E Manaomia ona Iloa e Tagata

Saunia e Inaê Leandro, São Paulo, Pasila

O le malamalama faapea o aiga e mafai ona faavavau ua suia ai lo’u olaga e faavavau.

tamaitai talavou matua o loo faitauina se tusi

Na maliu lo’u tina ina ua 12 o’u tausaga. O le taimi lena na amata ai ona i ai ni a’u fesili e uiga i le mea e tupu i aiga pe a mavae lenei olaga. Sa ta’u mai e le faifeau i le lotu sa ou auai, a tatou feoti, o le a leai ni o tatou aiga. Sa ia fai mai o le a ou toe vaai i lo’u tina, ae o le a ou le iloaina o ia o lo’u tina, ma o le a ia le iloaina a’u o lana tama teine.

E le o le tali lea sa ou faamoemoe i ai. Sa faaauau pea ona matou auai i le lotu ma lo’u aiga, ae sa faaauau pea a’u fesili. Na ou mafaufau foi, “O fea la perofeta? O fea la Aposetolo?”

Ina ua atoa lo’u 14, sa ou sailia “Iesu Keriso” i luga o le initoneti. Na taitai atu ai au i se uepisaite mo Le Ekalesia a Iesu Keriso o le Au Paia o Aso e Gata Ai. E lei leva lena, ae tu’itu’i mai ni faifeautalai se toalua i lo’u faitotoa. Sa la fia faasoa mai se savali e faatatau ia Iesu Keriso. Sa ou valaauliaina i laua i totonu ma fai atu i lo’u tamā e faatasi ma i matou.

O le fesili muamua lava na fesili mai ai faifeautalai ia te au o le, “E te iloa e mafai ona faavavau aiga?”

Sa ou tali atu, “E leai, e le mafai.” Ona ou ta’u atu lea ia i la’ua mea sa ou aoaoina mai la’u faifeau. Ina ua uma le matou talanoaga, sa ou mauaina alii faifeautalai i luga o le Facebook. Sa ou matamata i vitio o i latou o faatofa atu i o latou aiga. Sa ou fia iloa pe aisea na latou tuua ai o la aiga e o mai i lo’u atunuu ma pe aisea na la talitonu ai e pei ona la talitonuina. Sa ou valaau atu i le numera o le telefoni na la’ua tuuina mai ia a’u ma fai atu, “Elders, e manaomia ona ou alu i le lua lotu i le Aso Sa.”

Mo le lua tausaga, sa ou auai i le lotu ma feiloai ma faifeautalai. Peitai, sa le’i taliaina e lo’u aiga le Ekalesia. Ina ua atoa lo’u 18, sa ou ta’u atu i lo’u aiga ua ou manao e papatiso. Sa ou taumafai e faasoa atu le talalelei ia i latou, ae sa lei saunia i latou.

Saunia e Auauna Atu se Misiona

I le 2015, sa ou faia ai sui papatisoga i le Malumalu o São Paulo Pasila. A o ou i ai iina, sa fesili mai se tamaloa ia te au pe o ou sauni e auauna atu i se misiona. Sa ou fai atu ou te faamoemoe e auauna atu i se aso. Ona ia fai mai lea, “Ou te manatu e tatau ona e saunia e auauna atu i se misiona ma tautala faaFarani.”

Sa ou mafaufau ifo ia te au lava, “FaaFarani aisea? Ou te sau mai Pasila. O le a faapefea ona ou auauna atu i se misiona e tautala faaFarani?” Ae ui i lea, ona o lena aafiaga i le malumalu, sa amata ai ona ou suesue i le faaFarani.

I ni nai masina mulimuli ane, sa ou faitauina ai le Tusi a Mamona i le faaFarani i se fale faatali pasi i São Paulo . Ina ua vaai mai le fafine i ou autafa i le faavaa o le tusi, sa amata ona ia talanoa mai ia te au i le faaFarani. Sa ou suesueina le gagana mo na o ni nai masina, ae sa ou malamalama atoatoa ia te ia!

Sa ou te’i, sa ia iloa e uiga i le Tusi a Mamona ona sa ia feiloai i faifeautalai i Pale, i le mea sa nofo ai o ia. Sa ia fesili mai ia te au le tele o fesili e uiga ia sa Nifae ma le asiasiga a le Faaola i Amerika. Ma le lē mafaamatalaina, sa mafai ona ou talanoa atu ia te ia e peiseai o ou tautala i la’u lava gagana. Sa ou tuuina atu ma le fiafia ia te ia la’u Tusi a Mamona.

I le amataga o le 2020, sa ou alu ai i Egelani e suesue le Igilisi e ala i se polokalama faafesuiai. Sa ou feiloai i se teineitiiti iina mai Moroko. O ana fesili e uiga i le mafuaaga ou te le inu ava malosi ai na taitai atu ai i se talanoaga e uiga i le Upu o le Poto, le Ekalesia, ma le Tusi a Mamona. Sa ou faaali atu ia te ia la’u Tusi a Mamona i le faaFarani, ma sa mafai ona ou toe taliina fesili e uiga i le talalelei i le faaFarani.

Sa ou iloaina e tatau i tagata ona iloa e uiga i le talalelei ma lenei tusi faapitoa i la latou lava gagana ma e mafai ona ou faaaogaina le Tusi a Mamona e avea ai ma se meafaigaluega i aao o le Atua e fesoasoani ai i isi.

Inaê Leandro (taumatau) ma se tasi o ana soa, o Sister Wongsin Elisaia, a o auauna atu i le Lotoa o le Malumalu i le Aai o Sate Leki, Iuta.

O Le Meaalofa o le Tautala i Gagana

Mulimuli ane, ina ua ou tatalaina lo’u valaauga o le misiona, sa ou iloa ai o le a ou alu i le Lotoa o le Malumalu i le Aai o Sate Leki, e tautala faaPotukale.

“E mo’i?” Sa ou mafaufau ai. “Ua iloa uma e tagata iina le Ekalesia, ma latou te le tautatala faaFarani i Iuta.”

Ina ua ou ta’u atu i lo’u aiga, sa fesili mai lo’u tama, “O le a e tuua lau galuega faafaiaoga i le aoga maualuga, lou aiga, lau galuega—mea uma—mo se misiona? O le a le tele o le a latou totogiina ai oe?” Sa faateia o ia ina ua ou fai atu ia te ia o le a ou totogia la’u lava misiona.

I le taimi muamua, ou te lei iloa pe aisea na valaauina ai au i Iuta, ae sa silafia e le Tama Faalelagi le mea e tatau ona ou i ai. I le Lotoa o le Malumalu, sa vave ona ou aoaoina afai e te iloa gagana e 10—pe na o le 2 po o le 3—e mafai ona e aoao atu i gagana uma e 10 iina. Sa matou tuuina atu ma a’u soa ni malaga maimoa i le faaSipaniolo, Potukale, ma le Igilisi i le Lotoa o le Malumalu ma i le Nofoaga Autu mo Fesoasoaniga Alofa i le Lotoa o le Uelefea. Sa matou aoao atu foi i luga o le initoneti i gagana eseese e ala i le uepisaite ComeuntoChrist.org.

Ua ou iloa le meaalofa o gagana mo a’u lava ia. A tatou maua le manao ma le naunautai e aoao se gagana, ma afai tatou te galulue malosi, e faamanuia i tatou e le Atua i ni auala faavavega e fesoasoani ia i tatou e tautatala ma malamalama ai.

tamaitai faifeautalai ma tusi o loo matala — “Pe a tatou maua le manao ma le naunautai e aoao se gagana, ma afai tatou te galulue malosi,” o le tala lea a Inaê, “e faamanuia i tatou e le Atua i auala e fesoasoani ia i tatou e tautatala ma malamalama ai.”

Ou te fiafia e faitau le Tusi a Mamona i isi gagana. O le faia o lena mea e fesoasoani ai i o’u tomai i le gagana ma tuputupu ae ai la’u molimau ma le malamalama i mataupu faavae o le talalelei.

O Aiga e Faavavau

Soo se taimi lava ou te valaau atu ai i le fale i le aso sauniuni, sa ou faasoa atu ni faamatalaga auiliili e uiga i manuia ma aafiaga o le misiona. Sa ou taulai atu i mea sa ou tutusa ai ma tagata o le aiga, ma sa latou faasoa mai a latou malaga ma mea sa tutupu i le fale. Sa latou tau mai foi ia te au le ala na latou fafagaina ai i pizza ia faifeautalai faamisiona aua sa latou faalogo i tala e uiga i tagata lelei i le Aai o Sate Leki o tausia i ma’ua ma la’u soa.

Ua 16 tausaga talu ona maliu lo’u tina. O se aso faigata lena, ae ou te iloa e mafai ona faavavau aiga. Ou te iloa o le a ou toe vaai i lo’u tina. Ou te iloa o le a ia iloaina au o lana tama teine. E toatele tagata e le o maua lenei malamalama.

O le mafuaaga lena sa ou auauna ai i se misiona. O le mafuaaga lena na ou aoaoina ai ni gagana fou. Ma o le mafuaaga lena ou te taumafai ai pea e fesoasoani i isi ia maua tali o le talalelei mo i latou lava.