E Na’o Tusiga Faaeletonika: Talavou Matutua
Tauivi ma le Suesueina o Tusitusiga Paia? Taulai Atu i le Auala o Loo E Faitau Ai
E nofo le tusitala i Kisumu, Kenya.
O le taimi lava na ou faamoemoe ai i la’u suesuega o tusitusiga paia, sa mafai ona ou toe lagonaina le filemu.
Sa ou iloaina o le toe foi atu i lo’u nuu i le mae’a ai o la’u misiona o le a luitauina ai a’u. O le a tofotofoina ai lo’u naunautaiga ma le manao e ola pea i le talalelei. Ae ona o aafiaga na ou maua i la’u misiona, sa ou iloa ai foi o le a faamanuiaina au pe afai ou te faamuamuaina le mana ma le puipuiga lea e mafai ona aumaia e le suesueina o tusitusiga paia i aso taitasi.
O lea, ae ou te lei toe foi atu i le fale, sa ou filifili ai e fai le suesuega o tusitusiga paia i aso taitasi ma a’u sini.
I la’u misiona, sa mafai ona ou suesue i a’u tusitusiga paia i aso uma. O lenei taimi faapitoa faatasi ma le Tama Faalelagi na faamanuiaina ai lo’u olaga ma faalolotoina ai lo’u fiafia i tusitusiga paia.
Ae ina ua ou toe foi i le fale ma faaauau pea le taimi, sa pisi le olaga. Sa amata vasega i le BYU–Pathway i le Lalolagi Atoa, sa ou faigaluega faasoloatoa, ma sa oo ina ou faalavelaveaina i taimi uma.
O la’u telefoni ma lo’u olaga pisi na tu i le va o a’u ma tusitusiga paia. Sa ou lagonaina se puipui o loo agai i luga i lo’u va ma le Tama Faalelagi. Ae na o lo’u faamoemoe lava i la’u suesuega o tusitusiga paia na mafai ai ona ou talepea i lalo le puipui ma maua ai lo’u ala e toe foi atu ai i lo’u Faaola.
Sa’ili’ili ma le Maelega ma le Faitau Faasamasamanoa
Mo sina taimi, sa ou faitauina tusitusiga paia i le po ma pe a ou maua se taimi avanoa i le taeao. Ae e tusa lava pe na ou faitau i nei taimi, e manaomia pea e la’u telefoni lo’u gauai atu i ai. E oo ane i le faaiuga o la’u suesuega, sa le mafai ona ou manatua mea sa ou faitauina.
I se tasi o a’u kosi o le BYU–Pathway, sa matou suesue ai le puleaina o taimi. Sa talosagaina i matou e vaai i a matou sini mo le tausaga ma saili se auala e tumau ai i na sini. I le taimi o lenei gaoioiga, sa ou faafesagai ai ma le puipui sa ou fausia i o’u lava mausa. Sa ou iloaina ua ou misia le maka i la’u sini ia suesue i tusitusiga paia i aso uma.
O lea sa ou tatalo ai pea lava pea pe faapefea ona ou toe faatulagaina la’u sini muamua ma avea ai ma se soo filiga o Iesu Keriso.
Ona ou iloaina lea o lo’u faafitauli o le auala sa ou suesue ai i tusitusiga paia.
A o avea o ia ma se tasi o Fitugafulu, sa aoao mai Elder Merrill J. Bateman: “Ina ia mafai ona o mai ia Keriso ma faaatoatoaina ia te ia, e manaomia e tagata taitoatasi ona maua se molimau i afioga a le Alii. O nisi tagata e vaivai ona ua latou lē tatalaina tusi, ae o isi ona ua latou faitau faasamasamanoa. E pei ona faamoemoeina e se tasi, e i ai se eseesega i le va o le sailiili ma le filiga po o le ‘mafaufau loloto i tusitusiga paia’ ma le faitauina faasamasamanoa.”
Pe a ou tatalaina tusitusiga paia ma se manao e mafaufau loloto ma suesue i upumoni o i totonu, ou te faafouina lou tulaga malamalama i le talalelei ma lagona le latalata atili atu i lo’u Faaola, o Iesu Keriso. Ou te lagonaina le alofa o le Atua e sili atu ona malosi, ma o le lagonaina o lenei mea, e faigofie ai ona ou fesoasoani atu i isi o loo manaomia le fesoasoani.
O se tasi o mau ou te fiafia i ai o le Filipi 4:13, lea e faamanatu mai ai ia te a’u “E mafai ona ou faia mea uma lava e ala ia Keriso, o lē ua faamalosia ai a’u.”
Ua ou iloa ai o le i ai o le Agaga e sili atu ona malosi i lo’u olaga pe a ou faia mausa faaleagaga o se faamuamua maualuga ma manatua e mafai moni lava ona ou faia mea uma e ala ia Keriso.
Faaavanoaina o se Taimi mo Ia
Pe a ou lagonaina masalosaloga i lo’u olaga, ou te manatua o Iesu Keriso o lo’u Togiola ma lo’u faufautua. I le avea ai ma o tatou faiaoga, e silafia e Ia lo tatou alualu i luma ma e mafai ona fesoasoani ia i tatou e faatoilalo soo se mea. Ou te iloa na faia e le Faaola lenei mea ma le tele o isi mea mo a’u. Faatasi ai ma Lana fesoasoani, e mafai ai ona avea atili a’u e faapei o Ia.
Ou te maua upumoni faapenei i upu o tusitusiga paia i aso uma! Pe a ou maua nei upumoni, ou te mauaina Iesu Keriso.
Na fautua mai Peresitene Russell M. Nelson: “E silafia outou e le Alii ma e alofa ia te outou. O Ia o lou Faaola ma lou Togiola. O loo Ia taitaia ma taialaina Lana Ekalesia. O le a ia taitaia ma taiala oe i lou olaga patino pe afai o le a e faaavanoa se taimi mo Ia i lou olaga—i aso taitasi ma aso uma.”
Talu lava ona ou faafouina la’u sini o le suesue i tusitusiga paia i aso taitasi (ma mafaufau loloto moni i ai), ua mafai ona ou talisapaia le mana ma le puipuiga latou te aumaia ia te a’u. Pe a tatou iloaina o loo i ai pea le Faaola e faamalosia i tatou, aemaise lava e ala i tusitusiga paia, e mafai ona tatou maua le filemu moni. E le maua le filemu moni mai le vaavaai atu i isi—e tusa lava pe foliga mai ua ia i latou mea uma e te manao i ai.
Ona o Iesu Keriso le tali