

Lona tolu: Valaaulia e Faatino

O le faatuatua ia Iesu Keriso e ao ona avea ma fatu o a tatou molimau ma o nei molimau e tatau ona sau mai tamaiti taitoatasi e ala mai i faaaliga patino.¹⁷ Ina ia lagolago ia tatou fanau i le atinaeina o a latou molimau, tatou te faamalosiau ia i latou e faaaoga le faitalia e filifili ai le mea sao¹⁸ ma saunia ai i latou mo se olaga atoa i le ala o feagaiga a le Atua.¹⁹

O se mea atamai le uunaia o a tatou fanau taitoatasi ina ia talia le valaaulia a Peresitene Nelson ia taulima a latou lava molimau ia Iesu Keriso ma Lana talalelei—ia galue i ai, ia faafailele ina ia tuputupu ae, ia fafaga i mea moni, ma ia aua nei faaleagaina i filosofia sese a alii ma tamaitai le talitonu.²⁰

Tulaga Faamatua Amiotonu, Fuafuaina

O faamoemoega o lo tatou Tama Faalelagi paia o se matua na faailoa mai i se faaaliga na tuuina mai ia Mose: “Aua faauta, o la’u galuega ma lo’u mamalu lenei—ia aumaia le tino ola pea ma le ola faavavau o le tagata.”²¹ Na faaopoopo mai Peresitene Nelson, “O le a faia e le Atua mea uma Na te mafaia, vagana ai le aiāina o lou faitalia, e fesoasoani ia te oe ia le misia faamanuiaga aupito silisili o le faavavau atoa.”²²

I le avea ai ma ni matua, o i tatou o sui o le Atua i le tausiga o fanau ua Ia tuuina mai ia i tatou.²³ E tatau ona tatou faia mea uma tatou te mafaia e fatu ai se siosiomaga lea e mafai ai e a tatou fanau ona lagona Lana faatosinaga paia.

E lei fuafuaina lava e le Tama Faalelagi mo i tatou o ni matua ia saofafai o ni tagata matamata, ma vaavaai atu i le faaalia mai o olaga faaleagaga o a tatou fanau. Sei ou faapupula atu lenei manatu e uiga i le faamatua fuafuaina i se aafiaga patino. A o ou auai i le Peraimeri i se paranesi laitiiti i Kuatemala, sa amata ona aoao au e o‘u matua e uiga i le taua o faamanuiaga faapeteriaka. Sa faaalu e lo’u tina le taimi e faasoa mai ai lona aafiaga i le mauaina o lona faamanuiaga faapeteriaka faapelepele. Sa ia aoaoina au i le aoaoga faavae e faatatau i faamanuiaga faapeteriaka, ma sa ia molimau mai e uiga i faamanuiaga folafolaina. O lana faamatua fuafuaina sa musuia ai au ia i ai lou manao e maua lo‘u faamanuiaga faapeteriaka.

Ina ua 12 o‘u tausaga, sa fesoasoani o’u matua ia te au e faatautaia le sailiga mo se peteriaka. Sa alagatatau lenei mea ona sa leai se peteriaka i le itu sa ou nofo ai. Sa ou malaga atu i se peteriaka sa i ai i se siteki e 156 kilomita le mamao. Ou te manatua lelei lava le taimi na tuu ai e le peteriaka ona aao i luga o lo‘u ulu e faamanuia au. Sa ou iloaina e ala i se faamautinoaga faaleagaga mamana, e aunoa ma se masalosalo, na silafia au e lo‘u Tama Faalelagi.

Mo se alii e 12 tausaga le matua mai se nuu laitiiti, o lena mea sa taua tele ia te au. Sa liliu atu lo‘u loto i lo‘u Tama Faalelagi i lena aso ona o le tulaga fuafuaina faamatua a lo‘u tina ma lo‘u tama, ma o le a ou faafetai pea e faavavau ia i la‘ua.

Na aoao mai Sister Joy D. Jones o le Peresitene Aoao talu ai o le Peraimeri: “E le mafai ona tatou faatali mo le liua ia tau ina tupu i a tatou fanau. O le liua faafuasei e lē o se mataupu faavae o le talalelei a Iesu Keriso.”²⁴ O a tatou valaaulia alofa ma musuia e mafai ona faia se eseesega i le auala e faaaoga ai e a tatou fanau o latou faitalia. Sa faamamafa mai e Peresitene Nelson, “E leai se isi galuega e sili atu i le faamatua amiotonu, fuafuaina!”²⁵

Faaiuga

Matua, e tumu lenei lalolagi i filosofia, aganuu ma manatu faatautava mo taulaiga a a tatou fanau. O le fale tele ma le ateatea o loo faalauiloa mai ona sui auai i aso uma e faaaoga ai alaata aupito lata mai o ala o faasalalauga. Ae na aoao mai le perofeta o Moronae, “ae ua saunia e le Atua e ala i le meaalofa a lona Alo se ala e silisili ona lelei.”²⁶

A o tatou faipaaga ma le Atua e ala i feagaiga ma avea ma Ona sui i le tausiga o a tatou fanau, o le a Ia faapaiaina o tatou faamoemoega, musuia a tatou aoaoga, ma faato‘ato‘a a tatou valaaulia, ina ia “mafai ona iloa e a tatou fanau po o le a le puna e mafai ona latou tepa taulai i ai mo se faamagaloga o a latou agasala.”²⁷ I le suafa o Iesu Keriso, amene.