“Filifilia o le Malamalama o le Talalelei i lo le Pogisa o le Lalolagi,” Liahona, Aok. 2024.
Autalavou Matutua
Filifilia o le Malamalama o le Talalelei i lo le Pogisa o le Lalolagi
O se aafiaga faaleagaga na faamanatu mai ai ia te au faamanuiaga taua sa ou misia ona ou te lei manatu mamafa i le talalelei a Iesu Keriso.
Ata pue na faaali e tagata faataitai
Sa masani ona avea au ma se tagata matuai ese lava nai lo au i le taimi nei.
E ui ina sa ou fanau mai i Le Ekalesia a Iesu Keriso o le Au Paia o Aso e Gata Ai, ae ou te lei manatu mamafa lava i ai. Ou te lei mafaufau moni po o le a le uiga o upumoni o le talalelei mo lou olaga.
I Palekeria, o au o se tasi o nai tagata toalaiti o le Ekalesia. O aso taitasi, e siomia ai au i le tele o amioga ma faatosinaga faalelalolagi. O le toatele o tagata talavou iinei e leai ni amioga lelei po o ni tulaga faatauaina, ma o nisi taimi e mafai ona lagona le pogisa o le lalolagi.
I ni nai tausaga ua mavae, ina ua 17 ou tausaga, sa ou faanoanoa ma leai se faamoemoe. Sa ou le tafao ma ni uo lelei pe faia ni mea lelei. I se tasi aso na fai mai ai lo’u tama ia te a’u, sa ia lesitalaina a’u e auai i se konafesi o le Mo Le Malosi o le Autalavou i se atunuu lata ane. Ou te lei fia alu, ae o le iloaina sa manao o ia ou te alu, sa ou alu ma le musuā.
O le mea na faateia ai, o aafiaga faaleagaga sa ou maua i lena konafesi na suia atoa ai lo’u olaga.
I le MMA sa ou vaai moni ai lava i le uiga o le avea ma se soo o Keriso—ia ola i se tulaga ese nai lo le lalolagi. O nei tupulaga talavou faamaoni uma sa o se eseesega tele i faatosinaga le lelei sa masani ona siomia ai au. Sa ou lagonaina e pei ua ou vaai moni lava i le malamalama o loo tauaveina e nei soo. O aso taitasi, ou te lagonaina ai le malosi tele o le Agaga a o ou faaaluina le taimi ma tagata lelei, suesue i tusitusiga paia, aoao atili e uiga i le talalelei, ma iloa atili ai le Tama Faalelagi ma le Faaola.
Faia o Suiga
Sa ou iloaina e tatau ona ou suia a’u amioga ma amata ona malamalama i mea e mafai ona aumaia e le talalelei a Iesu Keriso i lo’u olaga.
Ina ua ou alu i le fale, sa ou le manao e leiloa le sootaga i le Agaga lea sa ou lagonaina i le taimi o le konafesi, o lea sa ou faia ai se sini e fai le mea sa manaomia e mausali ai le faatumauina o lo’u faavae fou i le talalelei ma faatumauina ai le Agaga ia te au.
O le faia o suiga sa fai si faigata i le taimi muamua. Sa tatau ona tuu lo’u faaaluina o taimi ma nisi o uo patino aua sa le o i latou o ni faatosinaga lelei ia te a’u. Sa ou galue e lafoai ni mausa leaga. Sa amata ona ou auai ma le manatu mamafa i le lotu. O le faia o nei faaiuga na fesoasoani ou te faatumuina ai lo’u olaga i le lelei. O le mea na fesoasoani ia te au e tumau ai pea le fesootai atu i le Agaga o le faataatia ese lea o se taimi i aso taitasi e suesue ai tusitusiga paia, aemaise lava le Tusi a Mamona.
Faamanatu ia Faamanuiaga o le Talalelei
O aoaoga i tusitusiga paia e faamanatu mai ai ia te au le mea e taua moni lava i lo’u olaga. Pe a ou lagonaina le tuuatoatasi i lo’u faatuatua, aemaise lava i le toalaiti o tagata o le ekalesia iinei i Palekeria, ou te faatagaina upumoni a perofeta anamua e faalolotoina lo’u faatuatua ia Iesu Keriso.
O se tasi o fuaiupu ou te fiafia lava i ai o le Moronae 10:32: “O mai ia Keriso, ma faaatoatoaina ia te ia, ma faafitia outou lava mai mea e le faaleatua uma; ma alolofa i le Atua ma o outou manatu atoa, mafaufau, ma le malosi atoa, ona lava lea o lona alofa tunoa mo outou, ma o lona alofa tunoa e mafai ai ona outou atoatoa ia Keriso.”
O mau faapenei e faamanatu mai ai ia te au le malamalama o loo ofoina mai e le talalelei ma faatumauina lo’u malosi pe a ou oo i se taimi faigata. E faamalosia e tusitusiga paia i taimi uma lo’u faavae o le faatuatua.
O le taimi nei, o loo ou sauni e auauna atu i se misiona, ma o loo ou feagai pea ma mea e le mailoa ma luitau (e pei o le mauaina talu ai nei i le ituaiga 1 o le mai suka). Ae o le faamuamuaina o mausa faaleagaga e fesoasoani ou te lagona ai le alofa o le Tama Faalelagi e sili atu nai lo se isi lava taimi.
Sa faamanatu mai e Peresitene Russell M. Nelson ia i tatou talu ai nei o le “mafaufau faaselesitila o lona uiga o le mafaufau faaleagaga.”
O le taumafai e fai mea e faatumauina ai le Agaga ia te au i aso taitasi e fesoasoani tele ia te au e mafaufau faaselesitila—ia mafaufau faaleagaga. Ua ou lagonaina ua avea atili au lava e faapei o Keriso a o ou mafaufau e uiga i mea o le a Ia faia. O le faatumauina o le Agaga ia te au e fesoasoani ou te maua ai le faamoemoe ma manatua faamanuiaga o loo teuina e le Tama Faalelagi mo i latou uma o e filifili e mulimuli ia te Ia.
Pipiimau i le Malamalama
O le ola ai i se lalolagi amioleaga lea e lagona ai le pogisa e mafai ona faigata i nisi taimi. Ae e fesoasoani foi ia te au e iloa atili ai le mafanafana ma le malamalama o le talalelei a Iesu Keriso. Sa ou misia le taua o lenei faamanuiaga ofoofogia i lo’u olaga mo le tele o tausaga. Ou te matua faafetai lava mo aafiaga faaleagaga e mafai e le Tama Faalelagi ona taitai atu i tatou i ai, aua o le taimi nei, ua ou pipiimau pea i le malamalama ma le olioli o le talalelei nai lo se isi lava taimi.
Ou te molimau atu afai e te faalagolago i le Alii ma suesue mai le Tusi a Mamona i aso uma, o le a sili atu ona faigofie lou olaga. O le a amata ona e vaai i faamanuiaga e tuuina mai e lo tatou Tama Faalelagi alofa i aso uma, ma o le a e iloa ai po o ai e mafai ona e avea ai faatasi ma le fesoasoani a le Alii.
E alala le tusitala i Varna, Pulekeria.