“O Upumoni e Lua e Fesoasoani Ia te A’u e Malamalama ai i le Lotomaualalo,” Liahona, Iulai 2024.
Autalavou Matutua
O Upumoni e Lua e Fesoasoani Ia te A’u e Malamalama ai i le Lotomaualalo
O le lotomaualalo e mafai ona fesoasoani i le faamaualuga ma lagona o le le atoatoa.
Ata pue o tagata o le ekalesia i Parakuei na pueina e Leslie Nilsson
O se mea moni: O a’u o se atalii o le Atua. Ma o se upumoni ofoofogia lena ma paia.
O se mea moni e tutusa lava le taua: Talu ai o isi tagata uma i lenei lalolagi o se atalii/afafine foi o le Atua, o i latou foi o ni tagata ofoofogia ma paia.
O nei upumoni uma e lua atonu e foliga mai e iloa gofie, ae sa umi se taimi na ou teulotoina ai ma malamalama i lo la uiga i lo’u olaga. O nisi taimi ou te ta’usalaina i le oo atu i se tulaga faamaualuga, ma le manatu faapea o lo’u ala o le ala sa’o lea po o le sili atu ona ou gafatia nai lo isi tagata. O isi taimi ou te faia ai le faafeagai, ma le lagonaina e itiiti lo’u agavaa po o le taua nai lo isi o siomia ai a’u.
O le tali i tauiviga uma e lua e tutusa lava:
Lotomaualalo.
Pe e Le i Lava Ea A’u?
O se tasi o aafiaga na faalotomaualaloina moni ai lava a’u na tupu i la’u misiona. Ou te manatu o le toatele o faifeautalai e taulimaina lagona o le le atoatoa a o taumafai e aumai tagata ia Iesu Keriso. I la’u misiona, sa ou faaaluina le tele o itula i se aso e taumafai ai e su’e se tasi e aoao ma sa teenaina pea lava pea. Ou te le’i lagonaina le faamanuiaina. Ou te le’i lagonaina na lava a’u taumafaiga. Mulimuli ane, sa amata ona ou lagonaina sa le lava a’u taumafaiga.
E ui atonu e le foliga mai o le lotomaualalo o le mea lea sa ou manaomia, ina ua ou faamatalaina o’u lagona i lo’u peresitene o le misiona, sa ia fesoasoani mai ia te a’u ia ou iloa o se vaega o lo’u faafitauli o le mafaufau lea sa tuusaunoaina a’u mai faafitauli o loo feagai ma faifeautalai i le lalolagi atoa. Ae e le o a’u le faifeautalai muamua na lagona le teenaina, ma e mautinoa lava o le a ou le mulimuli.
I se isi itu, sa ou faatalitonuina a’u lava o o’u faigata o au lava sa mafua ai, e ui lava i le mea moni e faapea, o nisi o faifeautalai sili ona lelei i le talafaasolopito—e pei o uluai Aposetolo e Toasefululua, o atalii o Mosaea, ma Alema le Itiiti—na feagai ma le teenaina ma sauaga sili atu nai lo a’u.
Nai lo le lagonaina o le faanoanoa mo a’u lava ia, sa amata ona ou lagonaina sa ou tu soosoo tauau ma Iesu Keriso i o’u tauiviga. Ma ina ua ou lagonaina le maasiasi i a’u taumafaiga lē atoatoa, sa ou manatua le mea na aoao mai e Peresitene Jeffrey R. Holland, Sui Peresitene o le Korama a Aposetolo e Toasefululua: “O le Togiola [a Keriso] o le a tauaveina ai faifeautalai atonu e sili atu ona taua nai lo le aveina o tagata sailiili. Pe a e tauivi, pe a teenaina oe, … o loo outou tutu faatasi ma le olaga silisili ua iloa e lenei lalolagi, ua na o le pau lea o le olaga mama ma le atoatoa ua soifua mai ai.”
O loo ou toe tepa pea i tua i lenei aafiaga pe a manaomia ona ou manatua ia lotomaualalo ma faalagolago i le Alii.
O Se Lesona i le Lotomaualalo
Sa ou aoaoina ni mea se tele e uiga i lo’u faasinomaga o se atalii o le Atua a o o’u i ai i la’u misiona. Ae ina ua ou foi mai i le fale, sa ou iloaina sa tele pea mea sa ou aoaoina e uiga i le taua o le manatuaina o isi tagata o fanau foi a le Atua.
E lei leva ona ou toe foi i le fale, ae lafoina a’u i se valaauga faigata ma tuu i ai le pule i se mea taua na tupu. Sa lofituina a’u, ma sa le mafai ona ou maua tagata o e sa tatau ona fesoasoani ia te a’u. Sa ou auina atu se imeli, o le mea moni, sa matuai malosi lava le faaupuga.
Sa ou sa’o e taua le valaauga ma sa ou manaomia se lagolago sili atu, ae sa vave ona ou iloaina atonu e le o le auala sili lea e faaosofia ai tagata. Sa ou manaomia le lotomaualalo; Sa manaomia ona ou manatua atonu sa i ai i isi tagata a latou lava mea sa latou popole i ai.
E pei ona aoao mai Elder Steven E. Snow a o avea ma se fitugafulu, “Afai tatou te faamaualalo i tatou lava, o le a taliina a tatou tatalo; tatou te olioli i le filemu o le mafaufau; tatou te auauna atili ma le lelei i o tatou valaauga; ma afai e faaauau pea ona tatou faamaoni, o le a i’u ina tatou toe foi atu i le afioaga a lo tatou Tama Faalelagi.”
E moni lava, ua ou lagonaina le olioli sili atu i lo’u valaauga ma i lo’u olaga a o ou aoao ia lotomaualalo atili.
Faapaleniina o Upumoni e Lua
Mo a’u, o le aoaoina o le lotomaualalo moni e faatatau i le faapaleniina o nei upumoni e lua:
O a’u o se atalii o le Atua. Ma ua siomia a’u e isi fanau a le Atua.
A o o’u aoao atili e uiga i le lotomaualalo, ua ou iloa ai o le mea na aoao mai e Elder Quentin L. Cook o le Korama a Aposetolo e Toasefululua e moni: “O le lotomaualalo e le o se mea maoae e ausia pe faatoilaloina foi ni luitau tetele. … O le mauaina o le mautinoa le leoa faapea e mafai ona tatou faalagolago i le Alii i lea aso ma lea aso o lea itula foi ma lea itula, e auauna atu ia te Ia, ma ausia ai Ona faamoemoega.” Ua ou aoaoina e mafai moni lava ona ou ausia faamoemoega o le Alii—ae seiloga lava ou te liliu atu lo’u loto ia te Ia ma talitonu ua Ia silafia le mea e sili ona lelei.
Ou te iloa a o tatou taumafai ia lotomaualalo atili ma faaKeriso, o le a faamanuiaina i tatou e le Tama Faalelagi i a tatou taumafaiga.
E alala le tusitala i Frankfurt, Siamani.