Ua Na’o Tusiga Faatekinolosi: Talavou Matutua
Anapogi: O Se Auala Mautinoa e Faamalosia ai Lou Faatuatua i le Alii
Aua nei galo lenei mataupu faavae mamana o le talalelei.
Pe na e mafaufau ea pe mafai moni lava ona e faatuatuaina le Tama Faalelagi ma Iesu Keriso?
Na ou lagonaina muamua lenei tulaga, aemaise lava ina ua avea au o se tasi o Le Ekalesia a Iesu Keriso o le Au Paia o Aso e Gata Ai.
Sa ou auai i le Ekalesia ina ua 17 ou tausaga, ma o au o le uii i lo’u aiga ma na o au lava le tagata o le Ekalesia. Sa ou talitonu e moni le talalelei a Iesu Keriso—sa ou tatalo e uiga i ai ma lagonaina le olioli tele. Sa ou manao e ola i le talalelei, ae i le taimi lava e tasi, sa ou lagonaina le lofituina o le tuuatoatasi. Sa ou maua ni faiga saua mai a’u uo ma nisi o lo’u aiga ona o le auai i le Ekalesia. Sa ou lagonaina e pei sa tatau ona ou filifili i le va o la’u sootaga ma e pele ia te au ma la’u sootaga ma le Alii. Sa ou lagonaina le le mafai ona ou faatalitonuina i latou o loo ou mulimuli i le ala sa’o.
Manatuaina o le Mana o le Anapogi
I se tasi aso, sa ou manatua ai se mea na aoaoina ai au e faifeautalai a o ou aoao e uiga i le talalelei: o le tulafono o le anapogi.
Sa la valaaulia au e tatalo ma anapogi e ole atu i le Tama Faalelagi e faamaluluina loto o o’u matua ina ia la tuuina mai lo la maliega mo au e papatiso ai. Sa ou mulimuli i a latou fautuaga ma lagonaina le filemu ma le mautinoa e ui lava i o’u tulaga. Sa sainia e lo’u tama le pepa o faamatalaga o le faatagaga, lea na mafai ai ona ou papatiso, e ui lava e lei faatagaina lava e lo’u tina.
A o ou mafaufau loloto i le leai o se lagolagosua a lo’u aiga i le taimi nei, sa ou manatuaina lena vavega o le filemu sa ou lagonaina ae ou te lei papatisoina. Sa ou manatua e mafai mea uma i le Tama Faalelagi (tagai i le Mataio 19:26) ma a o ou liliu atu ia te Ia i le faatuatua e ala i le anapogi ma le tatalo, e mafai e Ia ona faia mea e foliga mai e le mafai e ala i le faatuatua ia Keriso.
Ao tatou aoao i le Helamana 3:35, “Ae ui i lea sa latou anapopogi ma tatalo pea lava pea, ma sa faasolo malolosi ma faatupulaia ai pea i lo latou lotomaualalalo, ma mausali ma atili mausali ai i le faatuatua [ia] Keriso, seia oo ina faatutumuina o latou agaga i le olioli ma le faamafanafanaga.”
Sa ou manao e faaloloto lo’u faatuatuaina o le Tama Faalelagi, faatumulia lo’u loto i le olioli, ma faia le mea ou te mafaia e faamaluluina ai loto o i latou o e sa le lagolagoina au. O lea sa ou anapogi ai pea ma tatalo mo se toomaga mai le tulaga tuuatoatasi sa ou feagai ai.
Valaauliaina o Vavega
E leai se mea na suia vave. Sa ta’u mai ia te a’u sa ou faatupuina ni luitau i lo matou aiga ona o lo’u auai i le Ekalesia. Sa ou lagona le tuuatoatasi. Ae sa ou faatuatuaina o loo faafofoga mai le Tama Faalelagi i a’u tatalo ma o la’u anapogi o le a aumaia ai faamanuiaga. Mulimuli ane, sa ou vaaia se vavega—sa faasolosolo malie ona faamaluluina loto o o’u matua i le talalelei.
Sa ou lagonaina foi le faamalosia o lo’u faatuatua i le Tama Faalelagi ma lo’u Faaola. O lo’u faatuatua malosi atu na fesoasoani ia te au ia ou iloa ai le auala e tali atu ai i isi pe a latou le agalelei ma faapefea ona faalolotoina la’u sootaga ma e pele ia te au ma le Tama Faalelagi ma Iesu Keriso.
Ina ua mavae le tele o anapogi ma tatalo, sa ou maua le tali e auauna atu i se misiona. O se matua vavega, na iu ina papatisoina o’u matua ae ou te lei alu e auauna atu, ma sa mafai foi ona faamauina au ia i laua i le Malumalu o Manila Filipaina i ni nai masina ae e lei maea la’u auaunaga.
O loo faaauau pea ona aumaia e le anapogi vavega i lo’u olaga i Aso Sa anapogi taitasi. Ae ou te anapogi foi pe a le mautonu le olaga ma ou te matua manaomia lava le filemu o Keriso.
E pei ona aoao mai Peresitene Russell M. Nelson: “I taimi o le luluti o tiga, ma pe a oo faama’i i tulaga pipisi ogaoga, o le mea sili ma masani mo i tatou e fai o le valaau atu lea i lo tatou Tama Faalelagi ma Lona Alo—le Fomai Sili—e faaali mai lo La’ua mana ofoofogia e faamanuia ai tagata o le lalolagi.”
E mafai ona ou molimau atu ma le faamaoni o le anapogi o se tasi lea o auala ofoofogia e valaau atu ai i le Tama Faalelagi ma Iesu Keriso. O loo faaauau pea ona suia e le anapogi lo’u olaga ma lo’u faatuatua. Ou te faamoemoe e mafai ona e vaai i vavega e mafai ona aumaia e lenei taulaga i lou olaga.