Ua Na’o Tusiga Faatekinolosi: Talavou Matutua
Pe Faia Moni ea se Eseesega i le Tu Ai i Nofoaga Paia?
O le tu ai i se nofoaga e le paia o le a le avea ma se faafitauli pe afai ou te le faia se mea le paia … a ea?
A o o’u talavou, sa faailoa mai e o’u tuaoi ia te a’u ma lo’u aiga Le Ekalesia a Iesu Keriso o le Au Paia o Aso e Gata Ai. Sa iu ina ou papatiso, ona faatasi mai lea o nisi o nai o’u tei, ma mulimuli ane sa faapena foi o’u matua. E le toatele ni tagata o le Ekalesia i la’u eria o Initia, o lea sa manaia ai le i ai o se faavae mautu o le lagolagosua mai e pele i le aiga. O i latou sa faigofie ai ona faatumauina le malosi o lo’u faatuatua.
Ae ina ua ou foi mai i le fale mai la’u misiona, sa ou maua se galuega ma siitia ese ai mai lo’u aiga. Sa ou maua se fale mautotogi i se setete e ese mai, faatasi ai ma tagata sa matou potu e matua eseese lava o latou tulaga faatonuina nai lo au.
Sa ola foi a’u uo faigaluega i ni olaga e matua eseese lava nai lo a’u. Latou te potopoto faatasi i faaiuga o vaiaso taitasi e inu ma pati, ma sa latou valaaulia au ou te auai. O le le manao ia i ai i se siosiomaga faapena, sa ou teena ai i taimi uma a latou valaaulia.
Ae, i le mavae ai lo lea faaiuga o le vaiaso ma lea faaiuga o le vaiaso, a o ou nofo na o au i lo’u potu ma ala ae i Aso Sa taitasi e alu na o a’u i le lotu, sa amata ona ou lagona le lotovaivai.
Lagonaina o le Tuuatoatasi
E ui sa ou fai atu leai i uluai valaaulia e o faatasi ma au uo faigaluega, ae sa ou lagona le lotoleaga—sa foliga mai sa latou fiafia. Sa ou matauina o faauoga na latou atiina ae pe a latou o e tafafao sa foliga mai o loo fesoasoani ia i latou e agai ai i luma i a latou galuega.
Sa ou lagona e pei lava a’u o le tagata faigaluega filemu ma le faanoanoa e leai se tasi na iloaina.
I se tasi faaiuga o le vaiaso sa ou lelava ai i le lagonaina o le tuuatoatasi. O lea sa ou filifili ai e o ma i latou pe a latou fesili mai. Sa ou tauamiotonuina le faaiuga e ala i le filifili muamua o le a ou le faataitaia lava se ava malosi.
Sa ou fai ifo ia te au lava, ”E tusa lava pe ou te i ai i se nofoaga le paia, ae o le i ai iina o le a le afaina ai au pe afai ou te le faia se mea le paia, e sao?”
Ua Faatuputeleina le Mamao mai le Atua
A o amata ona matou o faatasi ma nei tagata faigaluega, sa faasolosolo lava ina amata ona ou sui. Sa ou tafao i le tuneva o po o Aso Toonai, lea na iu ai ina ou moeumi ma le lotu ai i Aso Sa.
E ui ou te lei inu ava malosi, ae ou te lei tu i nofoaga paia. Faaletino, sa ou le alu i le lotu. I le faaleagaga, ou te lei mafaufau e uiga i le talalelei pe faaavanoa se taimi mo le Tama Faalelagi. Sa ou fesuiaia lo’u falelotu mo ni pati. Ou te lei tuua se avanoa mo le Agaga i lo’u olaga.
I se tasi aso, sa ou ala ae i luga ma iloa ai le mamao na ou faatagaina ai a’u lava e alu ese mai le Tama Faalelagi. Sa ou lagona e pei ua ou faatoa malamalama i le faaupuga “tiga e tusa i le Atua” (2 Korinito 7:10). Sa tumu lo’u mafaufau ma lo’u loto i le ita.
“O le a ea lenei mea o loo ou faia?” Sa ou mafaufau ai. “E le o a’u lea.”
E ui lava o la ou te tafao i faaiuga o vaiaso, ou te lei lagonaina le fiafia.
Sa ou iloaina e tatau ona ou toe foi i luga o le ala ma lo’u faatuatua. Sa manaomia ona ou salamo.
Filifili e Tu i Nofoaga Paia
Sa masani ona ou mafaufau o le salamo o se faagasologa tiga, faigata, e tumu i le tausalaina ma le maasiasi. Ae e ala mai i lenei aafiaga, ua ou aoaoina ai o le salamo o le faagasologa o le faatagaina o Iesu Keriso e suia o tatou natura ma fesoasoani ia i tatou ia avea ma “tagata fou” (Mosaea 27:26).
Mulimuli ane, o le manatu ia Iesu Keriso ma Lana Togiola lea na fesoasoani ou te manatua ai po o ai moni lava au, o filifiliga ou te manao ia faia, ma siosiomaga ou te fia i ai.
Sa amata ona ou tatalo mo le taimi muamua i le mavae ai o le tele o masina. Sa ou le toe alu ma a’u uo faigaluega. Sa ou toe alu i le lotu. Sa ou tatalaina soo la’u Tusi a Mamona.
A o ou toe foi atu i a’u mausa faaleagaga faifai pea, sa ou lagonaina le filemu ma le mafanafana faafouina. Sa ou maua se molimau e faapea pe a talosaga mai le Atua mo se avanoa i lo’u olaga ma ou tuuina atu ia te Ia, o le a Ia faamanuiaina a’u. E mafai ona ou filifili e tu i nofoaga paia, ma afai o nisi taimi ou te oo ai i se siosiomaga e faigata ai ona lagona le Agaga, e mafai ona ou pipiimau i ou tulaga faatonuina ma le faatuatua ma faalagolago i le Tama Faalelagi ma Iesu Keriso e puipuia a’u (tagai i le 2 Tupu 6:15–16).
O Iesu Keriso o le Tali
O lenei aafiaga na faaali mai ai ia te au o loo i ai i le lalolagi se toso, faatosina malosi, ma e faigofie lava ona tafiesea i tatou pe afai tatou te le o faia se avanoa mo le Agaga i o tatou olaga.
Na aoao mai Peresitene Russell M. Nelson: “O le tatou sailiga silisili lava i le olaga o le saunia lea e feiloai ma lo tatou Mataisau. Tatou te faia lenei mea e ala i le tauivi i aso taitasi ia avea atili e pei o lo tatou Faaola, o Iesu Keriso [tagai i le 3 Nifae 27:27]. Ma e tatou te faia lena mea pe a tatou salamo i aso taitasi ma maua Lana faamamāāga, faamalologa, ma le mana faamalosiau. Ona mafai lea ona tatou lagonaina le filemu ma le olioli tumau, e oo lava i taimi faigata. O le mafuaaga tonu lea ua augani mai ai le Alii ia i tatou ia tutu i nofoaga paia ma ‘aua le masii ese’ [Mataupu Faavae ma Feagaiga 87:8].”
I le taimi muamua, sa ou popole lava i la’u galuega ma le tuuatoatasi. Ae ina ua ou alu ese mai le talalelei, sa ou iloaina afai ou te mulimuli ia Iesu Keriso, o le a faaauau pea ona Ia saunia se ala mo au faaletino, faaleagafesootai, faaleagaga, ma mea tautupe. A o faaleleia atili la’u sootaga ma le Tama Faalelagi ma Iesu Keriso, ua ou maua ni auala fou e fegalegaleai ai a o ou le tuuina a’u lava i siosiomaga matautia faaleagaga.
Ou te iloa ua saunia e le Tama Faalelagi se vaifofo mo a’u ia Iesu Keriso ma o le a faatumulia lo’u olaga i faamanuiaga a o faaauau pea ona ou mulimuli ia te Ia. Ou te lagona le faafetai tele mo se Faaola o le sa naunau e puapuagatia mo au ina ia mafai ona ou filifili e toe mulimuli ia te Ia.
Sa faasoa mai Peresitene M. Russell Ballard “o se sootaga ma lo tatou Tama Faalelagi ma Lona Alo, o le Alii o Iesu Keriso, e aupito sili ona taua. O lenei sootaga e sili ona taua i le taimi nei ma i le faavavau.” Ou te iloa afai e te faamalosia lou sootaga ma i Laua ma faia nisi avanoa mo i Laua i lou olaga, o le a mafai ona e lagonaina atili le filemu ma selesele ia faamanuiaga o le talalelei a le Faaola.