E Na’o Tusiga Faatekinolosi
Toomaga i le Faapaaga ma le Atua
Mai le “Our Covenant Relationship with God: A Wellspring of Relief,” na tuuina atu i tamaiti aoga i le Iunivesite o Polika Iaga i Provo, Iuta, ISA, i le aso 24 o Oketopa, 2023.
Ua tofu outou ma le avanoa e faipaaga ai ma lo outou Tama Faalelagi ma le Faaola i ni auala loloto ma mamana e ala i la outou sootaga o le feagaiga.
E i ai le toomagai le faapaaga ma le Atua. E le o tuua na o i tatou.
Ua tofu outou ma le avanoa e faipaaga ai ma lo outou Tama Faalelagi ma le Faaola i ni auala loloto ma mamana e ala i la outou sootaga o le feagaiga. E i ai se mapusaga i le iloaina e le o tuua na o oe i ou faanoanoaga, o ou luitau, o au faaiuga, o ou le mautonu, po o ou vaivaiga. O le Atua o le Tama o o tatou agaga, e alofa ia i tatou. Ma e ala mai i Lona Alo Pele, o Iesu Keriso, ma Lana taulaga togiola, ua maua ai faamanuiaga uma e finagalo le Tama mo oe i lenei sootaga o le feagaiga.
Pe a tatou mauaina sauniga ma feagaiga i le papatisoga ma le faamauga ma i Lona fale paia, e lei uma ona tatou aoao e uiga i feagaiga ma le mana o le perisitua. E le’i uma ona tatou aoao e uiga i le Alii ma Ona ala. E le’i uma ona tatou aoao po o ai moni i tatou.
O le mauaina o sauniga ma feagaiga o le talalelei a le Faaola ua na o se amataga. E le o se aitema faalefegalegalea’iga i luga o se lisi o mea e fai ae o le amataga o se sootaga matagofie o le feagaiga. Na aoao mai Peresitene Russell M. Nelson, “O le ala o feagaiga e faatatau uma i lo tatou sootaga ma le Atua.” Faalogo i upu a le perofeta a o Ia faamatalaina lenei sootaga o le feagaiga ma le auala e finagalo ai le Atua e faamanuia oe:
“O le taimi lava tatou te osia ai se feagaiga ma le Atua, tatou te tuua ai loa lava ni eleele e le faavaea e faavavau. O le a le lafoaia e le Atua Lana sootaga ma i latou o e na faia se sootaga ma Ia. O le mea moni, o i latou uma ua osia se feagaiga ma le Atua e mafai ona maua se ituaiga o alofa ma le alofa mutimutivale faapitoa. I le gagana Eperu, o lena alofa faalefeagaiga e taua o le hesed (חֶסֶד). …
Ona ua i ai i le Atua le hesed mo latou o e ua osifeagaiga ma Ia, o le a Ia alofa ia i latou. O le a faaauau pea ona galue o Ia faatasi ma i latou ma ofo atu ia i latou avanoa e sui ai. O le a Ia faamagaloina i latou pe a latou salamo. Ma a latou se ese, o le a Ia fesoasoani ia i latou ia maua lo latou ala e toe foi atu ai ia te Ia.
“O le taimi lava e osia ai e oe ma a’u se feagaiga ma le Atua, o le a sili atu ona vavalalata lo tatou sootaga ma Ia nai lo le taimi a o lei faia a tatou feagaiga. O lenei ua fusia faatasi i tatou. Ona o la tatou feagaiga ma le Atua, o le a lē vaivai ai lava o Ia i Ana taumafaiga e fesoasoani ia i tatou, ma o le a tatou le faaumaina lava Lona onosai alofa mutimutivale ia i tatou. Ua tofu i tatou uma ma se nofoaga faapitoa i le loto o le Atua. E i ai Ona faamoemoega maualuluga mo i tatou.”
Pe mafai ona e lagonaina le alofa o le Atua mo oe i nei upu? I le avea ai ma se tuafafine e lei faaipoipo lava, o lenei sootaga alofa ma le alofa mutimutivale o feagaiga ma lo’u Tama i le Lagi ma le Faaola e i ai se nofoaga mamana i lo’u olaga ma sa avea ma o lo o avea pea ma a’u punavai aupito silisili o le toomaga ma le filemu. E aumaia ia te a’u le faamafanafanaga e le mafaamatalaina, olioli paia, ma se faamautinoaga loloto, tumau e alofagia a’u o Lona afafine ma o a’u o se tasi o Lona aiga e faavavau. Ou te iloa e silafia a’u e Ia ma e malamalama atoatoa ia te a’u.
Po o le a lava lo tatou tulaga faalefaaipoipoga po o le talaaga, e finagalo le Alii ia i tatou e faipaaga ma Ia i se ala mamana—ia “tasi” (3 Nifae 19:23ma Ia i “a [tatou] mea uma e fai” (Alema 37:37). E le manaomia ona tatou faatautaia na o i tatou lenei olaga, ma e le o se mea e tatau ona tatou faafoeina. E mafai ona tatou filifili e maua le toomaga i le faipaaga ma le Alii e ala i a tatou feagaiga.
I le konafesi aoao o Aperila 2023, na saunoa Peresitene Camille N. Johnson: “Uso e ma tuagane, e le mafai ona ou faia na o a’u, ma ou te le tau faia na o a’u, ma o le a ou le faia lava. O le filifili ia noatia i lo’u Faaola, o Iesu Keriso, e ala i feagaiga na ou osia ma le Atua, ‘Ou te mafaia mea uma lava i le faamalosi mai o Keriso ia te au’ [Filipi 4:13].”
O Iesu Keriso o loo i le totonugalemu o a [tatou] feagaiga.” E na o Ia lava ma Lana taulaga e mafai ai ona tatou osia feagaiga ma le Atua. Na mafai mea uma ina ua faatoilaloina e le Faaola mea e le mafai ona fai. O Ia o “le Atua o vavega,” o se Atua o le alofa (Mamona 9:11; tagai foi i fuaiupu 11–21). Ma o loo faaauau pea ona tuputupu ae lo’u alofa mo Ia i aso taitasi.
Pe a tatou lagonaina Lona alofa ma tali atu i lena alofa e ala i le filifilia o Ia i aso taitasi, o le a faaitiitia le talalelei e uiga i lisi e siaki ae sili atu ona faatatau i le alofa ma le manao. O lenei mea e mafai ai ona tuputupu ae a’a moni o le talalelei i totonu o i tatou taitoatasi, ma aumaia ai ia i tatou le tausiga tumau ma le olioli. O lenei “alofa faalefeagaiga” e fesoasoani ia i tatou e tumau ai pe a le lava tiute po o lisi o mea e fai.
O faamanuiaga uma o le Togiola alofa mutimutivale a Iesu Keriso ua folafola mai e ala i lau sootaga o le feagaiga ma le Atua. Ia talia o Ia i Ona manaoga e faamanuia oe! Ia faaalu lena sootaga, taumafai e tausia au feagaiga, saili ia salamo soo, faaalu se taimi faatasi ma le Alii, aoao e uiga ia te Ia, ma alofa ia te Ia ma lou loto atoa. E leai se isi mea e sili atu ona faamalieina pe anoa nai lo le “iloa o oe le Atua moni e toatasi, ma Iesu Keriso, o lē na e auina mai“ (Ioane 17:3).