“Faamanuiaina ona o Lo’u Faamaoni,” Liahona, Aok. 2024.
O Leo o le Au Paia o Aso e Gata Ai
Faamanuiaina ona o Lo’u Faamaoni
Sa faaosoosoina au e tuu ma au se tupe faaopoopo, ae sa ou manatuaina le fautuaga mai lo’u epikopo.
Ata na tusia e Allen Garns
I le 2012, sa ou le toe faigaluega ai. O a’u taumafaiga e saili se galuega na faamaonia le le manuia. Mulimuli ane, sa tatau ona ou aapa atu mo se nonogatupe pe tusa o le $28 i le tupe Nigeria e taulima ai ou manaoga faaletino.
Na auina atu le aofaiga i la’u teugatupe i se faletupe i le lotoifale. O le taimi lava na ou maua ai se faasilasilaga o le fesiitaiga, sa ou alu ai loa i le faletupe. Sa ou faatumuina se pepa a le faletupe ma tuuina atu i le kesia. Sa siaki e le kesia ia faamatalaga o le fesiitaiga i luga o lana komepiuta ma fai mai ma le faaaloalo ia te au ou te nofo i se nofoa.
Pe tusa ma le lima minute mulimuli ane, sa ia valaau mai ai ia te au ma faaaoga se masini faitau tupe e faitau ai la’u tupe. Ona ia tuuina mai lea ia te au le $280—e le o le $28! I le le mautonu, sa ou tu ai mo se minute ma le tele o mafaufauga sa taufetuli mai i lo’u mafaufau.
O le iloaina o lo’u faatuai, na fai mai ai le kesia, “E tatau ona ou auauna atu i se isi tagata faatau i le taimi nei.” Ma le ataata, sa ou fai atu ai, “Ua ova mai ia te au le $252.” Ona ou tuuina atu lea o le tupe ova.
Sa matua faafetai tele o ia. Sa ia faamatala mai pe ana ou alu ma le tupe, o le aofaiga faaopoopo na ia tuuina mai ia te au o le a toe totogi atu mai i lona lava totogi.
Sa ou faatofa atu ia te ia, ae ina ua ou tuua le faletupe, sa oo mai se manatu i lo’u mafaufau: “O oe o se vale saupa’u lava. O le tupe na e toe faafoi atu e mafai ona fesoasoani ia te oe e totogi ai nisi o au pili e lei totogia.”
Ona ou manatuaina lea o fautuaga mai lo’u epikopo. Sa ia fai mai, “Soo se taimi lava e lu’iina ai pe faaosoosoina ai oe, usu ni viiga e sili ona e fiafia i ai.” O lea sa amata ai ona ou usuina le “Faaola o Isaraelu,” “Viia Le na Fetaia’i ma Ieova,” ma le “O Au o se Atalii o le Atua.”
I ni nai vaiaso mulimuli ane, sa ou maua ai se tusi mai se faalapotopotoga sa fai ai so’u faatalanoaga i le tolu masina muamua talu ai i le tulaga o le ofisa o le faleteuoloa. Sa latou filifili e faafaigaluega a’u. Mai le galuega fou, sa mafai ai ona ou totogia a’u pili e lei totogiina ma taulimaina ou manaoga faaletino.
Na fetalai Iesu, “O le faamaoni i le mea itiiti e faamaoni foi o ia i mea e tele, o le amioletonu i le mea itiiti, e amioletonu foi o ia i mea e tele” (Luka 16:10). Ou te molimau atu o le finafinau, faatuatua i le Alii o Iesu Keriso, ma le amiosa’o e agavaa ai i tatou e maua le anoanoai o faamanuiaga.