O Le A Se Mea e Mafai Ona Ou Fai Atu i Isi E Uiga i le Malumalu?
O le auala tatou te talanoa ai e uiga i le malumalu e taua.
Atapue o le Malumalu o Tegucigalpa Honduras, na saunia e Cody Bell
Ou te manatua lo’u fiafia i le mauaina o o’u faaeega paia a o o’u sauni e alu mo la’u misiona. Ou te manatua foi le liuaina o lena fiafia i le popole ma le fenumiai ina ua tuuina mai e nisi o tagata o le aiga ia te a’u ni lapataiga lē manino e uiga i le auai mo le uluai taimi.
Sa ou iloaina sa faamaoni o latou faamoemoega i le taumafai e fesoasoani mai ia ou maua se aafiaga lelei. Ae sa ou moomoo, na i lo le taulai atu i le lapataia o a’u e faapea o le malumalu o se mea e le masani ai, maimau pe ana fesoasoani tagata e saunia a’u mo le malumalu i ni auala faagaeetia ma sa’o.
Faatasi ai ma lena mea i le mafaufau, o mea nei e fa e mafaufau i ai a o e talanoa atu ia i latou o loo sauniuni e o i le malumalu mo le uluai taimi:
1. Taulai Atu i Upumoni nai lo Manatu
Pe a auai atu se tasi tatou te alolofa i ai i le malumalu mo le taimi muamua, o se vaega masani ai lo tatou mananao e faasoa atu o tatou lava aafiaga ia te ia. Ae e tatau ona tatou mautinoa o mea o loo tatou faasoa atu o loo taulai atu i upumoni o le talalelei nai lo o tatou lava manatu.
O faamatalaga sa’o e mafai ai e i latou e pele ia i tatou ona taulai atu i le Faaola ma ‘aua nei tosina atu i le lagonaina o se auala patino e uiga i o latou aafiaga i le malumalu. Sa saunoa Peresitene Russell M. Nelson e faapea, “O musumusuga lelei e faavae i luga o faamatalaga lelei.”
E mafai ona e faasoa atu faamatalaga sa’o (ma e oo lava i ata!) e uiga i le malumalu mai le vasega sauniuni o le malumalu, o tusitusiga paia, ma le temples.ChurchofJesusChrist.org. O nisi taimi atonu tatou te popole ai e uiga i mea e faasoa atu, ae e ala i le liliu atu i punaoa nai lo o tatou manatu, tatou te le popole ai e uiga i le soona faasoa atu.
E ala i le tuuina atu o faamatalaga sa’o e uiga i le malumalu, tatou te ofoina atu ai se vaaiga e sili atu ona faamalamalamaina e uiga i le malumalu. O manatu e masani ona taulai atu i lagona ma aafiaga na tatou maua, a o faamatalaga o le talalelei e taulai atu lea i le faatagaina o se tasi e pele ia iai so latou lava aafiaga i le malumalu.
2. Mafaufau i Upu E Te Faaaogaina
O a ni faamatalaga o le malumalu na tumau ia te oe? Mo se faataitaiga, na saunoa Peresitene Nelson, “O lau auaunaga ma le tapuai i le malumalu o le a fesoasoani ia te oe e mafaufau ai faaselesitila.” Ma na saunoa Peresitene Thomas S. Monson (1927–2018), “O [malumalu] taitasi e tu o se sulu taiala i le lalolagi.”
E mafai ona tatou filifilia upu ia e ofoina atu ai le faamoemoe ma le malamalama ia i latou tatou te alolofa i ai o e o loo sauniuni mo o latou aafiaga i le malumalu. E mafai ona tatou aloese mai faamatalaga le lelei o le malumalu (e pei o le “ese” po o le “uiga ese”), ma e mafai ona tatou filifili e faaaoga faamatalaga lelei, e faatotonugalemu ia Keriso (e pei o le “filemu” ma le “faamoemoe”).
Ou te iloa e aoga le mafaufau e uiga i le tele o ata matagofie ua ou vaai i ai i totonu o le malumalu, ma e masani lava o le a ou faasoa atu na ata i uo po o tagata o le aiga o e o loo sauniuni e o. O a ni faalogona ma lagona ma upu e oo mai i lou mafaufau pe a e vaai i na ata? Taumafai ia faagaeetia i le auala e te talanoa ai e uiga i le malumalu.
3. Saili Tali mai Punaoa o le Talalelei
Ona o lo tatou alolofa ma le faaaloalo loloto mo le malumalu, e mafai ona faigofie ona lagona le fefe e talanoa e uiga i ai. E mafai ona tatou le mautonu ma mafaufau po o le a le mea e talafeagai e ta’u atu. Ou te iloa sa ou aafia i le aga ma le tu lea ua masani ai o le ta’uina atu i uo fia iloa ma tagata o le aiga, e le mafai ona tatou talanoa e uiga i mea e tutupu i le malumalu.
Peitai, a o o’u auauna atu ma suesue atili e uiga i le malumalu, sa oo ina ou iloa e mafai ona tatou faasoa atu ni mea se tele atu nai lo le mea na ou iloaina!
Mo se faataitaiga, e mafai ona tatou faasoa atu faapea “o se faaeega paia o se ‘meaalofa’ moni lava.” O le faaeega paia o le malumalu o se meaalofa o faamanuiaga paia mai le Atua ia i tatou taitoatasi, ma o nisi o na faamanuiaga e aofia ai:
-
“Malamalama sili atu i faamoemoega ma aoaoga a le Alii.
-
“Malosiaga e faia ai mea uma e finagalo le Atua tatou te faia.
-
“Taitaiga faalelagi ma le puipuiga a o tatou auauna atu i le Alii, o tatou aiga, ma isi.
-
“Faateleina o le faamoemoe, mafanafana, ma le filemu.
E mafai foi ona tatou talanoa e uiga i feagaiga tatou te osia i totonu o le malumalu. O le mea matagofie e uiga i le malumalu o le faatagaina lea o i tatou e faalatalata atili atu i le Atua ma faamalosia lo tatou sootaga ma Ia e ala i le faia o folafolaga faaopoopo ma Ia. O nei feagaiga ua aofia ai:
-
“Tulafono o le Usiusitai, lea e aofia ai le taumafai e tausi poloaiga a le Atua.
-
Tulafono o le Taulaga, o lona uiga o le faia o mea uma tatou te mafaia e lagolago ai le galuega a le Alii ma salamo ma se loto momomo ma se agaga o le salamo.
-
“Tulafono o le Talalelei, o le tulafono maualuga atu lea na Ia aoao mai a o i ai o Ia i le lalolagi.
-
“Tulafono o le Ola Mama, o lona uiga o le faia o sootaga feusuai ma na o le tagata ua tatou faaipoipo i ai faaletulafono ma i la le tulafono e tusa ma le tulafono a le Atua.
-
“Tulafono o le Faapaiaga, o lona uiga o le tuuto atu o o tatou taimi, taleni, ma mea uma ua faamanuiaina ai i tatou e le Alii e fausia ai le Ekalesia a Iesu Keriso i le lalolagi.”
Ata o le Malumalu o Roma Italia na saunia e Cody Bell
A o tatou faasoa atu ni savali lelei e uiga i le malumalu, tatou te fesoasoani i e pele ia i tatou ia lagona atili le taliaina ma saunia e auai mo le uluai taimi. E mafai ona tatou fesoasoani ia i latou e tulimatai atu i le faalolotoina o la latou sootaga ma Iesu Keriso e ala i feagaiga o le malumalu.
4. Faasoa Aafiaga Lelei
O le mea ua sili ona ou aoaoina e uiga i le malumalu, faatasi ai ma faamatalaga sa’o, e leai se tulaga o le ese lava. O le mea moni, o le tele—pe afai e le o faamatalaga uma—o faamatalaga ma faamanuiaga tatou te maua i le malumalu e talitutusa ma mea ua aoaoina ai i tatou i aso uma i le talalelei.
E ala i o’u aafiaga, ua ou aoaoina ai o le fefe e le mai le Alii. Pe a tatou aloese mai i le talanoa e uiga i le malumalu pe taumafai e talanoa e uiga i ai ma ni lapataiga po o popolega le mautonu, e tuuina atu ai i le fili le mana sili atu e aumaia se vaaiga sese o le matagofie o le malumalu. Nai lo le faapuupuuina o a tatou talanoaga i le faapea atu, “Tau lava o le toaga e alu pea i ai, e oo atu lava i se tulaga lelei atu,” e mafai ona tatou faasoa atu ni aafiaga lelei tatou te maua mai le auai atu i le malumalu.
Pe a tatou iloa ua tatou fefefe i le taliina o fesili e uiga i le malumalu, atonu o se valaaulia lena mai le Alii e suesue atili ai e uiga i le malumalu. O le a faamanuiaina e lenei mea e le gata o i tatou ae faapena foi i latou e siomia i tatou. Sa faamoemoeina e le Alii le malumalu e faamanuiaina ai i tatou, ae le o le faafefeina o i tatou.
Ia manatua upu a Peresitene Nelson: “O le osia o feagaiga ma le mauaina o sauniga taua i le malumalu, faapea foi ma le saili e faalatalata atili atu ia te Ia iina, o le a faamanuia ai lou olaga i auala e le mafai ona faia e se isi lava ituaiga o tapuaiga.” Ma o le tele o lo tatou talanoa lelei e uiga i le maota o le Alii, o le tele foi lena o lo tatou taialaina o le tasi ma le isi e toe foi mai ma valaaulia na faamanuiaga i o tatou olaga.