“O Se Taimi Tulaga Ese mo Galuega o le Malumalu ma Talafaasolopito o Aiga,” Liahona, Aok. 2024.
O Se Taimi Tulaga Ese mo Galuega o le Malumalu ma Talafaasolopito o Aiga
E lei i ai muamua lava i le talafaasolopito o le lalolagi le tele o malumalu ma, faafetai i tekinolosi aupito lata mai, o le toatele naua o tagata (e aofia ai i latou e le auai i lo tatou faatuatuaga) e faaopoopo atu i o latou gafa faaleaiga.
O le a se mea ua musuia ai oulua e uiga i le galuega o le malumalu ma talafaasolopito o aiga?
Elder Hamilton: O loo manino lava le aao o le Atua i lenei galuega. Ina ua valaaulia i tatou e Peresitene Russell M. Nelson e “faamalolosia o tatou faavae faaleagaga faaletagata lava ia ,” ona ia saunoa mai lea, “O taimi e le’i tupu muamua ua valaau mai ai mo ni fuataga e le’i tupu muamua.” Tatou te lei vaai muamua lava i le ituaiga o tuputupu ae o loo tatou vaaia i le taimi nei. O loo tatou i ai i se vaitaimi o le fausiaina o malumalu e le’i iloa i le talafaasolopito o tagata, faatasi ai ma le toeitiiti 180 malumalu o loo faagaoioia, taseni o loo fausiaina, ma le tele o isi malumalu ua fofogaina atu i tausaga uma.
Ma faatasi ai ma lena tuputupu ae, e tuputupu ae ai foi le manaomia ona fausia le gafa o le tagata soifua. Na aoao mai Peresitene Nelson e faapea o le malumalu e “fafagaina i igoa.” E faalagolago ia i tatou le faamautinoa ua fafagaina lelei o tatou malumalu i igoa o loo manaomia ina ia mafai ai e o tatou tuaa ona maua o latou sauniga ma tagata o le ekalesia e mafai ona olioli i faamanuiaga o le malumalu i o latou olaga atoa.
E mafai ona e faasoa atu ou manatu i le auala e mafai ai ona tatou faamuamua le Faaola i le galuega o talafaasolopito o aiga?
Elder Hamilton: E tele taimi, tatou te taulai muamua atu ai i gafa, lea e taitai atu ai i tatou i o tatou tuaa, lea e taitai atu ai i tatou i le auai i sauniga ma osia feagaiga i le malumalu, lea e fusia ai i tatou i le Faaola. E matagofie lena mea, ae e tatau ona tatou faitauina mai le isi itu lena tusiga. E faamuamua le Faaola. Tatou te sailia se sootaga vavalalata ma Ia, o lea tatou te o atu ai i le maota o le Alii ma maua sauniga ma osia feagaiga ma Ia, fusia i tatou ia te Ia. Ona mafai lea ona tatou faia lena mea mo o tatou tuaa ua maliliu e ala i le sailia ma le faatinoina o sauniga o le malumalu mo i latou.
Tatou te amata i le Faaola ma faapea atu, “Ou te fia fesoasoani i ou tuaa ia fusia i latou lava i le Faaola e ala i sauniga o le malumalu.” Faatasi ai ma ni faailo se lua i luga o se telefonipoto, o le meafaigaluega o Sauniga ua Saunia i le FamilySearch e sailia ai tagata o lou aiga o e manaomia sauniga e faatino ina ia mafai ai ona latou maua le avanoa e fusia ai i latou lava i le Faaola. E sa’o le faasologa: O Iesu Keriso, ona sosoo lea ma feagaiga ma sauniga e taualuga i le malumalu—o le maota o le Alii.
Brother Rockwood: O le FamilySearch o se faalapotopotoga o auaunaga ua tuuto atu e fesoasoani i tagata o le lalolagi ia maua ma fesootai atu i o latou aiga. O le ute lena o mea tatou te faia ma sa faia mo le silia ma le 100 tausaga. Ua aumaia e le Ekalesia malumalu ma le FamilySearch ia latalata ma latalata atili atu i tagata i le lalolagi atoa. E tutusa lava la tatou sini: ia saunia auala mo tagata e o mai ai ia Keriso.
O le a se mea e sili ona faateia ai oe e uiga i lenei vaega o le galuega a le Atua o le faaolataga ma le faaeaga?
Brother Rockwood: O se tasi o mea aupito sili ona faateia ua ou vaaia i lo’u 20 tausaga i le galue ai i le Matagaluega o Talafaasolopito o Aiga o le toatele o tagata mai le lalolagi atoa o loo fausiaina o latou gafa faaleaiga. O le mea moni, o le toatele o tagata o loo faaaogaina le FamilySearch e le o ni tagata o lo tatou faatuatuaga. E toetoe lava o atunuu uma i luga o le fogaeleele e o mai ai. I le 2023, e 6 miliona tagata na saini mo se faitotoa o le FamilySearch—ma o le 97 pasene mataina o i latou e le o ni tagata o lo tatou faatuatuaga. E 4.1 miliona tagata sa auai i la matou konafesi a le RootsTech i le tausaga ua tea mai atunuu ma teritori e 243, ma o le toatele e le o ni tagata o la tatou faatuatuaga.
Elder Hamilton: O se faamatalaga toa tele le faapea atu o loo tatou fausiaina le gafa o le aiga o tagata, i le na o le 17 miliona tagata o le Ekalesia. Ae faatasi ai ma le fesoasoani a le faitau miliona o fanau a le Tama Faalelagi i le salafa o le kelope, ua fausia ai le laau e tasi le aiga i le taimi. Ona mafai lea e Au Paia o Aso e Gata Ai ona latou faatinoina galuega o sauniga o le malumalu ma saunia le ala mo o latou tuaa e fusia ai i latou lava ia Iesu Keriso. O le vavega maoae moni lava lenei o o tatou aso. Ua valaaulia le lalolagi atoa e o mai ma ao mai igoa i le gafa o le aiga ma fesoasoani ia i tatou e faailoa ma faamaumau nei sootaga faaleaiga i le aluga o taimi ma avanoa uma.
Pe o le mea ea lea e ta’ua e tagata o le agaga o Elia?
Elder Hamilton: E moni lava na sau Elia ma tuuina mai ki mo lenei galuega (tagai i le Mataupu Faavae ma Feagaiga 110:13–15). Ae ua aoao mai Peresitene Nelson o le mea e masani ona tatou ta’ua “o le agaga o Elia” o le Agaga Paia lea o loo molimau mai i le natura paia o le aiga. E musuia le matamata i ai. O se lagona mamana. E toetoe lava o taimi uma e amata ai e se tagata ona aoao atili e uiga i o latou tuaa, e oo mai se agaga mamana. O le Agaga Paia. O le molimau a le Agaga Paia e sili atu nai lo laina faaleaganuu, tuaoi faaupufai, ma tuaoi o gagana. O lenei Agaga o loo faatumuina ai le lalolagi ao o mai le faitau miliona o tagata i le FamilySearch.
O nisi taimi tatou te fesili atu ai i tagata e le auai i la tatou faatuatuaga, “Aisea e te faia ai lenei mea?” E masani lava ona tauivi tagata e faamalamalama atu. Latou te fai mai, “Ou te fia fesootai ma iloa pe faapefea ona ou auai. Ou te manao e lagonaina le avea o se vaega o se aiga.” O le mafuaaga lena latou te toe foi mai ai pea lava pea i le FamilySearch—aua latou te lagonaina se mea. O nei mea uma o le aao o le Alii o loo fesoasoani e fausia le gafa o le tagata soifua.
O le a sau tala e fai atu i tagata e i ai se manatu faapea e faigata le galuega o talafaasolopito o aiga?
Elder Hamilton: Ou te manao i tagata ina ia aveesea o latou muai manatu faapea o se galuega faigata lenei. E le o se galuega faafailautusi lenei. O se galuega faaleagaga. O se galuega fiafia. E mafai ona e vaai pea lava pea i ai i le talafaasolopito o lena mea.
Brother Rockwood: Ina ua iloa e uluai Au Paia e mafai ona latou faia papatisoga mo o latou tuaa, sa latou lagonaina se olioli maoae ma sa le mafai ona faatali e amata. I o tatou aso tatou te molimauina le olioli e lagona e tagata pe a latou faalogo ua fofogaina mai se malumalu i lo latou eria. O le olioli lea i se taimi ua amata ai ona matua pogisa ma pogisa atili le lalolagi. O loo aumaia e le Alii lenei olioli i tagata uma i le tele ma le tele o malumalu. O loo Ia tatalaina avanoa mo tagata e iloa ai o latou tuaa i auala e matuai le’i tupu muamua, faatasi ai ma tekinolosi na atiina ae i lalo o Ana musumusuga. O mea uma na ona o loo Ia faalilofia le lalolagi i le olioli.
Ona i ai lea o lena manatu e sili atu ona lelei le faia o galuega o talafaasolopito o aiga (pe ua uma foi ona faia) e se isi tagata i lo tatou aiga.
Elder Hamilton: O nisi tagata e le fia faalogo pe a latou faalogo i le “talafaasolopito o aiga” ona o se manatu mua’i mafaufauina po o ai e tatau ona faia lenei galuega po o ai o le a lelei i ai. Ae e anoanoai auala e faia ai lenei galuega. O loo i ai tusitalafaasolopito popoto o aiga ua i ai se lagona fiafia tele mo gafa ma faaaluina le tele o itula ma itula o o latou taimi e tulitulimatagauina ai, aoao e uiga i ai, ma maua tomai faapitoa. Ae o loo i ai foi tagata o e na ona mananao lava ia maua se igoa o le aiga i le isi a latou taimi faatulagaina o le malumalu. O loo i ai matua pisi, tagata ua litaea, autalavou, ma e oo lava i tamaiti Peraimeri o loo faia talafaasolopito o aiga. Tatou te manaomia nei tagata uma, po o le a lava le auala e mafai ona latou fesoasoani ai.
E mafai faapefea ona fesoasoani le autalavou ma talavou matutua?
Elder Hamilton: E maoae le vaaia o le faateleina o a tatou talavou o loo auai i talafaasolopito o aiga. I le 2011, na tuuina mai ai e Elder David A. Bednar o le Korama a Aposetolo e Toasefululua se lauga i le konafesi aoao lea na ia valaaulia ai le autalavou o le Ekalesia e auai i lenei galuega. Sa ia saunoa, “Ua aoaoina ou tamāilima e tesi ma faasalalau i luga o upega tafailagi e faateleai ma faaalualu ai i luma le galuega a le Alii.” O le toatele o tagata talavou e lagolelei i tekinolosi. Latou te fiafia i le natura e foia ai faafitauli o talafaasolopito o aiga—e pei o se sailiga oa. E tatau ona e fuafua po o le fea e sosoo ai ma po o le a le isi mea e fai.
Na aoaoina e Peresitene Nelson le autalavou—ma le isi vaega o i tatou—o le faapotopotoina o Isaraelu o le galuega aupito silisili lea i le lalolagi. O le autalavou ma talavou matutua e le gata ina auai i lenei avanoa ae o loo taimua moni lava i ai. E ofoofogia le matamata i nei tagatanuu faaeletonika ua avea ma se vaega o se talanoaga maoae—o le fausiaina o malumalu e le’i tupu muamua, tekinolosi e lei i ai muamua, o le toatele o tagata auai e lei tupu muamua.
E fiafia nei tagata talavou i le malumalu, ma latou te alolofa i le Faaola. O se tasi o faaaliga maoae o le faapotopotoina—o le oo mai o le tupulaga faiae a o latou punouai i lenei galuega.
Brother Rockwood: E ese le matagofie o le aoaoina e tamaiti laiti o i latou o fanau a le Atua a o latou saunia mo a latou feagaiga o le papatisoga ma mulimuli ane o atu i le malumalu. Latou te aoao e mafai ona latou auai o ni fanau o le feagaiga e fesoasoani e faapotopoto Isaraelu, ma a o latou faia, e avea i latou ma soo malolosi atu o Iesu Keriso. O se avanoa maoae mo le autalavou le aoao po o ai i latou ma le faamoemoega o le Alii mo i latou—ma sa faasaoina moni lava i latou mo lenei aso, “ua faaauupegaina i le amiotonu” (1 Nifae 14:14).
Ua faapefea ona faamanuiaina lou aiga i galuega o talafaasolopito o aiga?
Elder Hamilton: Sa matou tau atu i se mutaaga a o matou sailia le tuaa o le tama o le tama o lo’u tama matua Farani, o Adolph Cuny, mo le umi sa matou galulue ai—i le tele o tausaga. Sa le mafai ona matou mauaina ona matua, e tusa lava po o le a le malosi na matou saili i ai. Ae o le tausaga na te’a nei, sa tilotilo mai ai nisi o tagata suegafa maoae i Farani o loo galulue i le FamilySearch i a matou faamaumauga ma, i le faaaogaina o o latou tomai ma le malamalama i le lotoifale, na mafai ai ona maua matua o Adolph ma e oo lava i ona matua matutua.
Ua mafai nei e lo matou aiga ona faia o latou sauniga uma i le malumalu, ma o loo matou galulue nei i o latou aiga lautele ma e tupuga mai ia i latou. Sa tatalaina se faitotoa i le toatele o tagata mai lenei vaega o le gafa o lo’u aiga. O lenei faamanuiaga sa saunia e le FamilySearch ma lana upega fesootai o tagata sailiili ma faufautua tuuto ma atamamai. O lenei ituaiga fesoasoani o loo avanoa i soo se tagata ulu i le FamilySearch—tagata o le Ekalesia pe leai.
O a ni tulaga faaleleia ua e vaaia mai i lenei galuega?
Brother Rockwood: Mo le tele o tausaga, sa teuina ai faamaumauga pepa e ekalesia po o malo. O le tele o faamaumauga i sisifo e amata i le vaitau o le TA 1500–1600. I le vaitau o le 1930 sa amata ai ona matou pueina faamaumauga e faaaoga ai ataninii. E oo atu i le taimi na faaiuina ai lena mea i le 2006, ua 2.6 miliona taaiga o ataninii i la matou faaputuga. Sa tonu ia i matou e faafuainumera na ata, lea sa foliga mai o se galuega faatino e alu ai le faitau fia sefulu o tausaga. Ae o musumusuga faalelagi na aumaia ai ia i matou se tekinolosi fou lea na matua faapuupuuina ai lena mea i se vaega o lena taimi, na faamaeaina i le 2022. O le vaega aupito sili o lena mea o mea sa na o ataninii na maua ai a o lea ua maua gofie i luga o le initoneti, e ala i le FamilySearch. E mafai ona e faaaogaina e ala i se telefonipoto, tapeleti, po o se komepiuta. Ua avea le initoneti ma se fesuiaiga o taaloga.
Sa faia e le FamilySearch se faaiuga lototoa e siitia atu i se laau faitele—e pei o le Wikipedia, lea e mafai ona maimoaina ma faasa’oina e tagata uma. O suiga e tuliloaina ma le faaeteete, ma faatasi ai ma se ituaiga o faiga a tagata, e mafai ai ona fausia le gafa o le tagata soifua i se auai sili atu ma itiiti ni mea sese.
Elder Hamilton: O le asō, e faitau piliona tagata e mafai ona faaaogaina le initoneti. Ina ia faaaoga tekinolosi telefonipoto, ua atiae ai e le Ekalesia ni polokalama feaveai e aumai ai le FamilySearch i tagata i soo se mea. O le polokalama o Manatuaga, o le polokalama o Gafa o le Aiga, ma le polokalama o le Ia Auai o loo maua uma mo telefonipoto, lea ua tatalaina ai faitotoa e faalautele ai le galuega a le Alii.
Brother Rockwood: O loo tatou i ai i le lotolotoi o vavega, faatasi ai ma le tele naua o malumalu o loo fausiaina ma le tele o faamaumauga ua aoina mai e le toatele. Ma i le taimi tonu lava tatou te manaomia ai, o le tekinolosi e faatulaga ai ma maua ai le faigofie ona maua ua atiaeina. O le atamai faafoliga ua faatagaina nei i tatou e faatulaga faamatalaga i se auala e mafai ai ona sailia ma faaliliuina i soo se gagana.
Elder Hamilton: O le asō ua tatou vaaia ai le faataunuuina o le Efeso 1:10, lea o loo faapea mai “ina ia na faaopoopoina ia Keriso i le sauniga i le faaatoaga o tausaga, o i latou uma o i le lagi, atoa ma i latou o i le lalolagi.” O se tasi o auala ua tatou vaai ai i lona faataunuuina o totonu o malumalu, o igoa, ma tekinolosi e o mai faatasi uma i le aao o le Alii ina ia mafai ai ona tatou faia galuega o le malumalu mo le toatele o fanau a lo tatou Tama Faalelagi o e naunau e taliaina. Ma o le tala moni lava lena o le taumafaiga o le malumalu ma talafaasolopito o aiga i se aotelega. O loo i ai le Alii i lenei galuega, ma o loo tutupu vavega. O loo tutupu ona o loo Ia taitaia.