O Se Ata, o se Tusi, ma se Papatisoga

Saunia e Brenda Hosaflook Wells, West Virginia, ISA

Ou te faafetai i se faatinoga laitiiti na faia ai se eseesega tele.

E le itiiti ifo ma le faatasi i le tausaga, e asiasi mai ai se sui o le siosiomaga i la matou aoga faaitumalo. O le mea masani, o le tagata asiasi e agalelei ma e masani ona faia ni talanoaga pupuu. Na faapena le tulaga na i ai Ryan Pethtel. Sa matauina e Ryan ata o lo’u aiga i lo’u ofisa, o lea i le taimi o asiasiga taitasi sa ma’ua faafesuiaia ai tala faaleaiga.

I se tasi o asiasiga, sa matauina ai e Ryan se ata fou o le faaipoipoga a lo’u atalii ma lona toalua i le Malumalu o Uosigitone D.C. Sa liliu atu le ma talanoaga i le malumalu, le talalelei a Iesu Keriso, ma le Tusi a Mamona.

“Sa ma sailia ma lo’u toalua se lotu,” o lana tala lea. “Ou te faamoemoe e tuuina atu i la’u fanau mea ua e tuuina atu i lau fanau.”

I le sauniuniga mo le asiasiga na sosoo ai a Ryan, sa ou tusia ai lau molimau i totonu o se kopi o le Tusi a Mamona ma ave i lo’u ofisa. Ae o le tausaga na sosoo ai na oo mai ai se isi tagata asiasi o le siosiomaga. Sa le toe faigaluega Ryan mo le matagaluega. Sa lofituina lo’u loto, ae sa ou teuina le tusi i lo’u ofisa ina nei ou lagonaina le uunaiga e tuuina atu i se isi tagata.

Peitai, i se tausaga mulimuli ane, sa ou maua ai se imeli mai ia Ryan e faatulaga ai se asiasiga. Sa toe foi o ia i lana galuega tuai. Ina ua ia taunuu, na iu lava ina sii atu le ma talanoaga i le Ekalesia. Ina ua ou tuuina atu ia Ryan le kopi o le Tusi a Mamona, sa ia susueina ma le fiafia le tusi.

I ni nai masina mulimuli ane, sa ou faatasi atu ai ma lo’u toalua, o Bill, i se tofiga a fautua maualuga e lauga i Mannington, Virginia i Sisifo—o le nuu o Ryan. Mulimuli ane, sa fesili mai se tuafafine i le falesa pe ou te iloaina Ryan ma pe na ou tuuina atu ia te ia se Tusi a Mamona. O ia o le faletua o Ryan, o Stephanie.

Fai mai Stephanie sa la fuafua ma Ryan e papatiso i le po na muamua atu, ae sa ma’i Ryan. O se faamanuiaga e le’i iloa! Sa mafai ona ma auai ma Bill i le la papatisoga na toe faatulaga i le tolu vaiaso mulimuli ane. I lo la papatisoga, sa ta’ua ai e Ryan o le Tusi a Mamona sa ou tuuina atu ia te ia sa le’i loteina seia oo ina faafesootai e lona toalua ia faifeautalai.

O la’u vaega i lo laua liliuga na amata i le tuuina o se ata o le malumalu i lo’u ofisa. O le ata na taitaiina atu ai i se talanoaga. O le talanoaga na taitai atu ai i le Tusi a Mamona.

O faatinoga taitasi sa laiti, ae sa maoae le taunuuga (tagai i le Mataupu Faavae ma Feagaiga 64:33). E tumu lo’u loto i le faafetai ona o a’u faatinoga laiti na faia ai se eseesega tele ma taitai atu ai se tasi i le Faaola.