Mo Mātua

Auala e Fesootai atu ai le Lagolago i Lou Atalii po o le Afafine Faifeautalai

Saunia e London Brimhall

Mekasini a le Ekalesia

O mataupu faavae nei mai taitai o le Ekalesia e mafai ona fesoasoani a o e saili e ofo atu le lagolago i lau faafaifeautalai.

Ata na tusia e Alex Nabaum

Pe a alu lau tama i se misiona, pe mo se auaunaga po o se misiona faafaiaoga, e oo mai ma ni lagona fefiloi. Atonu e te lagonaina le fiafia, faanoanoa, faamaualuga, ma le popole—i le taimi e tasi. Atonu foi e lagona e lau faifeautalai le lotovaivai po o le le fiafia mai lea taimi i lea taimi ae o le a lagonaina foi le olioli, alofa, ma le faamoemoe. I le avea ai ma matua ma tagata o le aiga, ua ia te oe se avanoa faapitoa e siitia ai ma faamalosia lau faifeautalai a o e fesootai atu ia te ia. O le malamalama i nisi o mataupu faavae mo le auai i lenei ituaiga o fesootaiga e mafai ona aoga e le gata i matua o le faifeautalai ae faapea foi i aiga, uo, ma taitai.

Faamanatu ia i Latou Lo Latou Faamoemoega

Faamanatu i lau faifeautalai le galuega tele na valaauina o ia e fai. Sa faamamafa mai e Peresitene Russell M. Nelson le taua o lenei galuega paia:

E tatau i fanau uma a lo tatou Tama Faalelagi ona maua le avanoa e filifili ai e mulimuli ia Iesu Keriso, ia talia ma maua Lana talalelei ma ona faamanuiaga uma. …

“… Na auina mai outou i le lalolagi i lenei taimi patino, lenei taimi aupito taua i le talafaasolopito o le lalolagi, e fesoasoani e faapotopoto ia Isaraelu. E leai se mea o tupu i le lalolagi i le taimi nei, e sili atu ona taua nai lo lena.”

“E tatau i fanau uma a lo tatou Tama Faalelagi ona maua le avanoa e filifili ai e mulimuli ia Iesu Keriso, ia talia ma maua Lana talalelei ma ona faamanuiaga uma.”

E aoaoina e faifeautalai o lo latou faamoemoega o le “valaaulia lea o isi e o mai ia Keriso e ala i le fesoasoani atu ia i latou ia maua le talalelei toefuataiina e ala i le faatuatua ia Iesu Keriso ma Lana Togiola, salamo, papatisoga, mauaina o le meaalofa o le Agaga Paia, ma tumau e oo i le iuga.”

Fesoasoani i lau fanau ia manatua lo latou faasinomaga paia. O i latou o fanau a le Atua, na auina mai iinei i lenei taimi ona sa faatuatuaina i latou e le Tama Faalelagi i Lana galuega. Faailoga auala e mafai ona latou faaaoga ai a latou meaalofa e faamanuia ai olaga o isi. I le avea ai ma soo o Iesu Keriso, e mafai ona latou faia mea atonu latou te manatu e le oo i ai lo latou gafatia.

Taulai atu i le Faaleagaga

E ui atonu e te manao i ni tala fou i vaega uma o le misiona, ae aua nei faatagaina le faatauvaa e puleaina le talanoaga. Na aoao mai Elder Dieter F. Uchtdorf o le Korama a Aposetolo e Toasefululua: “Taulai atu i le tulaga faaleagaga o le auaunaga a lau tama. E matagofie le telefoni a se faifeautalai i le fale; e mafai ona latou suia le fua mai le ‘O le a lau ti taeao na fai?’ i le … ‘O ai le aiga po o le tagata o loo e aoaoina i le taimi nei ma o le a foi le lesona? O le a se mea ua sili ona faamalosia ai oe?’ O le tulaga lamatia o nisi taimi tatou te taulai atu ai i mea faatauvaa ma faatuatuanai ai i mea faaleagaga.”

Taulai atu i le faaleagaga e ala i le uunaia o lau faifeautalai e faasoa mai ni aafiaga e uiga ia i latou o loo ia auauna atu i ai pe aoao atu. Mafaufau e tatalo mo na tagata i au tatalo faaletagata lava ia pe faaleaiga. Faalogo ma le toto’a a o faasoa mai e lau faifeautalai auala na pa’i atu ai le Agaga i lona loto i lena vaiaso.

Nai lo le tuuina atu o ni faafouga i luga o ata o le TV po o taaloga, faasoa atu ni taimi taua mai lou olaga lea na taialaina, faamafanafanaina, pe aoaoina ai oe e le Alii. A o e faia lena mea, o a oulua talanoaga o le a faafouina faaleagaga ai oe ma lau faifeautalai.

Faasoa atu i le Malaga Faaleagaga

O le a faamanuiaina au talanoaga ma lau faifeautalai a o e saili e auai foi i le galuega o le faapotopotoina o Isaraelu. Na faasoa mai Sister Bonnie H. Cordon, o lē sa avea ma Peresitene Aoao o Tamaitai Talavou:

“Atonu e le mafai ona e savali faatasi ma [lau faifeautalai], ae e mafai lava ona lua tausoaina le malaga faaleagaga. …

“Auai faatasi ma lau faifeautalai i le galuega—suesue, auauna atu, ma faasoa atu le talalelei a Iesu Keriso! A o e faia lena mea, o le a oulua seleseleina uma faamanuiaga folafolaina o le galuega faafaifeautalai.”

Na tuuina mai foi e Sister Cordon ni fautuaga se tolu:

• “Faateleina au oe lava suesuega o tusitusiga paia ma faasoa atu ou malamalamaaga i le isi au imeli e sosoo ai.

• “Auai i le malumalu ma auai faatasi ma i latou i le galuega mamalu o le aumaia o aiga ia Keriso.

• “Saili au oe lava aafiaga faafaifeautalai ina ia mafai ai e oe ona iloa le olioli o le faasoaina atu o le talalelei.”

Po o le a lava lou filifiliga i le auala e te auai ai i le malaga faaleagaga, o le a faateleina lou olioli a o lua saili uma e fesoasoani i isi ia o mai ia Keriso.

I au fesootaiga uma ma lau faifeautalai, ia manatua e tepa atu i le Alii. O le a Ia musuia oe ia iloa mea e manaomia ona faalogo i ai lau faifeautalai ma le taimi. O le a faamanuiaina oe ma lau faifeautalai a o e aoao, tuputupu ae, ma auauna atu faatasi.

Suesue Atili

Sa alofa, faasoa, ma valaaulia le Faaola. O le a se foliga o lena mea i o tatou olaga i aso uma? Maimoa le vitio “Simple Ways to Love, Share, and Invite” i le ChurchofJesusChrist.org/serve/share.

Faamatalaga

1. Russell M. Nelson, “Faamoemoe o Isaraelu” faigalotu a le autalavou i le lalolagi atoa, 3 Iuni, 2018), Potutusi o le Talalelei.

2. Tala’i La’u Talalelei: O Se Taiala i le Faasoaina atu o le Talalelei a Iesu Keriso (2023), 1.

3. “E Mafai e Matua ona Lagolago Sili Atu a Latou Faifeautalai e ala i le Mauaina o Aafiaga Faaleagaga faatasi ma i Latou, Ua Fai Mai ai Taitai e Toa 3,” Talafou a le Ekalesia, 5 Mati, 2019, ChurchofJesusChrist.org.

4. “E Mafai e Matua ona Sili Atu le Lagolagoina o a Latou Faifeautalai,” ChurchofJesusChrist.org.