E Na o Tusiga Faaeletonika: Aoaoga a Taitai o le Ekalesia mai Ala o Faasalalauga Faaagafesootai
Fanau a le Atua ma Lona Alofa
Vaai i mea na aoao atu talu ai nei e perofeta soifua ma isi taitai o le Ekalesia i luga o ala o faasalalauga faaagafesootai e uiga i le auala ua avea ai i tatou uma ma fanau a le Atua.
Ua faamanatu mai e le Salamo 82:6 ia i tatou lo tatou tofi paia: “O outou o atua; ma o outou uma o fanau a le Silisili Ese.”
E faapena foi, na talosagaina ma le naunautai i tatou e Peresitene Russell M. Nelson ina ia iloa le mea moni e uiga i o tatou tagata:
“A’u uo pele e, o outou moni lava o fanau agaga a le Atua. Sa outou pepese lava i lenei upumoni talu ina outou iloa upu o le ‘O A’u o se Atalii/Afafine o le Atua.’ Ae pe ua tusia ea lena upumoni e faavavau i lou loto?…
“O igoa faalelalolagi e iloa ai outou o le a le taitai avatua ia te outou se vaaiga mamao o tagata e mafai ona avea ai outou mulimuli ane. O le a le mafai ona latou faamautu atu lou kenera paia (DNA) po o lou gafatia paia e le faatuaoia. …
“… A o e taliaina nei upumoni, o le a fesoasoani atu le Tama Faalelagi ia te oe ia ausia lau sini silisili o le ola e faavavau i Lona afioaga paia.”
Na saunoa taitai o le Ekalesia i le konafesi aoao e uiga i lo tatou tofi paia o ni fanau a le Atua (tagai i faaputuga o le “natura paia” ma le “taua o le tagata lava ia”). Ua latou faasoa mai foi ni savali e uiga i nei autu i luga o ala o faasalalauga faaleagafesootai, e aofia ai mea nei:
O Outou o Fanau a le Atua, o se Tofi Tulagaese Faalelagi.
“O taimi faigata tele nei mo i tatou uma, ae ua lava mafuaaga ua aumaia e le talalelei a Iesu Keriso tatou te fiafia ai. E ala mai i Lana perofeta, ua tuuina mai ai e le Atua ia i tatou le lu’i ina ia faaauau pea ona ui atu i puapuaga, ma ua otooto mai i aoaoga a Iesu Keriso le ala e aga’i manumalo atu ai i lo tatou taunuuga paia o le ola e faavavau. Ua outou iloa o outou o fanau a le Atua, o se tofi malualii faalelagi. E alofa le Atua ia te outou. O Ia o se faiaoga faufautua mamana, ma ua uma ona Ia folafola mai e fesoasoani ia te outou pe afai tou te saili ia te Ia i le ala sa Ia aoao mai.
“Faatu i lou mafaufau ma au faamuamua patino le upumoni mamana o oe o se atalii/afafine faapelepele o le Atua. O Lona alofa ua faaeeina ai oe i le faaaloalo, o le malosi, ma le faaosofia e faasagatau ai i soo se faafitauli e te lua fetaiai i lou olaga. Ma aua lava nei galo e alolofa Ana auauna ia te oe. Matou te alolofa ia te oe. I o outou atugaluga uma, a o outou galulue i o outou luitau uma, matou te uunaia outou ia lototetele, aua ua uma ona Ia manumalo i le lalolagi. Tatou te mafaia foi. Manatua, o le fuafuaga a lo tatou Tama o se fuafuaga o le fiafia.”
Peresitene Dallin H. Oaks, Facebook, 22 Me, 2023, facebook.com/dallin.h.oaks.
O Le a Le Taofia e le Atua le Alofa ia te Oe
“Po o le a lava lou uiga faaalia i le Atua, o le a le taofia lava lona alofa ia te oe.
“E faafia ona onosai le Tama Faalelagi ia te oe?
“E sili atu nai lo le mea e mafai ona e malamalama i ai.
“E faafia ona Ia faamagaloina oe?
“E sili atu nai lo le mea e te lagona e tatau ai.
“E faafia ona Ia faafaileleina ma faamafanafanaina oe?
“E sili atu nai lo le mea e mafai ona e iloa.
“E leai se mutaaga o le alofa tunoa ma le alofa mutimutivale o lo tatou Atua agalelei. E leai ni tapulaa i le loloto o Lona alofa. E leai se papupuni i Lona agaalofa mo Lana fanau.
“O le Atua e le o lo tatou itu tetee. O Ia o lo tatou faufautua. O lo tatou taiala. O lo tatou fomai. O lo tatou Faaola.
“O Lona faamoemoega ua tautino mai e ia lava ma le olioli silisili o lo tatou fiafia lea e ala i le tino ola pea ma le ola e faavavau.”
Elder Dieter F. Uchtdorf, Facebook, 8 Fep. 2023, facebook.com/dieterf.uchtdorf.
E Silafia e le Atua Lo Tatou Gafatia e Le I’u
“Pe a silasila mai le Tama Faalelagi ia i tatou, o Ana fanau, e silasila mai o Ia ia i tatou i le tagata moni o i ai i tatou. E silafia e Ia mea uma e uiga ia te i tatou. O lo tatou fefe, faanoanoa, ma lo tatou tuuatoatasi. Ae na te silafia foi ma olioli i lo tatou faatuatua, o tatou manaoga ma manumalo amiotonu. Na te faamanatuina taimi na tatou faatoilaloina ai faafitauli, pe faaletino, faalemafaufau, faalelagona, po o le faaleagaga. Ae o le tele lava, na te silafia lo tatou gafatia e le I’u. O lou gafatia e le I’u. Na te silasila mai i le uiga sili o i tatou, o le tagata mamalu ua ia i tatou le gafatia e avea ai.
A o e mulimuli i lo tatou Faaola pele, o Iesu Keriso, o le a tuputupu ae lou faatuatua. O le a faasolo ina malosi lou talitonuga, ma e i ai se aso, o le a mautinoa ai lou iloaina sa aoga au taumafaiga i le malaga. E mafai ona e faia lea mea. Talitonu. Talitonu i le Atua. Talitonu ia te oe lava. Filifili e mulimuli i le Faaola. Faalatalata atu i le Atua, ona faalatalata mai lea o Ia ia te outou.”
Elder Dieter F. Uchtdorf, Facebook, 18, Set. 2023, facebook.com/dieterf.uchtdorf.
O Oe O Se Vaega o le Aiga o le Alii
“Sei ou faamautinoa atu ia te outou afai ua e faaipoipo pe o nofofua, e i ai se aiga toatele po o se aiga laitiiti, o loo avea pea oe ma se vaega o le aiga o le Alii. Ou te olioli ona o le ata sili o le faaolataga ua lava le tele mo fanau uma a le Tama Faalelagi. Ma ou te matua faafetai lava ona o le fuafuaga a le Atua ua saunia ai se auala mo sootaga faaleaiga e faalautele i talaatu o le tuugamau. Ou te molimau atu a tatou toe foi atu i le afioaga o le Atua, o le a tatou faatasia e faavavau ma i latou e sili ona tatou alolofa i ai.”
Elder Quentin L. Cook, Facebook, 15 Me, 2023, facebook.com/quentin.lcook
E Silafia ma Alofa Patino le Tama oi le Lagi ia i Tatou
“Ua manino lava, e i ai so tatou Tama i le Lagi, e silafia ma alofa patino ia i tatou ma e malamalama atoatoa i o tatou puapuaga. O Lona Alo, o Iesu Keriso, o lo tatou Faaola ma le Togiola.
O le fuafuaga o le fiafia a le Tama mo Ana fanau e le gata e aofia ai le muai olaga ma le olaga faitino ae faapena foi se olaga e faavavau, e aofia ai se toe faatasiga sili ma le mamalu faatasi ma i latou ua maliliu. O mea sese uma o le a faasa’oina, ma o le a tatou vaai i ai i se manino atoatoa ma se vaaiga lē ponā ma le malamalama.”
Elder Quentin L. Cook, Facebook, 19, Oke. 2023, facebook.com/quentin.lcook
E Manaomia e Tupulaga Taitasi ona Malamalama Po o Ai i Latou
“E manaomia e tupulaga taitasi ona malamalama pe o ai i latou ma lo latou faasinomaga faavavau. E taufai faigata ona iloatino nei mea e lua ona e le manao le fili e i ai so outou malamalama manino i le Atua le Tama ma Iesu Keriso ma la La’ua fuafuaga o le fiafia mo oe ma lou sootaga ia i La’ua.
“O le lesona ia aua nei tuua le masalosalo po o le le talitonu e faatoilalo lo tatou faatuatua.”
Elder Quentin L. Cook, Facebook, 7, Tes. 2023, facebook.com/quentin.lcook.
O Malumalu o se Faailoga lea o le Alofa o le Atua.
“O le fausiaina o … malumalu i le salafa o le lalolagi o se faailoaga moni lea o le alofa o lo tatou Tama Faalelagi mo Ana fanau. O se molimau foi o loo soifua lo tatou Tama Faalelagi ma e popole o Ia i le faaolataga e faavavau o Ona atalii ma afafine i soo se mea. O se molimau matagofie o le faaaliga paia ma le fuafuaga ua i ai i le Atua mo i tatou, o Ana fanau, o o tatou tuaa, ma fanau.”
Elder Ulisses Soares, Facebook, 9 Oke., 2023, facebook.com/soares.u
O Ou Manaoga, Luitau, ma Faanaunauga e Faaauau Pea i luma o le Atua
“O’u tuafafine nofofua, ia iloa ua ou lagona e talanoa atu ia te outou ma o’u uso uma o e manaomia ona iloa e alofagia i latou ma silafia e lo tatou Tama Faalelagi. …
“Tamaitai lalelei ma afafine pele o le Atua, ou te iloa o loo silafia outou e lo tatou Tama Faalelagi ma le Faaola. E alolofa i Laua ia te oe. La te faafofoga i aioiga a lou loto, ou popolega, ou faanoanoaga, ou olioliga. E le o tuua lava na’o oe. E mafai ona e maua le malamalama atoatoa ia i Laua. Na tatau ona outou faipaaga ma le Alii i se ala mamana e ala i a outou feagaiga. I le Isaia mataupu e 49 ua tuuina mai ai e le Alii ia i tatou se malamalamaaga i Lona alofa tele mo oe ma aʼu. I [fuaiupu 14–16] o loo faapea mai:
“‘A ua fai mai Siona, Ua lafoaiina au e Ieova, ua galo mai au i le Alii.
“‘E galo ea i le fafine lana tama ua susu, na te le alofa i le tama a lona lava manava? ai lava e galo ia te i latou; ae le galo lava oe ia te a’u.
“‘Faauta, ua ou taia lou faatusa i o’u alofilima e tumau ou pa i oʼu luma.’
O ou puipui—o ou manaoga, luitau, manaoga—o loo i ona luma e le aunoa. E leai lava se taimi e te le o i ai i Lona mafaufau ma Lona loto. Ua uma ona togitogoia oe i luga o alofilima o [Ona] aao. Ou te alofa ia te outou, ma ou te tatalo o le a outou maua le tausiga suamalie, faamalologa, ma le filemu i le alofa lē mavae o le Atua mo oe o Lona afafine.”
Sister Kristin M. Yee, Facebook, 8, Mat. 2023, facebook.com/RS2ndCounselor.
E Mafai e le Alofa ma le Malamalama o le Atua ona Faatumauina lo Tatou Faasinomaga Paia i le Pito i Luma
“A o ou ola ae i Kuini, Niu Ioka, sa ou lagonaina i nisi taimi le feseta’i i le motu o tagata o loo nonofo i totonu o le aai. E i ai taimi ou te lagona ai le faaesea ma le tuuatoatasi, e ui lava sa siomia au e le toatele o tagata.
“Ina ua faailoa mai ia te au le talalelei a Iesu Keriso, sa amata ona ou iloaina le oo mai o le Malamalama o Keriso i lo’u olaga. A o ou taliaina valaaulia e faitau tusitusiga paia, tatalo, ma mafaufau loloto, sa amata ona tuputupu ae le malamalama o loo i totonu ia te a’u. Sa ou lagonaina le lauiloa tele i le Atua, lea sa ou lagonaina muamua e le iloa e isi tagata uma.
“A o ou talavou, sa ou faalagolago vave atu i lena malamalama, ma sa ou faalagolago pea i ai e oo mai i le aso. Ua aoao mai Peresitene Russell M. Nelson e ‘taua’ le iloaina o le alofa o le Tama Faalelagi ma Iesu Keriso—aemaise lava i o tatou aso ma vaitaimi nei. Ou te faafetai mo lena aafiaga taua i lo’u talavou ma o loo faaauau pea ona uunaia a’u i luma e Lo La alofa ma le malamalama i le asō.
“O le alofa ma le malamalama o le Atua e faatumauina ai lo’u faasinomaga paia o se afafine pele o le Atua i le pito i luma ma o le auala lea ou te filifili ai e tuuina atu au lava ma faafoeina lo’u ala i lo’u olaga i aso taitasi. Ua mafai ai foi ona ou vaai i le paia o fanau uma a le Atua—o’u uso e ma tuafafine. E mafai e le alofa o le Atua ona tuia le totonugalemu o loto o Ana fanau. Pe a tatou lagonaina—pe a tatou oo i ai mo i tatou lava—tatou te iloa ai le mafuaaga e sili ona manaomia i mea uma … ma sili ona fiafia i le agaga (1 Nifae 11:22–23).”
Sister Tracy Y. Browning, Facebook, 27 Iulai, 2023, facebook.com/Primary2ndCounselor.