Aoao e Tuu Atu Lo‘u Faatuatuaga i le Atua ma Lana Perofeta Nai lo a’u lava ia
O se aoaoga maulu i le sami na aoaoina ai a’u i le auala e silafia ai e le Tama Faalelagi le mea e sili ona lelei mo i tatou nai lo le mea tatou te iloa.
A o o’u auai i le Iuniveste a Polika Iaga i Hawaii, sa tonu ai ia te a’u e pāsia ma faamaonia a’u e avea ma tagata maulu ina ia mafai ona ou suesueina le vasa na siomia ai le lotoa matagofie. Mo le vaega mulimuli o le tusi faamaonia o le maa’au’au, sa matou faia ai ma le matou vaega se maulu e 20-minute mai le Uafu o Kewalo Basin i Honolulu.
Sa iloa e lo matou faiaoga maulu e faapea afai matou te oo i le tulaga lea, ua matou aoao i le auala e saogalemu ai ma mafai ona matou fiafia ai. Sa matou mautinoa lelei e tatau lava ona matou mulimulita’i i tulafono faavae e pei o le faaaogaina o le polokalama o paaga, ae sa ia ta’u mai ia i matou e mafai ona matou taula’i atili atu i le vaaiga nai lo le faaalia o tomai patino.
Sa ofoofogia le maulu mulimuli, ma sa ou fiafia e matamata i malie papa’e ma laumei o le sami. E leai se mea na mafai ona ou talisapaia ai lenei lalolagi matagofie na foafoaina e le Alii mo i tatou e pei lava o le mafai ona tepa a’e i luga o le fogātai ma ou iloa ai o loo o’u manava i lalo o le vai.
Tu’ua o le Taiala
Ina ua lata i le faaiuga o le matou aoaoga, sa foliga faagae’etia le faiaoga maulu i se maa e pei o le lapo’a o se aluga. Sa foliga mai o loo ia taumafai e sii i luga, ae sa ou lē onosai. “E na o ni nai minute lava o lo’o totoe,” sa ou mafaufau ai ia te a’u lava ia. “Ou te le’i manao e ma’imau lo‘u taimi e tilotilo ai i se maa.”
Sa ou alu’ese e vaavaai i nisi o amu lata ane ae faafuase’i ona ou faalogoina le tele o leo tau lē manino ma fiafia i lalo o le sami i le taimi e tasi. Sa ou tilotilo atu ma vaaia le matou vaega o faatau pupula i se mea, ae faatasi ai ma la’u mea manava i lo‘u gutu, sa lē mafai ai ona ou fesili po o le a le mea na tupu.
Sa toe fe’ausi atu le matou vaega i luga ma feosofi atu i le matou vaa. Ina ua uma ona matou aveesea a matou mea manava, ma amata ona talanoa fiafia tagata uma e uiga i mea sa latou vaaia. Sa fai mai la‘u uo ia te a’u, “Sa ou taumafai e faatosina mai oe ina ia mafai ona e iloa atu le aau ese mai!”
Sa vaai le faiaoga i se fe’e i lalo o se ma’a, o lea na ia aveesea ai le ma’a ina ia matamata i ai le vasega. O taimi uma lava e faame‘i ai e le faiaoga le ma’a, e sola i lalo le fee, se’ia oo ina lava le taimi e lafi ai-ma-saili ma faapasī mai ai e le fe’e lona taelama ma aau ese atu.
Sa ou a’au ma maulu i le tele o taimi ma vaaia le tele o le ola faasao i lalo o le sami, ae ou te le’i vaai lava i se fe’e. Ma ona o lo’u lē onosa’i, sa ou misia ai se avanoa e lē masani ona maua.
Sa ou mafaufau loloto i lenei aafiaga i le taimi o le matou malaga umi i le fale ma iloa ai ua ou aoaoina se lesona taua o le talalelei e uiga i le tausia o poloaiga ma mulimuli i le perofeta. Ou te le’i lē usita’i lo matou taita’i na ta’ita’ia i matou. Ae sa ou filifili ma le iloa e le’i iloa lelei e lo‘u taiala le mea e sili ona ou fiafia i ai.
Sa sili atu lo‘u faatuatuaina o a’u lava nai lo lo‘u faiaoga.
E Mafai Ona Tatou Faatuatuaina le Perofeta a le Atua
Ana faapea ou te faatuatuaina lo’u taiala, semanu ou te maua se aafiaga e sili atu ona tauia. Ma o le mataupu faavae lava lea e tasi e mafai ona faatatau i le faatuatuaina o le Tama Faalelagi e ala i le faatuatuaina o Lana perofeta.
Ua tatou iloa o lo tatou faamoemoega i lenei olaga o le saunia lea e feiloai ma le Atua e ala i le osia ma le tausia o feagaiga paia, ae e lē na o le pau lena o le mafuaaga ua tatou i ai iinei. Na aoao mai Liae ua tatou i ai iinei ina ia tatou “maua le olioli” (2 Nifae 2:25).
Ina ia fesoasoani ia i tatou ia iloa lena olioli ma faataunuu le fuataga o lo tatou foafoaga, ua valaauina ai e le Atua ia perofeta ma aposetolo, ma ua latou auauna atu e avea ma Ona fofoga mo lo tatou manuia. Ua Ia tuuina mai foi ia i tatou poloaiga ina ia mafai ai ona tatou maua ma faatumauina lenei olioli e faavavau.
I se auala, e mafai ai ona vaaia perofeta ma aposetolo o ni o tatou taiala ma poloaiga e fai ma a tatou “tulafono o le maulu,” aua ua faamoemoe e tausia i tatou ia saogalemu ma faamautinoa lo tatou fiafia.
Pe a tatou mafaufau ua sili atu lo tatou iloa, e pei ona ou faia i lo’u faiaoga maulu, tatou te lamatia i le nofoia o se aafiaga e maualalo ifo i le olaga nei ma faaali atu i lo tatou Tama oi le Lagi tatou te lē talitonu o loo ia te Ia mea e sili ona tatou fiafia i ai i le loto.
Ua aoao mai Elder Neil L. Andersen o le Korama o Aposetolo e Toasefululua:
“Aisea tatou te mulimuli ai i le perofeta? Aua ua valaauina o ia e le Alii o Iesu Keriso ma tofia o ia e avea ma Ana tagatavaai i le olo. …
“… Afai tatou te filifili e faataatia ese Ana fautuaga ma manatu e sili atu lo tatou iloa, o le a pagātia lo tatou faatuatua ma puaoa ai la tatou vaaiga e faavavau. Ou te folafola atu ia te outou afai tou te tūtūmau mausali i le mulimuli i le perofeta, o le a faateleina lo outou faatuatua i le Faaola.”1
Ua faamanuiaina i tatou e ola i se taimi ua saunia ai le afioga a le Atua mo i tatou. Nai lo le masalosalo i Ona manaoga mo i tatou ia lagonaina le olioli e faavavau, e mafai ona tatou maua le faatuatua ia te Ia ma “mafaufau i le tulaga manuia ma le fiafia o i latou o e e tausi i poloaiga a le Atua” (Mosaea 2:41).
Ou te iloa a tatou faalagolago i le Atua e ala i le mulimuli i Lana perofeta ma faatuatua i faamanuiaga folafolaina o le tausia o a tatou feagaiga ma Ana poloaiga, o le a Ia taialaina i tatou agai atu i aafiaga ofoofogia ma faatumuina o tatou olaga i le olioli.